Bɛwole me 1935 wɔ Darlaston mɔɔ wɔ England ɛleka bie mɔɔ bɛfɛlɛ ye Black Country la. Esike mungumungu ne mɔɔ vi kɔmpɛlɛ ngakyile mɔɔ wɔ ɛkɛ anu ba la ati a bɛfɛlɛ ɛkɛ ne Black Country a. Menlile ɛvolɛ nna la, me awovolɛ bɔle ɔ bo kɛ bɛ nee Gyihova Alasevolɛ sukoa Baebolo ne. Mɔɔ mele kakula kpavolɛ la, membanwunle ye wienyi kɛ ɛhye a le nɔhalɛ ne a, na bɛzɔnenle me wɔ 1952 wɔ mekɛ mɔɔ ɛnee meli ɛvolɛ 16 la.

Mekɛ zɔhane, membɔle ɔ bo kɛ mesukoa gyima wɔ kɔmpɛlɛ bie mɔɔ bɛyɛ adwinli mbulalɛ nee kale nwo ninyɛne la anu. Ɛnee bɛlɛtete me bɛamaa mearayɛ kɔmpɛlɛ kɛlɛhɛlɛvolɛ na me nye liele nwolɛ kpalɛ.

Ɛnee ɔwɔ kɛ mesi kpɔkɛ bie mɔɔ anwo hyia kpalɛ la wɔ mekɛ mɔɔ neavolɛ adenduvo bie hanle hilele me kɛ membayɛ dapɛne avinli Asafo Buluku Ɛzukoalɛ ne wɔ asafo mɔɔ wɔ me sua zo Willenhall anu la. Noko ɛnee mennwu mɔɔ meyɛ a. Mekɛ zɔhane ɛnee mekɔ debiezukoalɛ wɔ asafo nwiɔ anu. Wɔ dapɛne ne anu, mekɔ debiezukoalɛ wɔ asafo mɔɔ bikye me gyima nu wɔ Bromsgrove la, na ɔvi me sua nu mɔɔ kɔ ɛkɛ la le kɛyɛ kilomita 32 (mayɛlɛ 21). Saa mekɔ me awovolɛ ɛkɛ wɔ Willenhall wɔ dapɛne awieleɛ a, mekɔ debiezukoalɛ wɔ ɛkɛ.

Ɛhulolɛ mɔɔ ɛnee melɛ kɛ mebaboa Gyihova ahyehyɛdeɛ ne la maanle menliele neavolɛ adenduvo ne ɛsalɛdolɛ ne mendole nu, ɔnva nwo kɛ ɛnee yemɔ bamaa meagyakyi gyima mɔɔ me nye die nwo mɔɔ melɛsukoa la. Gyihova mɔɔ memaanle ɔhilele me adenle wɔ mekɛ zɔhane la bukele nwolɛ adenle bie maanle me mɔɔ metɛnunle me nwo ɛlɛ wɔ nwolɛ a.

Mekɛ mɔɔ mekɔ debiezukoalɛ wɔ Bromsgrove Asafo nu la, menyiale adiema raalɛ bie mɔɔ bɛfɛlɛ ye Anne mɔɔ ɔ nwo yɛ fɛ na ɔ nye die Gyihova ɛzonlenlɛ nwo la. Yɛgyale wɔ 1957, na yɛbɔ nu yɛyɛ dahuu adekpakyelɛ, adekpakyelɛ titili nee Bɛtɛle gyima ne bie. Anne ɛmaa me nye ɛlie wɔ me ɛbɛlabɔlɛ kɔsɔɔti anu.

Wɔ 1966, yɛ nye liele kɛ yɛhɔle Geleade sukulu ne mɔɔ tɔ zo 42 bie la. Bɛmaanle yɛhɔle Malawi, na ɛnee menli dɔɔnwo ze bɛ kɛ bɛle atiakunlukɛnlɛma  yɛɛ bɛdie nyɛvolɛ. Noko ɛnee yɛnze kɛ bɛnrɛmaa yɛnrɛdɛnla ɛkɛ ne yɛnrɛhyɛ.

