1. Asɔneyɛlɛ mɔɔ ɛlie duma la boni a yɛbazuzu nwolɛ a?

MENLI mgbe mgbe mɔɔ wɔ ewiade amuala la ze asɔneyɛlɛ ne mɔɔ menli dɔɔnwo fɛlɛ ye Yɛ Ze Mɔɔ wɔ Anwuma anzɛɛ Awulae Nzɛlɛlɛ ne la kpalɛ. Zɔhane edwɛkɛ nwiɔ ne kile asɔneyɛlɛ ne mɔɔ ɛlie duma mɔɔ Gyisɛse Kelaese mumua ne vale manle kɛ neazo la. Ɔle asɔneyɛlɛ mɔɔ nwolɛ hyia kpalɛ, na nuhua edwɛkɛ nsa ne mɔɔ lumua mɔɔ yɛbazuzu nwolɛ la baboa wɔ yeamaa wɔanwu mɔɔ Baebolo ne kilehile amgba la.

2. Ninyɛne mɔɔ Gyisɛse hilehilele ye ɛdoavolɛma kɛ bɛyɛ nwolɛ nzɛlɛlɛ la anu nsa a le boni?

² Wɔ asɔneyɛlɛ neazo ɛhye mɔlebɛbo, Gyisɛse hilehilele ye tievolɛma kɛ: “Bɛyɛ nzɛlɛlɛ a bɛyɛ ye zɛhae: ‘Yɛ Ze mɔɔ wɔ anwuma: Wɔ duma nwo ɛde; Wɔ belemgbunlililɛ ɛrɛla; Bɛyɛ Wɔ ɛhulolɛdeɛ wɔ azɛlɛ ye azo, Kɛmɔ bɛyɛ ye wɔ anwuma lɔ la.’” (Mateyu 6:9-13) Duzu a edwɛkɛ nsa ɛhye mɔ mɔɔ wɔ nzɛlɛlɛ ne anu la kile a?

3. Duzu a ɔhyia kɛ yɛnwu ye wɔ Nyamenle Belemgbunlililɛ ne anwo a?

³ Yɛlumua yɛzukoa Nyamenle duma Gyihova ne anwo ninyɛne dɔɔnwo. Eza yɛzuzu Nyamenle ɛhulolɛdeɛ—mɔɔ yeyɛ nee mɔɔ ɔbayɛ yeamaa alesama la bie mɔ anwo. Noko akee, duzu a ɛnee Gyisɛse ɛlɛkile wɔ mekɛ mɔɔ ɔhanle kɛ yɛyɛ nzɛlɛlɛ kɛ: “Wɔ belemgbunlililɛ ɛrɛla” la ɛ? Nyamenle Belemgbunlililɛ  ne a le duzu? Kɛzi ye ɛralɛ ne bade Nyamenle duma ne anwo, anzɛɛ ɔbayɛ ye nwuanzanwuanza ɛ? Na adenle boni azo a Belemgbunlililɛ ne ɛralɛ ne bamaa Nyamenle ɛhulolɛdeɛ ayɛ ɛkɛ a?

4. Nyamenle Belemgbunlililɛ ne a le duzu, na nwane a le zolɛ Belemgbunli a?

⁴ Nyamenle Belemgbunlililɛ ne le arane mɔɔ Gyihova Nyamenle a ɛva ɛzie ɛkɛ a, na Nyamenle mumua ne a ɛkpa Belemgbunli mɔɔ ɔbali zolɛ a. Nwane a le Nyamenle Belemgbunlililɛ ne azo Belemgbunli a? Gyisɛse Kelaese ɔ. Gyisɛse le Belemgbunli kpole mɔɔ tɛla dasanli belemgbunli biala na bɛfɛlɛ ye “awulae mɔ Awulae yɛɛ ɔle arelemgbunli Belemgbunli.” (Yekile 17:14) Ɔlɛ tumi ɔyɛ ninyɛne mgbalɛ dɔɔnwo ɔtɛla dasanli belemgbunli biala mɔɔ bɔ mɔdenle kpalɛ bɔbɔ la.

