ƐZUKOALƐDEƐ 38
Kile Ngoane Ahyɛlɛdeɛ Ne Anwo Anyezɔlɛ
Yɛde ngoane nu a yɛkola yɛyɛ ninyɛne dɔɔnwo mɔɔ yɛ anyelielɛ la. Saa yɛlɛyia ngyegyelɛ bɔbɔ a, yɛ nye kola die wɔ ɛbɛlabɔlɛ nu. Kɛ ɔkɛyɛ na yɛahile ngoane ahyɛlɛdeɛ ne anwo anyezɔlɛ ɛ? Na debie titili boni ati a ɔwɔ kɛ yɛyɛ zɔ a?
1. Duzu ati a ɔwɔ kɛ yɛ nye die ngoane nwo a?
Ɔwɔ kɛ yɛ nye die ngoane nwo ɔluakɛ ɔle ahyɛlɛdeɛ mɔɔ yɛ ɛlɔlɛ Selɛ, Gyihova ɛva ɛmaa yɛ a. Ye “ɛkɛ ne a ngoane vi a”—ɔdaye a ɔbɔle ngoane kɔsɔɔti a. (Edwɛne 36:9) “Ɔdaye a ɔmaa menli kɔsɔɔti ngoane nee ɛnwomenle nee debie biala a.” (Gyima ne 17:25, 28) Gyihova maa yɛnyia mɔɔ yɛhyia nwo amaa yɛadɛnla ngoane nu la. Eza noko ɔbɔ yɛ ngoane nwo bane amaa yɛ nye alie wɔ ɛbɛlabɔlɛ nu.—Kenga Gyima ne 14:17.
2. Kɛ ɔkɛyɛ na yɛamaa Gyihova anwu kɛ yɛ nye die ngoane ahyɛlɛdeɛ ne anwo ɛ?
Ɔvi mekɛ mɔɔ bɛnrenzɛle wɔ ala la, yɛɛ Gyihova bɔle ɔ bo kɛ ɔnea wɔ a. Nyamenle sunsum ne hanle ye sonvolɛ Devidi maanle ɔhanle kɛ: “Mekɛ mɔɔ mele mogya ɛdɔkɛ la, ɛ nye bɔbɔ nwunle me.” (Edwɛne 139:16) Wɔ ngoane sonle bolɛ kpole maa Gyihova. (Kenga Mateyu 10:29-31.) Saa awie anye fuu ku sonla anzɛɛ ɔku ɔ nwo bɔbɔ a, Gyihova di nyane kpole. a (Ɛzɛdɔso 20:13) Eza saa yɛ nye fuu yɛfa yɛ ngoane yɛto esiane nu anzɛɛ yɛannea boɛ na yɛfa awie mɔ ngoane yɛto esiane nu a ɔdi nyane. Saa yɛbɔ yɛ ngoane nee awie mɔ ngoane nwo bane a, ɔda ali kɛ yɛ nye die ngoane ahyɛlɛdeɛ nwanwane ne anwo.
SUKOA DƆƆNWO
Nea ndenle bie mɔ mɔɔ ɛbahola wɔalua zo wɔahile ngoane ahyɛlɛdeɛ ne anwo anyezɔlɛ la.
3. Nea wɔ kpɔkɛdelɛ zo boɛ
Kilisienema mɔɔ ɛyila bɛ nwo zo la fa bɛ ngoane muala sonle Gyihova. Ɔle kɛ asɛɛ bɛlɛfa bɛ sonlabaka ne amuala bɛabɔ afɔle bɛamaa Nyamenle la. Kenga Wulomuma 12:1, 2, na akee bɛzuzu kpuya ɛhye mɔ anwo:
-
Duzu a ɔwɔ kɛ ka wɔ ɔmaa ɛnea wɔ kpɔkɛdelɛ zo boɛ a?
-
Ndenle mɔɔ ɛbahola wɔalua zo wɔayɛ zɔ la bie mɔ a le boni?
4. Nea boɛ na awie amboda anzɛɛ anwu
Baebolo ne tu yɛ folɛ kɛ yɛhwe yɛ nwo yɛvi nyɛleɛ mɔɔ esiane wɔ nu la anwo. Ye VIDIO ne na nea ninyɛne bie mɔ mɔɔ ɛbahola wɔayɛ wɔava wɔabɔ ɛ nwo bane la.
Kenga Mrɛlɛbulɛ 22:3, na akee bɛzuzu kɛzi ɛbahola wɔabɔ ɛ nwo nee awie mɔ anwo bane wɔ . . .
-
wɔ sua nu.
-
wɔ gyima nu.
-
mekɛ mɔɔ bɛlɛdi nwɔhoa ngakyile.
-
mekɛ mɔɔ ɛlɛka kale anzɛɛ debie gyɛne anzɛɛ wɔvo bie la.
5. Bu kakula mɔɔ la ɛkolɛ nu la ngoane
Devidi hanle ye wɔ edwɛndolɛ nu kɛ Gyihova anye die kakula mɔɔ la ye mame akunlu la anwo. Kenga Edwɛne 139:13-17, na akee bɛzuzu kpuya ɛhye anwo:
-
Wɔ Gyihova anye zo, mekɛ boni a sonla ngoane bɔ ɔ bo a, mekɛ mɔɔ bɛkɛnrenzɛ ye anzɛɛ bɛkɛwo ye la?
