Матфейы 26:1—75
26 Йесо йӕ ныхас куы фӕци, уӕд йӕ ахуыргӕнинӕгтӕн загъта:
2 «Сымах зонут, дыууӕ боны фӕстӕ кӕй уыдзӕн Куадзӕн+, ӕмӕ уӕд Адӕймаджы Фырты хъӕдыл байтындздзысты»+.
3 Уӕд сауджынты хистӕртӕ ӕмӕ адӕмы хистӕр лӕгтӕ ӕрӕмбырд сты хистӕр сауджын Кайафӕйы+ кӕрты
4 ӕмӕ бауынаффӕ кодтой+ Йесойы ӕрцахсынӕн исты хиндзинад ӕрымысын ӕмӕ йӕ амарын.
5 Фӕлӕ дзырдтой: «Ӕрмӕст бӕрӕгбоны нӕ, науӕд адӕм сызмӕнтдзысты»+.
6 Йесо Вифанийы+, раздӕр хъотырӕй+ рынчын чи уыди, уыцы Симоны хӕдзары
7 фынгыл куы бадт, уӕд ӕм бацыд иу сылгоймаг дурынимӕ*, дурыны мидӕг уыди зынаргъ хӕрздӕф сой+, ӕмӕ йын сой йӕ сӕрыл уадзын райдыдта.
8 Йӕ ахуыргӕнинӕгтӕ уый куы федтой, уӕд смӕсты сты ӕмӕ загътой: «Цӕмӕн хъуыди уыйбӕрц сой хардз кӕнын?+
9 Уыцы сой бирӕ ӕхца райстаид, ӕмӕ уыцы ӕхца уыдаид мӕгуыртыл+ байуарӕн».
10 Йесо зыдта+, сӕ кӕрӕдзийӕн афтӕтӕ кӕй дзурынц, ӕмӕ сын загъта: «Цӕмӕн хъыгдарут ацы сылгоймаджы? Уый мӕнӕн хорздзинад ракодта+.
11 Мӕгуыртӕ+ ӕдзухдӕр уемӕ сты, ӕз та уемӕ ӕдзух нӕ уыдзынӕн+.
12 Ацы сылгоймаг мыл хӕрздӕф сой кӕй рауагъта, уымӕй мын мӕ буар ныгӕнынмӕ бацӕттӕ кодта+.
13 Ӕцӕг уын зӕгъын: хорз хабар ӕгас дунейы кӕмфӕнды ма хъусын кӕной, уым-иу ӕрымысдзысты ацы сылгоймаджы ӕмӕ-иу зӕгъдзысты, цы бакодта, уый тыххӕй»+.
14 Уый фӕстӕ дыууадӕс ахуыргӕнинагӕй иу, Иудӕ Искариот+, зӕгъгӕ, сауджынты хистӕртӕм ацыди
15 ӕмӕ сын загъта: «Уӕ къухы уын ӕй куы бафтын кӕнон, уӕд мын цы ратдзыстут?»+ Уыдон ын зӕрдӕ бавӕрдтой ӕртын ӕвзист ӕхцайӕ+.
16 Ӕмӕ уӕдӕй фӕстӕмӕ, сӕ къухы сын ӕй куыд бафтын кодтаид, уымӕн хорз фадат агуырдта+.
17 Донгонд дзулты+ бӕрӕгбонӕн йӕ фыццаг бон ахуыргӕнинӕгтӕ бацыдысты Йесомӕ ӕмӕ йӕ бафарстой: «Куыд дӕ фӕнды, кӕм дын ӕрӕвӕрӕм Куадзӕны фынг?»+
18 Уый сын дзуапп радта: «Ацӕут горӕтмӕ, ахӕм ӕмӕ ахӕм адӕймагмӕ+, ӕмӕ йын зӕгъут, зӕгъгӕ, Ахуыргӕнӕг афтӕ зӕгъы: „Мӕ афон ӕрхӕццӕ, ӕмӕ Куадзӕн мӕ ахуыргӕнинӕгтимӕ дӕ хӕдзары бӕрӕг кӕндзынӕн“»+.
