1-3. (a) Antoy agawa akin et napepeligroy sankaabungan nen Abigail? (b) Antoy aralen tayod sayan makapadinayew ya bii?

MANPUTI busaleg to may aripen ya linmad si Abigail. Natatakot ta delikadoy situasyon da. Walay 400 ya sundalon mamapaarap ed lugar da pian pateyen si Nabal ya asawa nen Abigail tan amin ya lalakin walad pudir to. Akin kasi?

² Say nanggawa-gawad saya et si Nabal. Anggapoy panangasi to yan too tan magasgasal so ugali to. Balet diad sayan pankanawnawa et alingo-lingod ininsulto to​—say inad-aron komandante na matoor tan makpel iran sundalo. Atan so rason no akin ya batik ed kinen Abigail imay aripen, ya anganko et sakey ed saray managpastol nen Nabal. Matalek iyan aripen ya manggaway paraan si Abigail pian niliktar so interon sankaabungan nen asawa to. Balet, wala tay nagawaan na sakey a bii sumpad sakey ya armada?

³ Antis tayon ebatan itan, kabaten tayo pa ni iyan makapadinayew a bii. Siopa si Abigail? Panon ya linmesa iyan problema? Tan antoy naaralan tayod pananisia ya impanengneng to?

4. Anton klase na too si Nabal?

⁴ Diad tua, aperperdi Abigail ed si Nabal. Maomaong si Abigail, si Nabal balet et teriblin asawa. Tua, mayaman, balet atagtagey so pakanengneng tod sarili to. Balet, anto kasi pakanengneng na arum ed sikato? Diad Biblia et talagan negatibo so impaneskribe ed si Nabal. Say labay ya ibaga na ngaran to et “Andi-kabaliksan,” odino “Bagel.” Kasin inngaran itan na atateng to, o impangaran labat ed sikato lapud ugali to? Agtayo amta, balet say segurado et inanga-angay to itan  a ngaran. Si Nabal et “maramsak tan mauges ed saray gawa to.” Lapud abusado tan buanges, kakkabusol na totoo.​—1 Sam. 25:2, 3, 17, 21, 25.

5, 6. (a) Antoy labalabay mod saray kualidad nen Abigail? (b) Antoy posiblin rason no akin ya akiasaway Abigail ed andiay-kakanaan a laki?

⁵ Nidumadumay Abigail ed si Nabal. Say labay ya ibaga na ngaran to et “Manliket so Amak.” Siempre, anggan siopan ama et maliket no say anak to et maganggana, balet lalon maliket no makalakal. No maminsan, no say sakey ya too et guapo o magana, ag-importante ed sikato iray kualidad ya singa say pakatalos, dunong, pakpel, tan pananisia. Aliwan ontan si Abigail. Unong ed Biblia, sikatoy aliwa labat a maganggana noagta sakey ya ‘biin walaan na pakatalos.’—Basaen so  1 Samuel 25:3.

⁶ Diad panaon tayo, ompan pankelawan na arum no akin ya akiasawa iyan intelihentin marikit ed andiay-kakanaan a laki. Tandaan tayo ya nensaman, kaslakan ya saray ateng so mamipili no siopay naasawa o napiasawaan na anak da. No bilang ta andi, kaukolan nin siansiay abobon na atateng. Kasin saray ateng nen Abigail so malabay ed si Nabal, tan sikato so pinili ra lapud mayaman tan kabkabat? Kasin impakasal day Abigail ed Nabal pian naagwat irad kairapan? Antokaman so rason, agto labay ya ibagan no makuartay Nabal et maong lan asawa.

7. (a) Antoy agnepeg ya gawaen na saray atateng no labay dan ibangat ed ananak da so dugan panmoria ed panangasawa? (b) Antoy determinadon gawaen nen Abigail?

⁷ Maabig no ibangat na atateng ed ananak da so dugan panmoria ed panangasawa. Agda lalagyaten iray anak da ya mangasawa odino miasawa lapud kuarta. Tan agda ra pipiliten ya miinaroan no uga-ugaw ni ra tan agda ni sarag iray responsabilidad na sakey ya asawa. (1 Cor. 7:36) Diad si Abigail, anggapo lay pankanawnawa ton naisip iratan ta asawa to lay Nabal. Balet ta sikatoy determinadon gawaey anggaay nayarian to anggano mairap so situasyon to.

8. Siopay ininsulto nen Nabal, tan akin et talagan aliwa iyan ginawa to?

⁸ Lapud samay ginawa nen Nabal, inyan to laingen ed peligro so bilay nen Abigail. Samay lakin ininsulto to et anggapoy arum noag si David​—say matoor ya lingkor nen Jehova ya nilanaan nen propetan Samuel. Sikato so pinili na Dios ya onsalat ed si Saul bilang ari. (1 Sam. 16:1, 2, 11-13) Diad saman et manaamot-amot diad kadesiertoan si David tan say 600 ya sundalo to ta sikatoy labay ya pateyen nen Arin Saul lapud imon to.

