Ayezaya 44:1-28
44 “O me sonvolɛ Gyekɔbo, akee tie,Yɛɛ wɔmɔ Yizilayɛ mɔɔ mekpa wɔ la.+
2 Edwɛkɛ mɔɔ Gyihova,Wɔ Bɔvolɛ ne nee Ahenle mɔɔ nwonle wɔ,+Na yeboa wɔ ɔvi mekɛ mɔɔ ɛla ɛkolɛ nu* la ɛha la ɛne:
‘Mmasulo, me sonvolɛ Gyekɔbo,+Yɛɛ wɔmɔ Gyɛhyelan*+ mɔɔ mekpa wɔ la.
3 Ɔluakɛ mebamaa mɔɔ nzuhɔne ɛlɛku ye la anyia nzule anlo+Na meamaa azudenle aze azɛlɛ resee zo.
Mebawola me sunsum meagua ɛ mra anwo zo+Na meayila ɛ bo zo amra.
4 Na bɛbafifi kɛ ndile amolɛ,+Kɛ pɔpola mbaka mɔɔ gyigyi azudenle nloa la.
5 Ko baha kɛ: “Mele Gyihova ɛdeɛ.”+
Ko noko bava Gyekɔbo duma avɛlɛ ɔ nwo,Yɛɛ bieko noko bahɛlɛ ɔ sa anwo kɛ: “Gyihova ɛdeɛ ɔ.”
Na ɔbava Yizilayɛ duma yeado ɔ nwo zo.’
6 Edwɛkɛ mɔɔ Gyihova,Yizilayɛ Belemgbunli+ nee ye Kpɔnevolɛ,+ ɛlɔne Gyihova ɛha la ɛne:
‘Medame a mele alimoa ne nee awieleɛ ne a.+
Ɛye me a Nyamenle biala ɛnle ɛkɛ.+
7 Nwane a le kɛ medame a?+
Maa ɔdea nu ɔha na ɔli nwolɛ daselɛ ɔhile me!+
Ɔvi mekɛ mɔɔ membɔle tete amra la,Maa bɛha ninyɛne mɔɔ baraNee mɔɔ bɔ zo mɔɔ bazi la.
8 MmasuloYɛɛ mmamaa wɔ ahonle tu.+
Asoo meanlimoa meanga meangile bɛ nuhua ko biala yɛɛ meambɔ ye nolo ɔ?
Bɛle me alasevolɛ.+
Asoo ɛye me a Nyamenle bieko wɔ ɛkɛ ɔ?
Kyɛkyɛ, Bodane+ bieko ɛnle ɛkɛ; menze biala.’”
9 Menli kɔsɔɔti mɔɔ se ananze la ɛyɛ mgbane,Yɛɛ nvasoɛ ɛnle bɛ ninyɛne ne mɔ mɔɔ bɛ nye die nwo la azo.+
Bɛ alasevolɛ ɛhye mɔ ɛnnwu ɛhwee yɛɛ bɛnze ɛhwee,+Yemɔti menli mɔɔ yɛle bɛ la babɔ anyiemgba.+
10 Nwane a kɛyɛ nyamenle anzɛɛ ɔkɛgua bulalɛ ananzeMɔɔ ɔnnyia nvasoɛ biala wɔ zo a?+
11 Nea! Ɔ gɔnwo mɔ kɔsɔɔti anyunlu bagua aze!+
Dwinvolɛma ne le menli ala.
Bɛmaa bɛ muala bɛboɔboa bɛ nloa na bɛgyinla ɛkɛ.
Bɛ ahonle badu na bɛ muala bɛ nyunlu agua aze.
12 Mbulalɛ dwinvolɛ ne fa bulalɛ wula senle nu na ɔyɛ nwolɛ gyima.
Ɔfa ɔ sa mɔɔ anwosesebɛ wɔ nu la ɔsɔ hamenle nuƆyɛ nwolɛ gyima na ɔsiezie ye.+
Akee ɛhɔne ku ye na ye anwosesebɛ wie;Ɔnno nzule yemɔti ɔwie fɛ.
13 Kapentanli twe ɛzuzunyɛma, na ɔfa twɔko kɔkɔlɛ ɔkɛlɛhɛlɛ baka nwo.
Ɔfa bulalɛ ɔtwɔlɔhwɔlɔ baka ne anwo na ɔfa debie* ɔkɛlɛhɛlɛ zolɛ.
Ɔyɛ ɔmaa ɔsɔho sonla,+Ɔmaa ɔ nwo yɛ fɛ kɛ sonla la,Kɛ bɛva bɛzie sua nu.+
14 Sonla ne bie gyima a le kɛ ɔbapɛ sida mbaka.
Ɔkpondɛ baka bie, oku baka,Na ɔmaa ɔnyi ɔyɛ baka ɛsesebɛ wɔ kpɔkɛ nu.+
Ɔdua lɔɔle baka na ezule tɔ gua zo maa ɔnyi.
15 Akee ɔyɛ ɛyɛne ɔmaa sonla fa wuda senle.
Ɔfa foa ko ɔbɔ ɔ nwo wuluwulu;Ɔwuda senle na ɔto paano.
Noko eza ɔfa bie ɔyɛ nyamenle na ɔsonle ye.
Ɔfa bie ɔse ananze na ɔbɔ ɔ ti aze ɔmaa ye.+
16 Ɔfa foa ko ɔwuda senle;Ɔfa bie ɔtondo nane ɔdi na ɔ ko yi.
