Parad dakel, singa imposible ya magmaliw ya pantay-pantay so panagtrato ed amin ya lahi.

•   “Diad amin ya parte na mundo, say panangidumaduma ed lahi et singa samal ya manederal ed saray institusyon, grupo na totoo, tan inagew-agew ya kabibilay na ordinaryon totoo. Atan so rason no akin ya aliwan patas so panagtrato na totoo ed sakey tan sakey.”—António Guterres, UN Secretary-General.

 Posible ni kasin magmaliw ya pantay-pantay so panagtrato ed amin ya lahi? Antoy ibabaga na Biblia?

 Naamtaan tayod Biblia no antoy pakanengneng na Dios ed nanduruman lahi.

•   “Manlapud sakey a too et ginawa [na Dios so] amin a nasyon na totoo pian manayam diad interon dalin.”—Gawa 17:26.

•   “Anggapoy lalabien na Dios, noagta diad balang nasyon et makapaliket ed sikato so toon ontatakot ed sikato tan manggagaway duga.”—Gawa 10:34, 35.

 Ipapaamta na Biblia ya saksakey ya pamilya so nanlapuan na amin ya totoo tan aawaten na Dios so kada lahi.

 Magmaliw lan pantay-pantay so panagtrato na totoo ed sakey tan sakey diad uley na Panarian na Dios, say gobierno ed tawen. Bangatan na satan ya gobierno iray totoo no panon so dugan pantrato ed sakey tan sakey. Naaralan dan labanan so antokaman ya nalilikna dan pambusol ed arum ya lahi.

•   “Naaralan na saray manaayam ed sayan dalin so inkatunong.”—Isaias 26:9.

•   “Say resulta na tuan inkatunong et kareenan, tan say bunga na tuan inkatunong et agmanganggan deen tan kaligenan.”—Isaias 32:17.

 Diad tulong na Biblia, natan ni labat et naaaralan la na minilyon ya totoo no panon dan tratoen ya walaay respeto tan dignidad so arum.

•   Pian naaruman ni antam, basaen so isyu na magasin ya Onliing! ya say title to et “Naandi ni Kasi Diskriminasyon?”

•   Basaen so artikulo ya “Pitongtong ed Saray Ananak Tungkol ed Panangidumaduma ed Lahi” pian naamtaan mo no panon ya itongtong na atateng iyan topic diad ananak da.