1. Dicon e famia di Adam cu Eva no por a drenta e Hofi di Eden, y kico tabata Abel su deseo di mas grandi?

ABEL tabata riba un sero hunto cu su carnenan cu tabata come yerba trankil. El a bira wak na horizonte, caminda e por a mira un luz debil asina. E tabata sa cu eynan tabatin un spada na candela cu tabata draai continuamente, blokiando entrada di e Hofi di Eden. Un tempo su mayornan, Adam cu Eva, tabata biba eynan, pero awor ni nan ni nan yiunan no por a drenta mas. Kisas a cuminsa bira scur ora cu Abel a hisa cara wak cielo y pensa riba su Creador, mientras cu biento tabata pasa den su cabey. Kisas el a puntra su mes: ‘E relacion entre hende y Dios lo drecha un dia?’ Esey tabata Abel su deseo di mas grandi.

2-4. Con Abel ta papia cu nos awe?

² Awe Abel, e di dos yiu di Adam, ta papia cu bo. Abo ta tend’e? Kisas bo ta pensa cu esey ta imposibel, pasobra el a muri hopi tempo pasa. Casi 6.000 aña pasa su curpa a bira stof y caba na nada. Fuera di esey, Bijbel ta siña nos cu “e mortonan no sa nada.” (Ecl. 9:5, 10) Ademas, ni un solo palabra cu Abel a papia ta skirbi den Bijbel. Pues, con e por papia cu nos?

³ Inspira pa Dios, apostel Pablo a skirbi: ‘Aunke Abel a muri, pa motibo di su fe e ta papia ainda.’ (Lesa Hebreonan 11:4.) Si, e ta papia pa medio di su fe. Abel tabata e prome ser humano cu a cultiva e bunita cualidad ey. El a demostra su fe na un manera asina impresionante, cu su ehempel ta un patronchi bibo cu nos por imita awe. Si nos studia su ehempel y haci esfuerso pa imit’e, ta comosifuera nos ta tende Abel papia cu nos.

⁴ Pero, kico nos por siña for di Abel y su fe siendo cu Bijbel ta bisa masha poco di dje? Laga nos wak.

5. Dicon Hesus a referi na e epoca di Abel como “dia a funda mundo”? (Wak tambe e nota.)

⁵ Abel a nace casi na comienso di historia humano. Siglonan despues, Hesus a referi na e epoca di Abel como “dia a funda mundo.” (Lesa Lucas 11:50, 51.) Ora Hesus a uza e palabra “mundo”, e tabata kiermen evidentemente e hendenan cu por a ser rescata for di pica. Abel tabata e di cuater ser humano na mundo e tempo ey, pero aparentemente e tabata e prome cu pa Dios a bin na remarca pa haya salbacion. * Ta bisto cu Abel no a lanta den un ambiente cu bon ehempel cu e por a imita.

6. Ki sorto di mayor Abel tabatin?

⁶ Pues, aunke mundo a caba di cuminsa, ya e famia humano tabata biba den un situacion hopi tristo. Abel su mayornan, Adam y Eva, probablemente tabata hopi bunita y yen di energia. Na principio, nan tabata perfecto y tabatin e chens di biba pa semper. Pero nan a comete e fayo di mas grandi di nan bida, y nan tabata sa esey: Nan a rebela contra Jehova Dios, y el a saca nan for di Paradijs. Como cu nan a pone nan propio deseonan prome cu tur otro cos—hasta prome cu bienestar di nan descendientenan—nan a perde perfeccion y bida eterno.—Gen. 2:15–3:24.

7, 8. Kico Eva a bisa ora Cain a nace, y kico kisas el a pensa?

 ⁷ Despues cu Dios a saca Adam cu Eva for di Paradijs, nan tabatin un bida duro. Ora nan prome yiu a nace, nan a yam’e Cain, y Eva a declara: “Mi a haya un yiu homber cu yudansa di SEÑOR.” Kisas Eva a pensa riba e promesa cu Jehova a haci den e Hofi di Eden, esta, cu un cierto muher lo a haya un “simia” (un descendiente) cu un dia lo caba cu e malbado cu a hinca Adam cu Eva den mal caminda. (Gen. 3:15; 4:1) Acaso Eva a kere cu ta e tabata e muher menciona den e profecia ey y cu Cain tabata e “simia” priminti? Si ta esey el a pensa, e tabata completamente ekiboca.

