“MEKOLA megyinla debie biala anloa kyesɛ sɔnea.” Edwɛkɛ ɛhye mɔɔ bɛka bɛsele la ka kɛzi menli bie mɔ bu sɔnea la anwo edwɛkɛ—bɛ nye die nwolɛ. Noko bie mɔ bu sɔnea kɛ kpɔvolɛ mɔɔ dahuu bɛkulo kɛ bɛdi ɔ nwo zo konim a. Kɛzi ɛdwenle nwo ɛ? Saa ɛyia sɔnea a, ɛbagyakyi ɛ nwo anzɛɛ ɛbagyinla ɔ nloa ɔ?

Nɔhalɛ nu, tɛ sɔnea biala a fa ngyegyelɛ kpole ba a. Kɛ neazo la, saa ɛfea ɛ nwo ɛdi bisiketi dɔɔnwo a ɔnrɛzɛkye wɔ ɛbɛlabɔlɛ. Noko saa ɛgyakyi ɛ nwo ɛmaa sɔnea bie mɔ a—titile mɔɔ kɔwie nla nwo ɛbɛlatane nu a—ɔbahola yeava esiane yeara. Baebolo ne bɔ kɔkɔ kɛ: ‘Awie mɔɔ sɛkye agyalɛ la ɛnlɛ adwenle; sonla mɔɔ yɛ ɛhye la sɛkye ɔ nwo.’—Mrɛlɛbulɛ 6:32, 33.

Saa ɛyia ɛbɛlatane nwo sɔnea a, kɛzi ɔwɔ kɛ ɛyɛ wɔ nyɛleɛ ɛ? Baebolo ne bua kɛ: ‘Nyamenle ɛhulolɛdeɛ a le kɛ awie biala anwo kɛde na ɔkɛhwe ɔ nwo ɔkɛvi nla nwo ɛbɛlatane nwo. Ɔwɔ kɛ bɛ nuhua ko biala nwu kɛzi ɔbanlea ɔ nwo zo wɔ anwodelɛ nee enililɛ nu la.’ (1 Tɛsalonaekama 4:3, 4) Kɛ ɔkɛyɛ na wɔanyia zɔhane tumi ne ɛ? Suzu ndenle nsa mɔɔ bahola aboa la anwo.

Saa yɛnea nvoninli mɔɔ maa yɛnyia nla nwo atiakunluwɔzo a ɔbamaa yɛanyia subane ɛtane. Mekɛ mɔɔ Gyisɛse ɛlɛsi zo kɛ yɛnea debie a yɛ tiakunlu ba zo la, ɔbɔle kɔkɔ kɛ: ‘Awie biala mɔɔ kɛnlea raalɛ na ɔkɛnyia ɔ nwo atiakunluwɔzo la ɛzɛkye agyalɛ wɔ ye ahonle nu dɛba.’ Mekɛ mɔɔ ɔlɛwudu edwɛkɛ ne anu la, ɔdule folɛ kɛ: “Zɔhane ati saa ɛ nye fema ne yɛɛ twehwe wɔ ahɔ ɛtane nu a, tu ye to ye lɔ.” (Mateyu 5:28, 29) Boni a ɔkile a? Saa yɛbahola yɛagyinla sɔnea nloa a, ɔwɔ kɛ yɛsi kpɔkɛ ndɛndɛ yɛɛ ɔnle kɛ  yɛnea nvoninli mɔɔ maa yɛnyia nla nwo atiakunluwɔzo la.

Neazo ɛne: Fa ye kɛ ɛ nye ɛhɔdɔ fitanli milahyinli ne mɔɔ kpa senle la azo. Ɛbahɔ zo wɔanlea ɔ? Kyɛkyɛ! Ɛbaye ɛ nye wɔavi ɛkɛ amaa yeanzɛkye ɛ nye. Zɔhane ala a, ɛ nye kɔbɔ nvoninli mɔɔ maa ɛnyia nla nwo atiakunluwɔzo—buluku nu, kɔmputa zo, anzɛɛ ɔle sonla a—ye ɛ nye fi ɛkɛ ne ndɛndɛ. Bɔ wɔ adwenle nwo bane na yeanzɛkye. Juan, mɔɔ ɛnee nea nlanwonvoninli na yegyakyi la ka kɛ: “Saa menwu raalɛ mɔɔ anwo yɛ fɛ a, mete nganeɛ kɛ ɔwɔ kɛ menea ye bieko na menea ye fane nsa. Yemɔti mebɔ mɔdenle meye me nye meto ahane, na meka mekile me nwo kɛ: ‘Fa asɔneyɛlɛ to Gyihova anyunlu! Ɔhyia kɛ ɛyɛ asɔne kɛkala!’ Meyɛ asɔne mewie a, ɔngyɛ ɛnee nganeɛdelɛ ne ɛvi ɛkɛ.”—Mateyu 6:9, 13; 1 Kɔlentema 10:13.