5. Nienwu a Nyamenle Belemgbunlililɛ ne bavi ali tumi a, na duzu a ɔbali zolɛ tumi a?

⁵ Nienwu a Nyamenle Belemgbunlililɛ ne bavi ali tumi a? Kɛkala, Gyisɛse wɔ ni? Ɛbahakye kɛ ɛzukoale kɛ bɛhunle ye baka zo, na akee bɛdwazole ye. Ɛhye anzi mekɛ ekyi bie ɔhɔle anwuma. (Gyima ne 2:33) Yemɔti ɛkɛ ne a Nyamenle Belemgbunlililɛ ne wɔ a—ɔwɔ anwuma. Ɛhye ati a Baebolo ne fɛlɛ ye “anwuma Belemgbunlililɛ” la. (2 Temɔte 4:18) Ɔwɔ nuhua kɛ Nyamenle Belemgbunlililɛ ne wɔ anwuma ɛdeɛ, noko ɔbali tumi wɔ azɛlɛ ye azo amuala.—Yekile 11:15.

6, 7. Duzu a maa Gyisɛse yɛ Belemgbunli mɔɔ le ngakyile a?

⁶ Duzu a maa Gyisɛse yɛ Belemgbunli mɔɔ le ngakyile a? Mɔɔ de la a le kɛ, ɔnrɛwu ɛlɛ. Mekɛ mɔɔ Baebolo ne fa Gyisɛse ado alesama arelemgbunli nwo la, ɔhanle kɛ “ɔlɛ ngoane mɔɔ ɛnlɛ awieleɛ” anzɛɛ mɔɔ ɛnzɛkye ɛlɛ a. (Hibuluma 7:16) Ɛhye kile kɛ ninyɛne mgbalɛ mɔɔ Gyisɛse bayɛ la amuala ɛnrɛzɛkye ɛlɛ. Na ɔbayɛ ninyɛne mgbole mɔɔ nvasoɛ wɔ zo a.

⁷ Suzu Baebolo nu ngapezo ɛhye mɔɔ fane Gyisɛse anwo la anwo nea: ‘Gyihova sunsum ne bara ɔ nwo zo, ɔbanwu nrɛlɛbɛ, yeanyia ndelebɛbo, ɔbanyia anwosesebɛ, yeayɛ folɛtuvolɛ,  ɔbanyia adwenle na yeazulo Gyihova. Ɔbava anyelielɛ yeayɛ tieyɛ yeamaa Gyihova, ɔnrɛbua ndɛne ɛnyelɛzo, yɛɛ ɔnrɛhyea ɔ nzo ɔnrɛbua ndɛne. Ɔbabua ehyianvolɛma ndɛne pɛlepɛle nu, na yeabua awienvolɛma ndɛne pɛpɛ.’ (Ayezaya 11:2-4) Zɔhane edwɛkɛ ne kile kɛ Gyisɛse bali azɛlɛ ye azo amra anwo zo tumi kɛ Belemgbunli mɔɔ le tenlene na ɔse anwunvɔne a. Asoo ɛbahulo kɛ ɛkɛnyia belemgbunli mɔɔ le kɛ ɛhye la ɔ?

8. Nwane mɔ a nee Gyisɛse bali tumi a?

⁸ Nyamenle Belemgbunlililɛ ne anwo nɔhalɛ edwɛkɛ bieko a le ɛhye: Tɛ Gyisɛse angomekye a bali tumi a. Ɔ nee awie mɔ a bali tumi ne a. Kɛ neazo la, ɛzoanvolɛ Pɔɔlo hanle hilele Temɔte kɛ: “Saa yɛgyinla kpundii a, yɛ nee ye bali belemgbunli.” (2 Temɔte 2:12) Ɛhɛe, Pɔɔlo, Temɔte, yɛɛ menli gyɛne mɔɔ di nɔhalɛ mɔɔ Nyamenle ɛkpa bɛ la nee Gyisɛse bali tumi wɔ anwuma Belemgbunlililɛ ne anu. Menli nyɛ a banyia adenle kɛnlɛma ɛhye a?