Yɛhɔdwule Malawi wɔ February 1, 1967. Mɔɔ yɛvale siane ko yɛzukoale ɛkɛ ne aneɛ ne yɛwiele la, yɛbɔle maangyeba zo neavolɛ gyima ne abo. Ɛnee yɛlɛ kale bie mɔɔ menli suzu kɛ yɛbahola yɛava yɛahɔ ɛleka biala, na yɛbahola yɛava yɛapɛ azule bɔbɔ la. Noko tɛ zɔhane a ɔde a, ɛnee yɛkola yɛfa yɛpɛ nzule mɔɔ ɛnle kuma la ala. Ɔdwu mekɛ ne bie a, yɛda ndɛtɛlɛ sua mɔɔ bɛva ɛya bɛdu zo, mɔɔ bɛfa tɛnte bɛwula ɛya ne abo wɔ fɔsɛlɛ mekɛ nu amaa yeannwu la anu. Ɛnee ɔnle tɛnlabelɛ kpalɛ mɔɔ ɔwɔ kɛ yɛfa yɛbɔ yɛ edwɛkpatɛlɛvolɛ gyima ne abo a, noko yɛ nye liele nwolɛ!

Wɔ April, mendele kɛ ngyegyelɛ bie ɛlɛbɔ ɔ bo wɔ maanle ne anu. Mendele edwɛkɛ bie mɔɔ ɛnee Malawi maanle kpanyinli Dr. Hastings Banda ɛlɛka wɔ riledio zo la. Ɔhanle kɛ Gyihova Alasevolɛ ɛndua adwule yɛɛ bɛlɛgyegye arane ne. Somolɛ ɛhye mɔ ɛnle nɔhalɛ. Yɛ muala yɛze kɛ bɛ ngyegyelɛ a le kɛ yɛngyinla afoa biala, titili kɛmɔ yɛndɔ kaade mɔɔ kile kɛ yɛwɔ maanyɛlɛ eku bie anu la ati ɔ.

Wɔ September, yɛgengale ye wɔ adwelie kɛlata ne anu kɛ maanle kpanyinli ne ɛbɔ mediema somolɛ kɛ bɛlɛfa ngyegyelɛ bɛara ɛleka biala. Ɔhanle wɔ maanyɛlɛma ayia bie mɔɔ bɛyɛle la abo kɛ, ye arane ne bali kpɔkɛ mɔɔ bɛbɔ kɛ bɛfa bɛ sa bɛado Gyihova Alasevolɛ anwo zo la anwo gyima ndɛndɛ. Bɛvale bɛ sa bɛdole yɛ gyima ne azo wɔ October 20, 1967. Yeangyɛ, kpolisima nee arane mgbanyima mɔɔ bɛmaa nyɛvolɛ adenle wɔ maanle ne anu la rale Bɛtɛle ɛkɛ ne kɛ bɛba bɛarado nu na bɛavoa edwɛkpatɛlɛvolɛma bɛavi maanle ne anu.

Bɛguale yɛ efiade kenle nsa na akee bɛyele yɛ bɛhɔle maanle bie mɔɔ bɛfɛlɛ ye Mauritius mɔɔ  Britain a nea zolɛ la anu. Noko Mauritius mgbanyima ne mɔ ammaa yɛ adenle kɛ yɛyɛ yɛ edwɛkpatɛlɛvolɛ gyima ne wɔ ɛkɛ. Ɔti bɛmaanle yɛ gyimalilɛ wɔ Rhodesia (mɔɔ ɛnɛ bɛfɛlɛ ye Zimbabwe la). Mɔɔ yɛdwule ɛkɛ ne la, yɛyiale nrenyia kpoleravolɛ bie mɔɔ boka menli mɔɔ maa nyɛvolɛ adenle wɔ maanle ne anu anwo la na yeammaa yɛ adenle. Ɔhanle kɛ: “Bɛdu bɛ bɛvi Malawi, bɛammaa bɛandɛnla Mauritius, ɔti kɛkala bɛra ɛke ɔluakɛ ɛke le kpalɛ.” Anne bɔle ɔ bo kɛ ɔsu. Ɛnee ɔzɔho kɛ bɛngulo kɛ bɛdie yɛ wɔ ɛleka biala! Zɔhane mekɛ ne, ɛnee akee mekulo kɛ mefi ɛkɛ na mesia mekɔ me sua zo England. Awieleɛ bɔkɔɔ ne, mgbanyima ne mɔ maanle yɛ adenle kɛ yɛbahola yɛahɔla Bɛtɛle ɛkɛ, noko aleɛ kye ala a yɛzia yɛrɛla bɛ ɔfese ɛkɛ. Ɛnee yɛvɛ kpalɛ, noko yɛgyakyile debie biala yɛwulale Gyihova asa anu. Aleɛ hyenle mɔɔ yɛhɔle ɛkɛ ne la, ye ewiazo bɛhanle bɛhilele yɛ kɛ yɛbahola yɛadɛnla Zimbabwe kɛ nyɛvolɛ na ɛnee yɛ nye ɛnla. Me rɛle ɛnrɛvi kɛzi mendele nganeɛ wɔ kenle zɔhane la. Menwunle ye wienyi kɛ ɛnee Gyihova ɛlɛkile yɛ adenle.

