DIAD idarakel na totoo, maples a kinmayat ed dalin so kasalanan tan inkauges. Say alenleneg a propeta ed saman a si Enoc so angipasakbay a nasabi agew et deralen na Dios iray mauges a totoo. Pero, nantultuloy so kaugsan tan linmoor ni ingen. Walaray anghel a nanrebelde ed si Jehova sanen tinaynan da so tawen ya ayaman da, a nankunkunwari iran too diad dalin, tan angaasawa ira na bibii. Say resulta, nanilalak ira na mabibiskeg tan angkakabaleg a bubusangel ya atawag a Nefilim ya amaloor ed panggugulo tan pampapateyan diad mundo. Naermenan a maong so Dios ed impakanengneng ton aliwliwa so nansumpalan na saray pinalsa to diad dalin.

Kayari impatey nen Enoc, walay sakey a toon nidumaduma. Say ngaran to et Noe. Sikato tan say pamilya to et ginawa ra so anggaay nayarian da pian gawaen so duga ed arap na Dios. Sanen deralen la na Dios so mauges a totoo ed saman, labay ton isalba si Noe tan saray ayayep ed dalin. Kanian inkuan na Dios ed sikato a manggawa na baleg tan pandukey ya arka. Satan so pakasalbaan nen Noe tan say pamilya to, pati dakerakel a klase na ayayep ed pakadelap na interon mundo. Inunor nen Noe so Dios. Diad loob na saray dekada ya impanggawa nen Noe ed satan ya arka, sikato met so ‘managpulong na inkatunong.’ (2 Pedro 2:5) Pinasakbayan to ray totoo ed onsabin Delap, pero imbaliwala da. Sinmabi panaon ya onloob lay Noe tan say pamilya to ed arka, pati saray ayayep. Inkapot na Dios so arka. Insan la inmuran.

Inmuran na makmaksil ed loob na 40 ya agew tan 40 a labi anggad alipos so interon dalin. Nalner so amin a mauges a totoo. Kalabas na pigay bulan, nen oneekat la, sinmadsar so arka ed sakey a palandey. Apalabas ni sakey taon, insan pinmaway si Noe tan say pamilya to ed arka. Bilang pisasalamat, angibagat na ayep si Noe ed si Jehova. Bilang ebat na Dios, pinaseguroan to ra ya agto la deralen lamet so amin a bilay ed tapew na dalin panamegley na delap. Amawala si Jehova na rainbow bilang garantiya tan panonot ed sayan makaligliwan sipan.

Kayari Delap, inikdan met na Dios iray totoo na pigaran balon ganggan. Inabuloyan to ran mangan na karne. Pero, insebel toy pangan na dala. Ingganggan to met ed poli nen Noe ya onkayat ira ed dalin, balet walaray agtinmulok. Akinonong iray totoo ed lider a manngaran na Nimrod, tan inggapo ray angipaalagey na baleg a tori diad syudad na Babel, ya atawag met a Babilonia. Say gagala ra et pian kontraen so igaganggan na Dios ya onkayat ira komon ed interon dalin. Balet pian napatunda iraman a rebelde, winetwet na Dios so saksakey a lenguahe ra tan impansalita to ra na nanduruman lenguahe. Lapud agla ira makapantatalosan, tinaynan day ipapaalagey da tan nantatayak ira.

—Nibase ed Genesis kapitulo 6 anggad 11; Judas 14, 15.