Ayezaya 66:1-24
66 Edwɛkɛ mɔɔ Gyihova ɛha la ɛne:
“Anwuma le me belemgbunli ebia, yɛɛ azɛlɛ ye le me gyakɛ abo ebia.+
Ɛnee nienwu a bɛbahola bɛazi sua bɛamaa me a,+Yɛɛ nienwu a me ɛnwomenlelielɛ ɛleka ne wɔ a?”+
2 “Me sa a yɛle ninyɛne ɛhye mɔ amuala a,Yɛɛ kɛ ɔyɛle mɔɔ bɛ muala bɛrale la ɛne,” kɛ Gyihova se la ɛne.+
“Noko mebanlea sonla mɔɔ le bɛlɛvo na ɔ nwo ɛbubu yeNa ɔdwenledwenle me edwɛkɛ ne anwo la.+
3 Sonla mɔɔ ku ɛnlankɛ la le kɛ awie mɔɔ ku sonla la.+
Sonla mɔɔ fa boane bɔ afɔle la le kɛ awie mɔɔ bu twea kɔme la.+
Sonla mɔɔ fa ahyɛlɛdeɛ bɔ afɔle la le kɛ awie mɔɔ fa kpolike mogya bɔ afɔle la!+
Sonla mɔɔ fa ɛyɛlɛvuanlɛ bɔ ngakyelɛ afɔle la+ le kɛ awie mɔɔ fa ngonyia edwɛkɛ yila awie la.*+
Bɛva bɛ adenle ɛdeɛ zo,Yɛɛ bɛ nye die* mɔɔ le kyibadeɛ la anwo.
4 Ɔti mebakpondɛ ndenle mealua zo meahwe bɛ nzo,+Na ninyɛne mɔɔ bɛsulo la bara bɛ nwo zo.
Ɔluakɛ menvɛlɛle la, awie biala anlie zolɛ;Mendendɛle la, awie biala andie.+
Bɛhɔle zo bɛyɛle mɔɔ le ɛtane wɔ me nye zo la,Na bɛyɛle mɔɔ me nye ɛnlie nwolɛ la.”+
5 Bɛdie Gyihova edwɛkɛ, bɛmɛ mɔɔ bɛ nwo woso bɛ wɔ* ye edwɛkɛ ne anwo la:
“Bɛ mediema mɔɔ kpɔ bɛ na bɛkpo bɛ ɔlua me duma ne ati la hanle kɛ, ‘Anyunlunyia ɛha Gyihova!’+
Noko ɔbara na yeamaa bɛ nye alie,Na bɛmɛ a bɛ nyunlu bagua aze a.”+
6 Dede bie wɔ suakpole ne azo, dede bie vi ɛzonlenlɛsua ne anu!
Gyihova ane ɔ, ɔlɛtua ye agbɔvolɛ kakɛ kɛ mɔɔ ɔfɛta la.
7 Kolaa na ɔ ko aha ye la, ɔwole.+
Kolaa na yeade awolɛ nyane la, ɔwole ralɛ nrenyia.
8 Nwane a ɛde debie zɛhae bie ɛlɛ a?
Nwane a ɛnwu debie zɛhae bie ɛlɛ a?
Asoo bɛwo azɛlɛ kenle ko ala anu?
Anzɛɛ bɛwo maanle bie arɛlevilɛ nu ɔ?
Noko Zayɔn vole awolɛ zo ala la, ɔwole ɔ mra mrenyia ne mɔ.
9 “Asoo mebamaa awie avo awolɛ zo na akee menrɛmaa kakula ne ɛnrɛra ɔ?” Gyihova a se a.
“Anzɛɛ mebamaa awie ako aha ye na meadua ye awodeɛ ne anloa ɔ?” wɔ Nyamenle ne a se a.
10 Bɛmɛ mɔɔ bɛkulo Gyɛlusalɛm la kɔsɔɔti, bɛ nee ye ɛli fɛlɛko na bɛmaa bɛ nye ɛlie ɔ nwo.+
Bɛmɛ mɔɔ bɛlɛdi ɔ nwo nyane la kɔsɔɔti, bɛ nee ye ɛli fɛlɛko.
11 Ɔluakɛ bɛbanlo ɔ nyɛfo bɛ ko ayi na bɛ rɛle akyekye,Bɛbanlo ye dɔɔnwo na bɛ nye alie wɔ ye anyunlunyia dɔɔnwo ne anu.
12 Ɔluakɛ edwɛkɛ mɔɔ Gyihova ɛha la ɛne:
“Mebamaa ye anzodwolɛ ayɛ kɛ azule+Na maanle maanle ne mɔ anyunlunyia ayɛ kɛ azule mɔɔ ɛyi la.+
Bɛbanlo nyɛfonlɛ na bɛavia bɛ wɔ bɛ nzi,Yɛɛ bɛbadedɛ bɛ wɔ bɛ gyakɛ azo.
