ਜ਼ਬੂਰ 19:1-14
ਨਿਰਦੇਸ਼ਕ ਲਈ ਹਿਦਾਇਤ। ਦਾਊਦ ਦਾ ਜ਼ਬੂਰ।
19 ਆਕਾਸ਼ ਪਰਮੇਸ਼ੁਰ ਦੀ ਮਹਿਮਾ ਦਾ ਐਲਾਨ ਕਰਦਾ ਹੈ;+ਅੰਬਰ* ਉਸ ਦੇ ਹੱਥਾਂ ਦੀ ਕਾਰੀਗਰੀ ਬਿਆਨ ਕਰਦਾ ਹੈ।+
2 ਉਹ ਹਰ ਦਿਨ ਗਵਾਹੀ ਭਰਦੇ ਹਨਅਤੇ ਉਹ ਹਰ ਰਾਤ ਗਿਆਨ ਦਿੰਦੇ ਹਨ।
3 ਨਾ ਹੀ ਉਨ੍ਹਾਂ ਦੇ ਬੋਲ ਹਨ ਅਤੇ ਨਾ ਹੀ ਸ਼ਬਦ;ਉਨ੍ਹਾਂ ਦੀ ਆਵਾਜ਼ ਸੁਣਾਈ ਨਹੀਂ ਦਿੰਦੀ।
4 ਪਰ ਉਨ੍ਹਾਂ ਦੀ ਆਵਾਜ਼ ਸਾਰੀ ਧਰਤੀ ਉੱਤੇ ਗੂੰਜਦੀ ਹੈ*ਅਤੇ ਉਨ੍ਹਾਂ ਦਾ ਸੰਦੇਸ਼ ਧਰਤੀ* ਦੇ ਕੋਨੇ-ਕੋਨੇ ਵਿਚ ਪਹੁੰਚਦਾ ਹੈ।+
ਉਸ ਨੇ ਆਕਾਸ਼ ਵਿਚ ਸੂਰਜ ਲਈ ਤੰਬੂ ਲਾਇਆ ਹੈ;
5 ਸੂਰਜ ਲਾੜੇ ਵਾਂਗ ਆਪਣੇ ਕਮਰੇ ਵਿੱਚੋਂ ਨਿਕਲਦਾ ਹੈ;ਉਸ ਨੂੰ ਇਕ ਸੂਰਮੇ ਵਾਂਗ ਦੌੜ ਲਾਉਣ ਵਿਚ ਖ਼ੁਸ਼ੀ ਹੁੰਦੀ ਹੈ।
6 ਉਹ ਆਕਾਸ਼ ਦੇ ਇਕ ਸਿਰੇ ਤੋਂ ਨਿਕਲਦਾ ਹੈਅਤੇ ਚੱਕਰ ਕੱਢ ਕੇ ਦੂਜੇ ਸਿਰੇ ਤਕ ਜਾਂਦਾ ਹੈ;+ਕੋਈ ਵੀ ਚੀਜ਼ ਉਸ ਦੀ ਗਰਮੀ ਤੋਂ ਬਚ ਨਹੀਂ ਸਕਦੀ।
7 ਯਹੋਵਾਹ ਦਾ ਕਾਨੂੰਨ ਮੁਕੰਮਲ ਹੈ+ ਜੋ ਨਵੇਂ ਸਿਰਿਓਂ ਜਾਨ ਪਾਉਂਦਾ ਹੈ।+
ਯਹੋਵਾਹ ਦੀ ਨਸੀਹਤ* ਭਰੋਸੇਯੋਗ ਹੈ+ ਜੋ ਨਾਤਜਰਬੇਕਾਰ ਨੂੰ ਬੁੱਧੀਮਾਨ ਬਣਾਉਂਦੀ ਹੈ।+
8 ਯਹੋਵਾਹ ਦੇ ਆਦੇਸ਼ ਸਹੀ ਹਨ ਜੋ ਦਿਲ ਨੂੰ ਖ਼ੁਸ਼ ਕਰਦੇ ਹਨ;+ਯਹੋਵਾਹ ਦੇ ਹੁਕਮ ਸ਼ੁੱਧ ਹਨ ਜੋ ਅੱਖਾਂ ਵਿਚ ਚਮਕ ਲਿਆਉਂਦੇ ਹਨ।+
9 ਯਹੋਵਾਹ ਦਾ ਡਰ+ ਪਵਿੱਤਰ ਹੈ ਜੋ ਹਮੇਸ਼ਾ ਕਾਇਮ ਰਹਿੰਦਾ ਹੈ।
ਯਹੋਵਾਹ ਦੇ ਕਾਨੂੰਨ ਸੱਚੇ, ਹਾਂ, ਬਿਲਕੁਲ ਸਹੀ ਹਨ।+
