ANSAKIT lay beneg nen Sara kanian inmalagey nin agano tan ninmengneng ed arawi. Maliket ya mantratrabaho iray ariripen tan uunoren da ray ganggan nen Sara. Pero kaiba da met ya mantratrabaho si Sara ta makulin bii. Imadyin mo pa ya iyuunat toy kinmekelat la ran taklay to. Seguro naksawan lan mansasakab na pilat ed toldan panaayaman da. Say masagapsap ya tela na satan ya tolda et gawad bagoy kanding tan kinmupas la ta pigaran taon lan nauuran insan nanaagew. Kanian nayarin naisip nen Sara ya abaybayag la ra manayan manaalis-alis na ayaman. Maples so oras tan onseselek lay agew. Nen kabuasan, inmalis is Abraham * tan natan et tatalaranan la nen Sara so isempet to. Akaimis iyan magangganan bii nen nababantag to lay asawa to ya paepas lad palandey.

Samploran taon lay linmabas manlapu nen indaulo nen Abraham so pamilya tan ariripen to tan binaliw day Ilog Eufrates ya anggad akasabi rad Canaan. Maliket ya sinuportaan nen Sara so asawa to ed sayan pambiabiahe ra ed pasen ya agda amta, ta amta to ya walay importantin papel nen Abraham ed gagala nen Jehova ya mamawalay sakey ya pinabpablin ilalak tan sakey a bansa. Anto balet so papel nen Sara? Ag-onanak si Sara, tan natan et 75 lay taon to. Seguro inisip to, ‘Panon ya ontua so im-promise nen Jehova anta agak onanak?’ Natural met labat ya naaburido odino agni ingen makaanos.

Ompan no maminsan et iisipen tayo met no kapigan kasi nagawa iray im-promise na Dios. Talagan aliwan mainomay so manalagar, lalo la no walay labalabay tayo lan nagawa. Antoy naaralan tayod pananisia na sayan makapadinayew ya bii?

Kakkapanlapu na sayan pamilya ed Ehipto. (Genesis 13:1-4) Natan et wala la rad kapalandeyan diad bukig na Bethel, ya say tawag na saray Canaanita et Luz. Diad sayan atagey ya patar, sankabantag nen Sara so arum ya parte na Insipan ya Dalin. Ditan et wala ray syudad na saray Canaanita tan saray karsada ya paonlad ararawin lugar. Pero diad tua, nidumaduma itan ed lugar ya binalegan nen Sara, say Ur, sakey ya mayaman ya syudad diad Mesopotamia ya 1,900 kilometro lay kaarawi to. Tinaynan to diman iray dakel ya kanayon to, say mainawan bilay ya wala ray tindaan tan tiangge, tan say balibalin abung da ya konkretoy atep tan padir to, tan nayarin walay suplay na danum diad mismon abung da! Pero no isipen mon pagbabawian nen Sara ya tinaynan to iratan ya amin tan naiiliw toy mainawan bilay, agmo ni sirin kabat iyan bii ya matoor ed Dios.

Kalabas na manga 2,000 ya taon, pinuyanan na Dios si apostol Pablo ya mangisulat tungkol ed pananisia nen Sara tan Abraham. Isip mo iyan insulat to: “No naynay dan nonoten imay pasen a tinaynan da, wala komon so pankanawnawa ran ompawil.” (Hebreo 11:8, 11, 15) Balet, agla ninonot nen Sara tan Abraham so apalabas. No atan so sankanonot da, wala pay tsansa dan ompawil. Pero no pinmawil  irad Ur, agda naeksperiensya so espisyal ya pribilehyon iter nen Jehova ed sikara. Tan imbes ya magmaliw iran alimbawa na pananisia ya naalig tayo, seguradon agtayo ra kabat natan.

Imbes ya panhinayangan nen Sara so apalabas, ninmengneng ed arapen. Kanian tuloytuloy ton sinuportaan so asawa to diad pambiabiahe ra​—maan-anos ya man-impake na tolda, manakar ya kaiba iray ayayep da, insan mangipaalagey lamet na tolda. Dakel ya subok tan pananguman so inanosan to. Nen inulit nen Jehova so promise tod si Abraham, anggapo nin siansiay imbaga To no antoy papel nen Sara!​—Genesis 13:14-17; 15:5-7.

Imbagan siansia nen Sara ed si Abraham so plano ya abayag to lan nononoten. Imadyin moy lupa to nen imbaga to ya: “Ipangasim, dengel mo ak natan! Agto ak inabuloyan nen Jehova a mananak.” Insan to imbagad si Abraham ya no nayari et alaen ton komaduan asawa so aripen ton bii ya si Hagar pian nawalaan na anak. Seguradon ansakisakit so liknaan nen Sara legan ton ibabaga itan ed asawa to! Singa mairap ya talosan natan itan ya pagagawa nen Sara. Balet nensaman normal labat ya say sakey ya laki et walay onkokomaduan asawa to pian seguradon walay mananawir to. * Kasin inisip nen Sara ya atan so paraan pian nagawa so gagala na Dios ya panamegley nen Abraham et niwala so sakey ya bansa? Antokaman so inisip to, segurado tayon sikatoy akaparaan ya mansakripisyo. Antoy reaksion nen Abraham? Nabasa tayo ya ‘dinengel to so imbaga nen Sara.’​—Genesis 16:1-3.

