Ɛzoanvolɛma Gyima 1:1-26
1 O Tiyɔfelɛse, wɔ edwɛkɛ ne mɔɔ limoa mɔɔ mengɛlɛle la anu, menganle ninyɛne mɔɔ Gyisɛse bɔle ɔ bo yɛle nee mɔɔ ɔhilehilele la kɔsɔɔti+
2 ɔhɔdwule kenle ne mɔɔ bɛvale ye bɛhɔle anwuma+ wɔ mekɛ mɔɔ ɔluale sunsum nwuanzanwuanza ne azo ɔvale adehilelɛ ɔmaanle ɛzoanvolɛma ne mɔ mɔɔ ɔkpale bɛ la.+
3 Mɔɔ ɔnwunle amaneɛ ne la anzi, ɔyele ɔ nwo ɔhilele bɛ ɔmaanle bɛnyianle daselɛ dɔɔnwo kɛ ɔde aze.+ Bɛnwunle ye too kenle 40, na ɔhanle Nyamenle Belemgbunlililɛ ne anwo edwɛkɛ.+
4 Mɔɔ ɔ nee bɛ yiale la, ɔzele bɛ kɛ: “Bɛmmafi Gyɛlusalɛm,+ emomu bɛhɔ zo bɛhendɛ mɔɔ Selɛ ne ɛva ɛbɔ ɛwɔkɛ+ mɔɔ bɛdele nwolɛ edwɛkɛ bɛvile me ɛkɛ ne la;
5 ɔluakɛ Dwɔn ɛdeɛ, ɔvale nzule a ɔzɔnenle a, noko ɔnrɛhyɛ bɛbava sunsum nwuanzanwuanza bɛazɔne bɛ.”+
6 Ɔti mɔɔ bɛyiale nu la, bɛbizale ye kɛ: “Awulae, mekɛ ɛhye anu a ɛbava belemgbunlililɛ ne wɔamaa Yizilayɛ bieko ɔ?”+
7 Ɔbuale bɛ kɛ: “Ɔngyia kɛ bɛkɛnwu mekɛ anzɛɛ ɛlobɔ ne mɔ mɔɔ Selɛ ne angome a kola* kile la.+
8 Emomu, saa sunsum nwuanzanwuanza ne ba bɛ nwo zo a,+ bɛbanyia tumi na bɛayɛ me alasevolɛ+ wɔ Gyɛlusalɛm+ nee Dwudiya nee Samɛlea amuala,+ bɛahɔdwu azɛlɛ ye azo ɛleka biala.”+
9 Mɔɔ ɔhanle ɛhye ɔwiele na bɛ nye gyi ɔ nwo la, bɛmaanle ye zo bɛhɔle anwuma na amungu ne hedale ɔ nwo zo na bɛannwu ye bieko.+
10 Mekɛ mɔɔ ɔlɛkɔ na bɛlɛnea anwomanyunlu la, arɛlevilɛ nu ala, mrenyia nwiɔ mɔɔ wula adɛladeɛ fufule+ la ragyinlanle bɛ nwo ɛkɛ
11 na bɛhanle kɛ: “Galelima, duzu ati a bɛgyi ɛke bɛlɛnea anwomanyunlu ɛ? Gyisɛse ɛhye mɔɔ bɛva ye bɛvi bɛ avinli bɛhɔ anwuma la balua adenle ko ne ala azo ara kɛ mɔɔ bɛnwunle ye kɛ ɔlɛkɔ anwuma la.”
12 Akee bɛvile boka bie mɔɔ bɛfɛlɛ ye Ɔlivi Boka mɔɔ ɔbikye Gyɛlusalɛm la azo bɛziale bɛrale Gyɛlusalɛm,+ ɔle ɛnwomenlelielɛ kenle adendulɛ ala.
