1. Unda nos por siña tocante futuro?

BO A yega di wak noticia na television y puntra bo mes: ‘Ta kico ta bai para di e mundo aki?’ Cosnan tragico ta sosode asina diripiente y onverwacht cu ningun hende no por predeci kico lo pasa mañan. (Santiago 4:14) Sinembargo, Yehova si sa kico lo sosode den futuro. (Isaias 46:10) Hopi tempo pasa su Palabra, Bijbel, a predeci no solamente e cosnan malo cu ta sosode den nos tempo sino tambe e cosnan maraviyoso cu lo sosode den futuro cercano.

2, 3. Ki pregunta e disipelnan a haci Hesus, y con el a contesta nan?

² Hesucristo a papia tocante e Reino di Dios cu lo pone un fin na maldad y haci e tera un paradijs. (Lucas 4:43) Hende tawata kier sa ki dia e Reino lo a bin. De echo, Hesus su disipelnan a puntr’e: “Kico lo ta e señal di bo binida y di e fin di tempo?” (Mateo 24:3) Como contesta Hesus a bisa nan cu ta Yehova Dios so sa precis ki dia e fin di e sistema aki lo a bin. (Mateo 24:36) Pero loke si Hesus a predeci ta cosnan cu lo a tuma luga riba tera un poco  prome cu e Reino lo a trece berdadero pas y siguridad pa humanidad. Loke el a predeci ta tumando luga awor!

³ Prome cu nos analisa e evidencia cu nos ta bibando den “e fin di tempo”, of fin di e sistema di cosnan aki, laga nos considera brevemente un guera cu ningun hende no por a mira. El a tuma luga den shelo, y su resultado ta afecta nos.

4, 5. (a) Kico a tuma luga den shelo un poco despues cu Hesus a haya poder como Rei? (b) Segun Revelacion 12:12, kico lo tawata e resultado di e guera den shelo?

⁴ E capitulo anterior di e buki aki a splica cu Hesucristo a bira Rei den shelo na aña 1914. (Daniel 7:13, 14) Poco despues di a ricibi poder como Rei, Hesus a tuma accion. Bijbel ta bisa: “Tawatin guera den shelo, Miguel [un otro nomber pa Hesus] y su angelnan tawata haci guera contra e dragon [Satanas e Diabel]. Y e dragon y su angelnan tawata haci guera.” * Satanas y su angelnan malbado, e demoñonan, a perde e guera ei y a wordo saca for di shelo y tira abou riba tera. Dios su fiel yiunan spiritual a alegra cu Satanas y su demoñonan no tawata den shelo mas. Di otro banda, hende riba tera lo no por a alegra manera e angelnan den shelo pasobra Bijbel a predeci: “Ai di tera . . . pasobra Diabel a baha bin serca boso cu gran furia, sabiendo cu ta ked’e solamente un poco tempo mas.”—Revelacion 12:7, 9, 12.

⁵ Tuma nota di kico lo tawata e resultado di e guera den shelo. Satanas, den su furia lo a causa ai, of problema, pa hende riba tera. Manera lo bo bai mira, nos ta bibando awor den e tempo di ai ei. Pero esei lo ta pa un periodo  relativamente cortico, solamente “un poco tempo.” Asta Satanas ta conciente di esei. Bijbel ta referi na e periodo aki como “e ultimo dianan.” (2 Timoteo 3:1) Nos por ta hopi contento cu pronto Dios lo elimina Diabel su influencia for di riba tera! Laga nos considera algun di e cosnan cu Bijbel a predeci y cu ta tumando luga aworaki. E cosnan aki ta duna prueba cu nos ta bibando den e ultimo dianan y cu e Reino di Dios pronto lo trece bendicionnan eterno pa esnan cu ta stima Yehova. Prome, laga nos analisa cuater aspecto di e señal cu Hesus a bisa lo a caracterisa e tempo den cua nos ta biba.

6, 7. Con e palabranan di Hesus tocante guera y hamber ta cumpliendo awe?

⁶ “Nacion lo lanta contra nacion, y reino contra reino.” (Mateo 24:7) Miyones di hende a ser mata den guera durante e ultimo siglo. Un historiado Britanico a skirbi: “Siglo 20 tawata esun mas sangriento den historia skirbi. . . . E tawata un siglo di guera casi continuo, cu apenas un par di periodo cortico sin cu ningun caminda tawatin conflicto arma y organisa.” Un informe di Worldwatch Institute ta declara:  ‘Tres biaha mas tanto hende a muri den guera durante siglo 20 cu den tur e gueranan for di e prome siglo AD [di nos era] te cu aña 1899.’ Mas cu 100 miyon hende a muri como resultado di guera desde 1914. Miyones di hende a sufri miseria y dolor pasobra nan a perde sernan keri den guera. Podise bo mes tambe a perde un ser keri door di guera.

