Bɛbɔle Blessing * ɛwɔkɛ kɛ saa ɔdwu abolokyi a bɛbamaa yɛayɛ enrinli. Noko bɛbole ye too kenle bulu na bɛnwunlonwunlanle ye kɛ saa yeambɔ tuutuu a, bɛbayɛ ye abusua ne basabasa.

Amaa Blessing ahola adua euro * 40,000 kakɛ mɔɔ ɔ menle ne ɛpɛ ɛmaa ye la ɛnee ɔwɔ kɛ nɔsolɛ biala ɔnyia euro 200 kɔdwu 300. Blessing ka kɛ, “Ɔyɛ a menyia adwenle kɛ menriandi, noko ɛnee mesulo mɔɔ bɛbava bɛayɛ me abusua ne la. Ɛnee medɔ ɛhane nu.” Ye edwɛkɛ ne le kɛ menli mgbe nna bie mɔɔ bɛyɛ ngɛkɛlɛ wɔ ewiade amuala tuutuu gyima nu la.

Ɛvolɛ kɛyɛ 4,000 mɔɔ ɛze la, kpavolɛ bie mɔɔ bɛfɛlɛ ye Dwosefi la amediema ne mɔ dɔnenle ye. Ɔyɛle akɛlɛ wɔ Yigyibitinli bie mɔɔ lɛ dibilɛ kpole la sua nu. Bɛangile Dwosefi nyane wɔ alimoa ne kɛ mɔɔ bɛyɛle Blessing la. Noko bɛdole ye efiade na bɛvale bulalɛ bɛzɔle ye ɔluakɛ ɔmenle aye ne dole ye ɛzonle kɛ yedo ye bɔna.—Mɔlebɛbo 39:1-20; Edwɛndolɛ 105:17, 18.

Ɛnee Dwosefi le akɛlɛ wɔ tete ne; na Blessing le akɛlɛ wɔ ɛvoya 21 ye anu. Menli ɛdɔnenlɛ a dole bɛ mu nwiɔ a. Gyima ɛhye maa bɛbu menli kɛ ninyɛne, ɔmmaa bɛndwenle bɛ nwo kɛ bɛ nvasoɛ ne ala.

Konle rayɛle adenle sikalɛ mɔɔ bɛdua zo bɛnyia ngɛkɛlɛ a. Bɛkile kɛ Yigyibiti Belemgbunli Thutmose III vale pilizama 90,000 rale ye maanle nu wɔ mekɛ mɔɔ ɔ nee Keenama hɔhonle la. Bɛmaanle bɛyɛle ngɛkɛlɛ gyima wɔ ɛleka mɔɔ bɛtu nvutuke, bɛsisile ɛzonlenle azua na bɛdule ahuma mɔɔ nzule dua nu.

 Wɔ Wulomu Tumililɛ ne abo, konle maanle bɛnyianle ngɛkɛlɛ dɔɔnwo, na ɔyɛ a ngɛkɛlɛ ti bɛkɔ konle. Mgbondabulɛ kile kɛ, ɛnee menli mɔɔ bɛwɔ Wulomu maanle ne anu la anu kɛyɛ foa ko le ngɛkɛlɛ. Bɛhilele Yigyibitima nee Wulomu ngɛkɛlɛ nyane dɔɔnwo. Kɛ neazo la, ɛnee ngɛkɛlɛ mɔɔ bɛyɛ gyima wɔ ɛleka mɔɔ bɛtu nvutuke la ngoane mekɛ le kɛyɛ ɛvolɛ 30 ala.

