1. Anton abilidad so ontulong ed sikatayon aligen iray kualidad na Dios?

INIKDAN itayo nen Jehova na abilidad ya talosan so liknaan na arum tan iyan so sarili tayo ed situasyon da anggano agtayo ni itan asali. (Basaen so Efeso 5:1, 2.) Panon tayon nausar iyan abilidad diad maong ya paraan? Akin ya kaukolan tayoy manalwar ed no panon tayon usaren iyan abilidad?

2. Antoy nalilikna nen Jehova no nanairapan tayo?

² Malikeliket tayod sipan na Dios ya onsabi panaon et anggapo lay manirap. Iilaloan na saray alanaan so imortal ya bilay ed tawen tan iilaloan na ‘arum a karnero’ so bilay ya andi-angga diad dalin. (Juan 10:16; 17:3; 1 Cor. 15:53) Balet natan, amin tayo et makakaeksperiensya ni na irap. Natatalosan nen Jehova so nalilikna tayo. Nen naaripen iray Israelita ed Ehipto, ibabaga na Biblia ya ‘sikato so napapairap ed amin ya irap da.’ (Isa. 63:9) Kalabas na pigaran siglo, nen natatakot iray Judio ed saray onkokontrad pangipaalagey lamet na templo, imbaga na Dios ed sikara: “Siopaman a maniwit ed sikayo et manidiwit ed bukel na matak.” (Zac. 2:8, NW) No panon ya inar-aro na ina so mansususon anak to, inar-aro nen Jehova iray lingkor to tan labay to  ran tulongan. (Isa. 49:15) On, sarag nen Jehova ya iyan so sarili to ed situasyon na arum, tan inikdan to itayo met na ontan ya abilidad.—Sal. 103:13, 14.

3. Antoy sakey ya paneknek ya si Jesus et maabagey?

³ Alikna nen Jesus so paniirap na arum, anggano agton balot asali so situasyon da. Singa bilang, amta to ya natatakot iray ordinaryon totoo ed saray relihyoson lider, ya amalikdo ed sikara tan nanggawa na ambelat iran totontonen. (Mat. 23:4; Mar. 7:1-5; Juan 7:13) Agbalot asali nen Jesus so tinmakot odino apalikdo, balet natatalosan toy situasyon da. Kanian “sanen anengneng to iray totoo, sikaray naabagey to, lapud singa ra kinatatan tan pinaulyanan a karnero ya andian na managpastol.” (Mat. 9:36) Inalig nen Jesus so Ama to ya maar-aro tan maabagey.—Sal. 103:8.

4. Antoy epekto ed si Jesus sanen anengneng toy paniirap na arum?

⁴ Nen anengneng nen Jesus iray totoon nanairapan, tinulongan to ra lapud inaro to ra. Talagan inalig toy Ama to ya maar-aro. Aminsan, kayari ton nampulong kaiba iray apostol to, itagar to la ra komon ya manpainawa ed nisulinek ya pasen. Balet nen anengneng ton dakel ya totoo so manaalagar ed sikato, naabagey to ra. Kanian anggano naknaksawan, “imbangat to ira na dakel a bengatla.”—Mar. 6:30, 31, 34.

5, 6. Pian naalig tayoy panangaro na Dios, panon so nepeg ya pantrato tayod arum? Mangiter na alimbawa. (Nengnengen so litratod gapo na artikulo.)

⁵ Naalig tayoy panangaro na Dios diad paraan na pantrato tayod arum. Nonoten pa iyan alimbawa: Walay kalangweran ya brother ya say ngaran to et Alan. Sankanonot to so maedad lan brother ed kongregasyon da ya lapud makapuy lay mata to et agla tanton makabasa. Nanairapan met iyan maedad lan brother ya onakar diad panagpulong ed kaabungan. Anonotan nen Alan iyan imbaga nen Jesus: “Say labay yon gawaen na totoo ed sikayo, gawa yo met ed sikara.” (Luc. 6:31) Kanian tinepetan nen Alan so sarili to, ‘Antoy labay kon gawaen na totoo ed siak?’ Say tampol ya naisip to, ‘Labay kon migalaw irad siak na baskitbol!’ Balet agla sarag na sayan maedad lan brother so man-baskitbol. Kanian say nepeg ya itepet nen Alan ed sarili to et, ‘No siak iman ya brother, antoy labay kon gawaen na arum parad siak?’