⁷ “Lo tin hamber.” (Mateo 24:7) Investigadonan ta bisa cu produccion di cuminda a aumenta masha hopi durante e ultimo 30 añanan. Apesar di esei, hamber ta sigui reina pasobra hopi hende no tin suficiente placa pa cumpra cuminda ni nan no tin tereno pa planta cuminda. Den paisnan den desaroyo, mas cu mil miyon hende tin cu biba di un entrada di dos florin of menos pa dia. Mayoria di e hendenan aki ta sufri di hamber cronico. Organisacion Mundial di Salud ta calcula cu desnutricion ta e causa principal di morto di mas cu cinco miyon mucha tur aña.

8, 9. Kico ta mustra cu e profecianan di Hesus tocante temblor y pestilencia a cumpli?

⁸ “Lo tin temblornan grandi.” (Lucas 21:11) Segun e Departamento Mericano di Investigacion Geologico, nan ta spera un averahe di 19 temblor grandi pa aña. Esakinan tin suficiente  potencia pa causa daño na edificio y habri tera. Y como averahe, tur aña tawatin temblornan suficiente fuerte pa causa destruccion total di edificionan. Datonan cu tin disponibel ta mustra cu temblor a costa bida di mas cu dos miyon hende for di aña 1900 te cu awor. Un fuente a declara: “Mehoracionnan den tecnologia a baha e cantidad di morto djis un tiki asina.”

⁹ “Lo tin . . . pestilencia.” (Lucas 21:11) Apesar di avancenan medico, malesanan bieu y nobo ta sigui afligi humanidad. Un informe ta bisa cu 20 enfermedad bon conoci—entre nan tuberculosis, malaria y colera—a bira mas comun den decadanan resien, y algun tipo di enfermedad a bira mas y mas dificil pa cura cu remedi. De echo, por lo menos 30 malesa nobo a presenta. Algun di nan no tin cura y nan ta fatal.

10. Ki caracteristicanan predeci na 2 Timoteo 3:1-5 bo ta mira den hende awe?

¹⁰ Fuera di identifica cierto susesonan mundial, Bijbel a predeci cu un cambio den sosiedad humano lo a caracterisa e ultimo dianan. Apostel Pablo a describi con hende en general lo ta. Na 2 Timoteo 3:1-5, nos ta lesa: “Den e ultimo dianan temponan trabahoso  lo bin.” En parte, Pablo a bisa cu hende lo ta

• stimado di nan mes

• stimado di placa

• desobedecido na mayornan

• ingrato

• sin amor

• sin dominio propio

• grosero

• stimado di placer mas bien cu stimado di Dios

• cu tin aparencia di ta religioso berdad, ma cu ta nenga su poder

11. Con Salmo 92:7 ta describi loke lo pasa cu hende malbado?

¹¹ Hende den bo comunidad a bira asina? Indudablemente cu si. Tur caminda tin hende cu mal caracteristica. Esaki ta indica cu pronto Dios lo actua, pasobra Bijbel ta bisa: “Ora e malbado spruit manera yerba, y tur cu ta haci inikidad [of, “loke ta perhudicial”, NW] florece, ta pa nan wordo destrui pa semper.”—Salmo 92:7.

12, 13. Con ‘berdadero conocemento’ a aumenta den e “tempo di e fin” aki?

¹² E ultimo dianan en berdad ta yen di ai, precis manera Bijbel a  predeci. Sinembargo, den e mundo yen di problema aki tin desaroyonan positivo entre e adoradonan di Yehova.

¹³ “[“Berdadero”, NW] conocemento lo aumenta”, e buki biblico di Daniel a predeci. Na ki tempo esei lo a sosode? Durante “e tempo di e fin.” (Daniel 12:4) Specialmente desde 1914, Yehova a yuda e personanan cu realmente ta desea di sirbie pa crece den comprondemento di Bijbel. Nan a compronde mas y mas berdad precioso tocante Dios su nomber y su proposito, tocante e sacrificio di rescate di Hesucristo, e condicion di e mortonan y e resureccion. Ademas, adoradonan di Yehova a siña con pa hiba nan bida na un manera cu ta beneficia nan y ta trece alabansa na Dios. Tambe nan a haya un comprondemento mas cla di e papel di e Reino di Dios y con lo e rectifica asuntonan riba tera. Kico nan ta haci cu e conocemento aki? E pregunta ei ta hiba nos na un otro profecia cu ta cumpliendo den e ultimo dianan aki.