9. Menli nyɛ a nee Gyisɛse bali tumi a, na mekɛ boni a Nyamenle bɔle ɔ bo kɛ ɔkpa bɛ a?

⁹ Kɛmɔ yɛnwunle ye wɔ buluku ɛhye Tile 7 ne la, ɛzoanvolɛ Dwɔn nyianle ɛnyelɛzodeɛnwunlɛ bie mɔɔ nuhua a ɔnwunle kɛ “Boaneralɛ ne [Gyisɛse Kelaese] gyi Boka Zayɔn [ye belemgbunlililɛ gyinlabelɛ mɔɔ wɔ anwuma la] azo; ɔ nee menli apenle ngoko ɛya ko, abulanla nee nna (144,000) mɔɔ bɛhɛlɛ ɔdaye ye duma yɛɛ Selɛ ne duma wɔ bɛ nwoma azo la a gyi ɛkɛ a.” Menli 144,000 ne a le nwane mɔ? Dwɔn mumua ne ka kile yɛ kɛ: ‘Bɛmɛ yɛɛ ɛleka biala mɔɔ Boaneralɛ ne ɛlɛkɔ la bɛdoa ye a. Bɛmɛ a bɛdɔ bɛ bɛvi aleɛabo amra avinli kɛ bɛle menli mɔɔ bɛlumua bɛva bɛ bɛrɛlɛ Nyamenle nee Boaneralɛ ne a.’ (Yekile 14:1, 4) Ɛhɛe, bɛle Gyisɛse Kelaese ɛdoavolɛma mɔɔ di nɔhalɛ, mɔɔ bɛkpa bɛ kɛ bɛ nee ye ɛli tumi wɔ anwuma a. Saa bɛdwazo bɛ bɛfi ewule nu bɛkɔ anwuma a, bɛ nee Gyisɛse bali ‘belemgbunli wɔ azɛlɛ ye azo.’ (Yekile 5:10) Ɔbɔ ye ɛzoanvolɛ ne mɔ mekɛ zo toonwo mɔɔ ba la, Nyamenle ɛhɔ zo ɛkpa Keleseɛnema mɔɔ di nɔhalɛ la amaa bɛ dodo adwu 144,000 ne.

10. Duzu ati a ngyehyɛleɛ mɔɔ Nyamenle ɛyɛ kɛ Gyisɛse nee 144,000 ne ɛli alesama anwo zo tumi la le ɛlɔlɛ kpole a?

 ¹⁰ Ngyehyɛleɛ mɔɔ Nyamenle ɛyɛ kɛ Gyisɛse nee 144,000 ne ɛli alesama anwo zo tumi la le ɛlɔlɛ kpole. Mɔɔ de la a le kɛ, Gyisɛse ze kɛzi alesama te nganeɛ nee nyane mɔɔ bɛnwu ye la. Pɔɔlo hanle kɛ Gyisɛse “le sonla mɔɔ se yɛ anwunvɔne wɔ yɛ sinlidɔlɛ nwo a. . . . Bɛzɔle ye bɛnleanle kɛ yɛdayɛ la, noko yeanyɛ ɛtane biala.” ( Hibuluma 4:15; 5:8) Menli mɔɔ ɔ nee bɛ bali tumi la noko ɛnwu amaneɛ ɛlɛ na bɛgyinla kpundii. Bieko, bɛgyinla sinlidɔlɛ nee anwodɔlɛ ngakyile kɔsɔɔti anloa. Nɔhalɛ nu, bɛbade ngyegyelɛ mɔɔ alesama yia ye la abo!

11. Duzu a Gyisɛse hanle kɛ ye ɛdoavolɛma ne ɛzɛlɛ wɔ Nyamenle ɛhulolɛdeɛ ɛyɛlɛ nwo a?

¹¹ Mekɛ mɔɔ Gyisɛse hanle kɛ ye ɛdoavolɛma ne ɛzɛlɛ ɛmaa Nyamenle Belemgbunlililɛ ne ɛrɛla la, eza ɔhanle kɛ bɛzɛlɛ bɛmaa bɛyɛ Nyamenle ɛhulolɛdeɛ wɔ “azɛlɛ ye azo” kɛmɔ bɛyɛ ye wɔ anwuma lɔ la. Nyamenle wɔ anwuma, na dahuu anwumabɔvolɛma mɔɔ di nɔhalɛ la yɛ ye ɛhulolɛdeɛ wɔ ɛkɛ. Noko akee, wɔ buluku ɛhye Tile 3 ne yɛzukoale kɛ anwumabɔvolɛ atisesebɛ bie gyakyile Nyamenle ɛhulolɛdeɛ ɛyɛlɛ na ɔmanle Adam nee Yive yɛle ɛtane. Yɛbazukoa mɔɔ Baebolo ne ka fane anwumabɔvolɛ atisesebɛ ɛhye mɔɔ yɛze ye kɛ yemɔ a le Seetan Abɔnsam la anwo ninyɛne dɔɔnwo wɔ Tile 10 ne anu. Bɛmanle Seetan nee anwumabɔvolɛma mɔɔ lile ɔ nzi mɔɔ bɛfɛlɛ bɛ sunsum evinli la adenle bɛmanle bɛdɛnlanle anwuma mekɛ ekyi. Ɛhye ati, ɛnee tɛ bɛdabɛ mɔɔ bɛwɔ anwuma la amuala a ɛlɛyɛ Nyamenle ɛhulolɛdeɛ a. Ɛnee ɛhye bahakyi wɔ mekɛ mɔɔ Nyamenle Belemgbunlililɛ ne babɔ ɔ bo kɛ ɔdi tumi la. Ɛnee Gyisɛse Kelaese mɔɔ bɛzie ye Belemgbunli fofolɛ la nee Seetan baho.—Yekile 12:7-9.

