ƐVOYIA MƆƆ LIMOA Kilisienema bɔle mɔdenle bɔle “Belemgbunlililɛ ne anwo edwɛkpa” ne nolo hilele menli dɔɔnwo. (Mat. 24:14) Bie mɔ hɔle maanle gyɛne zo. Kɛ neazo la, ɛzoanvolɛ Pɔɔlo hɔle ɛleka mɔɔ ɛnɛ bɛfɛlɛ ye Turkey la, na ɔlile daselɛ kpalɛ wɔ mekɛ mɔɔ ɔyɛ edwɛkpatɛlɛvolɛ gyima ne wɔ ɛkɛ la. * Nzinlii, kɛyɛ ɛvolɛ 2,000 wɔ 2014, bɛyɛle edwɛkɛhanlɛ titili bieko wɔ Turkey. Duzu ati a bɛyɛle nolobɔlɛ titili ɛhye anwo ngyehyɛleɛ a? Nwane mɔ a yɛle bie a?

Nolobɔlɛma mɔɔ wɔ Turkey la bo 2,800, noko menli mɔɔ wɔ maanle ne anu la le mgbe 79. Ɛhye kile kɛ ɔwɔ kɛ nolobɔlɛnli ko biala di menli 28,000 daselɛ. Ɛhye kile kɛ, menli mɔɔ wɔ maanle ne anu la ekyi bie a nolobɔlɛma ɛhola ɛli bɛ daselɛ a. Nolobɔlɛ titili ne bodane a le kɛ bɛdua zo bɛali menli dɔɔnwo daselɛ wɔ mekɛ ekyi bie anu. Mediema kɛyɛ 550 mɔɔ bɛka Turkey aneɛ la nee mediema mɔɔ bɛvi maanle ngakyile zo la hɔle Turkey, na bɛ nee nolobɔlɛma mɔɔ wɔ ɛkɛ ne la yɛle daselɛlilɛ gyima ne. Duzu a vile nu rale a?

Bɛlile daselɛ wɔ ɛleka dɔɔnwo. Asafo ko mɔɔ wɔ Istanbul la hɛlɛle kɛ: “Saa menli nwu yɛ a, bɛbiza kɛ: ‘Bɛlɛyɛ nyianu kpole bie wɔ ɛke ɔ? Yɛnwu Gyihova Alasevolɛ ne mɔ wɔ ɛleka biala!’” Asafo bie mɔɔ wɔ Izmir la hɛlɛle kɛ: “Nrenyia bie mɔɔ wɔ taxi station la bikyele asafo nu kpanyinli ko na ɔbizale ye kɛ, ‘Boni a ɛlɛkɔ zo a? Bɛlɛtɛlɛ bɛ gyima ne anu ɔ?’” Ɛhɛe, bɛnwunle nolobɔlɛ ne.

Menli mɔɔ vi maanle gyɛne zo mɔɔ bɛyɛle daselɛlilɛ gyima ne bie la anye liele. Steffen mɔɔ vi Denmark la hanle kɛ: “Ɛnee mekola meka edwɛkɛ ne mekile menli mɔɔ bɛtɛtele Gyihova anwo edwɛkɛ biala la dahuu. Mendele nganeɛ kɛ ɛnee melɛda Gyihova duma ne ali meahile menli.” Jean-David mɔɔ vi France la hɛlɛle kɛ: “Ɛnee yɛfa mekɛ dɔɔnwo yɛka edwɛkɛ ne wɔ awɔdenle ne mɔ azo. Ɛnee ɔyɛ anyelielɛ kpalɛ! Ɛnee menli dɔɔnwo ɛnze Gyihova Alasevolɛ. Ɛnee yɛkola yɛbɔ adwelielilɛ bo, yɛye yɛ vidio ne mɔ, na yɛgyakyi yɛ mbuluku ne mɔ bie yɛmaa suamenle biala.”

 Wɔ dapɛne nwiɔ pɛ anu, menli 550 ne vale mbuluku kɛyɛ 60, 000 maanle! Nolobɔlɛ titili ne maanle yɛlile daselɛ wɔ ɛleka dɔɔnwo.

Bɛmianle edwɛkɛhanlɛ gyima ne anu. Nolobɔlɛ titili ne nyianle mediema mɔɔ wɔ ɛkɛ ne la anwo zo tumi. Bɛ nuhua dɔɔnwo bɔle ɔ bo kɛ bɛsuzu dahuu ɛzonlenlɛ gyima ne anwo. Nɔhalɛ nu, wɔ siane 12 ne mɔɔ bɛyɛle nolobɔlɛ titili ne la anzi, dahuu adekpakyelɛma mɔɔ wɔ Turkey la ɛrayɛ ɛya ngyɛnu 24.

