1, 2. (a) Ngyegyelɛ boni a ngakula dɔɔnwo mɔɔ bɛle nyɛvolɛ la yia a? (b) Kpuyia boni mɔ a yɛbabua wɔ edwɛkɛ ɛhye anu a?

JOSHUA se: “Ɔvi me ngakula nu, ɛnee me awovolɛ sua zo aneɛ ne bie a meka ye wɔ sua nu nee debiezukoalɛ bo a. Noko mɔɔ membɔle sukulu ɛhɔlɛ bo la, me nye raliele ɛleka mɔɔ yɛhɔ la aneɛ ne anwo. Ɛvolɛ ekyii pɛle nu la, mendele aneɛ ne kpalɛ. Ɛnee mende debiezukoalɛ ne mɔ abo, yɛɛ ɛnee mennwu ngakyile mɔɔ wɔ me awovolɛ amaamuo ne anu la.” Joshua anwubielɛ ne ta si.

² Ɛnɛ, menli mɔɔ bo 240,000,000 la de maanle mɔɔ tɛ ɛkɛ ne a bɛwole bɛ la anu. Saa ɛle wovolɛ mɔɔ wɔdu wɔhɔ maanle gyɛne zo a, kɛ ɔkɛyɛ na wɔaboa ɛ mra wɔamaa bɛ nee Nyamenle anyia agɔnwolɛvalɛ kpalɛ na bɛayɛ ngakula mɔɔ “lua nɔhalɛ ne anu” ɛ? (3 Dwɔn 4) Na kɛzi awie mɔ bahola aboa ɛ?

3, 4. (a) Kɛzi awovolɛ bahola ayɛ neazo kpalɛ amaa bɛ mra ɛ? (b) Duzu a ɔnle kɛ awovolɛ maa bɛ nye da kɛ bɛ mra bayɛ a?

³ Awovolɛ, bɛ neazo bahola aboa bɛ mra amaa bɛava adenle mɔɔ kɔ dahuu ngoane nu la azo. Saa ɛ mra nwu kɛ ‘ɛfa Belemgbunlililɛ  ne ɛdimoa a,’ bɛbava bɛ nwo bɛado Gyihova anwo zo kɛ ɔbamaa bɛ sa aha bɛ ngyianlɛdeɛ. (Mat. 6:33, 34) Yemɔti mmakpondɛ ninyɛne mgbole. Fa nwonane afoa nu ninyɛne bɔ afɔle kpondɛ sunsum nu anwonyia​—tɛ ye angɔbɛnzi. Mmatwe kakɛ ɛmaa ɛ nwo. Bɛkpondɛ “anwonyia wɔ anwuma”​—Gyihova anyunlu ɛlolɛ​—na tɛ anwonyia, ezukoa dɔɔnwo anzɛɛ “menli anyunlunyia.”​—Kenga Maake 10:21, 22; Dwɔn 12:43.

⁴ Mmayɛ gyima too mɔɔ ɛnnyia mekɛ ɛmmaa ɛ mra a. Maa bɛnwu ye kɛ saa bɛfa Gyihova bɛdimoa dumalielɛ anzɛɛ anwonyia mɔɔ bɛbakpondɛ bɛamaa bɛ nwo anzɛɛ ɛdawɔ la anyunlu a, bɛbamaa ɛ nye alie bɛ nwo kpole. Mmanyia adwenle kɛ ɔwɔ kɛ ngakula kpondɛ ninyɛne maa bɛ awovolɛ amaa bɛ nwo adɔ bɛ. Kakye kɛ, “tɛ mralɛ a kpondɛ ninyɛne sie bɛ awovolɛ a, awovolɛ a kpondɛ sie bɛ mra a.”​—2 Kɔl. 12:14.

5. Duzu ati a ɔwɔ kɛ awovolɛ ka Gyihova anwo edwɛkɛ kile bɛ mra ɛ?

⁵ Kɛ mɔɔ bɛhanle la, menli mɔɔ “vi maanle maanle ne mɔ nee aneɛ ngakyile ne mɔ anu” la ɛlɛba Gyihova ahyehyɛdeɛ ne anu. (Zɛk. 8:23) Noko saa ɛngola ɛnga ɛ mra aneɛ a, ɔyɛ se kɛ ɛbahilehile bɛ nɔhalɛ ne. Ɛ mra a le Baebolo sukoavoma mɔɔ anwo hyia mɔɔ ɛbahola wɔanyia a, na Gyihova mɔɔ ‘bɛbanwu’ ye la bamaa bɛanyia dahuu ngoane. (Dwɔn 17:3) Nwolɛ adenle biala mɔɔ ɛbanyia la, ‘fa kilehile’ bɛ Gyihova anwo debie, amaa bɛanwu ye.​—Kenga Mɛla ne 6:6, 7.

