Saray Gawa na Saray Apostol 23:1-35
23 Legan ya onnenengneng si Pablo ed Sanhedrin, inkuan to: “Agagi, onkikiwas ak ed arapan na Dios a malinlinis so konsiensiak+ anggad sayan agew.”
2 Diad saya et ingganggan na atagey a saserdoten si Ananias a sikatoy tampalen na saramay akaalagey ed abay to.
3 Kanian inkuan nen Pablo ed sikato: “Kabilen ka na Dios, sikan pinaputin padir. Kasin yinmurong kan mangukom ed siak unong ed Ganggan insan sumlangen mo lanlamang itan, diad pangigaganggan mon tampalen da ak?”
4 Inkuan na saramay akaalagey: “Iinsultoen moy atagey a saserdote na Dios?”
5 Inkuan nen Pablo: “Agagi, agko amta a sikatoy atagey a saserdote. Ta walan nisulat, ‘Agmo nepeg a pansalitaan na mauges so sakey a manuley ed kabaleyan mo.’”+
6 Natan, lapud amta nen Pablo a say kapaldua ed Sanhedrin et Saduceo tan say arum et Fariseo, oniay imbaga tod sikara: “Agagi, sakey ak a Fariseo,+ anak na saray Fariseo. Uukomen ak lapud manisia ak ed kioli na saray inaatey.”
7 Sanen imbaga to iya, nansasangsangan iray Fariseo tan saray Saduceo, tan naapag ira.
8 Ta ibabaga na saray Saduceo ya anggapoy kioli odino anghel odino espiritu, balet sarayan amin et aawaten* na saray Fariseo.+
9 Kanian walay agawan baleg a gulo, tan inmalagey so arum ed saray eskriba a walad dapag na saray Fariseo tan mapaspasnok iran akisangsangan, ya inkuan da: “Anggapoy naromog min kasalanan na sayan too, balet no akitongtong ed sikato so sakey ya espiritu odino sakey ya anghel+—.”
10 Natan sanen ampetang lay sangsangan, tinmakot so komandante na militar ompan pangguguyoran day Pablo, kanian ingganggan to iray sundalo a dagoen da tan alaen da, insan iyakar dad kuartel na saray sundalo.
11 Balet diad saman a labi et inmalagey so Katawan ed abay to, ya inkuan to: “Manpakpel ka!+ Ta no panon a sigpot mon tatasian ed Jerusalem so nipaakar ed siak, ontan met so nepeg a pantasim diad Roma.”+
12 Sanen kabuasan la, nankokomplot iray Judio tan nansamba ran amin, ya inkuan dan ag-ira mangan odino oninum anggad agda napatey si Pablo.
13 Masulok ya 40 totoo so nansamba.
14 Linma irayan totoo ed saray manunan saserdote tan mamatatken tan inkuan da: “Masimsimoon kamin nansamba ya agkamin balot mangan anggad agmi napatey si Pablo.
15 Kanian natan, sikayo tan say Sanhedrin et ipaamta yod komandante na militar a sikatoy nepeg ton iyakar dia, ya ibaraan yon walay labay yo nin linewen a maong ed kaso to. Balet antis a sikatoy makaasingger dia, akaparaan kami lan mamatey ed sikato.”
16 Balet sayan plano ran pansabat et nadngelan na anak na biin agi nen Pablo, tan sikatoy linmoob ed kuartel na saray sundalo tan imbaga tod si Pablo.
17 Diad saman et tinawag nen Pablo so sakey ed saray opisyal na armada tan inkuan to: “Iyakar mod komandante na militar iyan kalangweran a laki, ta walay ibaga to.”
18 Kanian sikatoy inyakar tod komandante na militar tan inkuan to: “Tinawag ak na samay prison si Pablo tan kinerew tod siak ya iyakar kod sika iyan kalangweran a laki, ta walay ibaga tod sika.”
19 Sikatoy inegnaan na komandante na militar tan inyarawi to, tan sanen sikara labat la et tinepetan to: “Antoy ibagam ed siak?”
20 Inkuan to: “Nampapaknaan na saray Judio a kerewen dad sika ya iyakar mo nabuas ed Sanhedrin si Pablo, ya ibaraan dan walay labay da nin linewen ed kaso to.+
21 Balet agka komon pakokombinse ed sikara, ta walay masulok ya 40 totoo ra a manabat ed sikato, tan nansamba ra ya ag-ira mangan odino oninum anggad agda napatey;+ tan akaparaan la ra natan, tan aalagaren dan abobonan moy kerew da.”
22 Kanian pinapawil la na komandante na militar so kalangweran a laki kayari ton binilin: “Agmo ibabaga ed anggan siopa ya impaamtam iya ed siak.”
23 Tan impatawag toy duara ed saray opisyal na armada tan inkuan to: “Iparaan yoy 200 a sundalo a manakar ya anggad Cesarea, ontan met ed 70 sundalon de-kabayoan tan 200 ya akaawit na gayang, diad komatlon oras na labi.*
24 Mangitarya kayo met na saray kabayo a luganan nen Pablo, pian sikatoy naawit dan maligen ed si Felix a gobernador.”
25 Tan sikatoy nanggawa na sulat ya oniay nabasa:
26 “Siak, si Claudio Lisias, so nansulat ed sika, Kagalgalang a Gobernador Felix: Awat moy panangumustak!
27 Sayan laki et inerel na saray Judio tan ngalngali da la pateyen, balet sinmabi ak a tampol a kaibak iray sundalo tan inliktar ko,+ lapud naamtaan kon sikatoy sakey a Romano.+
28 Tan lapud labay kon naamtaan no akin a sikatoy aakusaan da, sikatoy inyakar kod Sanhedrin da.+
29 Nalmoan kon sikatoy inakusaan nipaakar ed saray bengatlan pansusuppiatan ed Ganggan da,+ balet anggapon balot so niyakusa ra pian sikatoy manepeg a pateyen odino ipriso.
30 Balet lapud nipaamta ed siak so mauges a plano rad sikato,+ sikatoy impaiyakar kon tampol ed sika, tan ingganggan ko ray mangaakusa ed sikato a mansalita rad arapan mo.”
31 Kanian inala na sarayan sundalo si Pablo+ unong a niganggan ed sikara tan diad labi et sikatoy inawit dad Antipatris.
32 Diad tinmumbok ya agew, inabuloyan da iray sundalon de-kabayoan a mangulop ed sikato, balet pinmawil irad saray kuartel na saray sundalo.
33 Linmad Cesarea iray sundalon de-kabayoan tan inyawat dad gobernador so sulat tan inyarap da met ed sikato si Pablo.
34 Kanian binasa to itan tan tinepet to no anton probinsya so nanlapuan to, tan naamtaan ton sikatoy nanlapud Cilicia.+
35 Inkuan to: “Dengelen kon maong so kasom sano wadia met la ray mangaakusa ed sika.”+ Tan sikatoy impabantayan ton maong diad palasyo nen Herodes a panaayaman na gobernador.