Menli mɔɔ vi maanle gyɛne zo mɔɔ bɛyɛle bie la hanle kɛzi nolobɔlɛ titili ne boale bɛ bɔbɔ wɔ mekɛ mɔɔ bɛziale bɛhɔle bɛ maanle nu la. Şirin, adiema raalɛ bie mɔɔ vi Germany la hɛlɛle kɛ: “Ɛnee ɔnyɛ se kɛ mediema mɔɔ wɔ Turkey la bali daselɛ wɔ mekɛ mɔɔ bɛnle daselɛlilɛ nu la. Saa menle daselɛlilɛ nu a, ɔyɛ a mese nyiane kɛ mebali daselɛ. Noko, mediema mɔɔ wɔ ɛkɛ ne la neazo, bɛ asɔneyɛlɛ nee nolobɔlɛ titili ne ati, kɛkala mekola meyɛ mɔɔ ɛnee mengola ye yɛ la. Menlile daselɛ yɛɛ memaanle trate bɔbɔ wɔ keteke adenle bie mɔɔ la azɛlɛ bo la anu! Kɛkala, menze nyiane kɛ dɛba ne la.”

Johannes mɔɔ vi Germany la se, “Mezukoa ninyɛne dɔɔnwo mɔɔ baboa me wɔ me ɛzonlenlɛ gyima ne anu a. Ɛnee mediema mɔɔ wɔ Turkey la kulo kɛ bɛka nɔhalɛ ne anwo edwɛkɛ bɛkile menli dɔɔnwo ne ala. Bɛfa nwolɛ adenle biala mɔɔ bɛbanyia la bɛdi daselɛ. Menzile kpɔkɛ kɛ saa mesia mekɔ Germany a, mebayɛ ye zɔhane ala. Ɛnɛ, meka edwɛkɛ ne mekile menli dɔɔnwo metɛla dɛba ne.”

Zeynep mɔɔ vi France la hanle kɛ: “Nolobɔlɛ ɛhye ɛboa me wɔ me ɛzonlenlɛ gyima ne anu kpalɛ. Yeboa me yemaa menyia akɛnrasesebɛ, na menyia anwodozo wɔ Gyihova anu.”

Nolobɔlɛma ne bikyele bɛ nwo kpalɛ. Ɛlɔlɛ nee koyɛlɛ mɔɔ wɔ mediema mɔɔ bɛvi maanle ngakyile zo avinli la nyianle menli nwo zo tumi kpalɛ. Jean-David mɔɔ yɛlimoa yɛha ɔ nwo edwɛkɛ la hanle kɛ, “Mediema ne mɔ zonlenle yɛ ɛyɛvolɛ.” Ɔdoale zo kɛ: “Bɛliele yɛ kɛ bɛ gɔnwo mɔ mɔɔ boka bɛ abusua ne anwo la. Bɛliele yɛ wɔ bɛ azua nu. Ɛnee meze kɛ yɛle ewiade amuala mediemayɛlɛ; na mengengale nwolɛ edwɛkɛ dɔɔnwo wɔ yɛ mbuluku ne mɔ anu.  Noko kɛkala ɛdeɛ, menwu ye me nye zo. Ɔyɛ me fɛ kpole kɛ meboka Gyihova menli ne anwo a, na meyɛ ye mo kɛ yemaa menyia nwolɛ adenle kɛnlɛma ɛhye a.”

Claire mɔɔ vi France la ka kɛ: “Saa yɛvi Denmark, France, Germany, anzɛɛ Turkey bɔbɔ a, yɛ mualɛ yɛle abusua ko. Ɔle kɛ asɛɛ Nyamenle ɛye ɛweɛne mɔɔ la maanle kɔsɔɔti avinli la ɛvi ɛkɛ.”

Stéphanie mɔɔ vi France la doale zo kɛ: “Ɛlɔlɛ mɔɔ yɛlɛ yɛmaa Gyihova la a ɛha yɛ ɛbɔ nu wɔ nolobɔlɛ titili ɛhye anu a, na tɛ amaamuo anzɛɛ aneɛ mɔɔ yɛka la.”

Menli mɔɔ vale bɛ nwo wulale nu la bɔle ɔ bo kɛ bɛsuzu nwo kɛ bɛbahɔ Turkey bɛahɔboa wɔ gyima kpole mɔɔ wɔ ɛkɛ ne la anu. Bɛ nuhua ekyii bie ɛlimoa ɛhɔ lɔ. Yɛ nye die menli mɔɔ kɔboa wɔ ɛleka mɔɔ bɛhyia moalɛ la anwo kpalɛ.

Maa yɛva ekpunli ekyi bie mɔɔ nolobɔlɛma 25 a wɔ nu la kɛ neazo. Wɔ ɛvolɛ dɔɔnwo anu, ɛnee asafo nu kpanyinli ko a wɔ ɛkɛ a. Nea kɛzi nolobɔlɛma anye liele wɔ mekɛ mɔɔ bɛdabɛ mɔɔ bɛkɔboa wɔ ɛleka mɔɔ bɛhyia moalɛ la nsia mɔɔ bɛvi Germany nee Netherlands hɔboale bɛ wɔ 2015 ne anu la!