⁶ Anggano aliwa nin maedad si Alan, sarag ton imadyinen no antoy nalilikna na sakey a maedad la. Inobserbaan to imay maedad lan brother tan madengedengel ed saray istorya to. Kanian naamtaan nen Alan ya nanairapan la manaya iyan brother ya manbasa na Biblia tan ngalngali agmet la makaakar no manpulong ed kaabungan. Nen alikna nen Alan so irap na sayan brother, diman to anengneng no antoy kaukolan to, tan labay ton tulongan. Sarag tayo met itan ya gawaen. Pian naalig tayoy panangaro na Dios, kaukolan tayon iyan so sarili tayo ed situasyon na arum.—1 Cor. 12:26.

7. Panon tayon natalosan so irap ya dadalanen na arum?

⁷ No maminsan, aliwan mainomay ya talosan so irap ya dadalanen na arum lalo la no agtayo nin balot asali itan. Singa bilang, say arum ya agagi et makapuy so laman da lapud sakit odino ontatatken la ra. Say arum et walay problema dad emosyon lapud nadi-depress ira, mapagpaga iran maong, odino lapud minaltrato o inabuso ira  nensaman. Say arum ya agagi et aliwan Tasi iray kapamilya da odino bukor day mamapabaleg na ananak da. Amin tayo et walaan na problema, balet maslak et dumay problema tayod arum ya agagi. No ontan sirin, antoy nagawaan tayo? Ondengel tayon maong ed sikara tan talosan tayoy nalilikna ra pian amta tayo no panon tayo ran natulongan. Nanduruma so pankaukolan na kada indibidual, balet sarag tayo ran pasesegen ed espiritual tan mangiter na praktikal iran tulong. No ontan so gawaen tayo, aaligen tayoy Jehova.—Basaen so Roma 12:15; 1 Pedro 3:8.

8. Antoy akatulong ed si Jesus pian nipanengneng toy kamaongan?

⁸ Imbaga na Anak na Dios: ‘Say Sankatageyan et maong ed saramay andiay utang na linawa tan mauges.’ (Luc. 6:35) Inalig nen Jesus so kamaongan na Dios. Antoy akatulong ed si Jesus pian nipanengneng toy kamaongan? Inisip to no antoy nalikna na arum ed ibaga odino gawaen to. Singa bilang, aminsan et walay biin kabkabat ya makasalanan ya inmasingger ed sikato, tan manakis ed salian to. Anengneng nen Jesus ya talagan magbabawi iyan bii, tan amta to ya no basta to labat paalisen, mas grabe panermen to. Saman ya bii et kinomendaan tan pinerdona nen Jesus. Nen walay Fariseo ya agto agustoan iyan agawa, maong met so impitongtong nen Jesus ed sikato.—Luc. 7:36-48.

9. Antoy makatulong pian naalig tayoy kamaongan na Dios? Mangiter na alimbawa.

⁹ Panon tayon naalig so kamaongan na Dios? Kaukolan tayoy mannonot antis tayon mansalita odino manggaway sakey ya bengatla pian agtayo nasakitan so liknaan na arum. Insulat nen apostol Pablo ya saray Kristiano et “agnepeg a mikolkol, noagta mauyamo ed amin.” (2 Tim. 2:24) Isipen pa no panon mon nipanengneng so kamaongan ed sarayan situasyon: No say supervisor mo et paspasaray ya mantrabaho, antoy reaksion mo? No walay agin pigay bulan ya ag-akiaral insan anengneng mod Kingdom Hall, antoy ibagam ed sikato? No diad panagpulong et walay akatongtong mon ibaga ton, “Busy ak natan,” antoy gawaen mo pian nipanengneng moy konsiderasyon? No tepetan ka na asawam no akin ya akitrato kad arum ya agmo impaamta ed sikato, panoy iyebat mo? No iyan tayoy sarili tayo ed situasyon na arum tan isipen tayo no antoy epekto na ibaga tayod sikara, natebek tayo no panon so nepeg ya pansalita tan ikiwas tayo pian naalig tayoy kamaongan nen Jehova.—Basaen so Uliran 15:28.

