SI LUZIA ET KITLEY SO KAWIGIN SALI TO. Nen ugaw ni, apeketan na sakit ya polio, makaalis a sakit ya aatakien toy nervous system. Nen 16 so taon to, imbaga na biin amo to, “Dudusaen ka na Dios ta benger ka tan aliwliway panagtratom ed si nanay mo.” Kalabas na pigaran taon, agni alingwanan nen Luzia iraman ya ansakit a salita.

NEN NAAMTAAN NEN DAMARIS YA WALAY CANCER TOD UTEK, imbaga nen tatay to: “Antoy ginawam akin et ontan so agawad sika? Seguro walay mauges ya ginawam. Kanian dudusaen ka na Dios.” Asakitan ya maong si Damaris ed imbaga nen tatay to.

Abayag lan papanisiaan na totoo ya say sakit et dusa na Dios. Imbaga na libron Manners and Customs of Bible Lands ya dakel a totoo ed panaon nen Kristo so manisia ya “say rason no akin ya mansasakit so sakey et lapud kasalanan to odino kasalanan na kapamilya to, tan sikatoy dudusaen lapud satan.” Imbaga na Medieval Medicine and the Plague ya kalabas na nilasus ya taon manlapud impanbilay nen Jesus, “wala ray manisia ya saray salot et dusa na Dios ed sikara lapud kasalanan da.” Kanian nen inatey so minilyon a totoo diad interon Europe lapud salot nen koma-14 a siglo, kasin uukomen na Dios iray mauges a totoo? Odino kasin say salot et lapud impeksion ya awit na bakterya, ya singa naamtaan na saray researcher ed medisina? Wala ray mantetepet, talaga kasin uusaren na Dios so sakit pian dusaen iray totoo lapud kasalanan da? *

ISIPEN PA: Akin et pinaabig nen Jesus iray totoo no say sakit tan paniirap et dusa na Dios? Agta singa to palelemewen so hustisya tan inkatunong na Dios? (Mateo 4:23, 24) Agbalot kontraen nen Jesus iray gagawaen na Dios. Inkuan to: “Naynay kon gagawaen iray makapaliket ed sikato” tan “Gagawaen ko so ingganggan ed siak na Ama.”—Juan 8:29; 14:31.

Malinew so ibabaga na Biblia. Si Jehova a Dios et “agbalot manggaway ag-inkahustisya.” (Deuteronomio 32:4) Singa bilang, agbalot manlapud Dios so aksidente ed eroplano, ya mamatey ed nilasus ya inosentin totoo, lapud labay ton dusaen so sakey ya akalugan! Nipaakar ed inkatunong na Dios, imbaga na matoor a lingkor na Dios a si Abraham ya say Dios et agton balot ‘deralen so matunong a kaiba na mauges.’ “Imposible” itan, so kuan to. (Genesis 18:23, 25) Ibabaga met na Biblia ya “say Dios et agmanggagaway mauges” tan “agbalot manggaway aliwa.”—Job 34:10-12.

Say paniirap tayo et aliwan dusa na Dios lapud walay ginawa tayon kasalanan. Malinlinew iyan impaamta nen Jesus nen anengneng to tan na saray disipulo to so sakey a lakin bulag manlapud inkiyanak to. “Sikatoy tinepetan na saray disipulo to: ‘Rabbi, siopay nankasalanan, sayan too odino saray ateng to, kanian sikatoy niyanak a bulag?’ Inmebat si Jesus: ‘Aliwan sayan too odino saray ateng to so nankasalanan, balet lapud sayan kipapasen to et nayarin nipatnag iray gawa na Dios.’”—Juan 9:1-3.

Lapud lingon pakatalos diad saman a panaon, nayarin abigla iray disipulo nen Jesus nen imbaga tod sikara ya aliwan lapud nankasalanan imay laki odino saray ateng to kanian sikatoy abulag. Agto labat pinaabig imay laki noagta impetek to so aliwan papanisiaan na totoo ya say paniirap et dusa  na Dios. (Juan 9:6, 7) Saramay maniirap lapud graben sakit natan et naligliwa ed pakaamta ya aliwan say Dios so rason no akin ya maniirap ira.

Ipapaseguro na Kasulatan

• “Agnayarin suboken so Dios tan agto susuboken so siopaman diad panamegley na mauges iran bengatla.” (SANTIAGO 1:13) Kanian, say “mauges iran bengatla” ya nilasus taon lan mamapairap ed totoo kaibay sakit, panotot, tan patey, et magano lan naandi.

• Si Jesu-Kristo et “pinaabig ton amin iray maniirap.” (MATEO 8:16) Nen pinaabig na Anak na Dios so amin ya linmad sikato, impanengneng toy gawaen na Panarian na Dios ed interon mundo.

• “Punasen [na Dios] so amin a lua ed kamataan da, tan anggapo lay patey, anggapo met lay panermen tan panakis tan panotot. Saray datin bengatla et linmabas la.”—APOCALIPSIS 21:3-5.

Balet akin et grabe so paniirap na totoo? Abaybayag lan iisipen itan na totoo. No aliwan say Dios so panlalapuan na paniirap, siopa sirin? Saray ebat ed saratan ya tepet et naebatan ed onsublay ya artikulo.