9, 10. (a) Anton mairap ya situasyon so aanosan nen David tan saray sundalo to? (b) Akin et nepeg ya apresyaen komon nen Nabal so gagawaen nen David tan saray sundalo to? (Nengnengen met so footnote na parapo 10.)

 ⁹ Si Nabal et tagad Maon, balet walay dalin tod Carmelo. * Sakey itan ya baley ya asingger labat ed Maon. Marika iray kapukdolan ditan, ya balibalin pangipastolay 3,000 a karnero nen Nabal. Balet diad kaliberliber na satan et agmabuna so dalin. Diad abalaten et wadtan so maaw-awang a desierto na Paran. Diad bukig et wadtay agmabunan dalin ya mamaarap ed Dayat na Asin, ya amayamay so kelas tan ungi-ungib. Diad sarayan pasen so panaamotan nen David tan saray sundalo to. Aliwan mainomay so pakalmoy naakan ditan tan aanosan da kalamor so mairap ya kipapasen da. Ditan da maslak ya nababanaan iray managpastol nen mayaman a Nabal.

¹⁰ Panoy impantrato na sarayan makukulin sundalo ed saramay managpastol? Sarasarag da komoy manakew na pigaran karnero sagpaminsan, balet agda ginawa itan. Imbes, prinotektaan da iray karnero tan managpastol nen Nabal. (Basaen so 1 Samuel 25:15, 16.) Saray karnero tan managpastol et naynay a walad kapeligroan. Dakel so masisibeg ya ayayep diad kaliberliber. Sakey ni, asingsingger ditan so abalaten ya ketegan na Israel kanian mabetbet ya onaataki iray matatakew ya tagad arum a bansa. *

11, 12. (a) Panon ya impanengneng nen David so taktika tan respeto diad samay mensahe tod si Nabal? (b) Antoy aliwad samay reaksion nen Nabal?

¹¹ Seguradon mair-irap so mananap na naakan diad desierto. Kanian aminsan et angibaki si David na samploran lalaki pian onkerew na tulong ed si Nabal. Imbana to itan ed panaoy panagpoklis ed saray karnero, lapud diad saratan ya panaon et maiter iray totoo. Pinilipili nen David iray salitan impaibaga to. Tinawag to ni ingey sarili to ya “anak mo a David,” bilang respeto ed si Nabal ta mas matatken nen say sikato. Anto kasi reaksion nen Nabal?​—1 Sam. 25:5-8.

¹² Sinmulag! Imbaga na samay aripen ya angibalitad si Abigail ya “minudmora” nen Nabal iramay imbaki nen David. Imbaga nen Nabal ya agton balot mangiter na tinapay, danum, tan karne. Minelmelag toy David tan inkompara tod sakey ya rebelyoson aripen ya imbatikan toy amo to. Pareho ira nen Saul ya kabusol day David. Inad-aro balet nen Jehova si David. Aliwan rebelde so pakanengneng To ed sayan too, noagta sikato so onsublay ya ari na Israel.​—1 Sam. 25:10, 11, 14.

13. (a) Antoy inmunan reaksion nen David ed impanginsulto nen Nabal? (b) Antoy naaralan tayod Santiago 1:20 nipaakar ed samay reaksion nen David?

 ¹³ Sanen amawil la ramay imbaki nen David tan inistorya dad sikatoy agawa, sinmanok! Oniay ingganggan to: “Ibalkes yo ray espada yo!” Namparaan met si David tan pinmikal kaibay 400 ya sundalo to pian onlusob. Insamba ton pateyen toy Nabal tan amin ya lalaki a walad pudir to. (1 Sam. 25:12, 13, 21, 22, Maung a Balita) Natural labat ya onsanok si David, say makapuy balet et say plano ton gawaen. Oniay kuan na Biblia: “Say sanok na too et agmakapangipatnag na inkatunong na Dios.” (Sant. 1:20) Panon kasin niliktar nen Abigail so sankaabungan to?

14. (a) Antoy pakapatnagan ya labay ya ipetek nen Abigail so lingo nen Nabal? (b) Antoy naaralan tayod pandumaan nen Nabal tan Abigail? (Nengnengen met so footnote.)