Kasin si Jehova so amakiwas ed si Sara ya gawaen itan? Andi. Mapatpatnag ya say ginawa nen Sara et paraan na too. Say amta to et nanlapud Dios so problema to, tan singa anggapo lay arum ya solusyon. Pero amay solusyon ya naisip nen Sara et panlapuan lanlamang na problema to tan sakit na liknaan. Anggaman ontan, nanengneng tayod ginawa to ya sikatoy aliwan makasarili. Diad sayan mundo ya saray totoo et iyuuna day sarili da, di ba makapabilib so inkamasakripisyo nen Sara? No akaparaan tayon iyuna so pakasumpal na gagala na Dios imbes ya say sarili tayo, naalig tayo so pananisia nen Sara.

Ag-abayag, nanlukon si Hagar. Seguro inisip nen Hagar ya mas importante la nen si Sara, kanian minudmora toy amo ton bii. Seguradon adismayan maong si Sara! Inyabuloy na Dios tan nen Abraham ya pampasnokan nen Sara si Hagar. Nananak na laki si Hagar, ya say ngaran to et Ismael, insan linmabas so pigaran taon. (Genesis 16:4-9, 16) Nen wala lamet so mensahe nen Jehova, 89 lay taon nen  Sara tan 99 la nen Abraham. Makapakelaw so mensahen nadngel da!

Inulit la lamet nen Jehova so promise tod kaaro ton si Abraham ya parakelen Toy ilalak to. Sinalatan met na Dios so ngaran to. Sikatoy kabkabat ed ngaran ya Abram, balet manlapu lad saya et sinalatan nen Jehova so ngaran to na Abraham, ya say labay ton ibaga et “Ama na Karaklan.” Tan natan et imbagan siansia nen Jehova no antoy papel nen Sara ed gagala to. Amay datin ngaran ton Sarai ya nayarin say labay ton ibaga et “Makolkol,” et sinalatan na Dios na ngaran ya Sara, ya atan so mas amta tayo natan. Antoy labay ya ibaga na ngaran ya Sara? “Prinsesa”! Imbaga nen Jehova so rason no akin ya atan so inngaran to ed sayan inad-aron bii: “Sikatoy bendisyonan ko tan ikdan ta ka na anak a laki ed panamegley to; sikatoy bendisyonan ko tan sikatoy panlapuan na saray nasyon; sikatoy panlapuan na saray arari na totoo.”​—Genesis 17:5, 15, 16.

Amay promise nen Jehova ya walay ilalak ya panlapuan na bendisyon na amin ya bansa et nasumpal panamegley na anak nen Sara! Say ngaran ya pinili na Dios parad sayan ugaw et Isaac, ya say labay ton ibaga et “Panelek.” Nen naamtaan nen Abraham ya ikdan nen Jehova si Sara na sarili ton anak, sikatoy ‘dinmakmomo tan inmelek.’ (Genesis 17:17) Mankelaw si Abraham tan agaylay liket to! (Roma 4:19, 20) Si Sara balet ey?

Ag-abayag, walay taloran lalaki ya agkabat nen Abraham ya linmad tolda to. Kakkaktangay agew ed saman, pero nanapura iyan matatken lan sanasawa pian naparawes irayan bisita. Imbaga nen Abraham ed si Sara: “Apuram! Mangala kay taloran sukat na pinon arina, masam, tan manggawa kay tinapay.” Diad panaon di Abraham, talagan matrabaho so mansangkaili. Pero agpinaulyanan nen Abraham ya say asawa to labat so mankimey; nanapura met si Abraham ya amatey na kilaw a kalakian a baka tan angiparaan na dakel ya panangan tan iinumen. (Genesis 18:1-8) Saraman ya “lalaki” et anghel nen Jehova manaya! Posiblin atan so sankanonot nen apostol Pablo nen insulat to iya: “Agyo lilingwanan so panagparawes, ta diad panamegley na satan, agnaam-amtaan na arum a say sinangkaili ra et saray anghel.” (Hebreo 13:2) Labay mon aligen so balibalin alimbawa nen Abraham tan Sara ed pangasikasod bisita?

Nen inulit na sakey ed saray anghel imay im-promise na Dios ed si Abraham ya manlukon si Sara, walad loob na tolda si Sara pero mandengdengel. Lapud akulaw la, inisip ton imposible ya manlukon ni kanian agto apigilay elek to, tan imbaga to: “Natan ya akulaw ak la tan masiken lay katawan ko, talaga kasin niwala iyan liket ed siak?” Kinorehi na anghel si Sara tan tinepetan to, “Wala tay antokaman ya imposible ed si Jehova?” Lapud natatakot, nanrason ya tampol si Sara, tan natural met labat itan. Imbaga to: ‘Agak inmelek!’ Imbaga na anghel: “Inmelek ka.”—Genesis 18:9-15.