6. Saa ɛ mra sukoa wɔ aneɛ ne a, kɛzi ɔbaboa bɛ ɛ? (Nea mɔlebɛbo nvoninli ne.)

⁶ Ɛ mra ne mɔ bazukoa ɛkɛ ne aneɛ ne wɔ sukulu nee kpalɛ ne azo, noko ɔluakɛ bɛ nee wɔ babɔ adawu dahuu la ati, bɛbazukoa wɔ aneɛ ne. Saa ɛye adawu kpalɛ mɔɔ ɛ nee ɛ mra babɔ la ɛsie ahane a, wɔ aneɛ ne mɔɔ bɛbazukoa la eza baboa bɛ. Aneɛ nwiɔ mɔɔ ɛ mra bɛanwu ye la bamaa bɛ adwenle nu abuke na bɛahola bɛ nee awie mɔ ali ngitanwo. Bie a eza ɔbabuke adenle yeamaa bɛadɛlɛ bɛ ɛzonlenlɛ gyima ne anu. Carolina mɔɔ ye awovolɛ le nyɛvolɛ la se: “Asafo mɔɔ bɛka aneɛ gyɛne mɔɔ mewɔ nu la maa me nye die kpole, ɔyɛ anyelielɛ kɛ melɛboa wɔ ɛleka mɔɔ bɛhyia moalɛ dɔɔnwo la.”

7. Saa ɛnde ɛ mra aneɛ a, duzu a ɛbahola wɔayɛ a?

⁷ Noko mekɛ mɔɔ awovolɛ mɔɔ bɛdu bɛhɔ maanle gyɛne zo la amra ɛlɛnwu ɛkɛ ne amaamuo nee aneɛ ne kpalɛ la, ɛhulolɛ mɔɔ bɛ nuhua bie mɔ lɛ, nee kɛzi bɛkola bɛ nee awie mɔ bɔ adawu wɔ bɛ awovolɛ aneɛ nu la ka aze. Awovolɛ, saa ɛhye le nɔhalɛ wɔ bɛ mra afoa nu a, bɛbahola bɛazukoa ɛkɛ ne aneɛ ne bie ɔ? Saa ɛnwu adawu mɔɔ ɛ mra bɔ, ninyɛne mɔɔ bɛfa bɛdielie bɛ nye, mɔɔ bɛsukoa ye wɔ sukulu na eza ɛkola ɛ nee bɛ kilehilevolɛma di adwelie kpalɛ a, ɔbamaa wɔahola wɔahilehile bɛ wɔamaa bɛayɛ Kilisienema kpalɛ. Nɔhalɛ nu, ɔhyia mekɛ, mɔdenlebɔlɛ nee mɛlɛbɛnwoaze na wɔahola wɔazukoa aneɛ fofolɛ. Noko saa ɛ ra ne yɛle mumule a, asoo anrɛɛ ɛnrɛzukoa mumule aneɛ, na ɛ nee ye ahola ali adwelie ɔ? Zɔhane ala a ɔwɔ kɛ ɛyɛ ɛmaa ɛ ra mɔɔ ɔkola ɔ nee awie mɔ di adwelie kpalɛ wɔ aneɛ gyɛne nu noko a, ɔnle zɔ ɔ? *

8. Saa ɛngola ɛnga ɛ mra aneɛ kpalɛ a, kɛzi ɛbahola wɔaboa bɛ ɛ?

⁸ Nɔhalɛ nu, ɔnrɛhola ɔnrɛra ye kɛ awovolɛ mɔɔ bɛle nyɛvolɛ la bahola aha aneɛ fofolɛ mɔɔ bɛ mra ɛzukoa la kpalɛ. Ngyegyelɛ ɛhye bahola  amaa yeayɛ se kɛ awovolɛ bava “ngɛlɛlera nwuanzanwuanza ne” anu ndelebɛbo mɔɔ anu pi la ahilehile bɛ mra. (2 Tim. 3:15) Saa ɛwɔ tɛnlabelɛ zɛhae anu bɔbɔ a, ɛbahola wɔahilehile ɛ mra wɔamaa bɛanwu Gyihova na bɛahulo ye. Asafo kpanyinli bie mɔɔ bɛfɛlɛ ye Shan la ka kɛ: “Ɛnee yɛ mame mɔɔ ɔ ngome ɔlɛtete yɛ la ɛnde aneɛ mɔɔ yɛka la abo kpalɛ, yɛɛ me nee me diema raalɛ ne ɛngola ɛnga ye aneɛ ne kpalɛ. Noko mekɛ mɔɔ yɛnwunle kɛ ɔsukoa, ɔyɛ asɔne na ɔbɔ mɔdenle ɔyɛ abusua ɛzonlenlɛ dapɛne biala la, yɛnwunle kɛ Gyihova mɔɔ yɛbanwu ye la hyia kpole kpalɛ.”