Bɛmaanle menyɛle gyima wɔ Ɛzonlenlɛ Nwo Gyimalilɛleka ne mɔɔ wɔ Zimbabwe Bɛtɛlɛ la, na menyɛle gyima memaanle Malawi nee Mozambique. Ɛnee Malawi mediema ne mɔ ɛlɛyia kpɔdekpɔdeyɛlɛ mɔɔ anu yɛ se kpalɛ la. Ɛnee me gyima ne bie a le kɛ mebahile amaneɛbɔlɛ mɔɔ Malawi maangyebakyi zo neavolɛma fa ba la abo. Kenle ko bie meamkpɔne ndɛ na ɛnee mekulo kɛ mewie amaneɛbɔlɛ bie anwo gyima yɛ. Na mɔɔ menwunle kɛzi bɛlɛyɛ yɛ mediema ne mɔ basabasa la, menzunle. * Noko bɛ nɔhalɛlilɛ, bɛ diedi nee bɛ kpundiigyinlanlɛ ne hanle me ahonle kpalɛ.​—2 Kɔl. 6:4, 5.

Yɛyɛle biala mɔɔ yɛbahola la yɛvale sunsum nu aleɛ yɛhɔmaanle mediema mɔɔ hale Malawi nee bɛdabɛ mɔɔ basabasayɛlɛ ne ati bɛnriandile bɛhɔle Mozambique la. Bɛmaanle mediema mɔɔ kile chichewa, aneɛ mɔɔ menli dɔɔnwo ka wɔ Malawi abo la hɔdɛnlanle adiema nrenyia bie ɛya nu wɔ Zimbabwe. Ɔvile atiakunlukɛnlɛma nu ɔzile azua mɔɔ bɛbala nu nee ɔfese ɔmaanle bɛ. Na bɛdoale bɛ edwɛbohilelɛ gyima ne mɔɔ nwolɛ hyia la azo wɔ ɛkɛ.

Ɛnee ɛvolɛ biala, yɛyɛ ngyehyɛleɛ yɛmaa maangyebakyi zo neavolɛma mɔɔ wɔ Malawi la kɔ Chichewa nyianu ne bie wɔ Zimbabwe. Ɛkɛ ne a bɛ sa ka nyianu ɛdendɛlɛ ngɛlata ne mɔ a. Saa bɛlɛsia bɛahɔ a, bɛyɛ biala mɔɔ bɛbahola la bɛmakyi mediema ne mɔ ɛkɛ bɛka mɔɔ bɛhɔzukoale la bie bɛkile bɛ. Saa maangyebakyi zo neavolɛma ɛhye mɔ mɔɔ lɛ akɛnrasesebɛ la ba Zimbabwe ɛvolɛ biala a, yɛbɔ mɔdenle yɛyɛ Belemgbunlililɛ Gyima Sukulu yɛmaa bɛ yɛfa yɛmaa bɛ anwosesebɛ.

