Ɛhɛe, anwumabɔvolɛma ɛtane wɔ ɛkɛ. Bɛvi ni? Kakye kɛ Nyamenle bɔle anwumabɔvolɛ ne mɔ mɔɔ bɛkola bɛyɛ mɔɔ bɛkulo a. Mekɛ mɔɔ bɛbɔle nrenyia nee raalɛ mɔɔ limoa, Adam nee Yive la, sunsum nu abɔdeɛ bie vale nwolɛ adenle mɔɔ ɔlɛ ɔsi ɔ ti anwo kpɔkɛ la lile gyima wɔ adenle ɛtane zo vale atuadelɛ rale azɛlɛ ye azo. Ɔmaanle Adam nee Yive yɛle Nyamenle anwo anzosesebɛ. (Mɔlebɛbo 3:1-7; Yekile 12:9) Baebolo ne ambɔ anwumabɔvolɛ ɛhye duma anzɛɛ ekpunli mɔɔ ɛnee ɔwɔ nu wɔ anwuma kolaa na yɛayɛ anzosesebɛ la. Noko wɔ ye atuadelɛ ne anzi, Baebolo ne vɛlɛle ye Seetan mɔɔ kile “Dwazotiavolɛ” yɛɛ Abɔnsam mɔɔ kile “Sokpavolɛ.”​—Mateyu 4:8-11.

Ɔyɛ alɔbɔlɛ kɛ, atuadelɛ na abo ampɛ ɛkɛ ne ala. Wɔ Nowa mekɛ zo, anwumabɔvolɛma bie mɔɔ bɛambɔ bɔ dodo la ‘kpole bɛ tɛnlabelɛ ne mɔɔ fɛta’ wɔ anwuma la. Bɛrale azɛlɛ ye azo bɛravale sonla nwonane bɛkpolole amaa bɛahola bɛabɔ adwɔmane ɛbɛla. Bɛminlile bɛvile deɛmɔti bɛbɔle bɛ la anwo.​—Dwuudu 6; Mɔlebɛbo 6:1-4; 1 Pita 3:19, 20.

Duzu a dole bɛ a? Mekɛ mɔɔ Nyamenle vale azuyilɛ ne razɛkyele ewiade ne la, bɛhakyile na bɛziale bɛhɔle sunsum nu ɛleka. Noko akee, Nyamenle ammaa anwumabɔvolɛ ɛhye mɔ adenle yeamaa bɛanzia bɛangɔ “ɛleka mɔɔ ɛnee bɛde wɔ mɔlebɛbo” ne la. Emomu ɔvale bɛ ɔguale sunsum nu “awozinli kabii” bie mɔɔ bɛfɛlɛ ye Tatalɛse la anu. (Dwuudu 6; 2 Pita 2:4) Mbɔnsam ɛhye mɔ hɔveale Seetan Abɔnsam, “sunsum ɛtane ne mɔ kpanyinli” ne mɔɔ “yɛ ɔ nwo kɛ wienyi nu anwumabɔvolɛ” la tumi bo.​—Mateyu 12:24; 2 Kɔlentema 11:14.

Baebolo ne kilehile kɛ Nyamenle vale Mɛzaya Belemgbunlililɛ ne, anwuma arane ne ziele ɛkɛ wɔ 1914. * Ɛhye anzi bɛdule, Seetan nee ye sunsum evinli ne mɔ bɛvile anwuma bɛguale azɛlɛ ye azo. Amumuyɛyɛlɛ nee ɛbɛlatane mɔɔ ɛbu zo wɔ azɛlɛ ye azo la maa yɛnwu kɛzi bɛ ti yɛ se la.​—Yekile 12:9-12.

Noko akee, ninyɛne ɛzulolɛ mɔɔ sisi la maa yɛnwu kɛ bɛ ɛzɛkyelɛ mekɛ ɛbikye. Ɔnrɛhyɛ bɛbaye sunsum nu abɔdeɛ atisesebɛma ɛhye mɔ bavi ɛkɛ ne bɔkɔɔ. Wɔ ɛvolɛ 1,000 tumililɛ ne anzi, bɛbamaa sunsum evinli atisesebɛma ɛhye mɔ nwolɛ adenle mɔɔ li awieleɛ bɔkɔɔ amaa bɛazɔ alesama bɛanlea. Akee bɛbazɛkye bɛ bɔkɔɔ.​—Mateyu 25:41; Yekile 20:1-3, 7-10.