Baebolo ne ka kɛ ɛnee bɛfa kolɔbo anzɛɛ alo bɛmaa ninyɛne nu bɔ evuanlɛ. (Edwɛndolɛ 45:8; Mrɛlɛbulɛ 7:17; Sɔlɔmɔn Edwɛne 4:14) Ɔbayɛ kɛ Agarwood ne a ɛnee bɛfa bɛyɛ alo ne mɔɔ wɔ Baebolo mekɛ zo la a. Baka ne ɛlɛkpɔlɔ a bɛnyia nwole nee nyile evuanlɛ bɛfi nu. Ɛnee bɛti baka ne bɛyɛ ye pawoda, na akee bɛadɔne ye kɛ “alo.”

Baebolo ne fa Yizilayɛ ndanlɛ azua toto “alo mbaka mɔɔ [Gyihova] ɛlua la anwo.” (Ɛdianlɛ 24:5, 6) Ɛhye gyi ɛkɛ maa kɛzi Agarwood baka ne, mɔɔ ye tendenle kola dwu mita 30 na ɔtɛdɛlɛ ɔ nwo de la. Bɛnnwu baka ɛhye wɔ Yizilayɛ ɛnɛ ɛdeɛ, noko A Dictionary of the Bible ka kɛ “debie biala ɛnle ɛkɛ mɔɔ kile kɛ baka ɛhye nee gyɛne mɔɔ bɛnle maanzinli ɛhye anu la, ɛnee bie ɛnle Dwɔdan Bɔnza ne mɔɔ mbaka dɔɔnwo kye wɔ ɛkɛ la anu a.”

Nyamenle Mɛla ne hanle kɛ afɔle kɔsɔɔti mɔɔ bɛbɔ wɔ ɛzonlenlɛ sua ne anu la ɔwɔ kɛ di munli kpalɛ. Nyamenle ɛnlie afɔlebɔlɛ mɔɔ dɛne wɔ nwolɛ la ɛndo nu. (Adendulɛ 23:19; Sɛlɛvolɛma 22:21-24) Kɛmɔ Philo, mɔɔ le ɛvoya ne mɔɔ lumua Y.M. Dwuuma kɛlɛvolɛ kile la, ɛnee ɛsɔfoma mɔɔ wɔ ɛkɛ wɔ zɔhane mekɛ ne la neɛnlea nane biala anwo “vi ɔ ti zo kɔdwu ɔ gyakɛ anwo” na bɛnwu ye kɛ bɛte kpɔkɛ mɔɔ “nganlɛ anzɛɛ dɛne biala ɛnle bɛ nwo a.”

Nwomanli E. P. Sanders ka kɛ, bie a asɔne mgbanyima ne mɔ “manle menli mɔɔ bɛtɔne ninyɛne mɔɔ bɛfa bɛbɔ afɔle la tumi kɛ bɛdɔne nane nee nloma mɔɔ ɛsɔfo ne mɔ ɛnleɛnlea bɛ nwo ɛwie la angome. Wɔ adenle ɛhye azo, menli mɔɔ tɔne ninyɛne ne la bamaa ahenle mɔɔ tɔ la lisiti mɔɔ kile kɛ dɛne biala ɛnle nane anzɛɛ anloma ne mɔɔ ɔlɛtɔ la anwo a.”

Wɔ 2011, menli mɔɔ tudu azɛlɛ nwo kpondɛ tete ninyɛne la nwunle lisiti zɛhae bie wɔ ɛleka mɔɔ bikye ɛzonlenlɛ sua ne—ndɛtɛlɛ mɔɔ le kɛ ezukoa bulalɛ mɔɔ zolɛ edwɛkɛ ne vi ɛvoya ne mɔɔ lumua K.Y.M. nee 70 Y.M. la. Edwɛkɛ agbɔkɛ nwiɔ mɔɔ bɛva Arelam bɛhɛlɛ wɔ zolɛ la se, “Nwolɛ Te Maa Nyamenle.” Bɛsuzu kɛ ɛnee asɔne mgbanyima die lisiti zɛhae wɔ debie anzɛɛ nane biala mɔɔ bɛkɛyɛ kɛ bɛfa bɛabɔ afɔle la anwo.