Wɔ February 1975, mengɔle Mozambique kɛ mekakpɔla mediema mɔɔ vi Malawi mɔɔ ɛnriandi ɛhɔ ɛkɛ ne la. Ɛnee mediema mɔɔ wɔ ɛkɛ ne la ɛlɛfa adehilelɛ mɔɔ Gyihova ahyehyɛdeɛ ne fa maa yɛ la ali gyima, na ɛnee bɛlɛfa adehilelɛ fofolɛ mɔɔ ɔse ɔwɔ kɛ yɛnyia mgbanyima eku la bɛali gyima bɔbɔ. Mgbanyima fofolɛ ɛhye mɔ yɛle sunsum nu gyimalilɛ ngakyile nwo ngyehyɛleɛ, bie a le bagua nu ɛdendɛlɛ, alehyenlɛ ne anu tɛkese ne mɔɔ bɛsuzu nwo, Ɛzinzalɛ Arane ne ɛzukoalɛ yɛɛ bɛyɛle nyianu bɔbɔ. Kɛ mɔɔ yɛkɔ nyianu a bɛyɛ bɔkɔbɔkɔyɛlɛ, aleɛ ɛhyɛlɛ nee banebɔlɛ nwo ngyehyɛleɛ la, zɔhane ala a bɛyɛle wɔ ɛleka mɔɔ bɛde la a. Ɔlua Gyihova moalɛ zo, mediema ɛhye mɔ mɔɔ di nɔhalɛ la holale yɛle ninyɛne dɔɔnwo, na mekavi ɛkɛ ne la ɛnee yemaa me anwosesebɛ.

Mɔɔ ɔka ekyii 1980 dwu la, Zambia Bɛtɛle ne bɔle ɔ bo kɛ ɔnea mediema mɔɔ wɔ Malawi la. Noko ɛnee metɛdwenle mediema mɔɔ wɔ Malawi la anwo na meyɛ asɔne memaa bɛ, na zɔhane ala a mediema gyɛne dɔɔnwo noko yɛle a. Kɛmɔ ɛnee meboka Zimbabwe Ɔfese Kɔmatii ne anwo la ati, menyiale mediema mɔɔ le ewiade amuala gyima ne ati agyakɛnugyinlavolɛma, nee mediema mɔɔ ɛlɛnea gyima ne azo wɔ Malawi, South Africa, nee Zambia la fane dɔɔnwo. Mekɛ biala mɔɔ yɛbayia la, yɛbiza edwɛkɛ ko ɛhye, “Duzu bieko a yɛbahola yɛayɛ yɛaboa yɛ mediema mɔɔ wɔ Malawi la a?”

 Mekɛ guale nu la kpɔdekpɔdeyɛlɛ ne hanle aze. Mediema mɔɔ vile Malawi la bɔle ɔ bo kɛ bɛsia bɛara yɛɛ ɛnee bɛlɛgyakyi bɛdabɛ mɔɔ bɛhale ɛkɛ la kpɔdekpɔdeyɛlɛ. Maanle ngakyile mɔɔ bikye Malawi la bɔle ɔ bo kɛ bɛdie Gyihova Alasevolɛ bɛado nu wɔ mɛla adenle zo na bɛyele bɛ sa bɛvile yɛ gyima ne azo. Zɔhane ala a bɛyɛle wɔ Mozambique wɔ 1991 a. Mɔɔ ɛnee yɛlɛdwenle nwolɛ la a le kɛ, ‘Kenlenzu a Gyihova Alasevolɛ mɔɔ wɔ Malawi la banyia fanwodi a?’

Malawi maanyɛlɛ ngyehyɛleɛ ne hakyile, na wɔ 1993, arane ne yele bɛ sa mɔɔ bɛvale bɛdole Gyihova Alasevolɛ anwo zo la. Yeangyɛ, menyiale edwɛkpatɛlɛvolɛ bie na ɔbizale me kɛ, “Ɛbazia wɔahɔ Malawi ɔ?” Ɛnee meli ɛvolɛ 59 ɔti membuale ye kɛ, “Kyɛkyɛ, meyɛ ɛrelera!” Noko kenle ko zɔhane ala, yɛnyianle nrɛlaleɛ yɛvile Neazo Eku ne ɛkɛ ne kɛ yɛzia yɛhɔ Malawi.