19 Йӕ ахуыргӕнинӕгтӕ, куыддӕриддӕр сын загъта, афтӕ бакодтой, ӕмӕ, Куадзӕнмӕ цы хъуыди, уыдӕттӕ ӕрцӕттӕ кодтой+.
20 Уӕдмӕ баизӕр+. Йесо йӕ дыууадӕс ахуыргӕнинагимӕ бадти фынгыл+.
21 Ӕмӕ куы хордтой, уӕд сын загъта: «Ӕцӕг уын зӕгъын: уӕ иу мӕ ауӕй кӕндзӕн»+.
22 Уыцы ныхӕсты фӕстӕ йӕ ахуыргӕнинӕгтӕ тынг ӕрӕнкъард сты ӕмӕ йын райдыдтой радыгай дзурын: «Хицау, уый ӕз нӕ дӕн, афтӕ нӕу?»+
23 Йесо сын загъта: «Йӕ къӕбӕр мемӕ къусы чи тулы, уыдонӕй иу у мӕ уӕйгӕнӕг+.
24 Уӕвгӕ, Адӕймаджы Фыртӕн ӕнӕацӕугӕ нӕй, уый тыххӕй фыст куыддӕриддӕр у, афтӕ+. Фӕлӕ додой йӕ къона+ йӕ уӕйгӕнӕгӕн!+ Уыцы адӕймаг куы нӕ райгуырдаид, уӕд ын хуыздӕр уыдаид».
25 Уӕд ын Иудӕ, йӕ уӕйгӕнӕг, загъта: «Ахуыргӕнӕг, уый ӕз нӕ дӕн, афтӕ нӕу?» Йесо йын дзуапп радта: «Дӕхӕдӕг ӕй загътай».
26 Нырма хӕргӕ кодтой, афтӕ Йесо дзул райста+, Хуыцауӕн раарфӕ кодта ӕмӕ йӕ уый фӕстӕ ӕрсаста+, йӕ ахуыргӕнинӕгтӕм ӕй алӕвӕрдта ӕмӕ сын загъта: «Айсут ӕмӕ хӕрут. Ацы дзул нысан кӕны мӕ буар»+.
27 Стӕй та райста сӕны къус+, уый тыххӕй дӕр Хуыцауӕн бузныг загъта, алӕвӕрдта сӕм ӕй ӕмӕ сын загъта: «Уе ’ппӕт дӕр дзы бануазут+,
28 уымӕн ӕмӕ ацы сӕн нысан кӕны+ мӕ туг+ – „бадзырды туг“+, ӕмӕ ныккӕлдзӕн бирӕты тыххӕй+, цӕмӕй сӕ тӕригъӕдтӕ хатыргонд ӕрцӕуой+.
29 Фӕлӕ уын зӕгъын: амӕй фӕстӕмӕ ӕз сӕн нал бануаздзынӕн, цалынмӕ мӕ Фыды паддзахады уемӕ ног сӕн нӕ бануазон, уӕдмӕ»+.
30 Фӕстагмӕ ма Хуыцауӕн кады зарджытӕ азарыдысты+, ӕмӕ стӕй Оливӕбӕлӕсты хохы ’рдӕм араст сты+.
31 Уый фӕстӕ сын Йесо загъта: «Ахсӕв мӕ уе ’ппӕт дӕр ныууадздзыстут*, уымӕн ӕмӕ фыст у: „Фыййауы ӕрцӕвдзынӕн, ӕмӕ фысты дзуг алырдӕмты фӕлидздзӕн“+.
32 Фӕлӕ куы райгас уон, уӕд уӕ разӕй ацӕудзынӕн Галилейӕмӕ ӕмӕ уӕм уым ӕнхъӕлмӕ кӕсдзынӕн»+.
33 Уӕд ын Петр афтӕ: «Се ’ппӕт дӕр дӕ куы ныууадзой*, уӕддӕр дӕ ӕз никуы ныууадздзынӕн!»+
34 Фӕлӕ йын Йесо загъта: «Ӕцӕг дын зӕгъын: ахсӕв, уасӕг нӕма ныууасдзӕн, афтӕ ды мӕнӕй ӕртӕ хатты зӕгъдзынӕ, нӕ йӕ зонын, зӕгъгӕ»+.
