“Nyamenle bamaa maanle ko avinde, na ɔbahomo maanle zɔhane mɔ anwo zo yeamaa bɛagolo. Maanle ɛhye badɛnla ɛkɛ ne dahuu, awie ɛnrɛhola ɛnrɛzɛkye ye kenle bie maanle nu, yɛɛ awie mɔ gyɛne ɛnrɛhola ɛnrɛlie maanle ne ɛnrɛbu.”—Daneɛle 2:44.

Nyamenle Belemgbunlililɛ ne le anwuma arane. Gyisɛse Kelaese mɔɔ bɛkpa ye kɛ zolɛ Belemgbunli la baye alesama tumililɛ kɔsɔɔti avi ɛkɛ na yeamaa bɛayɛ Nyamenle ɛhulolɛdeɛ wɔ azɛlɛ ye azo kɛmɔ bɛyɛ ye wɔ anwuma la. (Mateyu 6:9, 10) Dasanli arane biala ɛnrɛdu arane ɛhye ɛnrɛvi ɛkɛ ɔluakɛ ɔle “yɛ Awulae nee Dievolɛ Gyisɛse Kelaese belemgbunlililɛ mɔɔ ɛmbɔ aze ɛlɛ la.” Ɔbamaa anzondwolɛ adɛnla ɛkɛ ne dahuu.—2 Pita 1:11.

“Seetan bɔbɔ kola kakyi ɔ nwo yɛ kɛ ɔle wienyi nu soanvolɛ. Yemɔti ɔnyɛ ɛzulolɛ kɛ Seetan sonvolɛma kɛhakyi bɛ nwo kɛ bɛle Nyamenle sonvolɛma kpalɛ a. Bɛbanyia ninyɛne mɔɔ bɛyɛ la anwo ahatualɛ mɔɔ fɛta la wɔ awieleɛ ne.”—2 Kɔlentema 11:14, 15.

Adalɛ ɛzonlenlɛ nwo bala ali kɛ Abɔnsam gyima na bɛaye ye bɛavi azɛlɛ ne azo. Ɛzonlenlɛ nu kyengyeyɛlɛ nee mogyahwilɛ biala bavi ɛkɛ. Ɛhye bamaa menli kɔsɔɔti mɔɔ kulo “nɔhalɛ nee tease Nyamenle ne la” azonle ye wɔ “diedi ko” nee “sunsum nu nee nɔhalɛ nu.” Anzondwolɛ nee koyɛlɛ boni a le ɛhye!—1 Tɛsalonaekama 1:9; Ɛfɛsɛsema 4:5; Dwɔn 4:23.

“Nyamenle mumua ne nee bɛ badɛnla na yeayɛ bɛ Nyamenle. Ɔbakyikyi bɛ nye anwo monle. Ewule ɛnle ɛkɛ bieko, monle ɛnle ɛkɛ, nyane ɛnle ɛkɛ, ɛzunlɛ ɛnle ɛkɛ ne bieko. Ɔluakɛ alumua ninyɛne ne mɔ ɛze ɛhɔ.”—Yekile 21:3, 4.

Gyihova Nyamenle ɛmaa ɛhye ɛyɛ zɔ ɔlua ɔ Ra, Gyisɛse, mɔɔ vale ye ngoane manle alesama la azo. (Dwɔn 3:16) Ɔlua Gyisɛse adehilelɛ zo, bɛbamaa alesama ali munli. Amaneɛnwunlɛ bavi ɛkɛ ɔluakɛ “Nyamenle mumua ne nee bɛ badɛnla” na yeakyikyi “bɛ nye anwo monle.” Ɔnrɛhyɛ, alesama sinlidɔlɛ nee amaneɛnwunlɛ bapɛ nu aze; “tenlenema bava azɛlɛ  ne ayɛ bɛ ɛdeɛ, na bɛadɛnla zolɛ dahuu.”—Edwɛndolɛ 37:29.

“[Gyisɛse Kelaese] hyele nane anwo ɛzulolɛ ne mɔɔ le kɛ ɛlɛnrɛne la, ɛwɔlɛ dɛba ne, mɔɔ bɛfɛlɛ ye Abɔnsam anzɛɛ Seetan la, na ɔguale ye anga mɔɔ kyesɛ ɛvolɛ apenle ko pɛ nu kolaa na bɛazianyi ye la. Nyamenle soanvolɛ ne vuandinle ye dole azɛlɛ kuma ne mɔɔ ɛnlɛ ɔ bo la anu, ɔhanle kuma ne ɔnwinle nwolɛ, na ɔzɔle ɔ nloa, amaa yeangola finde na yeabɛlɛbɛla maanle maanle bieko.”—Yekile 20:2, 3.

Sunsum ɛtane nyɛleɛ kɔsɔɔti bavi ɛkɛ wɔ mekɛ mɔɔ bɛbagua Seetan nee sunsum ɛtane ne mɔ anga na bɛavuandi bɛ bɛagua “azɛlɛ kuma ne mɔɔ ɛnlɛ ɔ bo,” mɔɔ le tɛnlabelɛ mɔɔ bɛngola bɛnyɛ ɛhwee la anu. Bɛnrɛva bɛ tumi ɛtane ne bɛnrɛgyegye alesama bieko. Nea kɛzi yɛ nwo badɔ yɛ kɛ yɛwɔ ewiade mɔɔ Seetan nee sunsum ɛtane ne mɔ tumi ɛnle nu la anu ɛ!

