Ɛzoanvolɛma Gyima 6:1-15
6 Mekɛ ne anu mɔɔ ɛnee ɛdoavolɛma ne anwo ɛlɛso la, Dwuuma mɔɔ ka Giliki aneɛ la bɔle ɔ bo dendɛle tiale Dwuuma mɔɔ ka Hibulu aneɛ la, ɔluakɛ ɛnee bɛbu bɛ nye bɛgua bɛ ahunlanvolɛ ne mɔ anwo zo wɔ aleɛ mɔɔ bɛkyɛ ye alehyenlɛ biala la anu.+
2 Ɔti Bulu Nee Nwiɔ ne vɛlɛle ɛdoavolɛma ne amuala na bɛhanle kɛ: “Ɔnle kpalɛ* kɛ yɛkɛgyakyi Nyamenle edwɛkɛ ne na yɛkɛgyinla ɛkponle nwo yɛkɛhyɛ aleɛ.+
3 Ɔti mediema, bɛye bɛ nuhua menli nsuu mɔɔ bɛlɛ duma kpalɛ,*+ mɔɔ sunsum ne ɛyi bɛ tɛkɛɛ na bɛze nrɛlɛbɛ la,+ amaa yɛakpa bɛ na bɛali edwɛkɛ ɛhye mɔɔ nwolɛ hyia la anwo gyima;+
4 na yɛmɛ yɛbadu yɛ nwo yɛazie ɛkɛ yɛayɛ asɔne na yɛahilehile Nyamenle edwɛkɛ ne.”
5 Menli ne amuala anye liele mɔɔ bɛhanle la anwo na bɛyele Sitivin, nrenyia bie mɔɔ ɔlɛ diedi kpole na sunsum nwuanzanwuanza ne ɛyi ye tɛkɛɛ la nee Felepe,+ Polɔkɔlɛse, Nekanɔ, Taemɔn, Paamɛnase yɛɛ Nekɔlɔso mɔɔ vi Anteɔko na yerayɛ Dwuunli la.
6 Bɛvale bɛ bɛrɛlɛle ɛzoanvolɛma ne, na mɔɔ bɛyɛle asɔne bɛwiele la, bɛvale bɛ sa bɛguale bɛ nwo zo.+
7 Na Nyamenle edwɛkɛ ne hɔle zo dɛlɛle,+ na ɛdoavolɛma ne dodo yɛle mɔnwo dɔɔnwo+ wɔ Gyɛlusalɛm; na ɛsɔfoma dɔɔnwo rayɛle diedima.+
8 Na ɛnee Sitivin mɔɔ Nyamenle ɛlolɛ nee ye tumi kpole ne wɔ ɔ nwo zo la ɛlɛyɛ nwanwane ninyɛne nee sɛkɛlɛneɛ mgbole wɔ menli ne avinli.
9 Noko menli bie mɔɔ vi ekpunli ne mɔɔ bɛfɛlɛ ye Fanwodima Nyianusua ne anu la, nee Saelinema nee Alɛzandeleama, nee menli bie mɔɔ vi Selesea nee Ehyea la dwazole kɛ bɛ nee Sitivin su kpolera.
10 Noko bɛangola bɛangyinla ye nrɛlɛbɛ nee sunsum ne mɔɔ ɔlɛfa yeadendɛ la anloa.+
11 Akee bɛwulowulale menli bie abo bɛmaanle bɛhanle kɛ: “Yɛdele kɛ ɔlɛka munzule edwɛkɛ yeatia Mosisi nee Nyamenle.”
12 Na bɛmaanle menli ne, mgbanyima ne mɔ nee mɛla kilehilevolɛma ne vale ɛya, na bɛrale ɔ nwo zo arɛlevilɛ nu bɛrahyele ye na bɛvale ye bɛhɔmaanle Sanhedelin ne.
13 Na bɛmaanle menli ralile daselɛ adalɛ na bɛhanle kɛ: “Nrenyia ɛhye tendɛ tia ɛleka nwuanzanwuanza ɛhye nee Mɛla ne dahuu.
14 Kɛ neazo la, yɛdele kɛ ɔlɛka kɛ Gyisɛse ɛhye mɔɔ vi Nazalɛte la bazɛkye ɛzonlenlɛsua ɛhye na yeahakyi amaamuo ne mɔɔ Mosisi vale gyakyile yɛ la.”
15 Mekɛ mɔɔ bɛdabɛ mɔɔ bɛde Sanhedelin ne anu la amuala nleanle ye koonwu la, bɛnwunle kɛ ɔ nyunlu ɛyɛ kɛ anwumabɔvolɛ nyunlu.