¹⁴ Aliwan singa si Nabal, dinengel nen Abigail imay aripen. Napatnagan tayod saya ya labay ton ipetek so baleg ya lingo nen asawa to. Oniay inkuan to may aripen nipaakar ed si Nabal: “Sikatoy sakey a mauges a too, ya agmakapisalita so sakey ed sikato.” * (1 Sam. 25:17) Lapud atagtagey so pakanengneng nen Nabal ed sarili to, agto labay so ondengel ed arum. Dakel so ontan natan. Balet amta na samay aripen ya aliwan ontan si Abigail, kanian sikatoy angibagaan to na problema.

15, 16. (a) Panon ya impanengneng nen Abigail ya sikatoy maong ya asawa, singa samay asawan bii ya adeskribe diad libro na Uliran? (b) Akin ya samay ginawa nen Abigail et aliwan panagrebelde ed inkaulo na asawa to?

¹⁵ Nan-isip tan kinmiwas ya tampol si Abigail. Nabasa tayo ya “si Abigail [et] nansiglat.” Diad sayan salaysay, amipat ya abitlan “nansiglat” si Abigail. Dakel so imprepara ton regalo parad si David tan saray sundalo to​—tinapay, alak, karnero, insanglil iran bukel, tan bibingka ya gawad pasas tan igos. Nanengneng tayod satan ya kabisado nen Abigail no antoy walad sankaabungan to tan talagan gagawaen to ray responsabilidad to, singa samay maong ya asawan bii ya adeskribe diad libro na Uliran. (Uli. 31:10-31) Pinauna la nen Abigail iray aripen to, awi-awit da ray imparaan to, insan met la tinmumbok. Balet unong ed  salaysay, “agto imbaga ed asawa to a Nabal” so ginawa to.​—1 Sam. 25:18, 19.

¹⁶ Labay kasin ibaga na satan ya agmanpapasakop si Abigail ed asawa to? Andi. Tandaan, mauge-uges so ginawa nen Nabal ed toon pinili nen Jehova a magmaliw ya ari. Tan lapud satan et nayarin nalanor so dakel ya inosentin membro na sankaabungan nen Nabal. No anggapoy gawaen nen Abigail, agta singa to kokonsintiey masiken to? Kanian diad sayan pankanawnawa, kaukolan ya mas iyuna nen Abigail so pampasakop tod Dios nen say pampasakop ed asawa to.

17, 18. Panoy inyasingger nen Abigail ed si David, antoy imbaga to, tan akin ya makakombinse so inkerew toy panangasi?

¹⁷ Ag-abayag, akapan-abet a siansiay Abigail tan si David kaiba to ray sundalo to. Inmepas ya tampol ed asno si Abigail tan dinmakmomo ed salian nen David. (1 Sam. 25:20, 23) Insan to imbalikas so walad puso to. Say inkerew toy panangasi parad asawa to tan ed interon sankaabungan da et talagan makakombinse. Akin?

¹⁸ Inako la nen Abigail so tetel ed amin ya agawa tan kinmerew na perdona. Binidbir ton say asawa to et bagel, ya dugarugad kabaliksan na ngaran ya Nabal. Singa ibabaga nen Abigail ed si David ya iyabeba to labat so reputasyon to no ombawi ed ontan a klase too. Binidbir nen Abigail ya si David et representanti nen Jehova, tan sikato so milalaban parad “saray bakal nen Jehova.” Amta nen Abigail imay sipan nen Jehova ya magmaliw ya ari si David ta inkuan to: “Si Jehova . . . sika so turoen to a prinsipe [odino, lider] ed Israel.” Insan akikasi si Abigail ed si David ya agkomon manggagaway pankasalananan tod dala odino sengegay ‘pakagapolan’ o pakakonsiensiaan to. (Basaen so 1 Samuel 25:24-31.) Talagan makapakiwas iran salita!

19. Antoy reaksion nen David ed imbaga nen Abigail, tan akin ya kinomendaan to?

¹⁹ Antoy reaksion nen David? Inawat to ray regalo nen Abigail tan inkuan to: “Bendito si Jehova, a Dios na Israel, ya angibaki ed sika ed sayan agew ya onabet ed siak. Et bendito so karunongan mo, tan bendito ka ya angiyagel ed siak ed sayan agew ed pankasalanan ed dala.” Nandinayewan nen David so pakpel nen Abigail tan say impangganat ton mangabet ed sikato. Binidbir ton lapud si Abigail et apaliisan toy pankasalanan ed dala. Oniay mapaabeban inkuan tod si Abigail: “Ontatdang ka ed kareenan ed abung mo . . . Dinengel ko so boses mo.”​—1 Sam. 25:32-35.

20, 21. (a) Akin et makapadinayew so inkamabulos nen Abigail ya ompawil ed asawa to? (b) Panon ya impanengneng nen Abigail so pakpel tan karunongan ed impitongtong tod si Nabal?