Mɛla mɔɔ Gyihova vale maanle tete Yizilayɛma la bɔle mraalɛ nee ngakula mɔɔ la bɛ kunlu la anwo bane. Kenga Ɛzɛdɔso 21:22, 23, na akee bɛzuzu kpuya ɛhye mɔ anwo:
-
Kɛzi ɛnee Gyihova bu awie mɔɔ ɔ nye ɛnla nwo na ɔkɛhu kakula mɔɔ la ɛkolɛ nu la ɛ?
-
Na saa awie anye fuu yɛ zɔ a anrɛɛ kɛzi ɔbabu ye ɛ? b
-
Kɛzi ɛbu adwenle mɔɔ Nyamenle lɛ la ɛ?
Bie a raalɛ mɔɔ bu ngoane kɛ ɔsonle bolɛ bɔbɔ la bahola anyia adwenle kɛ mɔɔ ɔwɔ kɛ ɔyɛ ala la a le kɛ ɔbaye ɔ ko. Kenga Ayezaya 41:10, na akee bɛzuzu kpuya ɛhye mɔ anwo:
-
Saa bɛlɛpiepia raalɛ kɛ ɔye ɔ ko a, nwane a ɔwɔ kɛ ɔkpondɛ moalɛ ɔfi ye ɛkɛ a? Duzu ati ɔ?
BIE MƆ KA KƐ: “Raalɛ lɛ adenle si kpɔkɛ kɛ ɔbaye ɔ ko—ɔdaye ɔ nwo ɔ.”
-
Duzu a maa ɛdie ɛdi kɛ Gyihova bu raalɛ nee ɔ ra mɔɔ la ɔ kunlu la ngoane kɛ ɔsonle bolɛ a?
EDWƐKƐ TITILI
Baebolo ne kilehile yɛ kɛ yɛhulo Gyihova ngoane ahyɛlɛdeɛ ne, yɛbu ye na yɛbɔ nwolɛ bane. Ɛhye kile yɛdayɛ mumua ne yɛ ngoane yɛɛ awie mɔ ɛdeɛ.
Ndinu
-
Duzu ati a dasanli ngoane sonle bolɛ maa Gyihova a?
-
Saa awie anye fuu ku sonla a kɛzi Gyihova bu ye ɛ?
-
Duzu a ɛ nye die nwo wɔ ngoane ahyɛlɛdeɛ ne anwo a?
KPONDƐ DƆƆNWO
Kɛ ɔkɛyɛ na yɛayɛ Gyihova mo wɔ ngoane ahyɛlɛdeɛ ne anwo ɛ?
Kpondɛ kpuya ɛhye mualɛ, Asoo Nyamenle bava raalɛ mɔɔ ɛye ɔ ko ɛlɛ la ɛtane ahyɛ ye ɔ?
“Duzu A Baebolo Ne Ka Ye Wɔ Ɛkolɛyelɛ Nwo A?” (Edwɛkɛ mɔɔ wɔ jw.org azo)
Sukoa kɛzi adwenle mɔɔ Nyamenle lɛ ye wɔ ngoane nwo la ɔwɔ kɛ ka nwɔhoalilɛ mɔɔ yɛkpa kɛ yɛbava yɛ nwo yɛawula nu la anwo debie.
“‘Nwɔhoalilɛ Mɔɔ Esiane Wɔ Nu’—Ɛbava Ɛ Nwo Wɔawula Nu Ɔ?” (Awake!, October 8, 2000)
Na saa awie nyia adwenle kɛ ɔhu ɔ nwo ɛ? Nea kɛzi Baebolo ne bahola aboa ye la.
a Gyihova dwenle bɛdabɛ mɔɔ bɛ ahonle ɛbubu la anwo kpalɛ. (Edwɛne 34:18) Ɔte nyane kpole mɔɔ awie ɛlɛdi a ɔmaa ɔnyia adwenle kɛ ɔhu ɔ nwo la abo na ɔkulo kɛ ɔboa ye. Amaa wɔanwu kɛzi ye moalɛ ne bamaa wɔahakyi wɔ adwenle la, kenga edwɛkɛ ne mɔɔ se “Mekulo Kɛ Mewu—Saa Menyia Adwenle Kɛ Mengu Me Nwo A, Asoo Baebolo Ne Bahola Aboa Me?” mɔɔ wɔ ɛzukoalɛdeɛ ɛhye Kpondɛ Dɔɔnwo foa ne la.
b Ɔnle kɛ bɛdabɛ mɔɔ bɛye bɛ ko ɛlɛ la maa bɛ adwenle bua bɛ fɔlɛ somaa —Gyihova bahola ava ahyɛ bɛ. Saa ɛkpondɛ nwolɛ edwɛkɛ dɔɔnwo a, nea edwɛkɛ ne mɔɔ se “Duzu A Baebolo Ne Ka Ye Wɔ Ɛkolɛyelɛ Nwo A?” mɔɔ wɔ ɛzukoalɛdeɛ ɛhye Kpondɛ Dɔɔnwo foa ne la.
Bie A Eza Ɛ Nye Balie
KPUYA MƆƆ MENLI TA BIZA
Baebolo Ɛzukoalɛ Nwo Ngyehyɛleɛ Boni A Gyihova Alasevolɛ Yɛ A?
Wɔ Baebolo ɛzukoalɛ nwo ngyehyɛleɛ mɔɔ Gyihova Alasevolɛ ɛyɛ mɔɔ ɛndua ɛhwee la anu, ɛbahola wɔava Baebolo ngilebɛbo mɔɔ ɛ nye die nwo wɔali gyima. Saa ɛkulo kɛ ɛto ɛ sa ɛfɛlɛ wɔ abusua ne yɛɛ ɛ gɔnwo mɔ a, ɛbahola wɔayɛ zɔ.