14. Con extenso e predicacion di e bon noticia di e Reino ta awe, y ken ta predic’e?

¹⁴ “E evangelio aki di e reino lo wordo predica den henter mundo”, Hesucristo a bisa den su profecia tocante “e fin di tempo.” (Mateo 24:3, 14) Rond mundo, miyones di Testigo di Yehova ta predica e evangelio of bon noticia di e Reino—kico e Reino ta, kico lo e haci y con nos por ricibi su bendicionnan. Yen di entusiasmo nan ta predica e bon noticia di e Reino den mas cu 230 pais y na mas cu 400 idioma. Nan ta bin di “tur nacion y tur tribu y pueblo y lenga.” (Revelacion 7:9) E Testigonan ta duna educacion biblico riba un base personal y gratis na miyones di hende cu kier sa kico Bijbel ta siña realmente. Esaki en berdad ta un cumplimento impresionante di profecia, specialmente door cu Hesus a predeci cu “tur hende lo odia” cristiannan berdadero!—Lucas 21:17.

15. (a) Abo ta kere cu nos ta bibando den e ultimo dianan, y dicon? (b) Kico “e fin” lo nifica pa personanan cu ta bai contra di Yehova y pa esnan cu ta somete nan mes na e gobernacion di e Reino di Dios?

¹⁵ Siendo cu asina tanto profecia di Bijbel ta cumpliendo awe, bo no ta di acuerdo cu nos ta bibando den e ultimo dianan? Despues cu e bon noticia ser predica te na e grado cu Yehova ta haya ta bon, “e fin” lo bin sigur. (Mateo 24:14) “E fin” ta nifica e tempo ora cu Dios lo caba cu maldad for di riba tera. Yehova lo uza Hesus y angelnan poderoso pa destrui tur persona cu deliberadamente ta opone of bai contra Yehova. (2 Tesalonicensenan 1:6-9) Satanas y su demoñonan lo no gaña e nacionnan mas. Despues di esei, e Reino di Dios lo drama hopi bendicion riba tur cu ta somete nan mes na su gobernacion husto.—Revelacion 20:1-3; 21:3-5.

16. Kico lo ta sabi pa bo haci?

¹⁶ Siendo cu fin di e sistema di Satanas ta serca, nos tin cu puntra nos mes: ‘Kico lo mi mester ta haciendo?’ Ta sabi pa sigui siña mas tocante Yehova y loke e ta rekeri di nos. (Huan 17:3) Studia Bijbel diligentemente. Hacie bo custumber pa asocia regularmente cu otro hende cu ta trata na haci Yehova su boluntad. (Hebreonan 10:24, 25) Absorba e conocemento abundante cu Yehova Dios a pone disponibel pa hende rond mundo, y haci e cambionan necesario den bo bida di manera cu bo por gosa di Dios su aprobacion.—Santiago 4:8.

17. Dicon destruccion di e malbadonan lo coi mayoria hende di sorpresa?

¹⁷ Hesus a predeci cu mayoria hende lo a ignora e evidencia cu nos ta bibando den e ultimo dianan. Destruccion di e malbadonan lo bin diripiente y onverwacht. Lo e coi mayoria hende di sorpresa mescos cu ora un ladron bin den anochi. (1 Tesalonicensenan 5:2) Hesus a spierta: “E binida di e Yiu di hende lo ta mescos cu e dianan  di Noe. Pasobra mescos cu den e dianan ei cu tawata prome cu e diluvio, nan tawata come y bebe, nan tawata casa y duna pa casa, te dia cu Noe a bai den e arca, y nan no a compronde [“no a haci caso”, NW] te ora cu e diluvio a bin y a bai cu nan tur, asina e binida di e Yiu di hende lo ta.”—Mateo 24:37-39.

18. Ki spiertamento di Hesus nos tin cu tuma na pecho?

¹⁸ Pesei Hesus a bisa su oyentenan: “Tene cuidou pa boso curason no ta carga pa causa di paranda y buracheria y e precupacionnan di bida, y e dia ei no bin diripiente riba boso manera un trampa; pasobra e lo bin riba tur esnan cu ta biba riba superficie di henter mundo. Ma sea alerta tur ora bai, haciendo oracion pa boso por tin forsa pa scapa di tur e cosnan aki cu ta bai tuma luga, y pa para [cu aprobacion] dilanti di e Yiu di hende.” (Lucas 21:34-36) Ta sabi pa nos tuma e palabranan di Hesus na pecho. Dicon? Pasobra ta e personanan cu tin e aprobacion di Yehova Dios y di “e Yiu di hende”, Hesucristo, tin e speransa di sobrevivi e fin di Satanas su sistema di cosnan y biba pa semper den e maraviyoso mundo nobo cu ta asina serca.—Huan 3:16; 2 Pedro 3:13.