10, 11. Antoy makatulong ed sikatayo pian naalig tayoy karunongan na Dios? Mangiter na alimbawa.

¹⁰ Say abilidad tayon imadyinen so situasyon ya agtayo ni asali et makatulong pian naalig tayoy karunongan nen Jehova tan nanengneng tayo la ray posiblin resulta na saray gawaen tayo. Say karunongan so sakey ed saray manunan kualidad nen Jehova, tan no labay to, sarag ton amtaen so detalyadon pansumpalan na sakey a bengatla. Siempre, agtayo itan nagawaan, balet anggan panon et sarag tayon nonoten no anto ray posiblin resulta na saray desisyon tayo. Agtayo aaligen iray Israelita. Agda ninonot so pansumpalan na agda itulok ed Dios. Agda met ninonot so relasyon dad sikato tan amin ya ginawa to parad sikara. Amta itan nen Moises, kanian oniay imbaga to nipaakar ed sikara: ‘Sakey ira a baley ya anggapo so simbawa tan anggapoy pakatalos da. No komon ta makabat ira, natalosan da  iya, tan naumameng day pansumpalan da!’—Deu. 31:29, 30; 32:28, 29.

¹¹ Pian naalig tayoy karunongan na Dios, maabig no imadyinen tayo so resulta na saray gagawaen tayo. Singa bilang, no akiinaroan ka, tandaan ya aliwan mainomay ya kontrolen so seksual iran pilalek. Kanian manalwar ka pian agka makagaway pakaderalan na mablin relasyon mod si Jehova! Dengel mo iyan simbawa nen Jehova: “Say marunong et nanenengneng toy peligro tan iyaamot toy inkasikato, balet say andiay kakabatan et ondidiretso tan aanien to ray pansumpalan.”—Uli. 22:3, NW.

12. Antoy resulta na makapuy ya pan-imadyin?

¹² No say sakey et marunong, kontrolen toy kanonotan to. Say kanonotan tayo et nikomparad apoy. No duga so pangusar, makatulong itan, singa diad panluto. Balet no agkontrolen so apoy, nayarin poolan toy abung tan saray manaayam ditan. Ontan met ed pan-imadyin. Makatulong itan no usaren tayo pian naalig tayoy Jehova. Balet makapuy itan no usaren tayod pampantasya na imoral. Singa bilang, no lanang tayon iimadyinen iray seksual a kagagawa, nasagyat tayon aktual ya gawaen itan. On, say pan-imadyin na imoral et manresultad ipatey ed espiritual!—Basaen so Santiago 1:14, 15.

13. Anton klase na bilay so inimadyin nen Eva?

¹³ Nonoten pa no panon ya ginmapo so pilalek nen Eva ya kanen so insebel ya bunga na ‘kiew ya pakaamtaan na maong tan mauges.’ (Gen. 2:16, 17) Imbaga na uleg ed sikato: ‘Agkayo ompatey. Amta na Dios a diad agew na pangan yo ed satan, nalukasan iray mata yo, tan magmaliw kayon singa Dios, ya amta yo so maong tan mauges.’ Anengneng nen Eva ya say bunga na kiew et “maong a pantagano, tan makapaliket ed saray mata.” Antoy resulta? ‘Amurbor na bunga, tan angan. Insan to met inikdan so asawa to, tan angan met.’ (Gen. 3:1-6) Asagyat si Eva ed samay imbaga nen Satanas. Inimadyin nen Eva so bilay to no anggapo lay mangibagad sikato no antoy maong tan mauges, noagta sikato lan mismo so mandesisyon. Talagan makapuy so nansumpalan na impan-imadyin to! Lapud sinagyat nen Eva si Adan tan nankasalanan met, “linmoob so kasalanan ed mundo . . . tan say ipapatey lapud kasalanan.”—Roma 5:12.