⁸ Ademas, si Adam cu Eva a hinca e ideanan ey den Cain su cabes segun cu e tabata crece, esaki sigur lo a hacie hopi arogante. Poco tempo despues, Eva a duna luz na su di dos yiu homber, pero di e yiu aki si e no a bisa nada particular. Nan a yam’e Abel, cu kisas ta nifica “Rosea”, of “Banidad.” (Gen. 4:2) Acaso nan a dun’e e nomber ey pasobra nan no a spera mucho di dje manera nan a spera di Cain? Nos no sa.

9. Kico mayornan awe por siña for di e relato tocante Adam cu Eva?

⁹ Nos por siña hopi for di e relato tocante e prome mayornan ey. Mayornan, puntra boso mes: ‘Loke mi ta papia y haci ta stimula e orguyo, ambicion y tendencianan egoista di mi yiunan? Of mi ta siña nan stima Jehova y forma un amistad cu ne?’ Lamentablemente, Adam cu Eva a faya cu nan responsabilidad. Pero ainda tabatin speransa pa nan descendientenan.

10, 11. Ki trabou Cain cu Abel a haci, y ki cualidad Abel a cultiva?

¹⁰ Segun cu Cain y Abel tabata crece, Adam sin duda a siña nan traha pa yuda percura pa e famia. Cain a bira cunukero; Abel a bira wardador di carne.

¹¹ Pero Abel a haci algo cu tabata hopi mas importante. A traves di añanan, el a cultiva fe, e bunita cualidad cu mas despues Pablo a skirbi tocante dje. Si bo wak bon, esey tabata algo extraordinario. No tabatin ningun hende di fe cu por a sirbi como ehempel pa Abel. Con el a logra cultiva fe den Jehova Dios? Laga nos analisa tres cos importante cu probablemente el a uza como base pa su fe.

12, 13. Con e creacion di Jehova por a yuda Abel su fe crece?

¹² Jehova su creacion. Ta berdad cu Jehova a maldiciona tera, y pesey el a produci mata di sumpiña y bringamosa cu a haci agricultura dificil. Pero asina mes tera a produci suficiente cuminda pa e famia di Abel. Ademas, Dios no a maldiciona bestia; ni sero,  lago, riu of lama; ni tampoco cielo, nubia, solo, luna of strea. Pues, unda cu Abel a wak, e por a mira prueba di e gran amor, sabiduria y bondad di Jehova, e Dios cu a crea tur cos. (Lesa Romanonan 1:20.) Cada biaha cu Abel a medita cu aprecio riba e creacion y cualidadnan di Dios, su fe a bira mas fuerte.

¹³ Abel siguramente a tuma tempo pa medita riba Jehova. Bo por imagina cu como wardador di carne e tabatin cu cana hopi. El a guia e bestianan manso aki pa subi sero y crusa vaye y riu; tur esaki pa nan por a haya e yerba di mas berde, e mihor fuente di awa y e mihor luga pa nan por a sosega. Di tur criatura cu Dios a crea, carne ta parce esun di mas indefenso; ta comosifuera nan a ser crea cu e necesidad pa hende proteha nan y guia nan. Acaso Abel tambe a sinti cu e tabatin mester di guia, proteccion y cuido di un Persona mas sabi y mas poderoso cu cualkier ser humano? Sin duda el a expresa hopi di e sintimentonan aki den su oracionnan, y pesey su fe a sigui crece.

14, 15. Con e promesanan di Jehova a fortalece Abel su fe?

¹⁴ Jehova su promesanan. Adam cu Eva lo mester a conta nan yiunan dicon Dios a saca nan for di e Hofi di Eden. Pues, Abel tabatin hopi cos pa medita ariba dje.