13 Mɔɔ bɛdwule ɛkɛ ne la, bɛhɔle ɛbolɔnsam ne azo ekpumgbunli ne anu, ɛleka mɔɔ ɛnee bɛde la. Ɛnee Pita yɛɛ Dwɔn nee Gyemise nee Andelu, Felepe nee Tɔmase, Baatɔlomiyu nee Mateyu, Afeɛse ara Gyemise nee Saemɔn mɔɔ le mɔdenlebɔvolɛ la yɛɛ Gyemise ara Dwudase wɔ ɛkɛ.+
14 Bɛ muala bɛ nee mraalɛ bie mɔ+ nee Gyisɛse amediema mrenyia ne mɔ+ nee ye mame Mɛle bɔle nu yɛle asɔne.
15 Mekɛ zɔhane, Pita dwazole gyinlanle mediema ne mɔ avinli (ɛnee menli ne amuala dodo bayɛ 120) na ɔhanle kɛ:
16 “Mediema, ɛnee ɔwɔ kɛ ngɛlɛlera ne mɔɔ sunsum nwuanzanwuanza ne luale Devidi anwo zo hanle dole ɛkɛ wɔ Dwudase+ mɔɔ hilele bɛdabɛ mɔɔ bɛrahyele Gyisɛse adenle anwo la ba nu.+
17 Ɔluakɛ ɛnee ɔboka yɛ nwo+ yɛɛ ɔnyianle ɛzonlenlɛ gyima ɛhye anu kyɛfoa.
18 (Yemɔti nrenyia ɛhye vale ye ninyɛndane nwo ahatualɛ dɔle azɛlɛ,+ mɔɔ ɔtɔ aze la ɔ ti kpɔnlanle aze, ɔ ko kpukele na ɔ kunlu anyalɛ muala tulule guale zo.+
19 Menli mɔɔ wɔ Gyɛlusalɛm la amuala dele ɛhye, ɔti bɛvɛlɛle azɛlɛ ne wɔ bɛ aneɛ nu Akɛledama, ɔ bo kile, “Mogya Azɛlɛ.”)
20 Ɔluakɛ bɛhɛlɛ ye wɔ Edwɛne buluku ne anu kɛ, ‘Maa ye tɛnlabelɛ ɛdɔ mgbane, yɛɛ mmamaa awie tɛnla ɛkɛ’+ na ‘Ye neavolɛ gyima ne, maa awie fofolɛ ɛyɛ.’+
21 Yemɔti ɔhyia kɛ menli mɔɔ bokale yɛ nwo wɔ mekɛ kɔsɔɔti mɔɔ ɛnee Awulae Gyisɛse wɔ yɛ avinli ɛlɛyɛ ye gyima ne,*
22 ɔvi mekɛ mɔɔ Dwɔn zɔnenle ye+ badwu mekɛ mɔɔ bɛvale ye bɛvile yɛ nwo ɛkɛ bɛhɔle anwuma la,+ ɔwɔ kɛ mrenyia ɛhye mɔ anu ko baboka yɛ nwo na ɔyɛ ye ewudwazo ne anwo dasevolɛ.”+
23 Ɔti bɛyele menli nwiɔ, Dwosefi mɔɔ bɛfɛlɛ ye Baasabase na eza bɛfɛlɛ ye Gyɛsetɛse la nee Matayase.
24 Akee bɛyɛle asɔne kɛ: “O Gyihova,* wɔmɔ mɔɔ ɛze awie biala ahonle nu la,+ kile yɛ menli nwiɔ ɛhye anu ko mɔɔ wɔkpa ye la
25 maa ɔva ɛzonlenlɛ gyima nee ɛzoanvolɛ gyima ɛhye mɔɔ Dwudase ɛkpo na yehɔ ɔdaye mumua ne ye ɛleka la.”+
26 Yemɔti bɛguale nwolɛ ma*+ na ma ne bɔle Matayase, na bɛvale ye bɛbokale ɛzoanvolɛma 11 ne anwo.*
Ɔbodwɛkɛ
^ Anzɛɛ “lɛ tumi.”
^ Giliki aneɛ nu, “ɛlɛdi akɔneaba.”
^ Nea Edwɛkɛbohilelɛ.
^ Anzɛɛ “bɛbule ye kɛ 11 ne mɔɔ ɛha la.”