Duzu a menli mɔɔ hɔboale wɔ Turkey la ka ye wɔ ɛkɛ ne asetɛnla nwo a? Nɔhalɛ nu, ɔyɛ a ɔnla aze, noko menli mɔɔ tu bɛ nwo maa kɔboa la anye die kpalɛ. Suzu mɔɔ bie mɔ ɛha la anwo nea:

Federico mɔɔ le agyalɛ nrenyia mɔɔ wɔ ye ɛvolɛ 40 ne anu na ɔdule ɔvile Spain la ka kɛ: “Kɛmɔ ɛnee menlɛ nwonane afoa nu ninyɛne dɔɔnwo la ati, ɔboale me ɔmaanle menvale me adwenle menziele ninyɛne mɔɔ anwo hyia la azo.” Duzu a ɔka ye wɔ gyima ɛhye anwo a? Ɔka kɛ, “Ɔle gyima kpalɛ bɔkɔɔ! Saa ɛkɔ maanle gyɛne zo kɛ ɛkaboa awie mɔ wɔamaa bɛanwu Gyihova a, ɛnee wɔva ɛ nwo wɔwula ɔ sa nu. Ɔmaa ɛte nganeɛ kɛ Gyihova dwenle ɛ nwo kpalɛ.”

 Rudy, mɔɔ ɔwɔ Netherlands na ɔle agyalɛ nrenyia mɔɔ wɔ ye ɛvolɛ 50 ne anu la ka kɛ: “Ɔ nye liele kpole kɛ ɔhɔzonlenle wɔ ɛleka mɔɔ bɛhyia nolobɔlɛma dɔɔnwo anwo la. Saa ɛnwu kɛzi menli nwu nɔhalɛ ne a bɛ nye die la a, ɔmaa ɛ nye die kpole.”

Sascha, agyalɛ nrenyia mɔɔ wɔ ye ɛvolɛ 40 ne anu na ɔvi Germany la ka kɛ: “Mekɛ biala mɔɔ mewɔ daselɛlilɛ nu la meyia menli mɔɔ ɛtɛtele nɔhalɛ ne anwo edwɛkɛ ɛlɛ la. Adenle ɛhye mɔɔ medua zo memaa menli ɛhye mɔ nwu Gyihova la maa me nye die kpole.”

Atsuko, agyalɛ raalɛ mɔɔ wɔ ye ɛvolɛ 30 ne anu na ɔvi Japan la ka kɛ: “Mekɛ bie, ɛnee mekulo kɛ Amagɛdɔn ba ndɛndɛ. Noko mengɔle Turkey la anzi, menlale Gyihova ase kɛ ɔlɛkɔ zo yeazi abotane la. Saa menwu kɛzi Gyihova ɛlɛdi ninyɛne nwo gyima la a, ɔmaa menyia ɛhulolɛ kɛ mebabikye ye kpalɛ.”

Alisa, adiema raalɛ mɔɔ wɔ ye ɛvolɛ 30 ne anu na ɔvi Russia la ka kɛ: “Gyihova mɔɔ mesonle ye wɔ adenle ɛhye azo la ɛboa me ɛmaa menwu kɛ ɔle kpalɛ.” (Edw. 34:8) Ɔtoa zo kɛ: “Gyihova le me Ze, eza ɔle me Gɔnwo kpalɛ, na tɛnlabelɛ ngakyile mɔɔ mekɔ nu la ɛlɛmaa meanwu ye kpalɛ. Menyia anwubielɛ mɔɔ yɛ anyelielɛ la dɔɔnwo wɔ ɛbɛlabɔlɛ nu yɛɛ menyia nyilalɛ dɔɔnwo!”

Nolobɔlɛ titili ne mɔɔ bɛyɛle ye wɔ Turkey la ati, menli dɔɔnwo ɛde edwɛkpa ne. Noko, azɛlɛsinli dɔɔnwo wɔ ɛkɛ mɔɔ bɛtɛyɛle nuhua gyima a. Mediema mɔɔ kɔboa wɔ Turkey la yia menli mɔɔ bɛtɛtele Gyihova anwo edwɛkɛ ɛlɛ la. Ɛkulo kɛ ɛkɔsonle wɔ azɛlɛsinli zɛhae anu ɔ? Saa ɔle zɔ a, ɛnee yɛmaa bɛ anwosesebɛ kɛ: “Bɛmaa bɛ nye zo bɛnlea ɛya ne mɔ anu kɛ ma ɛbolo mɔɔ ɔwɔ kɛ bɛte a.” (Dwɔn 4:35) Ɛbahola wɔahɔboa wɔ ɛleka mɔɔ ɛya ne anu ma “ɛbolo mɔɔ ɔwɔ kɛ bɛte” la ɔ? Saa ɔle zɔ a, ɛnee bɔ ɔ bo yɛ nwolɛ ngyehyɛleɛ amaa wɔadwu bodane ɛhye anwo. Debie ko a le kɛ: Edwɛkpa ne mɔɔ bɛbabɔ ye nolo “bɛahɔdwu azɛlɛ ye azo ɛleka biala” la bamaa bɛanyia nyilalɛ dɔɔnwo!​—Gyi. 1:8.