Ɛvolɛ biala, Gyihova Alasevolɛ nee menli mgbe dɔɔnwo mɔɔ bɛto ɛsalɛ bɛfɛlɛ bɛ la yia nu wɔ ewiade amuala di Gyisɛse ewule ngakyelɛlilɛ ne kokye kɛ mɔɔ ɔhanle kɛ bɛyɛ ye ala la. (Luku 22:19) Ayia ɛhye maa yɛte mɔɔ Gyisɛse yɛle wɔ mekɛ mɔɔ ɔvale ye ngoane ɔmaanle alesama la abo kpalɛ na yɛnwu kɛzi nwolɛ hyia la. Eza ɔmaa yɛnwu nvasoɛ mɔɔ wɔ ye ewule ne azo kɛkala nee kenle bie la.​—Dwɔn 3:16.

 Saa ɛhɔle Ngakyelɛlilɛ ne bie ɛvolɛ ɛhye anzɛɛ wɔangɔ bie bɔbɔ a, kɛ ɔkɛyɛ na wɔanyia Gyisɛse ewule afɔlebɔlɛ ne azo nvasoɛ ɛ? Gyisɛse hanle kɛ yɛyɛ ninyɛne nwiɔ bie mɔɔ anwo hyia la:

1.  1. Sukoa Nyamenle nee Gyisɛse anwo debie. Gyisɛse hanle hilele ye anwuma Selɛ ne wɔ asɔneyɛlɛ nu kɛ: “Ɛhye a le dahuu ngoane a, kɛ bɛkɛnwu wɔ, nɔhalɛ Nyamenle kokye ne, nee mɔɔ ɛzoanle ye la, Gyisɛse Kelaese.”​—Dwɔn 17:3.

2.  2. Fa mɔɔ wɔzukoa la yɛ gyima. Gyisɛse hanle ye fane dɔɔnwo kɛ ɔwɔ kɛ yɛfa ye ngilehilelɛ ne yɛbɔ yɛ ɛbɛla. Kɛ neazo la, mekɛ mɔɔ ɔlɛdwula ye Boka Zo Ɛdendɛlɛ ne mɔɔ menli dɔɔnwo ze ye kpalɛ la, ɔhanvole awie biala mɔɔ ‘tie ye edwɛkɛ na ɔyɛ la.’ (Luku 6:46-48) Eza ɔhanle ye mekɛ bie kɛ: “Saa bɛze ninyɛne ɛhye mɔ na bɛyɛ a, bɛ nye balie.”​—Dwɔn 13:17.

 Ɛkulo kɛ ɛsukoa Nyamenle nee Gyisɛse anwo ninyɛne dɔɔnwo ɔ? Ɛkpondɛ kɛ ɛnyia folɛdulɛ kpalɛ mɔɔ baboa wɔ yeamaa wɔava mɔɔ ɛlɛsukoa la wɔayɛ gyima ɔ? Ninyɛne mɔɔ bahola aboa wɔ la bie mɔ ɛne.

 Baebolo ɛzukoalɛ mɔɔ bɛndua ɛhwee mɔɔ yɛ nee menli yɛ la ɛboa bɛ nuhua dɔɔnwo yemaa bɛnwu mɔɔ Baebolo ne ka la na bɛlɛfa bɛayɛ gyima wɔ bɛ ɛbɛlabɔlɛ nu.

•   Kɔ Ɛ Nee Awie Ɛzukoa Baebolo Ne foa ne mɔɔ wɔ jw.org azo la amaa wɔanwu ngyehyɛleɛ ɛhye anwo edwɛkɛ dɔɔnwo.

•   Nea Akoaba Ba Wɔ Baebolo Ɛzukoalɛ Ne Abo vidio ne amaa wɔanwu kɛzi Gyihova Alasevolɛ nee menli sukoa Baebolo ne la.

 Gyihova Alasevolɛ yia nu fane nwiɔ dapɛne biala wɔ ɛleka mɔɔ bɛyia nu bɛsonle mɔɔ bɛfɛlɛ ye Belemgbunlililɛ Asalo la. Yɛsukoa Baebolo ne nee kɛzi yɛbava yɛabɔ yɛ ɛbɛla la wɔ ayia ɛhye mɔ abo.

 Awie biala kola kɔ debiezukoalɛ ɛhye mɔ bie; ɛnle Dasevolɛ bɔbɔ a ɛkola ɛkɔ bie. Bɛ ɛkɛ ne tɛnlabelɛ ne a bahile kɛ ɛbahola wɔahɔ ayia ɛhye mɔ abo anzɛɛ ɛbalua videoconference zo a wɔahɔ bie a.

•   Nea Duzu A Bɛyɛ Ye Wɔ Belemgbunlililɛ Asalo Ɛkɛ A? vidio ne amaa wɔanwu mɔɔ kɔ zo wɔ debiezukoalɛ ne mɔ abo la.

•   Kɔ Gyihova Alasevolɛ Debiezukoalɛ Ne Mɔ foa ne mɔɔ wɔ jw.org azo la amaa wɔanwu mekɛ mɔɔ bɛfa bɛyɛ debiezukoalɛ wɔ ɛleka mɔɔ ɛwɔ la.

 Edwɛkɛ nee vidio dɔɔnwo mɔɔ wɔ wɛbsaete ɛhye azo la baboa wɔ yeamaa wɔazukoa Gyisɛse ngilehilelɛ ne anwo ninyɛne dɔɔnwo na wɔanwu nvasoɛ mɔɔ wɔ Gyisɛse ewule afɔlebɔlɛ ne azo la.

 Kɛ neazo la, amaa wɔanwu kɛzi sonla ko ewule kola boa menli mgbe dɔɔnwo la, kenga edwɛkɛ “Kɛzi Gyisɛse Die Ngoane Ɛ?” yɛɛ “Duzu Ati A Gyisɛse Nwunle Amaneɛ Na Ɔwule A?” anzɛɛ nea Duzu Ati A Gyisɛse Wule A? vidio ne.