12. Ninyɛne nwiɔ mɔɔ anwo hyia la boni a bɛha nwolɛ edwɛkɛ wɔ Yekile 12:10 a?

¹² Ngapezo edwɛkɛ ɛhye mɔ ka mɔɔ bazi la anwo edwɛkɛ kɛ: ‘Akee mendele ɛnelɛ kpole bie vi anwuma, ɔse, “bɔ zo mɔɔ  Nyamenle ngoanelielɛ nee ye tumi nee ye Belemgbunlililɛ nee ye Kelaese ne tumi ɛra a, ɔluakɛ bɛvuandi [Seetan] mɔɔ gyi Nyamenle anyunlu nɔɔzo nee ewiazo toɔdoa yɛ mediema ne mɔ la bɛde aze!”’ (Yekile 12:10) Asoo ɛyɛle ninyɛne nwiɔ mɔɔ anwo hyia mɔɔ bɛha nwolɛ edwɛkɛ wɔ Baebolo ngyɛnu ɛhye anu la nzonlɛ ɔ? Mɔɔ lumua la, Nyamenle Belemgbunlililɛ ne mɔɔ Kelaese a le zolɛ belemgbunli la bɔ ɔ bo di tumi. Mɔɔ tɔ zo nwiɔ, bɛvuandi Seetan bɛvi anwuma bɛde aze.

13. Duzu a ɛvi Seetan mɔɔ bɛdu ye bɛvi anwuma lɔ la anu ɛra a?

¹³ Duzu a ɛvi ninyɛne nwiɔ ɛhye anu ɛra a? Yɛkenga mɔɔ zile anwuma lɔ la anwo edwɛkɛ kɛ: “Zɔhane ati bɛmɛ anwumaneamra, nee bɛdabɛ mɔɔ bɛwɔ zolɛ la amuala, bɛli fɛlɛko!” (Yekile 12:12) Ɛhɛe, anwumabɔvolɛma mɔɔ di nɔhalɛ mɔɔ wɔ anwuma la anye die ɔluakɛ bɛye Seetan nee ye sunsum evinli ne mɔ bɛvi ɛkɛ, na awie biala mɔɔ wɔ anwuma lɔ la di nɔhalɛ maa Gyihova Nyamenle. Anzondwolɛ nee koyɛlɛ mɔɔ di munli la a wɔ ɛkɛ a. Bɛlɛyɛ Nyamenle ɛhulolɛdeɛ wɔ anwuma.

14. Ɔluakɛ bɛvuandi Seetan bɛde aze la ati, duzu a ɛzi azɛlɛ ye azo a?

¹⁴ Na azɛlɛ ne noko ɛ? Baebolo ne ka ye kɛ: “Bɛmɛ azɛlɛ nee nyevile, bɛ gyakɔ! Ɔluakɛ Abɔnsam ɛdwu ɛra bɛ nwo lɔ, na ɛya kpole wɔ ye nuhua, ɔboalekɛ ɔze kɛ ye mekɛ ɛha ekyi bie ala.” (Yekile 12:12) Seetan ɛva ɛya ɔluakɛ bɛdu ye bɛvi anwuma na yeha ye mekɛ ekyi bie la ati. Kɛmɔ yeva ɛya la ati ɔfa ngyegyelɛ ɔba azɛlɛ ye azo. Yɛbazukoa zɔhane ngyegyelɛ ne anwo ninyɛne dɔɔnwo wɔ tile bieko mɔɔ doa zolɛ la anu. Noko mɔɔ ɛhye wɔ yɛ adwenle nu la, yɛbahola yɛabiza kɛ, Kɛzi Belemgbunlililɛ ne bamaa bɛayɛ Nyamenle ɛhulolɛdeɛ wɔ azɛlɛ ye azo ɛ?

