Bɛwole me nlenyia Thomas (1) * Williams wɔ Horncastle, England wɔ January 20, 1815. Ye ɛvolɛ nwiɔ anzi yɛɛ ye mame wule a, yemɔti ye papa, John Williams tetele ɔdaye nee ɔ mediema nsa. John hilele Thomas kapenta gyima, noko Thomas yɛle gyima gyɛne.

Ɛnee bɛlɛtete asɔne fofolɛ dɔɔnwo wɔ England. Ɛnee edwɛkpakavolɛ John Wesley ɛhwe ɔ nwo ɛvi Angelekane Asɔne ne anu na yede Methodist, ekpunli bie mɔɔ ɛnee bɛsi zolɛ kɛ bɛzukoa Baebolo ne na bɛbɔ edwɛkpa ne nolo la. Wesley ngilehilelɛ ne dɛlɛle ndɛndɛ, na Williams abusua ne hɔle zɔhane asɔne ne bie. Thomas rayɛle Wesley edwɛkpakavolɛ na ɔdule ɔ nwo ɔmaanle kɛ ɔkayɛ edwɛkpatɛlɛvolɛ gyima wɔ South Pacific. Wɔ July 1840, ɔ nee ɔ ye Mary (2) hɔle Lakeba Bɔra, * Fiji, boka bie mɔɔ kpu esike mɔɔ ɛnee menli mɔɔ di sonla la a de ɛkɛ la azo.

Mɔlebɛbo ne, Thomas nee Mary gyinlanle ngyegyelɛ dɔɔnwo anloa wɔ Fiji. Bɛvale mekɛ dɔɔnwo bɛyɛle gyima ɛsesebɛ wɔ tɛnlabelɛ mɔɔ anu yɛ se na ewia ne bɔ kpole wɔ ɛkɛ la anu. Eza bɛnwunle ninyɛne mɔɔ yɛ ɛzulolɛ—konle, kunlavolɛ mɔɔ bɛmia bɛ kɔmeza bɛku bɛ, ngakula ɛhunlɛ nee menli mɔɔ di sonla—na menli mɔɔ wɔ sua ne azo la andie bɛ edwɛkɛ ne. Mary nee ye belamunli ralɛ, John anwo dole bɛ mɔɔ ɔhale ekyi na bɛawu. Wɔ 1843, Thomas hɛlɛle kɛ: “Me ahonle dule mɔɔ ɛnee mennwu mɔɔ meyɛ a.” Noko, ɔ nee Mary gyinlanle kpundii na bɛnyianle anwosesebɛ ɔlua Gyihova Nyamenle anu diedi mɔɔ bɛlɛ la ati.

Mekɛ zɔhane, kɛmɔ Thomas ze kapenta gyima nye zo la ati, ɔzile Europema sua kɛnlɛma mɔɔ limoa la wɔ Fiji. Bɛwulale sua ne abo bɛmaanle ɔhɔle anwuma mɔɔ anwoma fa nu na bɛyɛle ninyɛne gyɛne wɔ sua ne anwo na ɛhye maanle Fijima ne anye liele nwolɛ. Ɔka ekyi na bɛawie sua ne si la, Mary wole ɔ ra nrenyia mɔɔ tɔ zo nwiɔ, Thomas Whitton (3) Williams, mɔɔ le me nlenyia fɔɔnwo la.

Wɔ 1843, me nlenyia Thomas mɔɔ limoa la boale maanle bɛhilele Dwɔn Edwɛkpa ne abo bɛhɔle Fiji aneɛ nu, gyima mɔɔ ɔnwunle kɛ ɔyɛ se kpalɛ la. * Noko ɛnee ɔle awie mɔɔ sukoa menli nee bɛ amaamuo nwo debie na ɔnwu ye kpalɛ a. Ɔdɔle ɔ rɛle aze ɔyɛle ye neɛnleanu ne mɔɔ ɔyɛle la anwo kɛlɛtokɛ wɔ ye buluku ne mɔɔ bɛfɛlɛ ye Fiji and the Fijians (1858), mɔɔ fane Fijima ɛbɛlabɔlɛ nwo wɔ ɛvoya 19 ne anu la.

 Ɔlua gyima ɛsesebɛ mɔɔ Thomas yɛle ye ɛvolɛ 13 wɔ Fiji la ati, ɛnee ɔnlɛ anwosesebɛ yemɔti ɔ nee ye abusua ne hɔle Australia. Thomas wule wɔ 1891 wɔ Ballarat, Victoria wɔ mekɛ mɔɔ ɛnee yeva ɛvolɛ dɔɔnwo yezonle kɛ ɛsɔfo kpanyinli la.