¹⁵ Jehova a bisa cu e tera lo ta maldiciona. Na e matanan di sumpiña y bringamosa cu tera a produci, Abel por a mira bon cla cu e palabranan ey a cumpli. Jehova a bisa tambe cu Eva lo tabatin hopi dolor durante embaraso y parto. Si Abel a mira su mama duna luz, sin duda el a nota cu e palabranan ey tambe a cumpli. Ademas, Jehova a premira cu Eva lo sinti un necesidad desbalansa di haya amor y atencion di su casa, y cu Adam, na su turno, lo a domin’e. No tin duda cu Abel a mira e realidad tristo ey cu su mes wowo. Den cada un di e aspectonan aki, Abel por a comproba cu loke Jehova bisa ta cumpli. Pesey, Abel tabatin bon motibo pa pone fe den Dios su promesa tocante un “simia” cu un dia lo drecha tur loke a bay robes den Eden.—Gen. 3:15-19.

16, 17. Kico Abel por a siña for di e kerubinnan di Jehova?

 ¹⁶ Jehova su sirbidornan. Abel su famia no tabata un bon ehempel p’e, pero hende no tabata e unico sernan inteligente riba Tera e tempo ey. Ora Jehova a saca Adam cu Eva for di e hofi, el a percura pa nan y nan descendientenan no por a drenta mas den e Paradijs ey. Pa vigila e entrada, Jehova a pone kerubin—angel di rango halto—eynan hunto cu un spada tur na vlam di candela cu tabata draai rond continuamente.—Lesa Genesis 3:24.

¹⁷ Como mucha, Abel lo mester a para wak e kerubinnan ey cu a materialisa y tuma forma di hende. Sin duda, Abel por a mira na nan apariencia cu nan tabata sumamente poderoso. Y e “spada” na candela cu tabata semper den movecion tambe lo mester tabata hopi impresionante. Acaso Abel a yega di mira e angelnan aki fada y bandona nan puesto? No. E criaturanan inteligente y poderoso ey a keda na nan puesto dia y anochi, aña aden aña afo, decada tras di decada. Asina Abel a mira cu Jehova Dios tabatin sirbidor husto y fiel. Na e comportacion di e kerubinnan ey, Abel a mira un clase di lealtad y obediencia na Jehova cu e no a mira den su mes famia. E ehempel di e angelnan ey sin duda a fortalece su fe.

18. Ki base solido nos tin awe pa edifica nos fe?

¹⁸ Abel su fe a bira mas fuerte pasobra el a medita riba tur loke Jehova a revela tocante su mes pa medio di su creacion, su promesanan y e ehempel di su sirbidornan fiel, e kerubinnan. Nos por siña hopi for di e ehempel di Abel, no ta berdad? E ta laga specialmente hobennan mira cu nan por cultiva berdadero fe den Jehova Dios, a pesar di kico nan famia haci. Tur  e maraviyanan di creacion cu tin rond di nos, henter Bijbel y tambe e tantisimo ehempelnan di hende di fe ta forma un base solido riba cua nos por edifica nos fe.

19. Ki berdad fundamental Abel a bin compronde cu tempo?

¹⁹ Segun cu Abel su fe den Jehova a crece, su deseo pa expresa su fe pa medio di obra tambe a crece. Pero kico un simpel hende por a duna e Creador di universo? Ta bisto cu Dios no tabatin mester di regalo ni yudansa di ningun hende. Pero cu tempo Abel a bin compronde e berdad fundamental aki: Si e simplemente ofrece Jehova lo mihor cu e tin, hunto cu e motivacion corecto, su amoroso Tata celestial lo keda contento.

20, 21. Kico cada un di e yiunan di Adam a ofrece Jehova, y con El a reacciona?

²⁰ Abel a dicidi di ofrece Dios un sacrificio. El a scoge e mihor carnenan di su tou, esta, e lamchinan cu tabata prome yiu di nan mama, y a ofrece “e vet”, loke p’e a parce e mihor parti di e lamchi. Mientrastanto, Cain tambe tabata kier e bendicion y fabor di Dios y a prepara un ofrenda di su cosecha. Pero Cain no tabatin e mesun motivacion cu Abel. Esaki a sali na cla ora e dos rumannan a presenta nan ofrenda.

