Nɔe ne mɔɔ aleɛ kye a Gyisɛse bawu la, ɔhanle ɔhilele ye nɔhalɛ ɛdoavolɛma kɛ bɛhakye ye afɔlebɔlɛ ne. Ɔluale panoo ne mɔɔ mgbɔvonle ɛnle nu nee nwanye kɔkɔlɛ ne mɔɔ gyi bɛ nyunlu ɛkɛ ne la azo, ɔvale mɔɔ bɛfɛlɛ ye kɛ Nɔsolɛ Aleɛ Mɔɔ Li Awieleɛ anzɛɛ Awulae Nɔsolɛ Aleɛ ne la ɔziele ɛkɛ na ɔhanle kɛ: “Bɛyɛ ɛhye bɛva bɛhakye me.”—Luku 22:19.

Ɛvolɛ biala, Gyihova Alasevolɛ mɔɔ wɔ ewiade amuala la yia nu na bɛdi Gyisɛse ewule ne anwo ɛvolɛ ne. Wɔ 2014, Ngakyelɛlilɛ ne bazi Kenlenzile, April 14, mekɛ mɔɔ ewia ne ɛhɔdɔ la.

Yɛfa anyelielɛ yɛado ɛsalɛ yɛavɛlɛ wɔ kɛ kɔ ayia ɛhye bie, na bɛbaha Gyisɛse afɔlebɔlɛ ewule ne anwo edwɛkɛ dɔɔnwo wɔ ɛkɛ. Awie biala kola kɔ ayia ɛhye bie. Bɛnlielie ezukoa wɔ ɛkɛ. Ahenle mɔɔ vale magazine ɛhye manle wɔ la bahola ahile wɔ mekɛ nee ɛleka mɔɔ bɛbayɛ Ngakyelɛlilɛ ne wɔ bɛ ɛkɛ ne la, anzɛɛ ɛbahola wɔanlea yɛ Intanɛte ɛleka ne, jw.org. Yɛsɛlɛ wɔ yɛ mekɛ ne nzonlɛ, na yeamkpa ɛ ti.