“Awieleɛ mekɛ ne” bara ye awieleɛ wɔ mɔɔ Gyisɛse vɛlɛle ye kɛ ‘anwongyelelɛ kpole’ ne la awieleɛ. Ɔhanle kɛ: “Ɔluakɛ anwongyelelɛ mɔɔ bara mekɛ zɔhane ne anu la, ye ɛzulolɛ, sumunli kɛ ewiade bɔle ɔ bo dedee mɔɔ yeradwu ɛnɛ la, bie ɛtɛsile ɛlɛ, yɛɛ bie noko ɛnrɛzi ɛlɛ na aloa abɔ.”—Mateyu 24:21.

Anwongyelelɛ ne bayɛ kpole ɔluakɛ munzule dɔɔnwo basisi. Ɛhye mɔ bɛara awieleɛ wɔ “Nyamenle Bedevinli ne Kenle kpole ne” mɔɔ bɛfɛlɛ ye “Amagɛdɔn” la anu.—Yekile 16:14, 16.

Menli mɔɔ wɔ ɛleka biala mɔɔ kulo mɔɔ debie kpalɛ la anye la ngyehyɛleɛ ɛtane ɛhye awieleɛ ade. Suzu nyilalɛ mɔɔ Nyamenle Belemgbunlililɛ ne ba a yɛbanyia la ekyi anwo nea.

Bɛbalie “menli pemgbenleamgbe” bahɔ anzondwolɛ ewiade fofolɛ nu: Nyamenle Edwɛkɛ ne ka “menli pemgbenleamgbe” mɔɔ bɛnze bɛ dodo mɔɔ “bɛho bɛdɔ zolɛ wɔ amaneɛnwunlɛ kpole ne anu” na bɛbalie bɛ ngoane bɛahɔ tenlene ewiade fofolɛ ne anu la anwo edwɛkɛ. (Yekile 7:9, 10, 14; 2 Pita 3:13) Bɛbahile kɛ bɛ ngoanelielɛ vi Gyisɛse Kelaese mɔɔ le ‘Nyamenle Boaneralɛ ne mɔɔ ɔbava yeabɔ afɔle yeaye ewiade amra ɛtane yeahɔ la’ ɛkɛ.—Dwɔn 1:29.

Anwuma ngilehilelɛ bava nvasoɛ dɔɔnwo ara: Wɔ ewiade fofolɛ ne anu, “[Gyihova] anwo adwenle bayi azɛlɛ ye tɛkɛɛ.” (Ayezaya 11:9) Mɔɔ boka anwuma ngilehilelɛ ne anwo la a le ndetelɛ mɔɔ bahile kɛzi yɛ nee menli kɔsɔɔti badɛnla anzondwolɛ nu na eza yɛanlea azɛlɛ ne boɛ la. Nyamenle ɛbɔ ɛwɔkɛ kɛ: ‘Medame a mele Gyihova bɛ Nyamenle ne, mɔɔ kilehile bɛ maa bɛyɛ kpalɛ, na ɔdi bɛ nyunlu ɔkilehile bɛ adenle mɔɔ ɔwɔ kɛ bɛdua nu la.’—Ayezaya 48:17.

Bɛbadwazo alɔvolɛ mɔɔ bɛwu la bɛavi nla nu: Mekɛ mɔɔ Gyisɛse wɔ azɛlɛ ye azo la, ɔdwazole ɔ gɔnwo Lazalɛse ɔvile ewule nu. (Dwɔn 11:1, 5, 38-44) Yemɔti ɔhilele debie mɔɔ ɔbayɛ ye kpole kpalɛ wɔ Nyamenle Belemgbunlililɛ ngyehyɛleɛ ne abo la. —Dwɔn 5:28, 29.

Anzondwolɛ nee tenleneyɛlɛ badɛnla ɛkɛ ne dahuu: Wɔ Kelaese tumililɛ bo, amumuyɛma ɛnrɛdɛnla ɛkɛ ne bieko. Kɛzi yɛnwu ye zɔ ɛ? Ɔboalekɛ Gyisɛse kola nwu ahonle nu ɔbava zɔhane tumi ne yeabua tenlenema nee ɛtanevolɛma ndɛne. Bɛnrɛmaa menli mɔɔ kɛkpo kɛ bɛnrɛgyakyi bɛ amumuyɛ ndenle ne mɔ la ɛnrɛdɛnla Nyamenle ewiade fofolɛ ne anu.—Edwɛndolɛ 37:9, 10; Ayezaya 11:3, 4; 65:20; Mateyu 9:4.

Yɛzuzu Baebolo ngapezo dɔɔnwo ne anu ekyi bie ala mɔɔ maa yɛnwu kɛ mekɛ kpalɛ la yɛ nyunlu la anwo. Saa Nyamenle Belemgbunlililɛ ne ɛlɛdi tumi wɔ azɛlɛ ye azo a, ‘anyelielɛ’ nee anzondwolɛ badɛnla ɛkɛ ne dahuu. (Edwɛndolɛ 37:11, 29) Nyane nee amaneɛnwunlɛ kɔsɔɔti mɔɔ gyegye alesama la bavi ɛkɛ. Nyamenle mumua ne edwɛkɛ bɔ nwolɛ ɛwɔkɛ kɛ: “Kɛkala, meyɛ ninyɛne kɔsɔɔti fofolɛ! . . . Edwɛkɛ ɛhye mɔ le nɔhalɛ yɛɛ bɛfa bɛ rɛle bɛto zolɛ a ɔyɛ boɛ.”—Yekile 21:5.