MGBAVOLƐ NEE MBƐLƐRA
12: Bodane
MƆƆ ƆKILE LA
Bodane mɔɔ ɛfa wɔazie ɛ nye zo la ɛnle ɛlalɛ bie ala—debie mɔɔ ɛ kunlu a anrɛɛ ɔbara nu la. Bodane kpalɛ hyia ngyehyɛleɛ, adwenle kpalɛ nee gyima ɛsesebɛyɛlɛ.
Bodane bie mɔ wɔ ɛkɛ mɔɔ ɔngyɛ na bɛadwu nwo (bie a ɔbali kenle anzɛɛ dapɛne ekyi na wɔadwu nwo), bie noko kyɛ ekyi (bie a ɔbali aziane) yɛɛ bie noko kyɛ kpalɛ (bie a ɔbali ɛvolɛ ko anzɛɛ mɔɔ bo zɔ la). Ɔhyia kɛ yɛfa bodane ngyikyingyikyi yɛsie yɛ nye zo amaa yɛahola yɛadwu bodane mɔɔ kyɛ la anwo.
DEƐMƆTI ƆHYIA LA
Saa ɛfa bodane ɛsie ɛ nye zo na ɛdwu nwo a, ɔmaa ɛnyia anwodozo wɔ wɔ nu, ɛnyia agɔnwolɛma kpalɛ na ɛ nye die kpalɛ.
Anwodozo: Saa ɛfa bodane ngyikyi ɛsie ɛ nye zo na ɛdwu nwolɛ a, ɔmaa ɛnyia anwodozo ɛfa bodane mgbole ɛsie ɛ nye zo. Eza ɔmaa ɛnyia anwodozo kpole ɛgyinla ngyegyelɛ mɔɔ ɛyia ye alehyenlɛ ko biala la anloa—le kɛ atipɛnema ngyegyelɛ.
Agɔnwolɛma: Menli anye die bɛdabɛ mɔɔ bɛfa bodane bɛsie bɛ nye zo na bɛpele bɛdwu nwo la anwo. Bieko, adenle kpalɛ ko mɔɔ ɛbahola wɔalua zo wɔamia agɔnwolɛvalɛ mɔɔ ɛ nee awie mɔ lɛ anu la a le kɛ, ɛ nee bɛ babɔ nu ali bodane ko anwo gyima.
Anyelielɛ: Saa ɛfa bodane ɛsie ɛ nye zo na ɛkola ɛdwu nwolɛ a, ɔmaa ɛ nye die kpalɛ.
“Me nye die nwo kɛ mebava bodane meazie me nye zo. Ɔmaa menyia debie meyɛ ye dahuu yɛɛ ɔmaa menyia debie mepele medwu nwo. Yɛɛ saa ɛdwu bodane bie anwo a, ɔmaa ɛ nye die na ɛka kɛ, ‘Wow, mehola meyɛ ɛhye! Mehola meyɛ mɔɔ menvale menziele me nye zo la.’”—Christopher.
BAEBOLO NGYINLAZO: “Sonla mɔɔ nea anwoma ne la ɛnrɛlua ma, yɛɛ sonla mɔɔ nea amungu ne la ɛnrɛde ma.”—Nolobɔvo 11:4.
MƆƆ ƐBAHOLA WƆAYƐ LA
Amaa wɔahola wɔava bodane wɔazie ɛ nye zo na wɔadwu nwo la, fa nzuzulɛ mɔɔ doɔdoa zo la yɛ gyima.
Nwu wɔ bodane ne mɔ. Kɛlɛ bodane mɔɔ ɛkulo kɛ ɛdwu nwo la na hyehyɛ bɛ—fa mɔɔ ɛkulo kɛ ɛdimoa ɛdwu nwo la dimoa na fa mɔɔ ɛha la toɔdoa zo.
Yɛ ngyehyɛleɛ. Wɔ bodane ko biala anwo, yɛ ninyɛne mɔɔ doɔdoa zo la:
-
Kile mekɛ mɔɔ ɛbava wɔali nwolɛ gyima wɔawie la.
-
Yɛ ninyɛne mɔɔ ɔwɔ kɛ ɛyɛ amaa wɔadwu nwolɛ la anwo ngyehyɛleɛ.
-
Dwenle ngyegyelɛ mɔɔ ɛbahola wɔayia nee kɛzi ɛbali nwolɛ gyima la anwo.
Yɛ nwolɛ debie. Mmakendɛ kɛ ɛbanyia debie biala mɔɔ fale mɔɔ ɛkulo kɛ ɛyɛ la anwo kolaa na wɔabɔ ɔ bo. Biza ɛ nwo kɛ, ‘Debie mɔɔ limoa mɔɔ ɔwɔ kɛ meyɛ amaa meadwu me bodane nwo la a le boni?’ Akee bɔ ɔ bo. Nea anyuhɔlɛ mɔɔ wɔnyia wɔ mekɛ mɔɔ ɛbava nzuzulɛ ko biala wɔayɛ gyima wɔawie la.
BAEBOLO NGYINLAZO: “Sonla mɔɔ bɔ mɔdenle yɛ gyima la ngyehyɛleɛ bawie boɛ.”—Mrɛlɛbulɛ 21:5.
Bie A Eza Ɛ Nye Balie
MƆƆ Ɛ TIPƐNEMA KA LA
Ɛbɛlabɔlɛ Kpalɛ Mɔɔ Tɛla Biala
Ɛlɛkpondɛ ɛbɛlabɔlɛ mɔɔ yɛ anyelielɛ la ɔ? Tie kɛzi Cameron nyianle ɛhye wɔ ɛleka mɔɔ ɔ nye ɛnla la.
MGBAVOLƐ NEE MBƐLƐRA BIZA KƐ
Kɛ Ɔkɛyɛ Na Meakpa Awie Mɔɔ Mebazukoa Ye La Ɛ?
Awie mɔɔ ɛsukoa ye la bahola aboa wɔ yeamaa wɔahoati ngyegyelɛ, wɔadwu wɔ bodane nwo na yeawie wɔ boɛ wɔ ɛbɛlabɔlɛ nu. Noko nwane a ɔwɔ kɛ ɛdi ye neazo nzi a?