35 Уӕддӕр Петр ныллӕууыд: «Демӕ мӕ амӕлын куы бахъӕуа, уӕддӕр афтӕ нӕ бакӕндзынӕн». Ӕмӕ афтӕ дзырдтой иннӕ ахуыргӕнинӕгтӕ дӕр+.
36 Уый фӕстӕ Йесо семӕ ӕрцыд, Гефсимани кӕй хонынц, уыцы бынатмӕ+, ӕмӕ сын загъта: «Цалынмӕ ӕз уӕртӕ уым кувон+, уӕдмӕ уал сымах ам абадут».
37 Уый фӕстӕ ацыд, ӕмӕ ма йемӕ акодта Петры ӕмӕ Зеведейы дыууӕ фырты+. Ӕмӕ уӕд тынг ӕрӕнкъард ӕмӕ йӕхимидӕг хъуырдухӕн кӕнын райдыдта+.
38 Ӕмӕ сын загъта: «Мӕ уд* дудгӕ рыст кӕны+. Фӕлӕуут ам мӕ фарсмӕ, ма бафынӕй ут»+.
39 Йӕхӕдӕг гыццыл фалдӕр ацыди, зӕххыл дӕлгоммӕ ӕрхауд ӕмӕ кувын райдыдта+, стӕй загъта: «Мӕ Фыд, кӕд гӕнӕн ис, уӕд мӕ ацы къус+ нуазын ма бахъӕуӕд. Ӕниу, мӕн куыд фӕнды, афтӕ нӕ+, фӕлӕ дӕу куыд фӕнды, афтӕ уӕд»+.
40 Йӕ ахуыргӕнинӕгтӕм куы ’рбаздӕхт, уӕд сӕ фынӕйӕ ӕрбаййӕфта ӕмӕ Петрӕн загъта: «Ау, иу сахат дӕр куыд нӕ бафӕрӕзтат мемӕ ӕнӕ фынӕйӕ?+
41 Ма бафынӕй ут+ ӕмӕ ӕппынӕдзух кувут+, цӕмӕй фӕлварӕны фидар фӕлӕууат+. Уд бӕргӕ фидар у, фӕлӕ буар та лӕмӕгъ у»+.
42 Дыккаг хатт дӕр та ацыд+ ӕмӕ куывта, ӕмӕ та загъта: «Мӕ Фыд, кӕд мын ацы къус ӕнӕбануазгӕ нӕй, уӕд, дӕу куыд фӕнды, афтӕ уӕд»+.
43 Куы сӕм ӕрбацыд, уӕд та сӕ фынӕйӕ ӕрбаййӕфта, уымӕн ӕмӕ сӕ цӕстытӕ хуыссӕгӕй ӕруӕззау сты+.
44 Ӕмӕ та сӕ уым ныууагъта, ацыд ӕмӕ та ӕртыккаг хатт+ дӕр афтӕ скуывта.
45 Уый фӕстӕ ӕрбаздӕхт йӕ ахуыргӕнинӕгтӕм ӕмӕ сын загъта: «Ныртӕккӕ уый рӕстӕг у, ӕмӕ фынӕй кӕнат ӕмӕ уӕ фӕллад уадзат? Ӕрхӕстӕг уыцы сахат, ӕмӕ Адӕймаджы Фырты тӕригъӕдджынты къухтӕм ратдзысты+.
46 Сыстут, цӕуын нӕ хъӕуы. Уӕртӕ ӕрбацӕуы мӕ уӕйгӕнӕг»+.
47 Ӕмӕ йӕ ныхас нӕма фӕци, афтӕ ӕрбазынд Иудӕ+, дыууадӕс ахуыргӕнинагӕй иу. Йемӕ йын сауджынты хистӕртӕ ӕмӕ адӕмы хистӕр лӕгтӕ+ рарвыстой бирӕ адӕмы хъаматӕ+ ӕмӕ хъилтимӕ.
48 Йӕ уӕйгӕнӕг сын загъта, куыд ӕй уыдзӕн базонӕн, уый: «Кӕмӕн апъа кӕнон, уый у. Уый-иу ӕрцахсут»+.