15. Adwenle boni a Nyamenle lɛ ye wɔ azɛlɛ ye anwo a?

¹⁵ Kakye adwenle mɔɔ Nyamenle lɛ ye wɔ azɛlɛ ye anwo la. Ɛzukoale nwolɛ debie wɔ Tile 3 ne anu. Nyamenle manle ɔlale ali wɔ Yidɛn kɛ ɔle ye ɛhulolɛdeɛ kɛ azɛlɛ ɛhye bayɛ paladaese mɔɔ alesama abusua mɔɔ le tenlene la a badɛnla zolɛ dahuu a. Seetan manle Adam nee Yive yɛle ɛtane na ɛhye hanle atiakunlukpɔkɛ mɔɔ Nyamenle lɛ ye wɔ azɛlɛ ye anwo la noko  yeangakyi ye. Ɔtɛde Gyihova ɛhulolɛdeɛ kɛ “tenlenema bava azɛlɛ ne ayɛ bɛ ɛdeɛ, na bɛadɛnla zolɛ dahuu.” (Edwɛndolɛ 37:29) Na Nyamenle Belemgbunlililɛ ne bamaa ɛhye ara nuhua. Wɔ adenle boni azo?

16, 17. Duzu a Daneɛle 2:44 ka ye wɔ Nyamenle Belemgbunlililɛ ne anwo kile yɛ a?

¹⁶ Suzu ngapezo ne mɔɔ wɔ Daneɛle 2:44 ne la anwo nea. Yɛkenga ye wɔ ɛkɛ ne kɛ: “Mekɛ mɔɔ maanle maanle ɛhye mɔ wɔ zolɛ la Nyamenle bamaa maanle ko avinde, na ɔbahomo maanle zɔhane mɔ anwo zo yeamaa bɛagolo. Maanle ɛhye badɛnla ɛkɛ ne dahuu, awie ɛnrɛhola ɛnrɛzɛkye ye kenle bie maanle nu, yɛɛ awie mɔ gyɛne ɛnrɛhola ɛnrɛlie maanle ne ɛnrɛbu.” Duzu a ɛhye maa yɛnwu ye wɔ Nyamenle Belemgbunlililɛ ne anwo a?

¹⁷ Mɔɔ lumua la, ɔkile yɛ kɛ bɛbava Nyamenle Belemgbunlililɛ ne bɛazie ɛkɛ wɔ “mekɛ mɔɔ maanle maanle ɛhye mɔ wɔ zolɛ la,” anzɛɛ wɔ mekɛ mɔɔ arelemgbunli gyɛne wɔ ɛkɛ ne la. Mɔɔ tɔ zo nwiɔ, ɔkile yɛ kɛ Belemgbunlililɛ ne badɛnla ɛkɛ ne dahuu. Awie ɛnrɛhola ɛnrɛzɛkye ye yɛɛ belemgbunlililɛ biala ɛnrɛhola ɛnrɛlie ɛnrɛbu. Mɔɔ tɔ zo nsa, yɛnwu ye kɛ Nyamenle Belemgbunlililɛ ne nee arelemgbunlililɛ mɔɔ wɔ ewiade ye la baho. Nyamenle Belemgbunlililɛ ne bali konim. Awieleɛ kolaa ne, ɔ ngomekye a ɔbayɛ arane mɔɔ bali alesama amuala anwo zo a. Akee alesama anye balie wɔ tumililɛ mɔɔ tɛla biala mɔɔ bɛnyia ye ɛlɛ la abo.

