DINAY panisiaan mod satan a dua? Parad dakel, makapaliket tan balibali may imbaga nen Saulo, ya tinawag ya apostol Pablo. (Gawa 17:26, 27) Tan dakel ni ray ontan a panamaseguro ed Biblia. Singa bilang, diad sakey ya impanpikasi nen Jesus, impaseguro tod saray papatumbok to ya sarag dan nakabat so Dios tan nabendisyonan ira.—Juan 17:3.

Balet dumay panisiaan na saray philosopher ya singa si Philo. Ibabaga ran agtayon balot nakabat so Dios ta agtayo natalosan so amin ya nipaakar ed sikato. Anton talagay tua?

Ibabagan mismo na Biblia ya wala ray nipaakar ed Dios ya mairap ya natalosan na totoo. Singa bilang, agnasukat, agnatantiya, tan agnatalosan no panon kabayag lan walay Dios ontan met ed kaaralem na karunongan to. Balet, agto labay ya ibagan agti la nakabat. Diad tua, say panisip tayod sarayan katuaan et ontulong pian ‘onapit tayo ed Dios.’ (Santiago 4:8) Nengnengen tayoy pigaran alimbawa na bengatlan agtayon talaga natalosan ed Dios. Insan tayo nengnengen no anto ray sarag tayon natalosan.

GAPO NA DIOS: Ibabangat na Biblia ya wala lay Dios “manlapu ed andi-anggaan ya angga ed andi-anggaan.” (Salmo 90:2) Kanian anggapoy gapo tan anggaan na Dios. Parad sikatayo ran totoo, “say bilang na saray taon to . . . so agnausisa” o agnabilang.—Job 36:26.

No akin ya importante: Ipropromisa na Dios ya makapambilay ka ya andi-angga no kabaten mo. (Juan 17:3) Panisiaan mo kasi yan promisa no agmet manbilay ya andi-anggaan so Dios? Say “Ari ed andi-anggaan” labat so makapanggawa ed satan.—1 Timoteo 1:17.

KANONOTAN NA DIOS: Ibabangat na Biblia ya “anggapo so makausisa” ed kanonotan na Dios ta atagtagey iratan nen say sikatayo. (Isaias 40:28; 55:9) Duga labat may tepet ed Biblia ya: “Siopa so akaamta la ed kanonotan nen Jehova, ta pian sikatoy ibangat to?”—1 Corinto 2:16.

No akin ya importante: Sarag na Dios ya dengelen so minilyon ya mandadasal anggano manbabansag. (Salmo 65:2) Naiimano to ingen so anggan sakey ya anuyaw o siwit ya napelag ed dalin. Napano kasi nonot na Dios kanian agto tayo la naimano o narengel ya manpipikasi? Andi, ta anggapoy limitasyon na nonot to. Ontan met, “mas mabli kayo ni nen say dakel ya anuyaw.”—Mateo 10:29, 31.

DALAN NA DIOS: Ibabangat na Biblia ya “say too agto natontonan so gawa a ginawa na Dios a manlapu ed gapo angga ed sampot.” (Eclesiastes 3:11) Kanian agtayon balot naamtaan ya amin so nipaakar ed Dios ta “agnatonton iray dalan to.” (Roma 11:33) Balet labay na Dios ya ipaamta so dalan tod saramay labay dan napaliket so Dios.—Amos 3:7.

No akin ya importante: No basaen tan aralen moy Biblia, walan walay balon naaralan mod Dios tan ed saray dalan to. Kanian makaapit tayo ed Ama tayod tawen ed andi-angga.

Aliwan lapud agtayo natalosan ya amin so nipaakar ed Dios et agtayo lan balot nakabat. Dakel so nabasad Biblia ya ontulong pian nakabat tayo. Singa sarayan alimbawa:

NGARAN NA DIOS: Ibabangat na Biblia ya walay ngaran na Dios. Inkuan to: “Siak si Jehova, satan so ngaran ko.” Nabasa so ngaran na Dios ed Biblia ya masulok a 7,000 beses, mas aminpiga ni nen say anggan anton ngaran.—Isaias 42:8.

No akin ya importante: Impikasi nen Jesus: “Ama mi a walad tawen, napasanto komon so ngaran mo.” (Mateo 6:9) Sarag mo met kasin usaren so ngaran na Dios ed pikakasim? Iliktar nen Jehova iramay manrerespeto ed ngaran to.—Roma 10:13.

PANAAYAMAN NA DIOS: Ibabangat na Biblia ya walay duaran “pasen”—say dalin ya panaayaman tayo tan say tawen ya panaayaman na saray espiritun pinalsa. (Juan 8:23; 1 Corinto 15:44) Say “pasen ya ayaman” na Dios et diad “tawen.”—1 Arari 8:43.

No akin ya importante: Mas natalosan tayoy Dios. Say Amalsa et aliwan puersa ya walad  amin a pasen o bengatla. Si Jehova et tua, tan manaayam ed sakey a pasen. Tan “anggapo so pinalsa ya agnanengneng na Dios.”—Hebreos 4:13.

PERSONALIDAD NA DIOS: Ibabangat na Biblia ya dakdakel iray mararakep ya ugali nen Jehova. “Say Dios et aro.” (1 Juan 4:8) Agan balot mantila. (Tito 1:2) Sikatoy makasi, matantan ya manpasnok, tan agmanlalabi. (Exodo 34:6; Gawa 10:34) Tan ompan ag-amta na dakel ya labalabay na Amalsa ya ‘nakaaro’ iramay manrerespetod sikato.—Salmo 25:14.

No akin ya importante: Sarag moy magmaliw ya kaaro nen Jehova. (Santiago 2:23) No mas nakakabat moy personalidad nen Jehova, mas natalosan mo ray salaysay ed Biblia.

Malinlinew so ibabaga na Biblia ed si Jehova a Dios. Sikatoy aliwan Dios ya agan balot natalosan. Diad tua, labay to ingen ya kabaten mo. Ipapaseguro na Biblia: “No sikato so anapen mo, sikato so naromog mo.” (1 Awaran 28:9) Akin ta no kabaten moy Dios diad pambasa tan pannonot ed saray salaysay ed Biblia? No gawaen mo itan, ipropromisa na Biblia ya say Dios et ‘onapit ed sika.’—Santiago 4:8.

Ompan isipen mo, ‘No agkon balot natalosan ya amin so nipaakar ed Amalsa, panon ak ya magmaliw a kaaro to?’ Isip mo pa ya: Kaukolan kasi ya asumpal met ed medisina so kaaro na sakey ya doktor? Andi! Anggan dumay propesyon to, nayari ran magmaliw ya sankaaro. Say importante et kabkabat na kaaro to so personalidad na doktor, no anto ray labay to, tan agto labay. Ontan met, naaralan mod Biblia no antoy personalidad na Dios ya Jehova—aya may kaukolan mon naamtaan pian nakaarom.

Nabasad Biblia iray impormasyon ya kaukolan tayo pian nakabat so Dios. Labay mon mas nakabat si Jehova ya Dios? Maliket iray Tasi nen Jehova ya iyaralan ka na Biblia. Anap mo ray Tasi ed lugar yo odino ombisitad website mi ya www.pr2711.com/pag.