1, 2. Siopa ray nagunggonaan ed panaral ed Kanta nen Solomon, tan akin? (Nengnengen so litratod sayan pahina.)

‘MAAR-AROY kanenengneng dad sakey tan sakey tan bembenan day lima! Mapatpatnag ya inar-aro day balang sakey!’ Ontan so naimano na elder ya angasal ed satan a sanasawa. Legan ya onsasayaw so balon kasal diad reception da, oniay sankanonot na samay elder: ‘Mansiansia kasi aroan da? Kasin onaralem itan diad ilabas na panaon, odino kalkalnan ombetel?’ Talagan balibali so panangaron nalikna na laki tan bii no ag-itan manguman tan agmangangga. Balet dakel natan so sanasawan mansisian, kanian natural labat ya isipen no kasin talagan posible so agmanganggan panangaro.

² Anggan diad panaon ni nen Arin Solomon, matalag la so tuan panangaro. Oniay insulat to nipaakar ed moralidad nen panaon to: “Diad sanlibon totoo et akaromog ak na sakey a lakin matunong, balet anggapoy aromog ko a biin matunong. Saya labat so aromogan ko: Say tuan Dios et ginawa ton maptek so katooan, balet nanggawa ra na dakel a pakana.” (Ecl. 7:26-29, NW) Lapud impluensya na dayon bibii ya mandadayew ed si Baal nensaman, inmabeban maong so moralidad kanian  nairapan si Solomon ya makaromog na laki o biin malinis ed moral. * Balet manga 20 taon antis na satan, walay insulat ton kansion ya mangipapanengneng ya posible so agmanganggan panangaro ed laki tan bii. Nanengneng met ed satan a kansion no anton klase itan a panangaro tan no panon itan ya nipatnag. Wala man so asawa tayo odino anggapo, dakel so naaralan tayod Kanta nen Solomon nipaakar ed tuan panangaro.

3. Akin ya posible so tuan panangaro ed laki tan bii?

³ Basaen so Kanta nen Solomon 8:6. Say aro et adeskribe ya “dalang nen Jehova.” Akin? On ta say aro so manunan kualidad to tan pinalsa to itayo ya walaay kapasidad ya mangaro. (Gen. 1:26, 27) Nen pinalsa nen Jehova so unonan laki ya si Adan, inikdan toy magangganan asawa. Kanengneng tod si Eva, agaylay liket to kanian agto apokpokan ya imbalikas so nalilikna to. Seguradon maap-apit so liknaan nen Eva ed asawa to ta sikatoy “inala” manlapud si Adan. (Gen. 2:21-23) Inikdan nen Jehova so totoo na kapasidad ya mangaro kanian posible sirin so tua tan agmanganggan panangaro ed laki tan bii.

4, 5. Isalaysay ed antikey so istorya na Kanta nen Solomon.

⁴ Balibali impandeskribe na Kanta nen Solomon ed panangaron posiblin niwala ed laki tan bii. Satan ya kansion et nipaakar ed aroan na sakey ya pastol tan marikit ya tagad Sunem o Sulem. Niay istorya da: Babantayan na marikit so ubasan na agagi to ya asingger ed pankakampoan nen Arin Solomon tan saray sundalo to. Naimano nen Solomon iyan marikit tan ingganggan to ray lingkor to ya iyakar dad kampo. Indayew toy ganggana na Sulamita tan inopresian toy dakel a regalo. Labay nen Solomon ya napelag so liknaan na marikit ed sikato, balet imbalikas na marikit so pilalek ton nakaiba so inad-aro ton pastol. (Kanta nen Sol. 1:4-14) Sikatoy inanap na pastol tan linma diman ed kampo. Nen aromog to so Sulamita, imbalikas day panangaro dad sakey tan sakey.—Kanta nen Sol. 1:15-17.

⁵ Nen pinmawil si Solomon ed Jerusalem, impila to imay marikit; balet tinumbok na pastol. (Kanta nen Sol. 4:1-5, 8, 9) Anggan antoy imbaga o ginawa nen Solomon, ag-anguman so panangaro na marikit ed pastol. (Kanta nen Sol. 6:4-7; 7:1-10) Kanian pinasempet la na ari. Diad sampot na kansion, imbaga na Sulamita ya say inaro to et ‘mangganat komon a singa kilaw ya ulsa’ a mangabet ed sikato.—Kanta nen Sol. 8:14.

6. Akin ya aliwan mainomay ya amtaen no siopa ray mansasalita diad Kanta nen Solomon?

⁶ Balibalin kansion so Kanta nen Solomon. Diad tua, tinawag itan ya “Kanta na saray kanta.” (Kanta nen Sol. 1:1) Balet diad sayan kansion, agsinansakey ya inyan nen Solomon so ngaran na karakter ya mansasalita. Agla angiyarum na dakel a detalye pian talagan ombitar so inkabalibali na liriko na mismon kansion. Anggaman ontan, naamtaan tayo nin siansia no siopay mansasalita no imanoen tayo imay ibabaga ra odino ibabaga na katongtong da. *

7, 8. Antoy nibaga tayod saray balikas na panangaro ya nabasad Kanta nen Solomon? Mangiter na alimbawa.