9. Kɛzi awovolɛ bahola aboa bɛ mra mɔɔ bie a ɔhyia kɛ bɛsukoa debie wɔ aneɛ nwiɔ anu ɛ?

⁹ Bie a ɔwɔ kɛ ngakula bie mɔ sukoa Gyihova anwo debie wɔ aneɛ nwiɔ anu​—mɔɔ bɛka ye wɔ sukulu nee sua nu la. Ɛhye ati, awovolɛ bie mɔ fa mbuluku, ninyɛne mɔɔ bɛbɔ bɛtie nee vidio ngakyile di gyima wɔ aneɛ nwiɔ ne anu. Nɔhalɛ nu, ɔwɔ kɛ awovolɛ mɔɔ bɛle nyɛvolɛ la nyia mekɛ dɔɔnwo maa bɛ mra na bɛdua ndenle ngakyile zo bɛboa bɛ bɛmaa bɛ nee Gyihova nyia agɔnwolɛvalɛ kpalɛ.

10. (a) Nwane a ɔwɔ kɛ ɔsi asafo mɔɔ bɛbahɔ nu la anwo kpɔkɛ a? (b) Duzu a ɔwɔ kɛ ɔdimoa ɔyɛ na yeazi kpɔkɛ kpalɛ a?

¹⁰ Saa “nyɛvolɛ” tu kɔ ɛleka mɔɔ ɔmbikye Alasevolɛ mɔɔ bɛka bɛ aneɛ ne a, ɔwɔ kɛ bɛkɔ debiezukoalɛ wɔ asafo mɔɔ bɛfa ɛkɛ ne aneɛ bɛdi gyima la anu. (Edw. 146:9) Noko saa asafo mɔɔ bɛfa wɔ sua zo aneɛ bɛdi gyima la bikye ɛkɛ a, kpuya ne a le kɛ: Asafo boni a baboa wɔ abusua ne a? Saa abusua tile dwenle nwo kpalɛ, ɔyɛ asɔne na ɔ nee ɔ ye nee mra suzu nwo wie a, ɔwɔ kɛ ɔsi kpɔkɛ. (1 Kɔl. 11:3) Ninyɛne boni mɔ a abusua tile ne bazuzu nwo a? Ngyinlazo boni mɔ a ɔwɔ kɛ ɔfa ɔyɛ gyima a? Bɛmaa yɛzuzu bie mɔ anwo.

11, 12. (a) Kɛzi aneɛ kola ka nvasoɛ mɔɔ kakula bie banyia avi debiezukoalɛ ne mɔ azo la ɛ? (b) Duzu ati a ngakula bie mɔ ɛnzukoa bɛ awovolɛ aneɛ ɛ?

¹¹ Ɔwɔ kɛ awovolɛ suzu bɛ mra ngyianlɛ nwo kpalɛ. Nɔhalɛ nu, ɔnva nwo aneɛ biala mɔɔ kakula bie ka la, amaa yeava nɔhalɛ ne la, saa ɔfa dɔnehwele ekyi bie ɔsukoa Nyamenle anwo debie dapɛne biala wɔ debiezukoalɛ bo a, ɛnee ɔtɛwiele. Noko, suzu ɛhye anwo nea: Saa ngakula kɔ debiezukoalɛ wɔ aneɛ mɔɔ bɛte ɔ bo kpalɛ la anu a, bɛbade ngilehilelɛ ne abo, ɔluakɛ bɛwɔ ɛkɛ ne bie la ati, bie bɔbɔ a bɛbazukoa ninyɛne dɔɔnwo bɛadɛla kɛzi bɛ awovolɛ suzu la. Noko saa ngakula ne mɔ ɛnde aneɛ ne abo kpalɛ a, ɔnrɛra ye zɔ. (Kenga 1 Kɔlentema 14:9, 11.) Bie a kakula bie sua zo aneɛ ɛnrɛyɛ aneɛ mɔɔ ɔbahakye ye dahuu anzɛɛ ɔ nye balie nwo bɔbɔ a. Nɔhalɛ nu, ngakula bie mɔ kola sukoa maa mualɛ, yɛ yɛkile bie mɔ na bɛmaa ɛdendɛlɛ wɔ bɛ awovolɛ aneɛ nu mɔɔ edwɛkɛ ne ɛnvi bɛ ahonle nu a.