Yɛ nye die gyima mɔɔ yɛlɛyɛ wɔ Zimbabwe la anwo ɔti ɛnee ɔnla aze kɛ yɛbazia yɛahɔ Malawi. Ɛnee yɛsosɔ ndinli wɔ maanle ne anu na yɛnyia agɔnwolɛma dɔɔnwo. Neazo Eku ne hanle hilele yɛ kɛ saa yɛngulo kɛ yɛkɔ a yɛbahola yɛahɔ zo yɛadɛnla Zimbabwe. Ɔti anrɛɛ yɛbahola yɛakpa adenle mɔɔ yɛkulo la na yɛadɛnla ɛkɛ. Noko mekakye kɛ mendwenlenle kɛzi Ebileham nee Sɛla gyakyile bɛ awuke mɔɔ bɛ nwo tɔ bɛ wɔ nu wɔ mekɛ mɔɔ bɛyɛle mrelera la amaa bɛali Gyihova adehilelɛ zo la anwo.​—Gyn. 12:1-5.

Yɛzile kpɔkɛ kɛ yɛbali adehilelɛ mɔɔ Gyihova ahyehyɛdeɛ ne ɛva ɛmaa yɛ la azo na yɛziale yɛhɔle Malawi wɔ February 1, 1995. Ɔvi kenle mɔɔ yɛlimoale yɛhɔle Malawi badwu mekɛ zɔhane ɛnee yeli ɛvolɛ 28. Bɛdele Ɔfese Kɔmatii, na ɛnee medame nee mediema gyɛne nwiɔ a wɔ nu a, na ndɛndɛ ne ala yɛbɔle ɔ bo yɛyɛle Gyihova Alasevolɛ gyimalilɛ ngakyile nwo ngyehyɛleɛ.

Ɔyɛ anyelielɛ kɛ ɛbanwu kɛ Gyihova ɛlɛmaa gyima ne anyia anyuhɔlɛ ndɛndɛ! Nolobɔlɛma ne dodo hɔle ɔ nyunlu ɔvi kɛyɛ 30,000 wɔ 1993 kɔdwu 42,000 wɔ 1998. * Neazo Eku ne liele dole nu kɛ yɛzi Bɛtɛle fofolɛ amaa bɛanlea gyima ne mɔɔ ɛlɛyɛ kpole la azo. Yɛdɔle azɛlɛ mɔɔ ye kpole le acre 30 la wɔ Lilongwe na bɛvale me bɛbokale suazilɛ kɔmatii ne anwo.

Mɔɔ bɛyila Bɛtɛle fofolɛ ne azo wɔ May 2001 la, Adiema Guy Pierce mɔɔ boka Neazo Eku ne anwo la a maanle ɛdendɛlɛ ne a. Malawi mediema mɔɔ bo 2,000 la a rale gyimalilɛ ne bie a na bɛzɔnenle bɛ nuhua dɔɔnwo la ɛnee yebo ɛvolɛ 40. Mediema  ɛhye mɔɔ di nɔhalɛ la gyinlanle kpɔdekpɔdeyɛlɛ mɔɔ anu yɛ se la anloa wɔ mekɛ mɔɔ bɛvale bɛ sa bɛdole yɛ gyima ne azo wɔ ɛvolɛ dɔɔnwo anu la. Ɛnee bɛdi ehyia, noko wɔ sunsum nu ɛnee bɛnyia bɛ nwo kpole kpalɛ. Na kɛkala bɛ nye ɛlie kɛ bɛbaranleɛnlea bɛ Bɛtɛle fofolɛ ɛkɛ. Bɛtɛle ɛleka biala mɔɔ bɛvale la bɛdole Belemgbunlililɛ edwɛne, na bɛdole ye kɛ mɔɔ Africama to bɛ edwɛne la. Na yemɔ maanle gyimalilɛ ne yɛle me anyelielɛ dɛlale gyimalilɛ biala mɔɔ mehɔ ɔ bo la. Ɔle daselɛ mɔɔ kile kɛ Gyihova yila bɛdabɛ mɔɔ bɛfa nɔhalɛlilɛ bɛgyinla sɔnea nloa la kpole.