Suzu Dwobu noko mɔɔ di nɔhalɛ la ɛdeɛ ne anwo, ɔhanle kɛ: “Me nee me nye ɛyɛ ngyekyeleɛ; kɛ menrɛnlea bɛlɛra mɔɔ ɛnze nrenya la menrɛhulo ye.” (Dwobu 31:1) Kɛmɔti a ɛmbɔ kpɔkɛ zɔhane bie ɛ?

Sɔ ɛhye nea: Saa ɛ nye bɔ nvoninli mɔɔ maa ɛnyia nla nwo atiakunluwɔzo la azo a, ye ɛ nye fi ɛkɛ ndɛndɛ. Sukoa Baebolo kɛlɛvolɛ ne mɔɔ yɛle asɔne ɛhye la: “Ye me nye fi ninyɛne mgbane mgbane nwo.”—Edwɛndolɛ 119:37.

Kɛmɔ yɛ muala yɛtɔ sinli la ati, ɔdwu mekɛ ne bie a atiakunluwɔzo ɛtane bahola agyegye yɛ. Baebolo ne ka kɛ: “Sonla ɔdaye ye atiakunluwɔzo ɛtane ne a sɔ ye nea na ɔtwe ye ɔfi Nyamenle anwo a. Saa ye munzule atiakunluwɔzo ne nrenzɛ a ɔwo ɛtane.” (Gyemise 1:14, 15) Kɛ ɔkɛyɛ na wɔahoati gyinlabelɛ mɔɔ akee ɛyɛ nwolɛ ɛhwee a ɔnyɛ boɛ la ɛ?

Saa atiakunluwɔzo ɛtane ba wɔ adwenle nu a, kakye kɛ ɛbahola wɔahile mɔɔ ɛbayɛ wɔ nwolɛ la. Ko tia zɔhane atiakunluwɔzo ne. Ye fi wɔ adwenle nu. Mmafa wɔ adwenle ɛkɔ ɛbɛlatane nwo nzuzulɛ mgbane zo. Nrenya bie mɔɔ bɛfɛlɛ ye Troy, mɔɔ ɛnee ta nea nlanwonvoninli wɔ Intanɛte zo la, ka kɛ: “Mebɔ mɔdenle meye nzuzulɛ ɛtane mefi me  adwenle nu na mefa me adwenle mesie ninyɛne kpalɛ zo. Ɛnee ɔnla aze. Ɔziale ɔrale fane dɔɔnwo. Noko awieleɛ ne, mengolale menwunle mɔɔ ɔwɔ kɛ meyɛ la.” Raalɛ bie mɔɔ bɛfɛlɛ ye Elsa, mɔɔ ɛnee ɛbɛlatane nwo sɔnea gyegye ye wɔ mekɛ mɔɔ ɔlɛnyi la ka kɛ: “Kɛmɔ menyɛle dɔɔnwo na menvale asɔneyɛlɛ mendole Gyihova anyunlu la ati, mengolale menlile adwenle ɛtane zo konim.”

Sɔ ɛhye nea: Saa ɛbɛlatane nwo adwenle ɛlɛgyegye wɔ a, yɛ ye ndɛndɛ gyinla na yɛ asɔne. Ko tia nzuzulɛ ɛtane na dwenle “ninyɛne mɔɔ le nɔhalɛ, mɔɔ lɛ duma, ninyɛne mɔɔ le fɔɔnwo, mɔɔ anwo te, mɔɔ le kɛnlɛma, mɔɔ sɔ ɛnyelɛ, nee mɔɔ di munli na ayɛlɛyelɛ wɔ nwolɛ la anwo.”—Felepaema 4:8.