¹² Bieko, tɛ aneɛ angomekye a kola ka kakula bie ahonle a. Ɛnee ɛhye le zɔ wɔ Joshua mɔɔ yɛlimoa yɛha ɔ nwo edwɛkɛ la afoa nu. Ɔ diema raalɛ Esther ka kɛ, “wɔ ngakula afoa nu, bɛnnwu ngakyile mɔɔ wɔ bɛ awovolɛ aneɛ, bɛ amaamuo nee bɛ ɛzonlenlɛ nu la.” Saa ngakula ande bɛ awovolɛ amaamuo bo a, bɛnrɛzukoa bɛ aneɛ nee bɛ diedi. Duzu a awovolɛ mɔɔ bɛle nyɛvolɛ la bahola ayɛ a?

13, 14. (a) Kɛmɔti a agyalɛma bie nee bɛ abusua ne hɔle asafo mɔɔ bɛfa ɛkɛ ne aneɛ bɛdi gyima la anu a? (b) Kɛ ɔyɛle mɔɔ awovolɛ ne mɔ anwo yɛle se wɔ sunsum nu ɛ?

¹³ Kilisiene awovolɛ fa bɛ mra ngyianlɛ dimoa mɔɔ bɛdabɛ mumua ne bɛ nye die nwo la anyunlu. (1 Kɔl. 10:24) Joshua nee Esther papa, Samuel ka kɛ: “Me nee me ye  nleanle aneɛ mɔɔ baboa yɛ mra ne mɔ amaa bɛ nee Nyamenle anyia agɔnwolɛvalɛ kpalɛ la, na yɛyɛle asɔne yɛkpondɛle nrɛlɛbɛ. Yɛnwunle aneɛ mɔɔ baboa bɛ la, noko ɛnee ɔbamaa yɛ nwo ahyele yɛ. Mɔɔ yɛnwunle kɛ yɛ sua zo aneɛ mɔɔ bɛfa bɛyɛ debiezukoalɛ ne ɛmboa bɛ kpalɛ la, yɛzile kpɔkɛ kɛ yɛbahɔ asafo mɔɔ bɛfa ɛkɛ ne aneɛ bɛdi gyima la anu. Yɛbɔle nu yɛhɔle debiezukoalɛ nee daselɛlilɛ dahuu. Eza yɛmaanle agɔnwolɛma mɔɔ wɔ ɛkɛ ne la ralile debie wɔ yɛ sua nu na yɛhɔle akpɔsa. Ɛhye mɔ amuala boale yɛ mra ne mɔ ɔmaanle bɛnwunle mediema ne mɔ, nee Gyihova kɛ bɛ Ze nee bɛ Gɔnwo na tɛ kɛ bɛ Nyamenle ala. Yɛbule ɛhye kɛ ɔhyia kpalɛ ɔtɛla yɛ sua zo aneɛ mɔɔ bɛbanwu ye kpalɛ la.”

¹⁴ Samuel toa zo kɛ: “Amaa yɛ nwo ayɛ se wɔ sunsum nu la, me nee me ye hɔle debiezukoalɛ wɔ asafo mɔɔ bɛfa yɛ sua zo aneɛ bɛdi gyima la anu. Ɛnee yɛnlɛ alagye wɔ ɛbɛlabɔlɛ nu, yɛɛ ɛnee yɛfɛ. Noko, yɛda Gyihova ase kɛ yeyila yɛ mɔdenlebɔlɛ nee yɛ afɔlebɔlɛ zo la. Yɛ mra nsa ne amuala ɛlɛsonle Gyihova wɔ dahuu ɛzonlenlɛ gyima ne anu.”