Mɔɔ bɛzile Bɛtɛle ne bɛwiele la, me nye liele kpole kɛ membɔle ɔ bo menyianle gyimalilɛ kɛ mengɔnyila Belemgbunlililɛ Asalo zo. Asafo ngakyile mɔɔ wɔ Malawi la nyianle ngyehyɛleɛ mɔɔ bɛyɛle kɛ bɛbasisi Belemgbunlililɛ Asalo bɛamaa maanle mɔɔ bɛnlɛ ezukoa dɔɔnwo la azo nvasoɛ. Alimoa ne ɛnee asafo bie mɔ yia wɔ sua mɔɔ bɛva mbaka bɛbobɔ la anu. Bɛvale ndɔ ɛkpa bɛdule zo yɛɛ bɛyɛle bɛnkye mɔɔ bɛbadɛnla zolɛ la bɛzieziele nu. Kɛkala bɛyɛ gyima ɛsesebɛ bɛgua belekese na bɛto ye wɔ fonlomo mɔɔ bɛzi la anu amaa bɛava bɛasisi azua fofolɛ ngɛnlɛma mɔɔ bɛbayia nu la. Noko bɛ nye tɛdie kɛ bɛbava bɛnkye bɛaziezie nu ɔluakɛ kɛ mɔɔ bɛka ye la, Bɛnkye mɔɔ, dahuu ɛbanyia ɛleka wɔamaa sonla ko!

Eza me nye ɛlie kɛ menwu kɛ Gyihova ɛlɛboa menli yeamaa bɛanyi sunsum nu la. Me nye die mediema mgbavolɛ mɔɔ wɔ Africa la anwo kpalɛ ɔluakɛ bɛtu bɛ nwo bɛmaa yɛɛ bɛnyia anyuhɔlɛ ndɛndɛ ɔlua ndetelɛ mɔɔ Gyihova ahyehyɛdeɛ ne fa maa bɛ nee gyima mɔɔ bɛfa bɛmaa bɛ mɔɔ bɛyɛ la azo. Ɛhye ati bɛkola bɛyɛ gyima dɔɔnwo wɔ Bɛtɛle nee asafo ne mɔ anu. Maangyebakyi zo neavolɛma fofolɛ mɔɔ bɛkpale bɛ mɔɔ ɛnee bɛ nuhua dɔɔnwo ɛgya la maanle asafo ne mɔ anwosesebɛ. Agyalɛma ɛhye mɔ kpale kɛ bɛbava awolɛ bɛabɔ afɔle amaa bɛava bɛ mekɛ muala bɛazonle Gyihova ɔnva nwo kɛ bɛ amaamuo yɛɛ ɔdwu mekɛ ne bie a bɛ mbusuafoɔ tinlitinli bɛ nwo zo kɛ bɛwo la.

Mɔɔ yɛlile ɛvolɛ 52 wɔ Africa la, menyianle kpɔkɛdelɛ nwo ngyegyelɛ bie mɔ. Ɔfese Kɔmatii ne zɛlɛle Neazo Eku ne adenle kɛ bɛmaa yɛzia yɛhɔ Britain na bɛliele bɛdole nu. Ɔyɛle yɛ nyane kɛ yɛlɛgyakyi gyima mɔɔ yɛ nye die nwolɛ la yɛahɔ, noko Britain Bɛtɛle abusua ne ɛlɛnea yɛ kɛnlɛma wɔ yɛ mgbanyinli mekɛ nu.

Medie meto nu bɔkɔɔ kɛ Gyihova mɔɔ memaanle ɔhilele me adenle wɔ ɛbɛlabɔlɛ nu la a le kpɔkɛ kpalɛ mɔɔ tɛla biala mɔɔ menzile a. Saa menvale me nwo mendole medame mumua ne me ndelebɛbo zo a, anrɛɛ awie ɛnze ɛleka mɔɔ me gyima ne bava me ahɔdwu a. Ɛnee Gyihova ze mɔɔ ɔwɔ kɛ meyɛ amaa me ‘ndenle adenrɛ fɔɔnwo’ la. (Mrɛ. 3:5, 6) Mɔɔ mele kakula kpavolɛ la, ɛnee me nye die nwo kɛ mebazukoa gyima mɔɔ kɔmpɛlɛ kpole bie yɛ la anwo ninyɛne dɔɔnwo. Noko Gyihova ewiade amuala ahyehyɛdeɛ ne maanle me sunsum nu bodane mɔɔ ɛmaa me kunlu ɛdwo me nwo kpalɛ la. Wɔ me afoa nu, Gyihova ɛzonlenlɛ a maanle me nye liele kpalɛ a na ɔtɛmaa me nye tɛdie!