Isaias 6:1-13
6 Diad taon na impatey nen Arin Uzias,+ anengneng koy Jehova ya akayurong ed magloria tan niyatagey a trono,+ tan asakbongan na saloy na kawes to so templo.
2 Akaalagey ed liber to iray serapin; anemiray payak na kada sakey. Insakbong na kada sakey* so duaran payak to ed lupa to, tan duara so insakbong tod sali to, tan say duara et pantitikyab to.
3 Tan say sakey et oniay ibabando tod samay sakey:
“Masanto, masanto, masanto si Jehova na saray armada.+
Say interon dalin et napnoy gloria to.”
4 Tan yinmugayog iray lusek na saray puerta lapud kasil na pambabando,* tan say abung et napnoy asewek.+
5 Insan inkuan ko: “Pakaskasi ak la!
Singa ak la inatey,*Ta aliwan malinis so panagsalitak,Tan manaayam ak a kaiba na saray totoon aliwan malinis so panagsalita ra;+Ta anengneng kon mismo so Ari, si Jehova na saray armada!”
6 Diad saman et tinmikyab ya amaarap ed siak so sakey ed saray serapin, tan walay awit ton mandarlang a ngalab+ a sinipit tod altar.+
7 Indelnet to itan ed sangik tan inkuan to:
“Nidelnet la iya ed saray bibil mo.
Naandi lay lingom,Tan aperdona lay kasalanan mo.”
8 Insan nadngel koy boses nen Jehova, a kuan to: “Siopay ibakik, tan siopay mangirepresenta ed sikami?”+ Tan inmebat ak: “Wadia ak! Ibaki mo ak!”+
9 Tan inkuan to, “La ka, tan ibagam ed sarayan totoo:
‘Narengel yon maminpigapiga,Balet agyo natalosan;Nanengneng yon maminpigapiga,Balet agkayo nawalaay kakabatan.’+
10 Pagmaliw mon agmaawat so puso na sarayan totoo,+Pagmaliw mon agmakadngel so kalayagan da,+Tan pepetan moy kamataan da,Pian agmakanengneng iray mata raTan agmakadngel iray layag da,Pian agmakatalos so puso raTan ag-ira ompawil tan ag-ira onabig.”+
11 Lapud saya et inkuan ko: “Anggad kapigan, O Jehova?” Insan inkuan to:
“Anggad nageba la iray syudad tan anggapo lay manayam ed saratanTan anggapo lay too ed kaabunganTan say dalin et aderal la tan agla napanayaman;+
12 Anggad ibantak nen Jehova ed arawi iray totoo+Tan nataynanan so baleg a kabiangan na dalin.
13 “Balet walay natilak ditan a kakaplo, insan napoolan lamet itan, a singa baleg a kiew tan kiew a roble,* a sano batangen et walay natilak a sengeg; sakey a masanton bini* so magmaliw a sengeg to.”
Paimanod leksab
^ Literal, “Insakbong to.”
^ Literal, “samay boses na ontatawag.”
^ Literal, “Apareen ak la.”
^ Sakey iyan klase na angkabaleg a kiew. Diad Ingles et oak.
^ Odino “ilalak.”