Mekɛ ɛlɛkɔ la, akɛlɛyɛlɛ rayɛle gyima kpole. Ɔvi ɛvoya 16 kɔdwu ɛvoya 19 ne, ngɛkɛlɛ mɔɔ bɛtɔ bɛ wɔ Afrika bɛkɔ Amerika la yɛle gyima kpole mɔɔ ezukoa wɔ nu. UNESCO bɔ amaneɛ kɛ, ‘bɛwuale mrenyia, mraalɛ nee ngakula mɔɔ bayɛ mgbe 25 kɔdwu mgbe 30 bɛdɔnenle bɛ.’ Mɔɔ bɛpɛ Atlantic nyevile ne la, menli dɔɔnwo wule. Olaudah Equiano, mɔɔ le akɛlɛ mɔɔ nyianle ngoane la bɔ amaneɛ kɛ: “Mraalɛ mɔɔ ɛlɛteɛdea nu nee bɛdabɛ mɔɔ bɛlɛwu la ɛzunlɛ ne maanle tɛnlabelɛ ne yɛle alɔbɔlɛ somaa mɔɔ ɛnnwu kɛzi ɛkile nu a.”

Ɔyɛ alɔbɔlɛ kɛ, akɛlɛzonlenlɛ tɛkɔ zo la. Kɛ mɔɔ Maanle Maanle Gyimayɛlɛ Fane ne kile la, mrenyia, mraalɛ nee ngakula kɛyɛ mgbe 21 yɛ gyima kɛ ngɛkɛlɛ mɔɔ bɛmaa bɛ ezukoa ekyii bie ala anzɛɛ bɛmmaa bɛ ɛhwee. Adwuleso ngɛkɛlɛ yɛ gyima wɔ ɛleka mɔɔ bɛtu nvutuke, ɛleka mɔɔ bɛnwo ndanlɛ, bɛgua belekese, tuutuuma azua nu yɛɛ wɔ awie mɔ azua nu. Ɔtia mɛla ɛdeɛ, noko akɛlɛyɛlɛ ɛhye ɛlɛkɔ ɔ nyunlu.

Atisesebɛ mɔɔ bɛyɛ bɛ la maa ngɛkɛlɛ dɔɔnwo ko kɛ bɛkɛnyia fanwodi. Wɔ ɛvoya mɔɔ limoa K.Y.M., kovolɛ Spartacus nee ngɛkɛlɛ 100,000 bie mɔ dele atua tiale Wulomuma, noko yeanyɛ boɛ. Wɔ ɛvoya 18 ne anu, ngɛkɛlɛ mɔɔ bɛwɔ Caribbean bɔra ne mɔɔ wɔ Hispaniola azo la dwazole tiale bɛ menle mɔ. Amaneɛ mɔɔ ngɛkɛlɛ ne mɔ nwunle ye wɔ akɛnla ɛya nu la maanle bɛhonle too ɛvolɛ 13 na awieleɛ ne, Haiti maanle ne nyianle ye fanwodi wɔ 1804.

Akɛlɛzonlenlɛ mɔɔ Yizilayɛma vile nu wɔ Yigyibiti la le konimlilɛ mɔɔ tɛla biala wɔ tetedwɛkɛ nu. Menli mɔɔ bayɛ mgbe nsa mɔɔ bɛle maanle mumua la a vile akɛlɛzonlenlɛ nu wɔ Yigyibiti a. Ɛnee ɔfɛta kɛ bɛnyia fanwodi. Baebolo ne hanle asetɛnla mɔɔ ɛnee bɛwɔ nu la anwo edwɛkɛ kɛ, “bɛyɛle Yizilayɛma kpoyokpoyo” anzɛɛ bɛyɛle bɛ atisesebɛ bɛmaanle bɛyɛle gyima ɛsesebɛ. (Adendulɛ 1: 11-14) Falo ne mɔ anu ko lile mɛla kɛ bɛhu mbɔdɔma amaa Yizilayɛma anwo anzo somaa.—Adendulɛ 1:8-22.

Yizilayɛma mɔɔ vile akɛlɛzonlenlɛ bo wɔ Yigyibiti la ɛnee le ngakyile, ɔluakɛ Nyamenle mumua ne a liele bɛ a. Nyamenle zele Mosisi kɛ, “Meze bɛ amaneɛnwunlɛ ne, na mera kɛ mebalie bɛ.” (Adendulɛ 3:7, 8) Badwu ɛnɛ, Dwuuma mɔɔ wɔ ɛleka biala la di Akpabɛnwo ne ɛvolɛ biala bɛfa bɛkakye kenle zɔhane.—Adendulɛ 12:14.

