• INKIYANAK: 1957

• BANSA: AUSTRALIA

• APALABAS: ALIWLIWAY IMPANUGAW TO

ISTORYAY BILAY KO:

Binmaleg ak ed Newcastle, diad New South Wales. Siak so panguloan ed sikamin pitoran sanaagi. Buanges si tatay ko, si nanay ko balet et maruksa. Ontan so binalegan min pamilya. Lanang ak ya bobogbogen nen nanay ko tan ansasakit so panagsalita da. Naynay dan ibabaga ya mauges ak kanian napairap ak ed impierno, natatakot ak laingen lapud saratan ya ibabaga da.

Lapud sasakitan ak nen nanay ko, agak makakaloob ed eskuelaan ta ansakit so laman ko. Nen 11 años ko, inala ak na saray autoridad ed atateng ko insan da ak impanayam ed institusyon ya gaway gobierno, tan ag-abayag et inyan da ak ed kombento. Nen 14 ko, tinmakas ak. Agko met la labay so onsempet ed sikami kanian nanayam ak ed kalye na Kings Cross, sakey ya lugar ed Sydney.

Lapud palaboy ak ed kalye, naaralan koy man-drugs, oninum na alak, manbantay na pornograpiya, tan asangkot ak ed prostitusyon. Aminsan, walay agawa ya akataktakotan ko. Diad saman, manaayam ak lad samay apartment to may makanggawa na nightclub. Diad sakey ya labi, walay duaran laki ya linmad man. Pinaloob to ak may makanggawa na nightclub ed kuarto, pero narerengel koy pantotongtongan da. Plano ton ilako ak ed saramay lalaki. Iyamot da ak kuno ed cargo ship tan awiten da ak ed Japan pian mantrabaho ed bar. Anerbiyos ak kanian tinmaboy ak ed balkon tan batik ak pian onkerew na tulong.

Walay asabat kon laki ya binmisita dia ed Sydney, impaliwawak ed sikato so agawa pian ikdan to ak komon na kuarta. Pero, inimbitaan to ak ya mila ed samay pampupundoan to pian makapanames ak tan makapangan. Manlapud saman, agak la inmalis diman, tan kayari sakey taon, nankasal kami.

NO PANON YA INUMAN NA BIBLIA SO BILAY KO:

Nen nampaiyaral ak na Biblia ed Saray Tasi nen Jehova, nanduruma so aliknak. Singa bilang, makakapasnok ak nen naamtaan kon si Satanas so lapuan na kaugsan, dumad samay lanang dan ibabangat ed siak ya say Dios kuno so lapuan na irap. Aligliwa ak met nen naamtaan ko ya aga pairapen na Dios iray totoo ed impierno. Ayan bangat et tatakotan kon maong.

Pambiliban ko met iray Tasi ta manggagawa ray desisyon base ed nanaaralan dad Biblia. Iyaaplika da so papanisiaan da. Mairap ak ya piulopan, pero anggano antoy ibagak o gawaen ko et rerespetoen ak na saray Tasi tan aaroen da ak nin siansia.

Pakaliknak et anggapoy kuentak, kabkabusol koy sarilik. Aratan so problemak ya abayag kon nilabanan. Anggano asabi panaon ya abautismoan ak lan Tasi nen Jehova, siansia nin ontan so naliliknak. Tua, inarok si Jehova, pero kombinsido ak ya agton balot naaro so singa oniad siak.

Insan ko labat nauman so panmoriak ed sarilik kayari na 15 taon manlapu nen abautismoan ak. Legan na paliwawa ed Kingdom Hall na Saray Tasi nen Jehova, impaimano na speaker so Santiago 1:23, 24. Diad saratan ya bersikulo et inkompara so Salita na Dios ed salming ya ditan et nanengneng tayoy sarili tayo unong ed pakanengneng nen Jehova. Lapud saman, mabetbet ko lan naiisip ya duma manayay pakanengneng kod sarilik ed pakanengneng nen Jehova. Diad gapo, agak manisia ed saya. Siansia nin naliliknak ya agak naaro nen Jehova.

Kalabas na pigaran agew, walay abasak ya teksto ya baleg so epekto tod bilay ko, amay Isaias 1:18 ya oniay ibabaga nen Jehova: “Dago kayo natan, tan pantongtongan tayo ray kaukolan ya ipetek ed baetan tayo. . . . Anggano saray kasalanan yo et ambalbalanga, napaputi iratan a singa niebe.” Aliknak ya singa ak kakatongtongen nen Jehova ya singa to ibabagan: “Sige la Vicky, ipetek tay kailangan ya ipetek ed baetan ta. Kabat ta ka, amtak so agawaan mon lingo, tan amtak no antoy walad pusom tan inar-aro ta ka.”

Agak makaugip ed saman ya labi. Siansia nin agak manisia no kasin naaro ak nen Jehova, pero naisip ko so dondon bagat nen Jesus. Insan biglak ya naisip ya abayag la manayan manaanos si Jehova ed siak, tan impanengneng ton inaro to ak diad dakel ya paraan. Pero, singak ibabagad sikato: “Kulang ni panangarom ed siak. Tan say dondon bagat na Anak mo et kulang pian nabayaran toy kasalanan ko.” Singak ipapawil so dondon ed si Jehova. Pero lapud impandalepdep kod sayan balibalin regalo, sa wakas aliknak ya inaro ak ya talaga nen Jehova.

MARAKEP IRAN RESULTA:

Nagmaliw ak ya malinis, maliket, tan buo. Mas maong so ulopan min sanasawa natan, tan maliket ak ya ibagad arum so experience ko pian natulongan ira. Mas maapit la natan so relasyon kod si Jehova.