⁷ Diad Kanta nen Solomon, dakel so nabasa tayon balikas na panangaro na samay marikit tan pastol. Napatnagan ed satan so kultura da nensaman manga 3,000 taon lay apalabas, kanian no nabasa tayo itan natan et singa nikadkaduma. Anggaman ontan, napno itan na kabaliksan tan natalosan tayoy liknaan na sayan saninaro ed sakey tan sakey. Singa bilang, indayew na pastol so maamon mata na marikit tan inkompara to itan ed “matay malapati.” (Kanta nen Sol. 1:15, NW) Inkompara balet na Sulamita so mata na inaro to ed mismon malapati. (Basaen so Kanta nen Solomon 5:12.) Imbaga ton say kolor na mata na inaro to et singa ra malapati ya manaames ed gatas.

⁸ Aliwan say itsura labat na sakey tan sakey so indaydayew na pastol tan na Sulamita. Alimbawa, labalabay na pastol so paraan na panagsalita na marikit. (Basaen so Kanta nen Solomon 4:7, 11.) Imbaga ton ‘say dila to et walaan na dilo tan gatas.’ Akin? Parad sayan pastol, saray salita na inaro to et masamit ya singa gatas tan puron dilo. Kanian nen imbaga tod marikit ya “malimgas ka, inarok; . . . anggapo so kabalawan ed sika,” aliwan say ganggana to labat so tutukoyen to, noagta pati saray marakep ya kualidad to.

9. (a) Antoy kaibad panangaro na sanasawa? (b) Akin ya importantin ibalikas na sanasawa so panangaro da?

⁹ Say pankasal et aliwa labat ya kontrata o legal ya paknaan. Kaukolan ya inar-aro na sanasawa so sakey tan sakey tan ibalikas day panangaro da. Balet anton klase na panangaro so nepeg ya walad sikara? Kasin say panangaro ya nibase ed saray prinsipyo na Biblia? (1 Juan 4:8) Odino panangaron nalilikna na sankapamilya? Kasin atan imay panangaro tan inkaapit ya nalilikna na sankaaro? (Juan 11:3) Odino romantikon aro? (Uli. 5:15-20) Diad tua, amin iratan et nepeg ya kaiba ed panangaro na sanasawa. Say sankaabigan ya paraan pian nipaliknay panangaro et ibalikas itan. Importante sirin ya agnapaulyanan na sanasawa so pangibalikas day panangaro dad sakey tan sakey anggano dakel so gagawaen dad inagew-agew! Say ontan iran balikas et baleg so nitulong to pian niwalay talek dad sakey tan sakey tan magmaliw ya maliket so ulopan da. Diad arum ya kultura ya say ateng so mamili na naasaway anak da tan agtanton kabat na laki tan bii so sakey tan sakey, kaukolan ya ibalikas day panangaro da pian onelet so ulopan da.

10. Antoy epekto na saray agnalingwanan ya balikas na panangaro?

¹⁰ Wala ni sananey ya positibon epekto no ibalikas na sanasawa so panangaro da. Inopresian nen Arin Solomon so Sulamita na ‘saray laga a balitok ya walaay pilak.’ Indaydayew to, ya kuan ton sikatoy “malimgas a singa say bulan, malinew a singa say banwa.” (Kanta nen Sol. 1:9-11; 6:10) Balet talagan matoor so marikit ed inaro ton pastol. Antoy akatulong ed sikaton manmatoor anggano arawi rad sakey tan sakey? Antoy akaligliwad sikato? (Basaen so Kanta nen Solomon 1:2, 3.) Sankanonot to ray balikas na panangaro na pastol. Parad sikato, ‘magmaong ni iratan nen say alak’ ya mamaliket ed puso, tan say ngaran to et singa ambalbalingit ya “larak ya inkalbo” ed ulo. (Sal. 23:5; 104:15) On, saray agnalingwanan ya balikas na panangaro  et ontulong pian mas ombiskeg so aroan. Importante sirin ya mabetbet ya ibalikas na sanasawa so panangaro dad sakey tan sakey!

11. Antoy naaralan na saray single ya Kristiano ed samay imbaga na Sulamita ed saray bibii ed Jerusalem?

¹¹ Walay naaralan met na saray single ya Kristiano ed Kanta nen Solomon, lalo la no labay day mangasawa o miasawa. Say marikit ya Sulamita et anggapoy nalilikna ton aro parad si Solomon. Kanian pinansamba to ray bibii ed Jerusalem: ‘Agyo liliingen so panangarok anggad labayen ko.’ (Kanta nen Sol. 2:7; 3:5) Akin? Ta makapuy no say sakey et basta labat nawalaan na romantikon liknaan ed anggan siopa. Kanian no labay na Kristiano so mangasawa o miasawa, maabig no alagaren to imay toon talagan naaro to.