²¹ Kisas tur dos yiu di Adam a uza un altar y candela pa presenta nan ofrenda. Y kisas nan a haci esey den bista di e kerubinnan, ya cu e tempo ey nan tabata e unico representantenan di Dios riba Tera. Con Jehova a reacciona? Na Genesis 4:4, nos ta lesa: “SEÑOR a aprecia Abel y su ofrenda.” Bijbel no ta bisa con Jehova a laga Abel sa esey si.

22, 23. Kico a pone cu Jehova a haya Abel su ofrenda mihor?

²² Dicon Dios a keda contento cu Abel su ofrenda? Tabata pa motibo di e ofrenda riba su mes? Abel a ofrece un criatura cu tin bida y a drama su sanger precioso cu a representa su bida. Acaso Abel a realisa con valioso un sacrificio asina lo tabata? Siglonan despues, Dios a uza e sacrificio di un lamchi sin defecto pa representa e sacrificio di su Yiu perfecto, “e Lamchi di Dios”, kende su sanger inocente lo a ser drama. (Juan 1:29; Exo. 12:5-7) Pero Abel probablemente no tabata sa ni a compronde e detayenan ey.

²³ Loke si nos sa sigur ta cu Abel a ofrece lo mihor cu e tabatin. Jehova a keda contento, no cu e ofrenda so, sino cu Abel mes tambe, pasobra el a presenta e sacrificio motiva pa amor pa Jehova y a base di berdadero fe.

24. (a) Dicon nos por bisa cu Cain su ofrenda riba su mes no tabata malo? (b) Den ki sentido Cain tabata mescos cu hopi hende awe?

 ²⁴ E situacion di Cain si tabata otro. Jehova ‘no a aprecia Cain ni su ofrenda.’ (Gen. 4:5) Riba su mes, Cain su ofrenda no tabata malo, pasobra siglonan despues e Ley di Dios a permiti hende ofrece producto di tera. (Lev. 6:14, 15) E problema tabata Cain mes, pasobra Bijbel ta bisa cu “su obranan tabata malo.” (Lesa 1 Juan 3:12.) Cain lo a pensa—manera te awe hopi hende ta pensa—cu djis haci comosifuera e ta sirbi Dios mes ta suficiente. No a tarda mucho cu su echonan a revela cu e no tabatin berdadero fe ni amor pa Jehova.

25, 26. Ki spiertamento Jehova a duna Cain, pero kico Cain a haci?

²⁵ Ora Cain a mira cu e no a haya Jehova su aprobacion, e no a purba di siña for di e ehempel di Abel. Al contrario, el a haya hopi rabia riba su ruman. Jehova a mira loke tabata pasando den Cain su curason y cu pasenshi el a purba di rasona cu ne. Jehova a spierta Cain cu si e sigui asina lo e comete un pica serio. Pero tambe el a sigura Cain cu si e cambia su manera, lo e acepta Cain.—Gen. 4:6, 7.

²⁶ Lamentablemente, Cain no a haci caso di Dios su spiertamento. El a invita su ruman chikito pa bay cu ne den cunucu. Eynan, Cain a ataca Abel y mat’e. (Gen. 4:8) Den un sentido, Abel a bira e prome victima di persecucion religioso, e prome martir. El a muri, pero su relato no a caba eynan.

27. (a) Dicon nos por ta sigur cu Abel lo resucita? (b) Con nos por mira Abel un dia?

²⁷ Den un sentido figurativo, Abel su sanger a sclama na Jehova pa venganza of husticia. Y Dios a percura pa Cain haya su castigo mereci. (Gen. 4:9-12) Pero loke ta mas importante ta cu Abel ta papia cu nos awe mediante su ehempel di fe. Abel probablemente a biba un shen aña asina, masha poco compara cu e hendenan di su epoca. Pero el a uza su bida bon. El a muri sabiendo cu su Tata celestial, Jehova, tabata stim’e y a aprob’e. (Heb. 11:4) Nos por ta sigur anto cu Abel ta safe den Jehova su memoria infinito, wardando pa ser resucita den e Paradijs riba Tera. (Juan 5:28, 29) Abo lo top’e eynan? Esey ta posibel, tanten cu bo ta determina pa scucha Abel ora e ta papia y pa imita su fe extraordinario.