Eza ɔbɔ ɔ nwo wuluwulu na ɔka kɛ:
“Aa! Senle ne mɔɔ menwu ye la ɛmaa me nwo ɛyɛ me wuluwulu.”
17 Noko ɔfa mɔɔ ɛha la ɔyɛ nyamenle, ɔfa ɔse ananze.
Ɔbɔ ɔ ti aze ɔmaa ye na ɔsonle ye.
Ɔyɛ asɔne wɔ ɔ nyunlu na ɔka kɛ:
“Die me, ɔluakɛ ɛle me nyamenle.”+
18 Bɛnze ɛhwee, bɛnde debie biala abo,+Ɔluakɛ bɛheda bɛ nye yɛɛ bɛnnwu debie.Nwunu biala ɛnle bɛ ahonle nu.
19 Biala ɛndwenle nwo wɔ ye ahonle nuYɛɛ ɔnnwu nrɛlɛbɛ anzɛɛ ɔnnyia ndelebɛbo kɛ:
“Meva foa ko mewuda senle,Yɛɛ medo paano na medondo nane wɔ ye samɛnlakɛ ne azo meli.
Asoo ɔwɔ kɛ akee mefa mɔɔ ɛha la meyɛ kyibadeɛ ɔ?+
Asoo ɔwɔ kɛ mesonle baka sinli* ɔ?”
20 Ɔdi nzonle.
Ye ahonle ɛbɛlɛbɛla ye ɛmaa yeminli.
Ɔngola ɔnlie ɔ nwo* yɛɛ ɔnga kɛ:
“Asoo tɛ adalɛ debie a wɔ me sa fema ne anu la?”
21 “O Gyekɔbo, kakye ninyɛne ɛhye mɔ, yɛɛ wɔmɔ Yizilayɛ,Ɔluakɛ ɛle me sonvolɛ.
Medame a menwonle wɔ a, yɛɛ ɛle me sonvolɛ.+
O Yizilayɛ, me rɛle ɛnrɛvi wɔ.+
22 Mebakyikyi wɔ mɛladonlɛ ne mɔ+ kɛ asɛɛ meva amungu meheda zo laNa meakyikyi wɔ ɛtane ne mɔ kɛ asɛɛ meva amungu kisii meheda zo la.
Sia bɛla me ɛkɛ, ɔluakɛ mebakpɔne wɔ.+
23 Anwuma, bɛva fɛlɛkolilɛ bɛdea nu,Ɔluakɛ Gyihova ɛyɛ debie!
Azɛlɛ ye azo ahuma, bɛdea nu wɔ konimlilɛ nu!
Awoka, bɛva fɛlɛkolilɛ bɛdea nu,+Kpɔkɛ nee nuhua mbaka kɔsɔɔti!
Ɔluakɛ Gyihova ɛkpɔne Gyekɔbo,Yela ye anyunlunyia ne ali wɔ Yizilayɛ anwo zo.”+
24 Edwɛkɛ mɔɔ Gyihova, wɔ Kpɔnevolɛ ne,+Mɔɔ nwonle wɔ sumunli mekɛ mɔɔ ɛla ɛkolɛ nu la ɛha la ɛne:
“Medame a mele Gyihova mɔɔ bɔle debie biala a.
Me ngome a menzanle anwuma anu,+Na mendɛlɛle azɛlɛ ne anu a.+
Ɛnee nwane a boka me nwo a?
25 Medame a mesɛkye adalɛ ngapezoma* sɛkɛlɛneɛ ne mɔ,Na memaa menli mɔɔ ka kenle bie edwɛkɛ la yɛ ahoasea a;+Memaa nrɛlɛbɛvolɛma anye zo ta bɛNa bɛ nrɛlɛbɛ ne yɛ ngoaseasɛm.+
26 Medame a memaa me sonvolɛ edwɛkɛ yɛ nɔhalɛNa memaa me soanvolɛma ngapezo ba nu a;+Meka Gyɛlusalɛm anwo edwɛkɛ kɛ, ‘Bɛbadɛnla zolɛ,’+
Nee Dwuda azuamgbole anwo edwɛkɛ kɛ, ‘Bɛbakyekye bɛ bieko,+Na meayɛ ye azua mɔɔ ɛzɛkye la boɛ.’+
27 Medame a meka mekile azule kpole ne kɛ, ‘We resee,Na mebamaa wɔ azule ne mɔ asesa.’+
28 Medame a meka Saelɛse+ anwo edwɛkɛ kɛ, ‘Ɔle me mboaneneavolɛ,Na ɔbayɛ me ɛhulolɛdeɛ bɔkɔɔ.’+Meka Gyɛlusalɛm anwo edwɛkɛ kɛ, ‘Bɛbakyekye ye bieko,’
Na meka ɛzonlenlɛsua ne anwo edwɛkɛ kɛ, ‘Bɛbado wɔ adiabo ne.’”+
Ɔbodwɛkɛ
^ Anzɛɛ “ɔvi awolɛ nu.”
^ Ɔ bo kile “Tenlenenli,” amodinli mɔɔ bɛfa bɛfɛlɛ Yizilayɛ.
^ Anzɛɛ “kɔmpase.”
^ Anzɛɛ “baka wulera.”
^ Anzɛɛ “ye ɛkɛla.”
^ Hibulu aneɛ nu, “menli mɔɔ ka edwɛkɛ mɔɔ nvasoɛ ɛnle zo la.”
