“Makapaaburido ta dakdakel natan so kabataan ya nadi-depress tan apektadoy panag-isip da, tan naamtaan mi ya say sakey ya manunan rason et say social media.”​—Dr. Vivek Murthy, U.S. surgeon general, New York Times, Hunyo 17, 2024.

 Panon ya naprotektaan na atateng iray ananak da ed saray makapuy ya epekto na social media? Makatulong iray bilin ya walad Biblia.

 Nia ray prinsipyo na Biblia.

 “Samay makabat et dadalepdepen toy kada gawaen to.”​—Proverbio 14:15.

 Wala ray makapuy ya epekto na social media kanian dapat agmo bastabasta papayagan so anak mo ya mangusar na social media. Antis mon payagan, segurom ya responsable la ed pangusar to. Kasin walay disiplina to ed karukey na oras ya panguusar toy social media? Kasin agto napapaulyanan so pikakaaro to ed saray maong ya totoo? Tan kasin papaliisan to iray makapuy ya babantayan o babasaen?

•   Parad kaaruman ya impormasyon, basaen iray artikulon “Duga Labat Kasi ya Mangusar na Social Media so Anak Ko?” tan “Ibangat so Tinedyer ya Anak Mo No Panon so Dugan Pangusar na Social Media.”

 “Usar yod sankaabigan so panaon yo.”​—Efeso 5:16.

 No payagan mon mangusar na social media so anak mo, dapat walay tongtongan yo no panoy pangusar tod satan, tan ipaliwawam no akin ya parad pankaabigan to iray nantongtongan yo. Dapat alerto ka ed saray pananguman ed ugali na anak mo ya pakapatnagan ya kaukolan mon limitaan so pangusar tod social media.

•   Ipabantay mod anak mo may whiteboard animation ya Magmaliw ya Matalino ed Pangusar na Social Network pian natalosan to no akin ya kaukolan iray limitasyon.

 Ibabaga na Biblia ya manbibilay tayo ed “mapeligro tan mair-irap a panaon.” (2 Timoteo 3:1-5) Pero nabasa tayo met ditan iray bilin ya makatulong ed sikatayo. Diad sayan artikulon nipaakar ed mental health na saray tinedyer walay masulok ya 20 ya nibased Biblia ya artikulo ya makatulong ed saray atateng tan saray ananak da.