Si Jesus et aliwan singa sikatayo ta nambilay lad tawen bilang anghel antis ya inyanak diad dalin. (Juan 8:23) Si Jesus so unaan ya ginawa na Dios, tan sikatoy tinmulong ed impanggawa ed amin. Sikato labat so direktan ginawa nen Jehova kanian duga so tawag ed sikaton “bogbogtong” o saksakey ya Anak na Dios. (Juan 1:14) Nanlingkor met si Jesus bilang Spokesman na Dios, kanian sikatoy tinawag ya “say Salita.”​—Basaen so Proverbio 8:22, 23, 30; Colosas 1:15, 16.

Imbaki na Dios so Anak to diad dalin. Inyalis toy bilay na Anak to diad eges na Judio ya birhen ya say ngaran to et Maria. Kanian anggapoy tatay nen Jesus ya too. (Lucas 1:30-35) Linma si Jesus diad dalin (1) pian ibangat so katuaan tungkol ed Dios, (2) pian ipanengneng toy alimbawa no panon tayon gawaen so labay na Dios anggano mairap, tan (3) pian iter so perpekton bilay to bilang “panondon.”​—Basaen so Mateo 20:28.

Say dondon et bayar pian nibulos so sakey ed ipapatey. (Exodo 21:29, 30) Agkaiba ed gagala na Dios ya ontatken tan ompatey so too. Akin ya nibaga tayo itan? On ta imbaga na Dios ed inmunan too, si Adan, ya no manggawa na “kasalanan” et ompatey. Kanian no agkomon nankasalanan si Adan, agkomon inatey. (Genesis 2:16, 17; 5:5) Say ibabaga na Biblia, “linmoob” ed mundo so  patey lapud si Adan. Impatawir to ed amin ya ananak to so kasalanan tan say resulta na satan, say patey. Kailangan tayoy dondon pian nibulos tayo ed parusan patey ya atawir tayod si Adan.​—Basaen so Roma 5:12; 6:23.

Siopa so manbayar na dondon pian nibulos tayod patey? No ompatey tayo, say nabayaran tayo labat et sarili tayon kasalanan. Anggapo so too ya nabayaran toy kasalanan na arum, ta amin et akatawir na kasalanan.​—Basaen so Salmo 49:7-9.

Amin tayo et makasalanan, balet si Jesus et perpekto. Kanian agto komon kaukolan so ompatey pian bayaran so kasalanan to​—ta anggapon balot so kasalanan to. Balet, inatey si Jesus parad kasalanan na arum. Impanengneng na Dios so panangaro tod saray totoo nen imbaki toy Anak to pian ompatey parad sikatayo. Impanengneng met nen Jesus ya inaro to tayo ta inunor toy Ama to tan inter toy bilay to pian dondonen so kasalanan tayo.​—Basaen so Juan 3:16; Roma 5:18, 19.

Bantayan so video ya Akin ya Inatey si Jesus?

Nen wadia ed dalin si Jesus, pinaabig to iray mansasakit, binilay to iray inatey, tan tinulongan to iray maniirap. Ontan met so gawaen to diad arapen parad maunor ya totoo. (Mateo 15:30, 31; Juan 5:28) Nen inatey si Jesus, sikatoy binilay na Dios bilang espiritu. (1 Pedro 3:18) Insan nanalagar diad nikawanan na Dios anggad inter nen Jehova ed sikato so autoridad ya manuley bilang Ari ed interon dalin. (Hebreo 10:12, 13) Natan et manuuley lan Ari si Jesus ed tawen, tan ipupulong na saray papatumbok to itan ya maong a balita diad interon mundo.​—Basaen so Daniel 7:13, 14; Mateo 24:14.

Asingger lan usaren nen Jesus so pakayari to bilang Ari pian ekalen so kairapan tan amin ya mauges. Amin ya totoo ya ipanengneng day pananisia tan unoren day Jesus et manbilay diad paraison dalin.​—Basaen so Salmo 37:9-11.