13 Kɛ mɔɔ mame kyekye ɔ ra nrenyia arɛle la,Zɔhane ala a mebahɔ zo meakyekye bɛ rɛle a;+Na mebakyekye bɛ rɛle wɔ Gyɛlusalɛm ati.+
14 Bɛbanwu ɛhye na bɛ ahonle ali fɛlɛko,Bɛ mbowule bayɛ ngɛnlɛma kɛ ndile amolɛ.
Na Gyihova azonvolɛ banwu ɔ sa,*Noko ɔbava ye agbɔvolɛ anwo ɛya.”+
15 “Ɔluakɛ Gyihova bara kɛ senle,+Na ye ehwili ne mɔ ara kɛ ahumu,+Kɛ ɔfa ɛya kpole yeadua bɛ kakɛ,Na yeava sendɔlɔra yeadea bɛ.+
16 Ɔluakɛ Gyihova bava senle abua ndɛne,Ɛhɛe, ye konle dadeɛ ne bahu menli* kɔsɔɔti;Na menli mɔɔ Gyihova bahu bɛ la bazo kpalɛ.
17 “Menli mɔɔ siezie bɛ nwo na bɛte bɛ nwo kɛ bɛwolo tola ne mɔ* anu+ bɛali ahenle mɔɔ gyi avinli la anzi, menli mɔɔ di kpolike nane+ nee bɛkyi ninyɛne yɛɛ ahila+ la amuala bara bɛ awieleɛ,” kɛ Gyihova se la ɛne.
18 “Kɛmɔ meze bɛ gyima nee bɛ adwenle la ati, melɛba mearaboɔboa maanle maanle nee aneɛ aneɛ kɔsɔɔti anloa, na bɛbara bɛaranwu me anyunlunyia ne.”
19 “Mebava sɛkɛlɛneɛ bie meazie bɛ avinli, na mebazoa menli mɔɔ bɛbanyia bɛ ti la bie mɔ wɔ maanle maanle ne mɔ anu—bɛbahɔ Tahyehye,+ Polu nee Lude+ mɔɔ bɛze ɛda to kpalɛ la ɛkɛ. Eza bɛbahɔ Tubale nee Gyeevan+ yɛɛ mbɔra mɔɔ wɔ moamoa la azo—bɛdabɛ mɔɔ bɛtɛtele me nwo edwɛkɛ anzɛɛ bɛtɛnwunle me anyunlunyia ne la ɛkɛ; na bɛbabɔ me anyunlunyia ne nolo wɔ maanle maanle ne mɔ anu.+
20 Bɛbava ɛ mediema ne mɔ amuala bɛavi maanle maanle ne mɔ anu+ bɛarɛlɛ Gyihova kɛ ahyɛlɛdeɛ; bɛbadɛnla mgbɔnwɔ zo, ehwili nu, ehwili mɔɔ mgbɔnwɔ twe la anu, mgbɔnwɔndua* zo yɛɛ afunlumu mɔɔ anwo yɛ ndɛ la azo, bɛahɔ me boka nwuanzanwuanza ne azo wɔ Gyɛlusalɛm, kɛ mɔɔ Yizilayɛma fa bɛ ahyɛlɛdeɛ to kyɛnze anu bɔkɔbɔkɔ nu kɔ Gyihova sua ne anu la,” Gyihova a se a.
21 “Mebaye bɛ nuhua bie mɔ meayɛ bɛ ɛsɔfoma nee Livaema,” Gyihova a se a.
22 “Kɛ mɔɔ anwuma fofolɛ ne nee azɛlɛ fofolɛ ne+ mɔɔ melɛbɔ la bagyinla me nyunlu dahuu la, zɔhane ala a ɛ bo zo amra nee wɔ duma bagyinla a,”+ Gyihova a se a.
23 “Na siane fofolɛ biala nee ɛnwomenlelielɛ kenle biala,Menli* kɔsɔɔti barabɔ bɛ ti aze amaa* me,”+ Gyihova a se a.
24 “Na bɛbavinde bɛahɔnlea menli mɔɔ dele me nwo atua la avunli;Ɔluakɛ bɛ nwo azone ne mɔ ɛnrɛwu,Yɛɛ bɛ senle ne ɛnrɛnlu,+Na bɛbayɛ kyibadeɛ bɛamaa menli* kɔsɔɔti.”
Ɔbodwɛkɛ
^ Anzɛɛ ɔkola ɔkile, “awie mɔɔ ye ananze ayɛlɛ la.”
^ Anzɛɛ “bɛ ɛkɛla anye die.”
^ Anzɛɛ “bɛdwenledwenle.”
^ Anzɛɛ “ye tumi.”
^ Hibulu aneɛ nu, “nwonane.”
^ Ɛhye kile, tola titili bie mɔ mɔɔ bɛsonle awozonle wɔ nu la.
^ Asoaso nyinli nee ɛkpɔnwɔ belɛ a wole ye a.
^ Hibulu aneɛ nu, “Nwonane.”
^ Anzɛɛ “barazonle.”
^ Hibulu aneɛ nu, “nwonane.”