10 ਉਹ ਸੋਨੇ ਨਾਲੋਂ,ਹਾਂ, ਬਹੁਤ ਸਾਰੇ ਕੁੰਦਨ* ਸੋਨੇ ਨਾਲੋਂ ਵੀ ਮਨ ਨੂੰ ਭਾਉਂਦੇ ਹਨ+ਅਤੇ ਉਹ ਸ਼ਹਿਦ, ਹਾਂ, ਛੱਤੇ ਤੋਂ ਚੋਂਦੇ ਸ਼ਹਿਦ ਨਾਲੋਂ ਵੀ ਜ਼ਿਆਦਾ ਮਿੱਠੇ ਹਨ।+
11 ਇਨ੍ਹਾਂ ਦੇ ਰਾਹੀਂ ਤੇਰੇ ਸੇਵਕ ਨੂੰ ਚੇਤਾਵਨੀ ਮਿਲਦੀ ਹੈ;+ਇਨ੍ਹਾਂ ਨੂੰ ਮੰਨਣ ਨਾਲ ਵੱਡਾ ਇਨਾਮ ਮਿਲਦਾ ਹੈ।+
12 ਆਪਣੀਆਂ ਗ਼ਲਤੀਆਂ ਦਾ ਕਿਸ ਨੂੰ ਅਹਿਸਾਸ ਹੁੰਦਾ ਹੈ?+
ਮੇਰੇ ਤੋਂ ਅਣਜਾਣੇ ਵਿਚ ਜੋ ਪਾਪ ਹੋਏ ਹਨ, ਤੂੰ ਉਨ੍ਹਾਂ ਤੋਂ ਮੈਨੂੰ ਬੇਕਸੂਰ ਠਹਿਰਾ।
13 ਅਤੇ ਆਪਣੇ ਸੇਵਕ ਨੂੰ ਗੁਸਤਾਖ਼ੀ ਭਰੇ ਕੰਮ ਕਰਨ ਤੋਂ ਰੋਕ;+ਇਨ੍ਹਾਂ ਨੂੰ ਮੇਰੇ ’ਤੇ ਹਾਵੀ ਨਾ ਹੋਣ ਦੇ।+
ਫਿਰ ਮੈਂ ਬੇਦਾਗ਼ ਹੋ ਜਾਵਾਂਗਾ+ਅਤੇ ਆਪਣੇ ਗੰਭੀਰ ਪਾਪਾਂ ਤੋਂ ਨਿਰਦੋਸ਼ ਠਹਿਰਾਂਗਾ।
14 ਹੇ ਯਹੋਵਾਹ, ਮੇਰੀ ਚਟਾਨ+ ਅਤੇ ਮੇਰੇ ਮੁਕਤੀਦਾਤੇ,+ਮੇਰੇ ਮੂੰਹ ਦੀਆਂ ਗੱਲਾਂ ਅਤੇ ਮੇਰੇ ਮਨ ਦੇ ਖ਼ਿਆਲਾਂ ਤੋਂ ਤੈਨੂੰ ਖ਼ੁਸ਼ੀ ਮਿਲੇ।+
ਫੁਟਨੋਟ
^ ਜਾਂ, “ਵਾਯੂਮੰਡਲ।”
^ ਜਾਂ ਸੰਭਵ ਹੈ, “ਮਿਣਨ ਵਾਲੀ ਰੱਸੀ ਸਾਰੀ ਧਰਤੀ ’ਤੇ ਪਹੁੰਚਦੀ ਹੈ।”
^ ਜਾਂ, “ਉਪਜਾਊ ਜ਼ਮੀਨ।”
^ “ਨਸੀਹਤ” ਅਨੁਵਾਦ ਕੀਤੇ ਗਏ ਇਬਰਾਨੀ ਸ਼ਬਦ ਵਿਚ ਕਾਨੂੰਨ, ਹੁਕਮ, ਚੇਤਾਵਨੀ ਅਤੇ ਉਹ ਗੱਲਾਂ ਸ਼ਾਮਲ ਹਨ ਜੋ ਪਰਮੇਸ਼ੁਰ ਆਪਣੇ ਲੋਕਾਂ ਨੂੰ ਯਾਦ ਕਰਾਉਂਦਾ ਹੈ ਅਤੇ ਉਨ੍ਹਾਂ ਮੁਤਾਬਕ ਚੱਲਣ ਲਈ ਕਹਿੰਦਾ ਹੈ।
^ ਜਾਂ, “ਸ਼ੁੱਧ ਕੀਤੇ ਗਏ।”