15. Kɛmɔti a adiema raalɛ Kristina dele nganeɛ kɛ asafo mɔɔ bɛfa ɛkɛ ne aneɛ bɛdi gyima la baboa ye ɛ?

¹⁵ Bie a ngakula mɔɔ bɛyɛ mgbanyinli la bɛanwu ye kɛ saa bɛkɔ asafo mɔɔ bɛte aneɛ ne abo kpalɛ la anu a, ɔbamaa bɛazonle Gyihova kpalɛ. Saa zɔhane a ɔde a, ɛnee ɔnle kɛ awovolɛ ne mɔ te nganeɛ kɛ bɛlɛkpo bɛ. Kristina ka kɛ: “Ɛnee mekola meka me awovolɛ aneɛ ne ekyi, noko ɛnee mende mɔɔ bɛka ye wɔ debiezukoalɛ bo la abo kpalɛ. Mɔɔ menyianle ɛvolɛ 12 la, mengɔle nyianu mɔɔ bɛfa me sukulu aneɛ ne bɛdi gyima la bie. Kenle zɔhane menwunle kɛ nɔhalɛ ne a bɛlɛkilehile la! Eza me nye liele kpole wɔ mekɛ mɔɔ membɔle ɔ bo kɛ mefa aneɛ mɔɔ meka wɔ sukulu meayɛ asɔne la. Menvile me ahonle nu mendendɛle mengilele Gyihova!” (Gyi. 2:11, 41) Mɔɔ Kristina yɛle kpanyinli la, ɔ nee ye awovolɛ zuzule nwo na ɔzile kpɔkɛ kɛ ɔkɔ asafo mɔɔ bɛfa ɛkɛ ne aneɛ bɛdi gyima la anu. Ɔka kɛ: “Me sukulu aneɛ ne mɔɔ menvale menzukoale Gyihova anwo debie la maanle menzile kpɔkɛ kpalɛ.” Yeangyɛ Kristina rayɛle adekpakyelɛnli mɔɔ anye die.

16. Kɛmɔti a ɔyɛ adiema raalɛ Nadia fɛ kɛ ɔdɛnlanle asafo mɔɔ bɛfa aneɛ gyɛne bɛdi gyima la anu ɛ?

¹⁶ Ngakula, bɛkulo kɛ bɛkɔ asafo mɔɔ bɛfa ɛkɛ ne aneɛ bɛdi gyima la anu ɔ? Saa ɔle zɔ a, biza ɛ nwo kɛ, duzu ati ɔ? Asafo zɛhae anu mɔɔ ɛbahɔ la baboa wɔ yeamaa wɔabikye Gyihova ɔ? (Gye. 4:8) Fanwodi mɔɔ ɛkpondɛ anzɛɛ ɛmkpondɛ kɛ ɛyɛ gyima dɔɔnwo la ati a ɛkulo kɛ ɛkɔ asafo zɛhae anu ɔ? Nadia, mɔɔ kɛkala sonle wɔ Bɛtɛle la ka kɛ: “Mɔɔ me nee me mediema ne mɔ nyianle ɛvolɛ bulu nee nsa mɔɔ kɔ la, ɛnee yɛkpondɛ kɛ yɛtu yɛkɔ asafo mɔɔ bɛfa ɛleka mɔɔ yɛde la aneɛ bɛdi gyima la anu. Noko ɛnee ye awovolɛ ze kɛ ɛkɛ ne mɔɔ bɛlɛkɔ la ɛnrɛboa bɛ wɔ sunsum nu. Kɛkala, yɛ nye die kɛ yɛ awovolɛ bɔle mɔdenle hilele yɛ bɛ aneɛ ne na eza bɛmaanle yɛdɛnlanle asafo mɔɔ bɛfa aneɛ gyɛne bɛdi gyima anu la. Yemaa yɛ nye ɛlie yɛɛ yɛnyia nwolɛ adenle dɔɔnwo yɛlɛboa awie mɔ yɛamaa bɛanwu Gyihova.”

17. (a) Nwane mɔ a Gyihova ɛva ngakula ɛtetelɛ nwo ɛzonlelilɛ ɛmaa bɛ a? (b) Kɛzi awovolɛ bahola anyia moalɛ na bɛava nɔhalɛ ne bɛatete bɛ mra ɛ?

¹⁷ Gyihova ɛmaa awovolɛ gyima kɛ bɛtete bɛ mra wɔ nɔhalɛ ne anu​—tɛ nana mɔ anzɛɛ awie gyɛne. (Kenga Mrɛlɛbulɛ 1:8; 31:10, 27, 28.) Noko, saa awovolɛ  ɛngola ɛnga ɛkɛ ne aneɛ ne kpalɛ a, bɛbahyia moalɛ na bɛahola bɛadwu bɛ mra ahonle nu. Moalɛ zɛhae mɔɔ awovolɛ bakpondɛ la ɛngile kɛ bɛlɛkpo bɛ ɛzonlelilɛ mɔɔ bɛlɛ la. Emomu, ɔboka bɛ mra mɔɔ bɛfa ‘Gyihova folɛdulɛ nee ye ngilehilelɛ bɛatete bɛ’ la anwo. (Ɛfɛ. 6:4) Kɛ neazo la, awovolɛ bahola amaa asafo nu mgbanyima amaa bɛ nzuzulɛ wɔ kɛzi bɛbayɛ abusua ɛzonlenlɛ na bɛaboa bɛ mra bɛamaa bɛanyia agɔnwolɛma kpalɛ mɔɔ bɛ nee bɛ badu la.