49 Ӕмӕ комкоммӕ Йесомӕ бацыд ӕмӕ йын загъта: «Дзӕбӕх у, Ахуыргӕнӕг!»+ Ӕмӕ йын фӕлмӕн ба акодта+.
50 Йесо+ та йӕ бафарста: «Ам цӕмӕн дӕ?» Уӕд адӕм Йесомӕ фӕлӕбурдтой ӕмӕ йӕ ӕрцахстой+.
51 Уӕд, Йесоимӕ чи уыди, уыдонӕй иу йӕ хъама фелвӕста, хистӕр сауджыны цагъары дзы ӕрцавта ӕмӕ йын йӕ хъус ахауын кодта+.
52 Фӕлӕ йын Йесо загъта: «Дӕ хъама йӕ бынаты сӕвӕр+, уымӕн ӕмӕ чидӕриддӕр йӕ къухмӕ хъама райса, уый йӕ мӕлӕт хъамайӕ ссардзӕн+.
53 Ӕви афтӕ ӕнхъӕл дӕ, ӕмӕ мӕ бон нӕу мӕ Фыдӕн ныллӕгъстӕ кӕнын, цӕмӕй мын ныртӕккӕ дӕр дыууадӕс ӕфсадӕй дӕр фылдӕр зӕдтӕ рарвита?+
54 Фӕлӕ ӕппӕт уыдӕттӕ куы не ’рцӕуой, уӕд Фыстад куыд сӕххӕст уыдзӕн?»
55 Ӕмӕ уӕд Йесо йе ’ргом адӕммӕ аздӕхта ӕмӕ загъта: «Раст цыма абырӕг дӕн, уыйау мӕм хъаматӕ ӕмӕ хъилтимӕ цы ’рбацыдыстут?+ Алы бон кувӕндоны куы бадтӕн+ ӕмӕ уӕ куы ахуыр кодтон, ӕмӕ мӕ уӕд куы нӕ ахстат?
56 Фӕлӕ ӕппӕт адӕттӕ уымӕн цӕуынц, цӕмӕй пехуымпарты фыстытӕ сӕххӕст уой»+. Уӕд ӕй йӕ ахуыргӕнинӕгтӕ се ’ппӕт дӕр ныууагътой ӕмӕ алыгъдысты+.
57 Йесойы чи ’рцахста, уыдон ӕй акодтой хистӕр сауджын Кайафӕмӕ+. Уым ӕрӕмбырд сты чиныджыдӕснытӕ ӕмӕ хистӕр лӕгтӕ+.
58 Петр Йесойы фӕдыл дӕрддзӕфгомау фӕцыд суанг хистӕр сауджыны кӕрты онг+. Стӕй кӕртмӕ бахызт, ӕмӕ уым лӕггадгӕнджытимӕ ӕрбадт ӕмӕ ӕнхъӕлмӕ каст, хъуыддаг цӕуыл ахицӕн уыдзӕн, уымӕ+.
59 Уыцы рӕстӕг та сауджынты хистӕртӕ ӕмӕ Сӕйраг тӕрхондон* ӕгасӕй дӕр агуырдтой мӕнгӕвдисӕнтӕ Йесойы ныхмӕ, цӕмӕй йын мӕлӕты тӕрхон рахастаиккой+.
60 Фӕлӕ сӕ къухы ницы бафтыд, кӕд сӕм бирӕ мӕнгӕвдисӕнтӕ ӕрбацыди, уӕддӕр+. Ӕппынфӕстаг ӕрбацыди дыууӕ мӕнгӕвдисӕны,
61 ӕмӕ уыдон загътой: «Ацы адӕймаг афтӕ загъта, мӕнӕн, дам, мӕ бон у Хуыцауы кувӕндон фехалын ӕмӕ йӕ ӕртӕ бонмӕ саразын»+.
