DAKEL a taon ya ibabaga na saray agmanisia ed Biblia ya si Arin Belsazar ya abitla ed libro na Daniel et is-istorya labat. (Dan. 5:1) Imbaga da itan lapud anggapoy ebidensya ya naromog na saray arkeologo ya sikatoy talagan nambilay. Balet anguman itan nen 1854. Akin?

Diad satan a taon, linma so arkeologon taga Britanya ya si J. G. Taylor ed karaanan a syudad ya Ur ya walad bandad abalaten na Iraq natan. Diad sakey ya baleg a tori et walay nalmo to ya pigaran cylinder a gawad pitek. Say karukey na saratan et manga 10 sentimetro tan wala ray akaukit ya sulat a cuneiform. Diad sakey ed saratan et nabasa so pikakasi parad andukey a bilay na ari na Babilonia ya si Nabonidus tan parad panguloan ya anak to ya si Belsazar. Kanian anggan saramay agmanisia et akombinse ya sayan adiskobre et paneknek ya talagan nambilay si Belsazar.

Balet aglabat ibabaga na Biblia ya nambilay si Belsazar noagta nan-ari met. Aglamet itan panisiaan na arum. Singa bilang, nen manga 1875 et insulat na scientist a si William Talbot ya wala ray mangibabagan “si Bel-sar-ussur [Belsazar] et nanuley a kaiba nen Nabonidus ya ama to. Balet anggapoy anggan melag ya ebidensya ya mamaneknek ed satan.”

Aresolbe balet itan ya problema nen wala ray nalmo ya cylinder ya pakabasaan a say ama nen Belsazar ya si Arin Nabonidus et pigaran taon ya anggapo ed Babilonia. Antoy agawa legan ya anggapo? “Nen anggapo si Nabonidus,” so kuan na Encyclopaedia Britannica, “si Belsazar so tinuro to ya manuley tan mangidaulo ed baleg a kabiangan na armada to.” Nanuley sirin si Belsazar ed Babilonia legan na saman a panaon. Kanian imbaga na arkeologo tan language scholar ya si Alan Millard ya duga imay “impanawag na Libro na Daniel ed si Belsazar ya ‘ari.’”

Siempre, parad saray lingkor na Dios, say manunan ebidensya ya napanmatalkan tan pinuyanan na Dios so libro na Daniel et nabasan mismo ed Biblia.​—2 Tim. 3:16.