Say Makapanyarin Babilonia, ya deneskribe ed libro na Apocalipsis, et ontutukoy ed amin a palson relihyon ed mundo, ya ag-aawaten na Dios. a (Apocalipsis 14:8; 17:5; 18:21) Anggano dakel so pandurumaan na sarayan relihyon, amin iraya et iyaarawi day totoo ed panagdayew ed tuan Dios, si Jehova.​—Deuteronomio 4:35.

No Panon ya Nabidbir so Makapanyarin Babilonia

1.   Say Makapanyarin Babilonia et sakey ya simbolo. Sikatoy deneskribe na Biblia bilang “sakey a bii” tan sakey a “bantog a balangkantis” odino imoral a bii, a say ngaran to et “sakey a misteryo: ‘Makapanyarin Babilonia.’” (Apocalipsis 17:1, 3, 5) Say libro na Apocalipsis et impaamta “diad panamegley na saray simbolo,” kanian duga labat ya ibagan say Makapanyarin Babilonia et aliwan literal a bii. (Apocalipsis 1:1) Sakey ni, sikatoy “akayurong ed dakdakel a danum,” ya mangirerepresenta ed “saray rasa tan grupo na totoo tan nasyon tan lenguahe.” (Apocalipsis 17:1, 15) Ag-itan nagawaan na literal a bii.

2.   Say Makapanyarin Babilonia et mangirerepresenta ed internasyonal a grupo. Sikatoy tinawag a “baleg a syudad a walaan na sakey a panarian a manguley ed saray arari ed dalin.” (Apocalipsis 17:18) Kanian interon mundo so sakop to tan iimpluensyaan to.

3.   Say Makapanyarin Babilonia et ontutukoy ed relihyon, aliwan politika odino komersyo. Say Babilonia nensaman et relihyoson syudad, a kabkabat ed panguusar toy panagmahiko tan panagsalamangka. (Isaias 47:1, 12, 13; Jeremias 50:1, 2, 38) Diad tua, palso so relihyon na totoo ditan ya kontra ed tuan Dios, si Jehova. (Genesis 10:8, 9; 11:2-4, 8) Saray manuley ed Babilonia et impasen day sarili ra ya mas atagey nen si Jehova tan agda nirespeto so panagdayew ed sikato. (Isaias 14:4, 13, 14; Daniel 5:2-4, 23) Ontan met, kabkabat so Makapanyarin Babilonia ed ‘panggagawa toy espiritismo.’ Ipapanengneng na satan ya sikatoy relihyoson organisasyon.​—Apocalipsis 18:23.

    Say Makapanyarin Babilonia et agnayarin ontukoy ed politika ta saray “arari ed dalin” et manermen lapud kaderal to. (Apocalipsis 17:1, 2; 18:9) Agmet itan ontutukoy ed komersyo ta diad Biblia et midumaan itan ed saray “negosyante ed dalin.”​—Apocalipsis 18:11, 15.

4.   Say Makapanyarin Babilonia et dugarugad deskripsion na palson relihyon. Imbes ya ibangat na palson relihyon so totoo ya onasingger ed tuan Dios, si Jehova, ibabangat to ran mandayew ed arum a dirios. Tatawagen iya na Biblia ya ‘pilalawanan ed dirios.’ (Levitico 20:6; Exodo 34:15, 16) Saray bangat a singa say Trinidad tan imortalidad na kamarerwa, tan saray kagagawa a singa say pangusar na imahen ed panagdayew et nanlapud Babilonia nensaman tan tuloytuloy nin gagawaen na palson relihyon. Say panagdayew na sarayan relihyon et nalalaokan met na panangaro ed mundo. Sayan ag-inkamatoor et tutukoyen na Biblia bilang espiritual a pikakalugoran.​—Santiago 4:4; paimanod leksab.

    Say kayamanan na palson relihyon tan say panangipangta tod satan et dugarugad deskripsion na Biblia nipaakar ed Makapanyarin Babilonia, ya “akasulong na purpura tan ambalbalangan kawes” tan “walaan na saray alahas a balitok tan mablin bato tan perlas.” (Apocalipsis 17:4) Say Makapanyarin Babilonia et lapuan na “saray makapadimlan bengatla diad dalin,” odino saray bangat tan kagagawa ya agmamapagalang ed Dios. (Apocalipsis 17:5) Saray membro na palson relihyon et “saray rasa tan grupo na totoo tan nasyon tan lenguahe” ya onsusuportad Makapanyarin Babilonia.​—Apocalipsis 17:15.

 Say Makapanyarin Babilonia so natetel lapud “amin a pinatey diad dalin.” (Apocalipsis 18:24) Ipapanengneng na history ya say palson relihyon et aglabat mangisusugsog na guerra tan terorismo, noagta agda met ibabangat ed totoo so katuaan nipaakar ed si Jehova, say Dios na aro. (1 Juan 4:8) Saya so rason no akin ya dakerakel so agawan panagpaagus na dala. Kanian, saramay labay dan paliketen so Dios et nepeg ya ‘ompaway ed sikato,’ ya onekal ira ed palson relihyon.​—Apocalipsis 18:4; 2 Corinto 6:14-17.