Saa atiakunluwɔzo nee sɔnea yia, na nwolɛ adenle ba a, ɔfa esiane ɔba. (Mrɛlɛbulɛ 7:6-23) Kɛ ɔkɛyɛ na ɛhye bie ando wɔ ɛ?

Baebolo ne tu yɛ folɛ nrɛlɛbɛ nu kɛ: “Sonla mɔɔ anye gyi ɔ ti anwo la nwu munzule na ɔtwe ɔ nwo ɔfea, na mɔɔ ɛnlɛ adwenle la kɔtɔ nu na ɔnwu amaneɛ.” (Mrɛlɛbulɛ 22:3) Yemɔti nea wɔ ɛlualɛ boɛ. Dumua nwu ninyɛne mɔɔ bahola ava ngyegyelɛ ara la na koati. (Mrɛlɛbulɛ 7:25) Nrenya bie mɔɔ bɛfɛlɛ ye Filipe, mɔɔ ɔholale ɔgyakyile nlanwonvoninli ɛnleanlɛ la hanle kɛ: “Menvale abusua kɔmputa ne menziele ɛleka mɔɔ awie biala bahola anwu ye la na menvale debie mɔɔ ɔmmaa debie ɛtane ɛmmaa zo la menwulale nu. Mekɔ Intanɛte zo wɔ mekɛ mɔɔ menli wɔ ɛkɛ la.” Zɔhane ala a, Troy, mɔɔ yɛlumua yɛha ɔ nwo edwɛkɛ la ka kɛ: “Mennea nvoninli mɔɔ maa menyia atiakunluwɔzo ɛtane la yɛɛ me nee menli mɔɔ ka nla nwo edwɛkɛ wienyi la ɛndendɛ. Mengulo kɛ edwɛkɛ to me.”

Sɔ ɛhye nea: Nwu wɔ sinlidɔlɛ ne bɔkɔɔ na dumua koati ninyɛne mɔɔ bamaa sɔnea ado wɔ la.—Mateyu 6:13.

Na saa mɔdenle mɔɔ ɛlɛbɔ la amuala anzi, ɛyɛ bɛtɛɛ na sɔnea to wɔ ɛ? Mmamaa wɔ abɛ nu bu na ɛgyakyi. Baebolo ne ka kɛ: “Saa tenlenenli tɔ aze fane nsuu bɔbɔ a, ɔdwazo.” (Mrɛlɛbulɛ 24:16) Nɔhalɛ nu, yɛ anwuma Selɛ ne ka kile yɛ kɛ ‘yɛdwazo.’ Asoo ɛbalie ye moalɛ ne mɔɔ vi ɛlɔlɛ nu la wɔado nu ɔ? Ɛnee mmagyakyi kɛ ɛbahɔ ye ɛkɛ wɔ asɔneyɛlɛ nu ɛlɛ. Sukoa ye Edwɛkɛ ne na dua zo nyia diedi. Bɔ kpɔkɛ kpundii kɛ ɛbahɔ Keleseɛne nyianu. Maa Nyamenle ɛwɔkɛ ne ɛkyekye ɛ rɛle kɛ: ‘Mebamaa wɔ anwosesebɛ, mebaboa wɔ.’—Ayezaya 41:10.

Cody, mɔɔ yɛhanle ɔ nwo edwɛkɛ wɔ mɔlebɛbo ne la ka kɛ: “Membɔle mɔdenle kpole na meahola meagyinla nlanwonvoninli subane ne anloa. Menyiale ngyegyelɛ dɔɔnwo noko ɔlua Nyamenle moalɛ zo, awieleɛ ne mengyakyile.” Dylan, noko mɔɔ yɛlumua yɛha ɔ nwo edwɛkɛ la ka kɛ: “Anrɛɛ ɔnrɛyɛ se kɛ me nee me gɔnwo gyimayɛvo ne bala. Noko mengyinlanle kpundii na menganle kɛ ‘Kyɛkyɛ!’ Ɔle kɛnlɛma kɛ ɛbanyia adwenle mɔɔ anu te la. Mɔɔ hyia kpalɛ la, meze kɛ memanle Gyihova anye liele.”

Saa ɛgyinla kpundii na ɛgyinla sɔnea nloa a, ɛbahola wɔalie wɔali kɛ Nyamenle anye balie ɛ nwo!—Mrɛlɛbulɛ 27:11.