Iisipen na arum a totoo ya nauman la so karga na Salita na Dios. Imbaga nen propeta Isaias ya say salita na Dios et “mansiansia ya anggad angga.” (Isaias 40:8) Akin ya makaseguro tayo ya agnauman iray promisa na Dios?

Walay pakayari na Dios ya ipreserba so Salita to pian ag-itan nauman. Nensaman, nen pinawala iray insulat ya kopya, maalwar ya bibilangen na saray managkopya iray letra na masanton sulat pian naseguro da ya ag-itan naaruman, nasalatan, odino nabawasan. Siempre, aliwa ran perpekto, kanian arum ya managkopya et alingo met ya daiset.

Natan et wala ray nilibon kopya na karaanan iran manuskrito na Masanton Kasulatan. No say sakey ya kopya et walay anggan daiset ya lingo to, sarag mon ikompara ed arum iran kopya pian naamtaan mo no antoy duga.​—Parad kaaruman iran impormasyon, nengnengen so artikulon “Kasin Nauman La o Asalatan so Karga na Biblia?” diad jw.org/pag.

Singa bilang, imanoen pay karaanan iran sulsulat a tatawagen ya Dead Sea Scrolls, ya adiskobre na saray bedouins ed saray kuweba ya asingger ed Dead Sea nen 1947. Karga na sarayan karaanan ya sulsulat iray kabiangan na Masanton Kasulatan ya insulat masulok lan duan libon taon so apalabas. Inkompara na saray eksperto irayan karaanan ya manuskrito ed Masanton Kasulatan ya walad sikatayo natan. Antoy naamtaan da?

Adiskobre na saray iskolar ya say karga na Salita na Dios ya walad sikatayo natan et pareho ed orihinal iran sulsulat. * Lapud maalwar ya inaral iray karaanan ya manuskrito, apruebaan ya say Masanton Kasulatan ya babasaen tayo et orihinal ya mensahe na Dios. Makaseguro tayo ya talagan impreserba na Dios so inkasusto na Masanton Sulsulat to parad sikatayo natan.

Kanian talagan makapantiwala tayo ya susto iray nabasa tayo ed Salita na Dios. Amtaen tayo sirin ed onsublay no antoy naaralan tayo nipaakar ed Dios manlapud saray propeta to.