LEKSION 17
Anto ray Kualidad nen Jesus?
Sanen naamtaan tayoy imbaga tan ginawa nen Jesus nen wadiad dalin, anengneng tayo ray ugali o kualidad to tan nen Ama to, si Jehova. Kanian labay tayo ran nakaaro. Antoy arum ed sarayan balibalin kualidad nen Jesus? Tan panon tayon naalig?
1. Akin ya si Jesus et singa si Ama to?
Diad tawen, binilyon lan taon ya akaiba nen Jesus so maaron Ama to, tan akaaral ya maong ed Sikato. Kanian, say panagnonot, nalilikna, tan kakikiwas to et singa si Ama to. (Basaen so Juan 5:19.) Diad tua, talagan naalig nen Jesus so personalidad nen Ama to, kanian say kuan to: “Siopaman ya akanengneng ed siak et anengneng to met lay Ama.” (Juan 14:9) No diman mo nakakabat si Jesus, diman mo met mas nakakabat si Jehova. Singa bilang, nanengneng ed malasakit nen Jesus ed saray totoo ya walay malasakit met nen Jehova ed sika.
2. Panon ya impanengneng nen Jesus so panangaro to ed si Jehova?
Imbaga nen Jesus: “Pian naamtaan na mundo ya inarok so Ama, gagawaen ko so ingganggan ed siak na Ama.” (Juan 14:31) Nen wadiad dalin si Jesus, impanengneng to ya inar-aro to so Ama to ta inunor to, anggano no maminsan et mairap. Sakey ni, labalabay nen Jesus ya istoryaey Ama to tan labay ton tulongan so arum pian nakaaro day Jehova.—Juan 14:23.
3. Panon ya impanengneng nen Jesus so panangaro to ed saray totoo?
Ibabaga na Biblia ya “nagkalalo lan panliliketan [nen Jesus iray] anak na totoo.” (Proverbio 8:31) Nanengneng tayoy panangaro to ta pinabiskeg to ray totoo tan agsinmawan tinmulong. Nen nanggawa na milagro si Jesus, agto labat impanengneng so pakayari to, imbes pati say panangasi to. (Marcos 1:40-42) Maar-aroy Jesus ed saray totoo tan patas so impantrato to ed amin. Aligliwa tan naikday ilalo iramay mapaabeban totoo ya dinmengel ed sikato. Akaparaan ya manirap tan ompatey si Jesus lapud panangaro to ed amin ya totoo. Balet, mas lalon inaro to iramay manguunor ed ibabangat to.—Basaen so Juan 15:13, 14.
DAKEL NI NAARALAN MO
Aralen so arum nin kualidad nen Jesus. Tan amtaen no panon ya ibaga o ipanengneng so panangaro tan inkamaiter, ya singa ginawa to.
4. Inaro nen Jesus so Ama to
Makaaral tayo ed si Jesus no panon ya ibaga o ipanengneng so panangaro tayo ed Dios. Basaen so Lucas 6:12 tan Juan 15:10; 17:26. Kayarin basaen so kada teksto, ebatan iya:
-
Panon tayon naalig si Jesus tan ipanengneng ya inaro tayo si Jehova?
Inar-aro nen Jesus so Ama to ed tawen tan naynay ton kakatongtongen diad pikakasi
5. Walay malasakit nen Jesus ed saray totoon mankaukolan
Mas uunaen nen Jesus so arum ya totoo nen say sarili to. Anggano nen naksawan la, siansia nin tinulongan to iray totoo. Basaen so Marcos 6:30-44, insan ebatan iraya:
-
Diad sayan teksto, panon ya impanengneng nen Jesus so malasakit tod arum?—Nengnengen so bersikulo 31, 34, 41, tan 42.
-
Akin et tinulongan nen Jesus iray totoo?—Nengnengen so bersikulo 34.
-
Lapud inalig nen Jesus so kualidad nen Jehova, anto sirin so naaralan mo tungkol ed si Jehova?
-
Panon tayon naalig so malasakit nen Jesus ed arum?
6. Maiter si Jesus
Maiter si Jesus anggano aliwan mayaman, tan ibabangat to itayo ya magmaliw ya maiter. Basaen so Gawa 20:35, insan ebatan iya:
-
Singa imbaga nen Jesus, panon tayon magmaliw ya maliket?
I-play so VIDEO, insan ebatan iya.
-
Panon tayon makapangiter anggano mairap so bilay?
Kasin antam?
Ibabangat na Biblia ya manpikasi tayo ed si Jehova diad ngaran nen Jesus. (Basaen so Juan 16:23, 24.) No ontan so pampikasi tayo, ipapanengneng tayon misalsalamat tayo ed ginawa nen Jesus ya tulong pian nakaaro si Jehova.
IBABAGA NA ARUM: “Anggapoy pibabali na Dios, anggano maniirap tayo.”
-
Inalig nen Jesus so personalidad na Ama to, kanian panon ya ipapanengneng na saray ginawa to ya inaro itayo nen Jehova?
SUMARYO
Inaro nen Jesus si Jehova tan saray totoo. Si Jesus et singa si Ama to, kanian no diman mo nakakabat si Jesus, diman mo met lalon nakakabat si Jehova.
Rebyu
-
Singa si Jesus, panon tayon nipanengneng so panangaro tayo ed si Jehova?
-
Singa si Jesus, panon tayon nipanengneng so panangaro ed totoo?
-
Antoy agusgustoan mon kualidad o ugali nen Jesus?
DISKOBRIEN
Amtaen iray arum ya kualidad nen Jesus ya sarag tayon aligen.
“Pian Naalig si Jesus, Magmaliw ya . . . ” (Jesus—Say Dalan, say Katuaan, say Bilay, pahina 317)
Amtaen no akin ya kailangan tayoy manpikasi diad ngaran nen Jesus.
“Akin et Manpikasi Diad Ngaran nen Jesus?” (Say Panag-bantayan-E, Pebrero 1, 2008)
Wala kasi ibabaga na Biblia tungkol ed itsura nen Jesus?
Antoy naaralan tayo ed impantrato nen Jesus ed saray bibii?
Ompan Nagustoan Mo Met
MABETBET YA ITETEPET
Anto tay Panag-aral na Biblia ya Iyoopresi na Saray Tasi nen Jehova?
Diad sayan libren interactive ya paraan na panag-aral ya iyoopresi na Saray Tasi nen Jehova, sarag mon usaren so anggan anton patalos na Biblia. Imbitaan so interon pamilyam odino anggan siopan kaarom ya labay day milad sika.