62 Уӕд хистӕр сауджын сыстад ӕмӕ йӕ бафарста: «Ницы дзурыс? Дӕ ныхмӕ цы дзурынц, уый тыххӕй дӕхӕдӕг та цы зӕгъдзынӕ?»+
63 Фӕлӕ Йесо ницы дзырдта+. Ӕмӕ йын уӕд хистӕр сауджын загъта: «Расомы кӕн удӕгас Хуыцауӕй, кӕй нӕ фӕсайдзынӕ+ ӕмӕ нын зӕгъ: ды дӕ Чырысти+, Хуыцауы Фырт?»
64 Уӕд ын Йесо загъта+: «Дӕхӕдӕг ӕй куы загътай+. Ӕз та уын зӕгъын: Адӕймаджы Фырты+ нырӕй фӕстӕмӕ+ уындзыстут Ӕппӕтхъомысджыны рахиз фарс* бадгӕ+ ӕмӕ уӕларвон мигътыл ӕрцӕйцӕугӕ»+.
65 Уыцы ныхӕстӕм хистӕр сауджын йӕ уӕлӕдарӕс ӕрыскъуыдта ӕмӕ загъта: «Ай мӕнӕ Хуыцауы куы фауы!+ Цӕй ӕвдисӕнтӕ ма нӕ хъӕуы?+ Хуыцауы куыд фауы, уый уӕхӕдӕг фехъуыстат!+
66 Цы зӕгъдзыстут?» Уыдон ын загътой: «Хъуамӕ амӕла»+.
67 Ӕмӕ йын райдыдтой йӕ цӕсгомыл тутӕ кӕнын+ ӕмӕ йӕ тымбылкъухӕй цӕвын+. Иннӕтӕ та йын йӕ уадултӕ дзӕхстытӕ кодтой+.
68 Ӕмӕ йын дзырдтой: «Чырысти+, кӕд пехуымпар дӕ, уӕд ма нын ӕй зӕгъ, чи дӕ ныццавта?»+
69 Петр та ӕддейӕ кӕрты куы бадти, уӕд ӕм лӕггадгӕнӕг чызджытӕй иу бацыд ӕмӕ йын зӕгъы: «Ды дӕр галилейаг Йесоимӕ уыдтӕ!»+
70 Фӕлӕ уый нӕ басаст ӕмӕ се ’ппӕты раз загъта: «Цӕй кой кӕныс, уый не ’мбарын».
71 Петр кулдуары ’рдӕм куы ацыд, уӕд та йӕ базыдта ӕндӕр лӕггадгӕнӕг чызг дӕр ӕмӕ, уым чи уыди, уыдонӕн загъта: «Ай дӕр назаретаг Йесоимӕ уыди»+.
72 Петр та уӕддӕр нӕ басаст ӕмӕ сомытӕ кӕнгӕ дзырдта: «Ӕз уыцы адӕймаджы нӕ зонын!»+
73 Гыццыл фӕстӕдӕр та, цы адӕм дзы лӕууыд, уыдон Петрмӕ бацыдысты ӕмӕ йын загътой: «Нӕ, ды дӕр ӕнӕмӕнг уыдонӕй дӕ. Дӕ ныхасӕй дӕр бӕрӕг у»+.
74 Ӕмӕ уӕд Петр райдыдта сомытӕ кӕнын ӕмӕ ард хӕрын: «Ӕз уыцы адӕймаджы нӕ зонын!» Ӕмӕ раст уыцы рӕстӕг уасӕг ныууасыд+.
75 Уӕд Петр ӕрхъуыды кодта Йесойы ныхӕстӕ, уасӕг нӕма ныууасдзӕн, афтӕ ды мӕнӕй ӕртӕ хатты зӕгъдзынӕ, нӕ йӕ зонын+, зӕгъгӕ. Ӕмӕ ӕддӕмӕ рацыди ӕмӕ тынг ныккуыдта+.
Фиппаинӕгтӕ
^ Комк. «алебастр дурынимӕ».
^ Комк. «мӕн тыххӕй фӕкӕлдзыстут».
^ Комк. «куы фӕкӕлой».
^ Грекъ. психе́. Кӕс Уӕлӕмх. 6.
^ Комк. «Синедрион».
^ Комк. «уындзыстут хъаруйы рахиз цонджы фарсмӕ».