14. Anto ran pasakbay ed Biblia so ontulong ed sikatayon paliisan so seksual ya imoralidad?

¹⁴ Tua, aliwan seksual ya imoralidad so kasalanan nen Eva. Balet nankasalanan lapud makapuy ya impan-imadyin to. Oniay  impasakbay nen Jesus nipaakar ed pan-imadyin ed imoral ya kagagawa: “Siopaman a naynay ya onlilinggis ed sakey a bii tekep na pampilpilalek ed sikato et akikalugoran la ed sikato dia ed puso to.” (Mat. 5:28) Tan oniay impasakbay met nen Pablo: “[Agkayo] manplaplano parad saray pilalek na laman.”—Roma 13:14.

15. Anton kayamanan so nepeg tayon tiponen, tan akin?

¹⁵ Makapuy met no say sankanonot tayo et manpayaman, ya lapud satan et anggapo lay panaon tayo parad si Jehova. Diad tua, say kayamanan na too et singa labat ‘atagey a bakor ed dilin isip to.’ (Uli. 18:11) Imbaga nen Jesus ya makulangkulang so “toon mantitipon na kayamanan parad inkasikato balet aliwan mayaman ed pakanengneng na Dios.” (Luc. 12:16-21) Maliket si Jehova no gagawaen tayoy panlabayan to. (Uli. 27:11) Tan maliket tayo met no amta tayon aabobonan to tayo lapud mantitipon itayo na “saray kayamanan ed tawen”! (Mat. 6:20) Say maapit ya relasyon ed si Jehova so sankablian lan kayamanan ya niwalad sikatayo.

16. Antoy sakey ya paraan pian agtayo masyadon mapagpaga?

¹⁶ Nonoten pa labat so kapagaan na toon mamapasyan mantipon na “saray kayamanan diad dalin.” (Mat. 6:19) Imbaga nen Jesus ya nairapan itayon iyuna so Panarian no say sankanonot tayo et “saray kapagaan ed sayan mundo” tan no napalikdo itayo na “pakayari na kaykayamanan.” (Mat. 13:18, 19, 22) Wala ray totoon masyadon mapagpaga ed arapen da, nayarin panaburidoan day kuarta odino arum ni. Balet no agtayo kontroley pampapaga tayo, nayarin onkapuy so laman tan espiritualidad tayo. Manmatalek tayo sirin ed si Jehova tan tandaan ya “say kapagaan ed puso na too so mamapabelat ed satan, balet say maabig a salita so mamaliket ed satan.” (Uli. 12:25, NW) No walay toon natatalosan to ka tan pasesegen to ka panamegley na “maabig a salita,” onlemew so liknaan mo. Kanian ibalikas moy naliliknam ed atateng mo, asawam, odino kaarom ya maespiritual pian napaseseg da kan manmatalek ed si Jehova tan nabawasan so pampapagam.

17. Panon itayon tutulongan nen Jehova no wala ray kapagaan tayo?

¹⁷ Anggapo lay mas makatalos ed saray kapagaan tayo nen say si Jehova. “Agyo pampapagaan so antokaman,” so insulat nen Pablo, “noagta diad amin a bengatla et ipaamta yo ed Dios iray kerew yo diad panamegley na pikakasi tan masimoon a pikekerew tekep na pisasalamat; tan say deen na Dios a palumbasan toy amin a kanonotan so manbantay ed saray puso tan nonot yo diad panamegley nen Kristo Jesus.” (Fil. 4:6, 7) Kanian no walay pampapagaan mo, nonot mo no siopa ray ontutulong pian naprotektaay espiritualidad mo—saray agagi, saray elder, say matoor ya aripen, saray anghel, si Jesus, tan si Jehova a mismo.

18. Panon itayon natulongan na pan-imadyin?

¹⁸ Naaralan tayon makatulong so pan-imadyin pian naalig tayo ray kualidad na Dios, singa say panangaro. (1 Tim. 1:11; 1 Juan 4:8) Maliket itayo no ipanengneng tayoy tuan panangaro, no isipen tayo ray resulta na saray gawaen tayo, tan no paliisan tayoy alabas ya pampaga. Kanian usaren tayo sirin so abilidad ya inter na Dios pian imadyinen so bilay tayo ed uley na Panarian tan pian naalig tayoy panangaro, kamaongan, karunongan, tan liket nen Aman Jehova.—Roma 12:12.