12. Akin ya inaro na Sulamita so pastol?

¹² Akin ya inar-aro na Sulamita so pastol? Tua, mataraki ya singa “ulsa ed uma”; mabiskeg iray lima to a singa ‘balitok a walaay topacio’; tan maregkel iray bikking to a singa ‘seklang a marmol.’ Balet aliwa labat ya mataraki tan mabiskeg so pastol. Imbaga na Sulamita ya no ikompara toy ‘inaro to ed arum ya lalaki,’ sikatoy singa kiew na ‘mansanas ed leet na saray kiew ed takel.’ Seguradon ontan so imbaga na sayan matoor ya marikit ta amta ton maespiritual so inaro to.—Kanta nen Sol. 2:3, 9; 5:14, 15.

13. Akin ya inaro na pastol so marikit ya Sulamita?

¹³ Say Sulamita balet ey? Sikatoy agustoan nen Arin Solomon anggano diad saman et 60 lay reyna to tan 80 so onkokomaduan asawa to tan agnabilang so kalangweran a bibii to. Mapatnag sirin ya sikatoy maganggana. Balet imbaga na Sulamita ya sikatoy sakey labat a “lirio ed saray lawak”—sakey ya ordinaryon rosas. Mapabpaabeban bii! Kampegan parad pastol et sikatoy “sakey a lirio ed leet na saray sabit,” aliwan ordinaryo! Sikatoy matoor ed si Jehova.—Kanta nen Sol. 2:1, 2; 6:8.

14. No labay moy mangasawa o miasawa, antoy naaralan mod samay pastol tan ed Sulamita?

¹⁴ Diad Kasulatan, mapekder ya ingganggan nen Jehova ed saray Kristiano ya mangasawa o miasawa ira “dia labat ed  Katawan.” (1 Cor. 7:39) Labay ya ibaga na satan ya say sakey ya Kristianon single et agmi-date o miinaroan ed agmananisia, tan mangasawa o miasawa labat ed matoor ya bautismadon lingkor nen Jehova. Diad tua, walan wala ray probleman naeksperiensya na sanasawa. Balet no maapit so relasyon dan dua ed si Jehova, magmaliw ya mareen tan maliket so panamaley da. Kanian no labay moy mangasawa o miasawa, alig moy alimbawa na pastol tan na Sulamita. Pilim so toon walaan na maabig iran kualidad tan talagan inaro toy Jehova.

15. Akin a maong ya alimbawa so Sulamita ed saray Kristianon saninaro?

¹⁵ Basaen so Kanta nen Solomon 4:12. Akin ya deneskribe na pastol so inaro to ya singa “tanamanan a sinikop [“tinalakan,” NW]”? Say tanamanan ya apadiran tan tinalakan so puerta to et agnalooban na anggan siopa. Ontan so Sulamita ta say panangaro to et para labat ed magmaliw ya asawa to—say pastol. Sikatoy ag-asagyat ed pananangguyor na ari, kanian pinaneknekan ton sikatoy singa ‘sakey a bakor,’ aliwan singa ‘sakey a pinto’ ya basta labat nalukasan. (Kanta nen Sol. 8:8-10) Ontan met iray Kristianon saninaro natan ya manplaplano lan mankasal. Matoor irad sakey tan sakey tan irereserba day panangaro tan atension da ed magmaliw ya asawa ra.

16. Antoy naaralan ed Kanta nen Solomon nipaakar ed piinaroan?

¹⁶ Nen intagar na pastol so Sulamita ya ompasyar, sikatoy ag-inabuloyan na saray kuya to. Imbes, sikatoy ingganggan dan manbantay ed kaubasan. Akin? Kasin anggapoy talek dad sikato? Kasin inisip da ya ompan labay toy manggaway imoral? Diad tua, manaalwar ira pian naprotektaay agi da ed tukso. (Kanta nen Sol. 1:6; 2:10-15) Makaaral iray single ya Kristiano ed satan. Legan na piinaroan, manalwar kayo pian mansiansian malinis tan masimpit so relasyon yo. Agkayo manbubukbukor ed lugar ya anggapoy makakanengneng ed sikayo. Tua, aliwan makapuy so malinis iran balikas na panangaro, balet paliisan iray situasyon ya nayarin natukso kayon manggaway aliwa.

17, 18. Panon kan atulongan na impanaral tayod Kanta nen Solomon?

¹⁷ Siempre, diad gapo na panangasawa et talagan inar-aro na Kristianon sanasawa so sakey tan sakey. Labay nen Jehova ya ag-itan mangangga. Kanian importantin gawaen na sanasawa so anggaay nayarian da pian mansiansian manliob so apoy na panangaro da tan seguroen dan onelet lan onelet so ulopan da.—Mar. 10:6-9.

¹⁸ No labay moy mangasawa o miasawa, pilim imay toon talagan naar-arom tan pabiskeg mo itan ya panangaro pian agnasebseban, a singa naaralan tayod Kanta nen Solomon. Balanglan labay moy mangasawa odino wala lay asawam, komon ta naeksperiensyam so tuan panangaro—say “dalang nen Jehova.”—Kanta nen Sol. 8:6.