Dios kier pa hende disfruta di bida riba tera. El a crea tera y tur loke tin riba dje pasobra e ta stima humanidad. Pronto lo e trece un mihor futuro pa hende di tur nacion. Lo e libra hende di tur loke ta causa sufrimento.—Lesa Jeremias 29:11.

No tin ningun gobierno cu a logra elimina violencia, maleza y morto. Pero Dios tin bon noticia pa nos. Pronto e lo reemplasa tur gobierno humano cu su gobernacion. E hendenan cu lo biba bou di e gobernacion aki lo disfruta di paz y bon salud.—Lesa Isaias 25:8; 33:24; Daniel 2:44.

Pa nos por haya alivio for di sufrimento, Dios tin cu caba cu mal hende. (Sofonias 2:3) Na ki tempo lo e haci esey? Su Palabra a papia di e cosnan cu ta terorisando humanidad aworaki. E sucesonan aki ta indica cu e tempo pa Dios actua ta cerca.—Lesa 2 Timoteo 3:1-5.

Nos tin cu siña tocante Dios for di su Palabra. Bijbel ta manera un carta cu un tata amoroso ta laga pa su yiunan. E ta siña nos con nos por hiba un mihor bida aworaki y con nos por disfruta di bida eterno riba tera den futuro. Kisas algun hende no ta gusta cu bo ta haya yudansa pa compronde Bijbel. Pero e oportunidad di haya un mihor futuro ta mucho bon pa bo perd’e.—Lesa Proverbionan 29:25; Revelacion 14:6, 7.