BƐHƆ ZO BƐZINZA!
Duzu Ati A Maanyɛlɛ Fa Mgbakyemgbakyenu Ba A?—Duzu A Baebolo Ne Ka A?
Maanyɛlɛ ɛva mgbakyemgbakyenu ɛra maanle dɔɔnwo anu. Wɔ 2022, Pew Research Center ne yɛle neɛnleanu wɔ maanle 19 anu. “Menli mɔɔ bɛnyi mɔɔ bɛwɔ maanle ɛhye mɔ anu la dodo mɔɔ bo foa ko la hanle kɛ wɔ bɛ maanle ne mɔ anu, menli mɔɔ wɔ maanyɛlɛ eku ngakyile nu la anloa ɛnzɛ bɛ nwo anzɛɛ bɛ nloa ɛnzɛ bɛ nwo fee.”
Asoo wɔnwu ye kɛ maanyɛlɛ ɛlɛfa mgbakyemgbakyenu ara ɛleka mɔɔ ɛde la ɔ? Duzu ati ɔ? Duzu a bali ngyegyelɛ ɛhye anwo gyima a? Nea mɔɔ Baebolo ne ka la.
Subane mɔɔ fa mgbakyemgbakyenu ba la
Baebolo ne hanle kɛ wɔ yɛ mekɛ ye azo, mɔɔ le “mekɛ mɔɔ li awieleɛ la,” menli dɔɔnwo banyia subane mɔɔ bamaa yeayɛ se kɛ bɛbayɛ ko la.
‘Wɔ mekɛ mɔɔ li awieleɛ la anu, mekɛ mɔɔ anu yɛ se la bara. Ɔluakɛ menli bahulo bɛ ngome bɛ nwo, bɛbayɛ menli mɔɔ bɛ nee bɛ ɛnyɛ ngyehyɛleɛ.’—2 Timote 3:1-3.
Menli dɔɔnwo ɛlɛyɛ gyima ɛsesebɛ amaa arane ne mɔ ahola ayɛ bɛ gyima kpalɛ noko ninyɛne ɛtɛyɛle boɛ. Menli mɔɔ lɛ adwenle ngakyile la ɛngola ɛmbɔ nu ɛnli ngyegyelɛ nwo gyima. Mɔɔ ɛvi nu ɛra la nee mɔɔ Baebolo ne hanle dole ɛkɛ ne mekɛ bie la yia.
“Sonla di sonla nwo zo tumi maa ɔnwu amaneɛ.”—Nolobɔvo 8:9.
Noko, Baebolo ne maa yɛnwu mɔɔ bali ngyegyelɛ ɛhye anwo gyima la—arane bie. Ahenle mɔɔ banlea zo la baye ngyegyelɛ mɔɔ yɛyia ye ɛnɛ la yeavi ɛkɛ.
Adekilevolɛ mɔɔ fɛta na ɔdwenle yɛ nwo
Baebolo ne ka adekilevolɛ mɔɔ fɛta kpalɛ la anwo edwɛkɛ: Gyisɛse Kelaese. Gyisɛse lɛ tumi nee ɛhulolɛ kɛ ɔbamaa menli kɔsɔɔti ayɛ ko na banyia anzodwolɛ.
“Tenlenema bakpazi wɔ ye mekɛ zo na anzodwolɛ ara ɛleka biala.”—Edwɛne 72:7.
“Maanle maanle kɔsɔɔti bazonle ye.”—Edwɛne 72:11.
Gyisɛse le adekilevolɛ kpalɛ, ɔluakɛ ɔdwenle alesama anwo na ɔkpondɛ kɛ ɔboa bɛ, titili bɛdabɛ mɔɔ bɛsisi bɛ la.
“Ɔbalie ehyianli mɔɔ su kpondɛ moalɛ, koahweabane nee mɔɔ ɛnlɛ boavolɛ la noko. Ɔbaze koahweabane nee ehyianli anwunvɔne, na yealie ehyianli ngoane. Ɔbalie bɛ yeavi nzisi nee basabasayɛlɛ nu.”—Edwɛne 72:12-14.
Sukoa Nyamenle Belemgbunlililɛ ne, anwuma arane mɔɔ Gyisɛse a nea zo la anwo debie dɔɔnwo. Sukoa kɛzi ɛbahola wɔanyia ye tumililɛ zo nvasoɛ yɛɛ kɛzi ɛbahola wɔaboa ye la.
Nea Duzu A Le Nyamenle Belemgbunlililɛ Ne? vidio ne.
Bie A Eza Ɛ Nye Balie
BAEBOLO KPUYA MƆƆ BƐBUA
Duzu A Bahile Kɛ Yɛwɔ “Awieleɛ Mekɛ” Anzɛɛ “Ewiade Awieleɛ Ne” Anu A?
Baebolo ne ka ninyɛne mɔɔ basisi kolaa na “ewiade awieleɛ” ne ara la anwo edwɛkɛ.
EDWƐKƐTILE NGAKYILE
Asoo Arane Nu Nzisi Bo Bapɛ?
Sukoa ndelebɛbo nsa mɔɔ ɔti yɛbahola yɛanyia anwodozo wɔ zɔhane arane ne mɔɔ nzisi biala ɛnle nu anu la.
BAEBOLO NGILEHILELƐ MƆƆ ANWO HYIA KPALƐ LA
Nyamenle Belemgbunlililɛ Ne Bɔle Ye Tumililɛ Bo Wɔ 1914
Kɛyɛ ɛvolɛ 2,600 mɔɔ ɛze ɛhɔ la, Nyamenle maanle belemgbunli bie mɔɔ lɛ tumi kpole la hanle ɛlalɛ na mɔɔ ɔnwunle ye la ɛlɛba nu ɛnɛ.
ƐZINZALƐ ARANE
Nwane A Di Belemgbunlililɛ Ne Azo A?
Baebolo kɛlɛvoma dɔɔnwo hɛlɛle ninyɛne mɔɔ bamaa yɛanwu awie mɔɔ bayɛ Belemgbunli wɔ Nyamenle Belemgbunlililɛ ne azo la anwo edwɛkɛ dole ɛkɛ. Wɔ alesama tetedwɛkɛ nu, sonla ko pɛ ala a edwɛkɛ mɔɔ bɛha bɛvale Tumivolɛ mɔɔ fɛta la anwo la nee ye kɔ a.
YƐ NWO EDWƐKƐ
Maa Yɛrakpɔla Wɔ
Ɛ nee yɛ ɛzuzu Baebolo nu edwɛkɛ bie anwo anzɛɛ sukoa Gyihova Alasevolɛ anwo edwɛkɛ dɔɔnwo.