18. Kɛ bɛfɛlɛ konle ne mɔɔ li awieleɛ mɔɔ Nyamenle Belemgbunlililɛ ne nee arelemgbunlililɛ mɔɔ wɔ ewiade baho la ɛ?

¹⁸ Baebolo ne ka konle ne mɔɔ li awieleɛ mɔɔ Nyamenle Belemgbunlililɛ ne nee arelemgbunlililɛ mɔɔ wɔ ewiade baho la anwo edwɛkɛ dɔɔnwo. Kɛ neazo la, ɔkilehile yɛ kɛ mekɛ mɔɔ awieleɛ ne ɛlɛbikye la, sunsum evinli ne mɔ babɔ adalɛ abɛlɛbɛla “arelemgbunli mɔɔ wɔ ewiade la.” Duzu ati ɔ? ‘Amaa bɛaboɔboa arelemgbunli ne mɔ anloa na bɛaho Tumivolɛ Bedevinli Nyamenle ne kenle kpole ne anu.’ Bɛbaboɔboa arelemgbunli mɔɔ wɔ azɛlɛ ye azo la anloa bɛahɔ “ɛleka bie mɔɔ  bɛfɛlɛ ye Hibulu nu ‘Amagɛdɔn’ la.” (Yekile 16:14, 16) Ɔlua mɔɔ bɛha ye wɔ ngyehyɛnu nwiɔ zɔhane mɔ anu la ati, bɛfɛlɛ konle ne mɔɔ li awieleɛ mɔɔ alesama arelemgbunlililɛ nee Nyamenle Belemgbunlililɛ ne baho la Amagɛdɔn konle.

19, 20. Duzu a ɛmmaa bɛnyɛ Nyamenle ɛhulolɛdeɛ wɔ azɛlɛ ye azo kɛkala a?

¹⁹ Duzu a Nyamenle Belemgbunlililɛ ne balua Amagɛdɔn ne azo ayɛ a? Suzu adwenle mɔɔ Nyamenle lɛ ye wɔ azɛlɛ ye anwo la anwo bieko nea. Ɛnee ɔle Gyihova Nyamenle ɛhulolɛdeɛ kɛ alesama abusua mɔɔ le tenlene na ɔdi munli la sonle ye wɔ Paladaese. Duzu a ɛtɛmanle ɛhye ɛtɛyɛle zɔ kɛkala a? Mɔɔ lumua la, yɛyɛ ɛtane, yɛ nwo to yɛ na yɛwu. Noko akee, yɛzukoale ye wɔ Tile 5 ne anu kɛ Gyisɛse wule manle yɛ amaa yɛahola yɛadɛnla aze dahuu. Ɔda ali wienyi kɛ ɛkakye edwɛkɛ ne mɔɔ bɛha ye wɔ Dwɔn Edwɛkpa ne anu la kɛ: ‘Na Nyamenle hulole ewiade kpole kpalɛ la ati ɔvale ɔ Ra mɔɔ ɔwole ye kokye ne la ɔmanle, amaa awie biala mɔɔ kɛlie ye kɛli la anzɛkye na yeanyia dahuu ngoane.’—Dwɔn 3:16.

²⁰ Ngyegyelɛ bieko mɔɔ wɔ ɛkɛ ne la a le kɛ menli dɔɔnwo yɛ ninyɛndane. Bɛbɔ adalɛ, bɛsisi awie mɔ, na bɛbɔ ɛbɛla ɛtane. Bɛngulo kɛ bɛyɛ Nyamenle ɛhulolɛdeɛ. Bɛbazɛkye menli mɔɔ yɛ ninyɛndane la wɔ Nyamenle Amagɛdɔn konle ne anu. (Edwɛndolɛ 37:10) Noko debie bieko mɔɔ ɔti bɛnyɛ Nyamenle ɛhulolɛdeɛ wɔ azɛlɛ ye azo la a le kɛ menli mɔɔ di tumi la ɛnwula menli anwosesebɛ ɛmmaa bɛnyɛ Nyamenle ɛhulolɛdeɛ. Menli mɔɔ di tumi la anu dɔɔnwo ɛnnea menli ne anwo zo kpalɛ, bɛ ti yɛ se na bɛnli nɔhalɛ. Baebolo ne ka ye wienyi kɛ: “Bie mɔ lɛ tumi ɛlɛsisi bie mɔ bɛamaa bɛanwu amaneɛ.”—Nolobɔvo ne 8:9.

