Antoy gawaen mo no natatakot ka?— Ompano ombatik kad si mamam tan si papam. Pero wala ni makatulong ed sika. Tan anggapoy makatalo ed sikato. Antam no siopa?— On, si Aman Jehova. Nengnengen ta pay istorya ed Biblia na balolakin say ngaran to et David. Amta ton lanang ya ontutulong ed sikato si Aman Jehova, kanian aga antakot.

Melag ni labat si David, ibabangat la na nanay tan tatay to ya aroen si Jehova. Kanian aga antakot anggano wala ray makapataktakot ya nagagawad sikato. Amta ton Kaaro toy Jehova tan sikatoy tulongan nen Jehova. Aminsan, nen manpapastol na karnero si David, walay sinmabin baleg ya leon tan siningkat toy sakey ya karnero! Antam no antoy ginawa nen David? Inusilan to tan pinatey to may leon, anggano anggapoy armas to! Insan nen kanen la lawari na oso so karnero, pinatey to met! Siopa kasi tinmulong ed si David?— On, si Aman Jehova.

Aminsan, anengneng lamet ya talagan masibeg si David. Milalaban iray Israelita ed saray Filisteo. Walay sundalo na Filisteo ya balbaleg a too, higante! Say ngaran to et Goliat. Eelek-elekan na sayan higante iray sundalon Israelita tan si Jehova. Hahamonen to ray Israelita ya milaban ed sikato. Pero natatakot ed sikato so amin ya Israelita. Nen naamtaan nen David, imbaga tod si Goliat: ‘Milaban ak ed sika! Tulongan ak nen Aman Jehova, tan taloen ta ka!’ Masibeg si David awa?— Aga antakot. Labay mon naamtaan no antoy sinmublay ya agawa?

Inala nen David so palsot to tan anokdok na limaran makinis ya bato, insan inmarap ed kalaban. Nen anengneng nen Goliat ya uga-ugaw si David, inelek-elekan to. Pero imbaga nen David ed si Goliat: ‘Milaban kad siak ya de-espada, balet milaban ak ed sika diad ngaran nen Jehova!’ Insan to binalaan na bato so palsot to, batik paasingger ed si Goliat, tan tinira to. Nakna ed moling si  Goliat! Nipasubsob ed dalin tan inatey! Ataktakot iray Filisteo kanian batik iran amin. Panon ya atalo na uga-ugaw nin si David so higante?— Sikatoy tinulongan nen Jehova, ta mas makapanyari nen samay higante!

Antoy naaralan mod si David?— Mas makapanyari si Jehova nen say anggan siopa. Tan sikatoy Kaarom. Kanian no natatakot ka, tandaan mo ya tulongan ka nen Aman Jehova pian naekal so takot mo!