Waaqayyoon, Maqaasaatiin Isa Beekuu Ni Dandeessaa?

Nama baayʼee beekamaa taʼe tokko maqaasaatiin waamanii nagaa akka gaafatan afeeramuun mirga guddaadha. Namoonni aboo qaban yeroo baayʼee maqaa ulfinaa kan akka “Kabajamoo Pireezidaantii” ykn “Ulfaatoo” jedhaniin waamamu. Kanaaf, namni aangoo guddaa qabu tokko “Maquma kootiin na waami” yoo siin jedhe mirga guddaa akka argatte akka sitti dhagaʼamu homaa hin shakkisiisu.

WAAQNI dhugaan Macaafa Qulqulluu keessatti, “Ani [Yihowaadha], maqaan koo isa kana” jedheera. (Isaayaas 42:8) * Inni maqaa ulfinaa hedduu kan akka “Uumaa,” “Waaqayyo Hundumaa Dandaʼuu,” akkasumas “Gooftaa Hundaa Olii” jedhaman kan qabu taʼus, tajaajiltoonnisaa amanamoon yeroo hundaa maqaa dhuunfaasaatiin akka isa waaman isaanii heyyamuudhaan isaan kabaja.

Fakkeenyaaf, Musee raajichi yeroo tokko, “Dhiifama naa godhi, Yihowaa” jedhee kadhateera. (Baʼuu 4:10, NW) Solomoon Mootichi kadhannaa yommuu Manni Qulqullummaa Yerusaalem murteeffame dhiheesse kan jalqabe, “Yaa [Yihowaa]” jechuudhaan ture. (1 Mootota 8:22, 23) Isaayaas raajichis Israaʼeloota bakka buʼee yommuu Waaqayyoon kadhate, “Yaa [Yihowaa], ati Abbaa keenya” jedheera. (Isaayaas 63:16) Abbaan keenya inni samii maqaasaatiin akka isa waamnu nu afeereera.

Yihowaa maqaadhaan waamuun barbaachisaa taʼus, maqaasaatiin isa beekuun garuu waan dabalatu qaba. Inni nama isa jaallatuufi isatti amanamu ilaalchisee, “Waan inni maqaa koo beekuufis, eegumsaan ol isa nan qaba” jedhee waadaa galeera. (Faarfannaa 91:14) Maqaa Waaqayyoo beekuun eegumsasaa argachuuf murteessaa waan taʼeef, maqaasaa beekuun waan baayʼee kan dabalatu taʼuu qaba. Yihowaa maqaasaatiin beekuuf maaltu si barbaachisaree?

[Miiljaleewwan]