Wɔ 1883, Thomas Whitton Williams nee ɔ ye Phoebe, (4) nee bɛ abusua ne hɔle Perth, Australia Adɔleɛ. Bɛ ra kpanyinli mɔɔ tɔ zo nwiɔ, Arthur Bakewell Williams, (5) mɔɔ le me nlenyia fɔɔnwo bieko la ɛnee ɛli ɛvolɛ ngɔnla.

Mekɛ mɔɔ Arthur nyianle 22 la, ɔhɔyɛle gyima wɔ Kalgoorlie, ɛleka mɔɔ bɛtu nvutuke, na ɔvi Perth aduduleɛ mɔɔ kɔ ɛkɛ la bayɛ mayɛlɛ 370 (km 600) la. Ɛkɛ ne a ɔgengale Maanle Maanle Avinli Baebolo Sukoavoma mɔɔ ɛnɛ bɛfɛlɛ bɛ Gyihova Alasevolɛ mbuluku ne bie a. Eza ɛnee ɔtua ezukoa ɔdie Zion’s Watch Tower ne dahuu. Arthur anye liele mɔɔ ɔgengale la anwo na ɔbɔle ɔ bo kɛ ɔka ndelebɛbo fofolɛ ɛhye anwo edwɛkɛ yeahile awie mɔ na bɛyia nu bɛsukoa Baebolo ne. Gyima mɔɔ bɛbɔle ɔ bo ekyi la a ɛmaa Gyihova Alasevolɛ mɔɔ bɛwɔ Australia Adɔleɛ la anwo ɛzo ɛnɛ a.

Eza Arthur hanle mɔɔ ɔlɛsukoa la anwo edwɛkɛ ɔhilele ye abusua ne. Thomas Whitton boale ɔ ra, Arthur mɔɔ ɛnee boka Baebolo Sukoavoma ne anwo la noko yeangyɛ yɛɛ ɔwule a. Ye mame Phoebe nee ɔ mediema mraalɛ, Violet nee Mary noko rabokale Baebolo Sukoavoma ne anwo. Violet rayɛle mekɛ kɔsɔɔti edwɛkpakavolɛ anzɛɛ adekpakyelɛnli. Arthur hanle kɛ, ɛnee ɔ diema raalɛ ne le “adekpakyelɛnli mɔɔ bɔ mɔdenle kpalɛ na ɔfi ye ahonle kɔsɔɔti anu ɔka edwɛkɛ ne wɔ Australia Adɔleɛ.” Ɔbayɛ kɛ ɛnee Arthur yɛ nyeyenu, noko Violet mɔɔ bɔ mɔdenle la neazo ne nyianle Williams awolɛndoazo bieko anwo zo tumi kpole.

Yeangyɛ, Arthur gyale na ɔhɔle Donnybrook, sua bie mɔɔ bɛdua mbakama mɔɔ wɔ nyiakɛ adɔleɛ wɔ Australia Adɔleɛ la. Ɛkɛ ne bɛdole ye duma “1914 Ɛzɛlɛ Kpanyinli!” ɔlua mɔdenlebɔlɛ mɔɔ ɛnee ɔfa ɔka Baebolo nu ngapezo mɔɔ fane ɛvolɛ zɔhane anwo la ati. * Mekɛ mɔɔ Ewiade Konle I bɔle ɔ bo la bɛgyakyile ɔ nwo ɛgololɛ. Arthur lile bɛdabɛ mɔɔ bɛbatɔ debie wɔ ye sotɔɔ ɛkɛ la daselɛ dahuu. Ɛnee ɔfa Baebolo nwo mbuluku ɔgua ye sotɔɔ ne nvɛnzɛlɛ ne azo mɔɔ awie biala nwu ye a. Ɔfa debie bie mɔɔ yehɛlɛ zolɛ kɛ awie biala mɔɔ bahola ahilehile Nsa-Ko ne anu la, ɔbahyɛ ye tete ne pɔne 100 la ɔkenda ye nvɛnzɛlɛ ne anyunlu. Arthur kpole diedi ɛhye mɔɔ ɛnee ɛngyi ngɛlɛlera ne azo la. Awie biala angola anlie zɔhane ezukoa ne.

Ɛnee bɛyɛ ekpunli Baebolo debiezukoalɛ nee asafo nyianu wɔ William sua nu ɛkɛ wɔ Donnybrook. Nzinlii, Arthur zile Belemgbunlililɛ Asalo mɔɔ limoa anzɛɛ ɛleka mɔɔ bɛyia la wɔ Australia Adɔleɛ. Wɔ ye ɛvolɛ 70 ne anu, ɛnee ɔwula ye tɛladeɛ na ɔbɔ ye taye, ɔtɛnla ye ɛkpɔnwɔ mɔɔ bɛfɛlɛ ye Doll la azo  na ɔkɔ moa ɔkɔka edwɛkɛ ne wɔ Donnybrook maangyeba ne anu.

