Dwuudu Kɛlata Ne 1:1-25
1 Dwuudu, Gyisɛse Kelaese akɛlɛ mɔɔ le Gyemise+ adiema la ɛlɛkɛlɛ ahɔmaa bɛdabɛ mɔɔ bɛvɛlɛ bɛ+ mɔɔ Nyamenle Selɛ ne kulo bɛ na bɛva bɛ bɛzie bɛmaa Gyisɛse Kelaese la:+
2 Anwunvɔnezelɛ nee anzodwolɛ nee ɛlɔlɛ ɛyi bɛ tɛkɛɛ.
3 Alɔvolɛ, ɛnee melɛbɔ mɔdenle biala kɛ mekɛlɛ bɛ wɔ ngoanelielɛ ne mɔɔ wɔ ɛkɛ maa yɛ muala la anwo ɛdeɛ,+ noko menwunle kɛ ɔhyia kɛ mekɛlɛ bɛ na metu bɛ folɛ kɛ bɛho ɛsesebɛ bɛmaa diedi ne+ mɔɔ bɛvale bɛmaanle nwuanzanwuanzama ne kokye la.
4 Deɛmɔti melɛkɛlɛ bɛ la a le kɛ, menli bie mɔ ɛwua bɛ nwo ɛravea bɛ avinli mɔɔ ɔvi tete ne bɛluale Ngɛlɛlera ne azo bɛhanle bɛdole ɛkɛ ne kɛ bɛbanyia ndɛnebualɛ ɛhye la; bɛle amumuyɛma mɔɔ bɛkakyi yɛ Nyamenle ɛlolɛ kpole ne bɛfa bɛyɛ nyelebɛnloa bɛbɔ anyiemgba ɛbɛla*+ na bɛkpo yɛ menle nee yɛ Awulae kokye ne, Gyisɛse Kelaese la.+
5 Bɛze ɛhye mɔ bɔkɔɔ ɛdeɛ, noko mekulo kɛ mekakye bɛ kɛ Gyihova* liele menli bie vile Yigyibiti azɛlɛ zo la,+ nzinlii eza ɔzɛkyele bɛdabɛ mɔɔ bɛnlɛ diedi la.+
6 Na anwumabɔvolɛma ne mɔ mɔɔ bɛandɛnla ɛleka mɔɔ ɛnee bɛde wɔ mɔlebɛbo ne na bɛkpole bɛ tɛnlabelɛ ne mɔɔ fɛta la,+ yegua bɛ kyeenyi na yeva bɛ yezie awozinli kabikabi nu dahuu yemaa kenle kpole ne anu ndɛnebualɛ ne.+
7 Zɔhane ala noko a Sodɔm nee Gomɔla yɛɛ azua mɔɔ zuozua bɛ la vale bɛ nwo wulale adwɔmane ɛbɛla* kpole nu na bɛlile nwonane nu atiakunluwɔzo mɔɔ ɛnle ye adenle zo la anzi a;+ bɛvale senle mɔɔ ɛnnu ɛlɛ la bɛhwenle bɛ nzo bɛva bɛyɛ kɔkɔbɔlɛ nwo neazo bɛmaa yɛ.+
8 Noko menli ɛhye mɔ ka ɛlalɛ ala la, bɛgua nwonane ne anwo evinli, bɛmbu tumililɛ yɛɛ bɛtendɛ bɛtia anyunlunyiama.+
9 Noko mekɛ mɔɔ anwumabɔvolɛ kpanyinli+ Maekeɛle+ nee Abɔnsam ɛlɛsu Mosisi funli ne anwo kpolera la,+ yeanzi ye ahonle yeanga edwɛkɛ ɛtane yeambua ye ndɛne,+ emomu ɔhanle kɛ: “Gyihova* ɛdea wɔ.”+
10 Noko menli ɛhye mɔ ka debie biala mɔɔ bɛnde ɔ bo la anwo edwɛkɛ ɛtane.+ Na debie biala mɔɔ bɛfa bɛ nane adwenle ne bɛte ɔ bo la,+ nuhua a bɛkɔ zo bɛsɛkye bɛ nwo a.