²⁰ Nen papawil lay Abigail, natural labat ya sankanonot to imay agawa, tan seguradon naimano ton nikadkaduma si David ta matoor  tan mapangasi; si Nabal balet ya masiken to et busangel. Balet ta agto la ra ’tan pinonot kasempet to. Oniay nabasa tayo: “Si Abigail linma ed Nabal.” On, sikatoy pinmawil ed asawa to tan determinadon gawaey responsabilidad to bilang asawan bii. Kaukolan ton ibaga ed si Nabal ya inikdan toy regalo si David tan saray sundalo to. Walay kanepegan nen Nabal ya naamtaan itan. Kaukolan met ya ibaga nen Abigail so impangamper tod dawdawit lan pamatey ed sikara. No naamtaan nen Nabal itan ed arum, lalon pakabalawan to. Balet agnibaga ’tan a tampol nen Abigail ta si Nabal et mamangan ya singa ari tan abuek a maong.​—1 Sam. 25:36.

²¹ Impanengneng lamet nen Abigail so pakpel tan karunongan. Inalagar to ni kabuasan sanen amawmawan lay Nabal. Tua, maong lan katongtong si Nabal ed saman, balet ta siansia nin makapanerbiyos no bilang manpasnok. Anggaman ontan, sikatoy nila nen Abigail tan inistorya toy amin ya agawa. Seguradon iilaloan to ya onsaboy dala nen Nabal, tan ompan sakitan to ni ingen. Say makapakelaw balet et ameneng si Nabal, ya aglabat anggan ginmala-galaw.​—1 Sam. 25:37.

22. Antoy agawad si Nabal, tan antoy naaralan tayod sayan salaysay no nipaakar ed panag-abuso ed loob na pamilya?

²² Akin et onmay agawad si Nabal? “Say puso to inatey ed loob to, tan nagmaliw a singa bato.” Posiblin naataki ed puso. Anggaman ontan, manga samploran agew ni linmabas insan inatey, balet aliwan lapud samay sakit to labat. Say inkuan na Biblia et: “Si Jehova kinabil toy Nabal, dia ed ontan sikatoy inatey.” (1 Sam. 25:38) Makatunongan labat itan ya ginawa nen Jehova, ta anampot a siansia so panamaley ya abayag lan aanosan nen Abigail. Tua, agla itan gagawaen nen Jehova natan, balet naaralan tayod sayan salaysay ya agbalot niyamot ed sikato so antokaman ya panag-abuso ed loob na pamilya. Nasabin-nasabi panaon ya iter toy hustisya.​—Basaen so Lucas 8:17.

23. Anto ni bendisyon ya naawat nen Abigail, tan akin et nibaga tayon ag-angumay ugali to anggan sanen sikatoy labay ya asawaen nen David?

²³ On, anampot lay panaanos nen Abigail ed impiasawa tod si Nabal, balet wala ni manaalagar ya bendisyon ed sikato. Sanen akabatan nen David ya inatey lay Nabal, angibaki na ariripen to ya mangibagan labay ton magmaliw ya asawa si Abigail. “Nia, say aripen mo a bii,” so kuan nen Abigail, “sakey ya aripen a mananguras ed saray sali na saray ariripen na katawan ko.” Mapatnag ya nansiansian mapaabeba si Abigail anggan sanen sikatoy  asawaen la nen David. Inkuan to ni ingen ya panserbian to ray ariripen nen David! Insan nabasa tayo lamet ya sikatoy “nansiglat” pian manparaan ya onlad si David.​—1 Sam. 25:39-42.

24. Anto ray irap ya dinalan nen Abigail sanen sanasawa la ra nen David, balet antoy panmoria nen David tan na Dios ed sikato?

²⁴ Agto labay ya ibagan lapud akiasaway Abigail ed si David et lanang lan mainaway bilay to. Wala lay inmunan asawa nen David, si Ahinoam. Anggaman inyabuloy na Dios so poligamya nensaman, seguradon mairap itan ya situasyon parad saray asawan bibii. Sakey ni, aliwa nin ari si David ed saman. Tan wala ray dinalan ton irap tan problema antis ya nanlingkor ed si Jehova bilang ari. Balet, lawas tinulongan tan sinuportaan nen Abigail si David, ya anggad inlukon toy sakey ya anak a laki. Apaneknekan nen Abigail ya sikatoy pinabpabli tan proprotektaan nen masiken to. Aminsan ni ingen et sikatoy inliktar nen David ed saray Amalekita! (1 Sam. 30:1-19) Inalig sirin nen David si Jehova a Dios, a mangaaro tan mamapabli ed marunong, makpel, tan matoor iran bibii, ya singa si Abigail.