Baebolo ne ka kɛ, “[Gyihova] yɛ Nyamenle ne ɛnli mɔguazo”, yɛɛ ɔtɛkakyile. (2 Edwɛkɛsisilɛ 19:7; Malakae 3:6) Nyamenle zoanle Gyisɛse kɛ ‘ɔrabɔ fanwodi nwo nolo ɔhile bɛdabɛ mɔɔ bɛwɔ akɛlɛzonlenlɛ nu la, . . . , na bɛdabɛ mɔɔ bɛlɛsisi bɛ la anwo adɔ bɛ.’ (Luku 4:18) Asoo ɛhye kile kɛ akɛlɛ biala banyia fanwodi ɔ? Kyɛkyɛ. Bɛzoanle Gyisɛse kɛ ɔralie menli ɔvi ɛtane nee ewule akɛlɛyɛlɛ bo. Nzinlii ɔhanle kɛ: “Nɔhalɛ ne bamaa bɛanyia fanwodi.” (Dwɔn 8:32) Ɛnɛ bɔbɔ, nɔhalɛ ne mɔɔ Gyisɛse hilehilele la die menli wɔ ndenle ngakyile dɔɔnwo azo.—Nea ɛlɛka “ Menvile Akɛlɛzonlenlɛ Gyɛne Bo.”

Nɔhalɛ nu, Nyamenle boale Dwosefi nee Blessing maanle bɛvile akɛlɛzonlenlɛ nu. Ɛbanwu Dwosefi anwo edwɛkɛ ne wɔ Baebolo ne anu, wɔ Mɔlebɛbo tile 39 kɔdwu 41. Fanwodi mɔɔ ɛnee Blessing ɛlɛkpondɛ la yɛ nwanwane.

Mekɛ mɔɔ bɛdule Blessing bɛvile Europe maanle bie anu la, ɔhɔle Spain. Ɔyiale Gyihova Alasevolɛ na ɔbɔle ɔ bo kɛ ɔ nee bɛ sukoa Baebolo ne. Ɔzile kpɔkɛ kɛ ɔbahakyi ye ɛbɛlabɔlɛ, ɔnyianle gyima na ɔhanle ɔhilele ye gyimamenle dɛba ne kɛ ɔde ye kakɛ ne mɔɔ ɔtua ye siane biala la azo. Kenle ko bie, Blessing gyimamenle dɛba ne vɛlɛle ye wɔ fonu zo. Ɛnee ɔkulo kɛ ɔfa Blessing kakɛ ne ɔkyɛ ye na ɔsɛlɛ ɛtane fakyɛ. Boni a zile a? Ɔdaye noko yebɔ ɔ bo ɔ nee Gyihova Alasevolɛ ɛlɛsukoa Baebolo ne! Blessing ka kɛ, “Nɔhalɛ ne maa yɛnyia fanwodi wɔ ndenle mɔɔ yɛ nwanwane la azo.”

Kɛmɔ Gyihova Nyamenle lile nyane wɔ atisesebɛ mɔɔ bɛvale bɛyɛle ye menli wɔ Yigyibiti la, zɔhane ala a ɔte nganeɛ ɛnɛ a. Nɔhalɛ nu, amaa akɛlɛzonlenlɛ biala ara awieleɛ la, ɔwɔ kɛ nzenzaleɛ kpole ba. Na Nyamenle ɛbɔ ɛwɔkɛ kɛ ɔbava nzenzaleɛ ɛhye yeara. “Kɛ mɔɔ ye ɛwɔkɛ ne kile la, yɛlɛkendɛ anwuma fofolɛ nee azɛlɛ fofolɛ, na ɛhye mɔ anu a tenleneyɛlɛ badɛnla a.”—2 Pita 3:13