11 Bɛ gyakɔ, ɔluakɛ bɛva Keen+ adenle zo yɛɛ ahatualɛ ti bɛpele bɛ nwo bɛva Beelam+ adenle ɛtane ne azo, yɛɛ bɛminli bɛ bo zo wɔ Kɔla+ atuadelɛ ɛdendɛlɛ ne anu!+
12 Ɛhye mɔ le awolɛ mɔɔ vea azule bo wɔ bɛ ɛlɔlɛ aleɛlilɛ bo+ wɔ mekɛ mɔɔ bɛ nee bɛ ɛlɛdi debie la, mboaneneavolɛma mɔɔ bɛ ko ala a bɛdwenle nwo mɔɔ bɛnzulo debie a;+ amungu mɔɔ nzule ɛnle nu mɔɔ anwoma bɔ ye kɔ ba,+ mbaka mɔɔ ɛnzo ma wɔ bokile nu, bɛwu bɔkɔɔ na bɛdudu bɛ nee bɛ bo ndinli ne mɔ;
13 nyevile azɛlɛkye mgbole mɔɔ bɛ awubue da bɛ anyiemgba ali;+ nwɔlɔra mɔɔ kpɔsa ala, mɔɔ awozinli kabikabi a wɔ ɛkɛ ne maa bɛ dahuu la.+
14 Ɛhɛe, Yinɔko+ mɔɔ tɔ Adam anwo zo nsuu wɔ awolɛndoazo nu la noko hanle bɛ nwo edwɛkɛ dole ɛkɛ ne wɔ mekɛ mɔɔ ɔhanle ɛhye la: “Nea! Gyihova* nee ye nwuanzanwuanzama apenle apenle* rale+
15 kɛ ɔbabua bɛ muala ndɛne+ na yeabua amumuyɛma kɔsɔɔti fɔlɛ wɔ bɛ ninyɛndane ne mɔɔ bɛdua amumuyɛ adenle zo bɛyɛ, nee ninyɛne mɔɔ yɛ azibɛnwo mɔɔ ɛtanevolɛma amumuyɛma ɛha ɛtia ye la amuala anwo.”+
16 Menli ɛhye mɔ tendɛ bɛ nzo abo,+ bɛ kunlu ɛndwo bɛ nwo ɛlɛ, bɛdi bɛ atiakunluwɔzo nzi,+ na bɛfa bɛ nloa bɛka edwɛkɛ mgbole bɛtu bɛ nloa anu, mekɛ mɔɔ bɛlɛdɛfɛdɛfɛ awie mɔ* wɔ bɛdabɛ bɛ boɛyɛlɛ ti la.+
17 Alɔvolɛ, bɛmɛ, bɛhakye edwɛkɛ ne mɔɔ yɛ Awulae Gyisɛse Kelaese ɛzoanvolɛ ne mɔ hanle dole ɛkɛ ne la,
18 kɛ mɔɔ ɛnee bɛta bɛka bɛkile bɛ la: “Mekɛ ne mɔɔ li awieleɛ la anu, agolobɛnwoma mɔɔ bɛdi bɛ atiakunluwɔzo ɛtane nzi la bara.”+
19 Ɛhye mɔ a le bɛdabɛ mɔɔ bɛfa mgbakyemgbakyenu bɛba la,+ bɛle nwonane nu menli, Nyamenle sunsum ne ɛngile bɛ adenle.
20 Noko bɛmɛ, alɔvolɛ, bɛnyi wɔ bɛ diedi nwuanzanwuanza ne anu, na bɛlua sunsum nwuanzanwuanza ne azo bɛyɛ asɔne,+
21 amaa bɛava bɛ nwo bɛazie Nyamenle ɛlɔlɛ ne anu,+ wɔ mekɛ mɔɔ bɛlɛkendɛ yɛ Awulae Gyisɛse Kelaese anwunvɔnezelɛ ne mɔɔ bahɔwie dahuu ngoane nu la.+
22 Bieko, bɛhɔ zo bɛze menli mɔɔ bɛ adwenle nu yɛ bɛ kesee la anwunvɔne;+
23 bɛhwe bɛ bɛvi senle ne anu bɛlie bɛ ngoane.+ Noko bɛhɔ zo bɛze awie mɔ anwunvɔne, bɛva ɛzulolɛ bɛyɛ zɔ, na bɛhyi tɛladeɛ ne mɔɔ ninyɛndane* ɛheha nu bɔbɔ la.+
24 Akee ahenle mɔɔ kola bɔ bɛ nwo bane na bɛandɔ aze na ɔmaa bɛfa fɛlɛkolilɛ kpole bɛgyinla mɔɔ ngehanleɛ biala ɛmba bɛ nwo wɔ ye anyunlunyia ne anyunlu la,+
25 yɛ Ngoanedievolɛ Nyamenle kokye ne, yemɔ a anyunlunyia, kpoleyɛlɛ, tumi nee anwosesebɛ ɛlua yɛ Awulae Gyisɛse Kelaese anwo zo ɛyɛ ye ɛdeɛ wɔ mekɛ kɔsɔɔti mɔɔ ɛpɛ nu nee ɛnɛ nee dahuu a. Amen.
Ɔbodwɛkɛ
^ Giliki, a·sel′gei·a. Nea Edwɛkɛbohilelɛ.
^ Nea Edwɛkɛbohilelɛ.
^ Anzɛɛ “apenle apenle bulu bulu.”
^ Anzɛɛ “bɛlɛkanvo menli.”
^ Giliki aneɛ nu, “nwonane.”