Kasin labay ya ibaga na satan ya kulang so pananisia nen Sara? Andi. Imbaga na Biblia: “Lapud pananisia, si Sara et akaawat na pakayarin manlukon, anggano akulaw la, ta impasen ton matoor imay Sakey ya angisipan.” (Hebreo 11:11) On, kabkabat nen Sara si Jehova; amta to ya sarag nen Jehova ya gawaen so anggan anton im-promise to. Ontan ya klase na pananisia so kaukolan tayon amin. Kanian maabig no kabaten tayon maong so Dios ya ibabaga na Biblia. No ontan so gawaen tayo, ditan tayo nanengneng no akin ya ontan la kabiskeg so pananisia nen Sara. Talagan totooren nen Jehova so amin ya promise to, ya no maminsan ni ingen et surprisaen to tayo kanian makalek tayo lapud agtayo makapanisia!

Nen 90 lay taon nen Sara, asabin siansia so abayag to lan papangarapen. Awalaan iran siansia na anak nen Abraham, ya natan et 100 to la! Say inngaran nen Abraham ed ugaw et Isaac, odino “Panelek,” ta atan so imbaga na Dios. Imadyin moy makakaimis ya lupa nen Sara legan ton ibabaga:  “Pinaelek ak na Dios; amin a makarengel ed saya et mielek ed siak.” (Genesis 21:6) Segurado ya lapud sayan makapakelaw ya regalo nen Jehova et malikeliket si Sara ed saray nakekeran taon na bilay to. Pero, walay kaiba to met ’tan ya baleg ya responsabilidad.

Nen limara lay taon nen Isaac, nampaponsia si Abraham ta apakso lay Isaac. Pero walay problema. Naiimano nen Sara ya si Ismael, a 19 lay taon to ed saman, et paulit-ulit ton babalawen si Isaac. Aliwa yan galaw-galaw ya panagkantiaw. Insulat nen apostol Pablo ya sayan ginawa nen Ismael et ‘panamasegsegang’ o panamairap. Amta nen Sara ya mauges so epekto na satan ed si Isaac. Amta to ya kaukolan ton idepensay Isaac aliwa labat ya lapud anak to, noagta lapud walay importantin papel to ed gagala nen Jehova. Kanian nampakpel tan kinatongtong toy Abraham. Diretsaan ton imbaga ya kaukolan ton pataynanen si Hagar tan Ismael.​—Genesis 21:8-10; Galacia 4:22, 23, 29.

Antoy reaksion nen Abraham? Oniay nabasa tayo: “Naermenan a maong si Abraham ed samay imbaga [nen Sara] nipaakar ed anak to.” Inar-aro toy Ismael tan natural labat ya nasakitan ta anak to. Pero, amta nen Jehova so agawa kanian imbaga tod si Abraham: “Agka naeermenan ed ibabaga nen Sara ed sika nipaakar ed ugaw tan ed aripen mon bii. Dengel ka ed sikato, ta say tawagen ya ilalak mo et manlapud si Isaac.” Impaseguro nen Jehova ed si Abraham ya agto paulyan si Hagar tan si Ismael. Kanian pinmayag lanlamang.​—Genesis 21:11-14.

Talagan maong ya asawa tan katulongan si Sara. Makpel ton kinatongtong si Abraham anggano amta ton agto nagustoan so ibaga to. Nen walay anengneng ton problema ya apektadoy bilay na pamilya da tan say arapen da, prangkan akitongtong ed asawa to. Pero agto labay ya ibagan anggapoy respeto to. Diad tua, si apostol Pedro ya walay asawa to met, et insulat to ya si Sara et maabig ya alimbawa ed saray asawan bibii ta impanengneng toy aralem ya respeto ed si Abraham. (1 Corinto 9:5; 1 Pedro 3:5, 6) Isip mo pa, no nampareen labat si Sara, agto nipanengneng so respeto ed si Abraham, ta manresulta iman ed balbaleg ya pakabalawan ed si asawa to tan na interon pamilya ra. Nansalita si Sara lapud panangaro to.

Labalabay na dakel ya kaasawaan ya bibii so alimbawa nen Sara. Naaralan dad sikato ya kaukolan dan ibagay nalilikna da ed asawa ra diad marespeton paraan. Ompan wala ray asawan bibii ya no maminsan et iisipen dan katongtongen komon nen Jehova so asawa ra ya singa ginawa tod si Abraham. Pero, seguradon makaaral irad makapadinayew ya pananisia, panangaro, tan anos nen Sara.

Anggano tinawag nen Jehova ya “Prinsesa” iyan bii, agto inilaloan ya sikatoy serbian ya singa prinsesa. Kanian agla pankelawan ya nen sikatoy inatey diad edad ya 127, “nanermen tan nanakis si Abraham lapud si Sara.” * (Genesis 23:1, 2) Naiiliw ton maong so inad-aro ton “Prinsesa.” Seguradon naiiliw met nen Jehova ya Dios iyan matoor ya bii, tan labalabay to lan bilayen diad paraison dalin. Bilay ya malikeliket tan anggapoy anggaan so ipaparaan na Dios ed si Sara tan ed amin ya mangaalig ed pananisia to.​—Juan 5:28, 29.