Arthur mɔɔ ɛnee ɔngulo ɔ nwo edwɛkɛ na ɔdi ɔ nwo eni, noko ɔbɔ mɔdenle la subane ne nyianle ɔ mra ne mɔ anwo zo tumi kpole. Ɔ ra Florence (6) zonlenle kɛ edwɛkpatɛlɛvolɛ wɔ India. Ɔ mra mrenyia, Arthur Lindsay (7) nee Thomas zonlenle kɛ asafo nu mgbanyima mekɛ tendenle kɛmɔ bɛ ze yɛle la.

Ɛnee bɛze me nlenyia Arthur Lindsay Williams kpalɛ na bɛkulo ye edwɛkɛ ɔlua ye subane kpalɛ ne ati. Ɛnee dahuu ɔnyia mekɛ ɔmaa menli na ɔbu bɛ kpalɛ. Eza yeli konim 18 wɔ ɛvolɛ 12 anu kɛ awie mɔɔ fa akuma bu mbaka wɔ nwɔhoalilɛ ne mɔɔ bɛyɛle wɔ maanzinli ne anu la.

Noko akee, ɔzinle Arthur anwo wɔ mekɛ mɔɔ ɔ ra Ronald (8) (me nenyia) mɔɔ ɛli ɛvolɛ nwiɔ vale akuma pɛle ampolo baka ekyi bie mɔɔ gyi yɛ abusua sua ne anzi la. Ronald mame dɔle ɔ rɛle aze kyekyele baka ne na awieleɛ kolaa ne ɔzole ampolo fɛlɛko kpalɛ. Bɛvɛlɛle ye Bɛlɛra Williams ampolo, bakama fofolɛ ɛhye razole Cripps Pink ampolo mɔɔ le ewiade ampolo ngakyile mɔɔ ɛlie duma la anu ko.

Ronald, anzɛɛ Gramp, kɛmɔ mefa mefɛlɛ ye la, nzinlii vale suazilɛ gyima ziele ɔ nye zo. Ɔdaye nee me Nana dule bɛ nwo maanle ɛvolɛ dɔɔnwo nee Alasevolɛ ne mɔ zile azua wɔ Australia nee Solomon Bɔra ne mɔ azo. Kɛkala ɔka ekyi Gramp nyia ɛvolɛ 80, noko ɔtɛsonle kɛ asafo nu kpanyinli na ɔboa ɔmaa bɛsi Belemgbunlililɛ Asalo na bɛsiezie ɛkɛ wɔ Australia Adɔleɛ.

Yɛ abusua agyadeɛ ne tɛbɔ ɛkɛ, me awovolɛ Geoffrey (9) nee Janice (10) Williams bɔle mɔdenle tetele me (12) nee me diema raalɛ Katharine (11) maanle yɛvale Keleseɛne ngyinlazo yɛbɔle yɛ ɛbɛla. Menyianle ɛvolɛ 13 la, medame noko me nee Gyihova nyianle agɔnwolɛvalɛ. Mekɛ mɔɔ yɛhɔle Keleseɛnema nyianu bie la, mendele kɛ John E. Barr, mɔɔ boka Gyihova Alasevolɛ Neazo Eku ne anwo la dule ngakula mɔɔ wɔ tievolɛma ne avinli la folɛ kɛ: “Bɛmmasɛkye debie mɔɔ sonle bolɛ mɔɔ bɛlɛ la—nwolɛ adenle mɔɔ bamaa bɛanwu Gyihova na bɛahulo ye la.” Menyilale me nwo zo memaanle Gyihova wɔ nɔsolɛ zɔhane. Ɛvolɛ nwiɔ anzi, membɔle adekpakyelɛ gyima ne abo.

Ɛnɛ, me nee me ye, Chloe lɛ anyelielɛ ɛlɛyɛ dahuu ɛzonlenlɛ gyima ne wɔ Tom Price, sua bie mɔɔ bɛtu nvutuke wɔ zo wɔ sɔlɔ adɔleɛ mɔɔ wɔ Australia Adɔleɛ la. Yɛfa yɛ mekɛ ne bie yɛyɛ gyima yɛfa yɛnea yɛ nwo. Me awovolɛ nee me diema raalɛ Katharine nee ɔ hu, Andrew le adekpakyelɛma wɔ Port Hedland. Ɔvi ɛkɛ ne mɔɔ kɔ sɔlɔ nehane la bayɛ mayɛlɛ 260. Me nee me papa noko sonle kɛ asafo nu mgbanyima.

Awolɛndoazo nsuu mɔɔ ɛze la, me nlenyia Thomas Williams zile kpɔkɛ zonlenle Gyihova Nyamenle. Bɛvale zɔhane diedi nee ɛzonlenlɛ nu agyadeɛ ne bɛgyakyile me. Me nye die kpole kɛ menyia sunsum nu agyadeɛ kpole ɛhye a.