21. Kɛzi Belemgbunlililɛ ne bamaa bɛayɛ Nyamenle ɛhulolɛdeɛ wɔ azɛlɛ ye azo ɛ?

²¹ Wɔ Amagɛdɔn konle ne anzi, alesama badɛnla arane kokye mɔɔ yemɔ a le Nyamenle Belemgbunlililɛ ne la abo. Zɔhane Belemgbunlililɛ ne bayɛ Nyamenle ɛhulolɛdeɛ na yeava nyilalɛ mɔɔ yɛ nwanwane la yeara. Kɛ neazo la, ɔbaye Seetan  nee ye sunsum evinli ne mɔ yeavi ɛkɛ. (Yekile 20:1-3) Bɛbava Gyisɛse afɔlebɔlɛ ne anu tumi ne bɛali gyima, amaa alesama mɔɔ di nɔhalɛ la anwo ando bɛ na bɛawu. Emomu, bɛbadɛnla aze dahuu wɔ Belemgbunlililɛ ne tumililɛ bo. (Yekile 22:1-3) Bɛbayɛ azɛlɛ ne amuala paladaese. Ɛhye ati Belemgbunlililɛ ne bamaa bɛayɛ Nyamenle ɛhulolɛdeɛ wɔ azɛlɛ ye azo na bɛade Nyamenle duma ne anwo. Duzu a ɛhye kile a? Ɔkile kɛ awieleɛ kolaa ne, awie biala mɔɔ de aze wɔ Nyamenle Belemgbunlililɛ ne abo la bali Gyihova duma ne eni.

22. Kɛzi yɛkola yɛnwu ye kɛ Nyamenle Belemgbunlililɛ ne amba wɔ mekɛ mɔɔ ɛnee Gyisɛse wɔ azɛlɛ ye azo anzɛɛ bɛdwazole ye la anzi ɛkɛ ne ala ɛ?

²² Mekɛ mɔɔ Gyisɛse hanle kɛ ye ɛdoavolɛma ne ɛyɛ asɔne kɛ, “Wɔ belemgbunlililɛ ɛrɛla” la, ɛnee ɔda ali wienyi kɛ Belemgbunlililɛ ne ɛtɛbale. Asoo ɔrale mekɛ mɔɔ Gyisɛse hɔle anwuma la ɔ? Kyɛkyɛ, ɔboalekɛ Pita nee Pɔɔlo hanle kɛ bɛdwazole Gyisɛse la ɔmanle ngapezo ne mɔɔ wɔ Edwɛndolɛ 110:1 la rale nuhua: “[Gyihova, NW] zele me Awulae kɛ ‘tɛnla me sa fema zo, kɔkpula kɛ menwɔva wɔ kpɔvolɛma amuala menwɔwula ɛ gyakɛ abo.’” (Gyima ne 2:32-35; Hibuluma 10:12, 13) Ɛnee ɔwɔ kɛ mekɛ ekyi gua nuhua.

23. (a) Mekɛ boni a Nyamenle Belemgbunlililɛ ne bɔle ɔ bo kɛ ɔdi tumi a? (b) Duzu a yɛbazuzu nwo wɔ tile bieko mɔɔ doa zo la anu a?

²³ Ɔbayɛ mekɛ tendenle nyɛ? Wɔ ɛvoya 19 nee 20 ne anu, Baebolo sukoavoma mɔɔ kpondɛ debie anwu ye la ranwunle ye  kɛ ɛhendɛlɛ mekɛ ne bara awieleɛ wɔ 1914 ne anu. (Mɔɔ fane mekɛ ɛhye anwo la nea Mokanwo ne anu wɔ mukelɛ 215-18.) Ewiade edwɛkɛ mɔɔ bɔle ɔ bo sisile wɔ 1914 la kile kɛ Baebolo sukoavoma ndelebɛbo ne le nɔhalɛ. Baebolo nu ngapezo mɔɔ ɛra nuhua la kile kɛ bɛziele Kelaese Belemgbunli wɔ 1914 na Nyamenle anwuma Belemgbunlililɛ ne bɔle ɔ bo kɛ ɔdi tumi. Ɛhye ati, yɛde Seetan ‘mekɛ ne mɔɔ ɛha ekyi bie’ la anu. (Yekile 12:12; Edwɛndolɛ 110:2) Yɛkola yɛsi ye pi kɛ ɔnrɛhyɛ Nyamenle Belemgbunlililɛ ne bamaa bɛayɛ Nyamenle ɛhulolɛdeɛ wɔ azɛlɛ ye azo. Asoo edwɛkɛ ɛhye yɛ wɔ anyelielɛ? Asoo ɛdie ɛdi kɛ ɔle nɔhalɛ ɔ? Tile bieko mɔɔ doa zo la baboa wɔ yeamaa wɔanwu ye kɛ Baebolo ne amgba kilehile ninyɛne ɛhye mɔ.