18, 19. (a) Kɛzi mediema mɔɔ bɛbɔ mɔdenle la bahola aboa ngakula ɛ? (b) Duzu a ɔwɔ kɛ awovolɛ kɔ zo yɛ a?

¹⁸ Ɔvi mekɛ mɔɔ kɔ mekɛ la, awovolɛ bahola amaa mbusua bie mɔ araboka bɛ abusua ɛzonlenlɛ ne anwo. Eza, mediema mɔɔ bɛ nee Gyihova lɛ agɔnwolɛvalɛ kpalɛ la kola boa bɛ gɔnwo mɔ ngakula kpalɛ, kɛ neazo la, bɛbahola bɛ nee bɛ ahɔ daselɛlilɛ na bɛabɔ nu bɛalie bɛ nye kɛmɔ ɔfɛta la. (Mrɛ. 27:17) Shan mɔɔ yɛlimoa yɛha ɔ nwo edwɛkɛ la ka kɛ: “Mekakye mediema mrenyia mɔɔ bɛboale me la. Menyia sukoavo gyimalilɛ a, bɛboa me, ɛhye maa mesukoa ninyɛne dɔɔnwo. Eza me nye liele ninyɛne mɔɔ yɛvale yɛliele yɛ nye kɛ ekpunli la anwo.”

¹⁹ Nɔhalɛ nu, ɔwɔ kɛ menli mɔɔ awovolɛ bakpa bɛ kɛ bɛboa bɛ mra ne mɔ la maa ngakula ne nyia ɛbulɛ kpole maa bɛ awovolɛ, bɛka bɛ nwo edwɛkɛ kpalɛ yɛɛ eza ɔnle kɛ bɛdie bɛ ɛzonlelilɛ bɛfi bɛ sa. Bieko, ɔnle kɛ boavolɛma ɛhye mɔ maa asafo ne anu amra anzɛɛ bɛdabɛ mɔɔ bɛnle nu la nyia bɛ nyɛleɛ nwo ngehanleɛ. (1 Pita 2:12) Ɔwɔ nuhua kɛ awovolɛ bahola akpondɛ moalɛ avi awie mɔ ɛkɛ ne ɛdeɛ, noko ɔle awovolɛ mumua ne ɛzonlelilɛ kɛ bɛbahilehile bɛ mra nɔhalɛ ne. Ɔwɔ kɛ bɛmaa bɛ nye kɔ moalɛ biala mɔɔ Kilisienema gyɛne ɛlɛfa aboa bɛ mra ne mɔ la anwo.

20. Kɛzi awovolɛ bahola aboa bɛ mra bɛamaa bɛayɛ Gyihova azonvolɛ kpalɛ ɛ?

²⁰ Awovolɛ, bɛzɛlɛ Gyihova kɛ ɔboa bɛ na bɛyele bɛ nwo. (Kenga 2 Edwɛkɛsisilɛ 15:7.) Fa agɔnwolɛvalɛ mɔɔ ɛ ra nee Gyihova banyia la dimoa wɔ ɛdeɛ ne anyunlu. Bɔ mɔdenle biala maa Nyamenle Edwɛkɛ ne ɛha ɛ ra ne ahonle. Nyia adwenle kɛ ɛ ra ne bahola ayɛ Gyihova sonvolɛ kpalɛ. Saa ɛ mra di Nyamenle Edwɛkɛ ne azo, na bɛsukoa wɔ neazo kpalɛ ne a, ɛbade nganeɛ kɛ ɛzoanvolɛ Dwɔn la, ɔhanle ye wɔ ɔ mra mɔɔ ɔhilehile bɛ nɔhalɛ ne la anwo kɛ: “Debie biala ɛnyɛ me anyelielɛ ɛndɛla ɛhye: kɛ mekɛde kɛ me mra ne mɔ lua nɔhalɛ ne anu.”​—3 Dwɔn 4.