Isaias 15:1-9
-
Mensahe sumpad Moab (1-9)
15 Say mensahe sumpad Moab:+
Lapud aderal so Ar+ na Moab ed loob labat na sakey labi,Anggapo lan balot so narengel ditan.
Lapud aderal so Kir+ na Moab ed loob labat na sakey labi,Anggapo lan balot so narengel ditan.
2 Sikatoy tinmatdang ed Abung* tan ed Dibon,+Diad atagey iran pasen, pian onakis.
Nanugaog so Moab lapud Nebo+ tan Medeba.+
Kinalbo so amin a kauloan,+ akatli so amin a balbas.+
3 Akasulong ira na sakon abel diad saray karsada.
Manugaog iran amin diad saray atep da tan diad saray plaza ra;Onakis ira diad iyepas da.+
4 Oneeyag so Hesbon tan Eleale;+Narerengel so boses da ya anggad Jahaz.+
Kanian oneeyag iray sundalo na Moab.
Sikatoy* ginmiwgiw.
5 Mansibsibek so pusok lapud Moab.
Binmabatik iray takas ditan tan akasabi ra anggad Zoar+ tan Eglat-selisiya.*+
Manak-akis iran ontatatdang ed Luhit;Sanen paarap irad Horonaim, inmakis iran maksil lapud kadederal.+
6 Ta nakatan iray danum na Nimrim;Amagaan so birdin karikaan,Naandi iray dika tan anggapo lay nanengneng a birdi.
7 Kanian awi-awit da iray akera ed saray tinipon da tan kayamanan da;Babaliwen da so lawak* a kawalaan na saray kiew ya alamo.
8 Ta say pannangis et sankarengel ed interon teritorya na Moab.+
Say panugaog et sinmabi anggad Eglaim;Say panugaog et sinmabi anggad Beer-elim.
9 Ta apano na dala iray danum na Dimon,Tan wala ni kaaruman ya iyakar ko parad Dimon:
Sakey a leon parad saramay tinmakas manlapud MoabTan parad saramay akera ed dalin to.+
Paimanod leksab
^ Odino “Templo.”
^ Odino “Say kamarerwa to et.”
^ Mapatnag a manutukoy ed sakey a pasen ed nasyon na Moab. Ipapatalos iya na arum bilang, “biin baka a taloy taon ni labat.”
^ Odino “kulos.”
