NO TIN nada mas indefenso cu un baby recien naci. Tempo nos tabata baby, nos tabata depende completamente di nos mayornan. Ora nos a siña cana, nos tabata topa hende grandi cu, na moda di papia, tabata parce gigante. Nos tabatin miedo di nan si nos mayornan no tabata cerca di nos. Pero, nos tabata sinti nos safe ora nos a coy man di nos mama of tata tene.

Tempo nos tabata mucha, nos bienestar tabata depende di e amor y apoyo di nos mayornan. Ora nos a realisa cu nan ta stima nos, nos a sinti nos safe. Y ora nan tabata sigura nos cu nos tabata haci bon, nos tabata sinti nos mes mas sigur y tabata bay bon den bida.

Segun cu nos tabata crece, nos bon amigonan tambe tabata laga nos sinti nos mes mas sigur. Nos tabata sinti nos comodo ora nos tabata hunto cu nan, y pesey nos no tabatin tanto miedo di bay scol.

Ta claro cu esey ta e infancia cu tur hende lo kier tabatin. Lamentablemente, ta dificil pa algun hoben haya bon amigo, y tin hopi mucha cu no ta haya suficiente atencion di nan mayornan. Melissa * a bisa: “Cada biaha cu mi mira potret di famianan cu ta echt uni y cu ta haci cos hunto, mi ta pensa den mi mes: Mare mi tambe tabatin un famia asina tempo mi tabata mucha.”

Kisas bo no tabatin mucho confianza den bo mes tempo cu bo tabata crece; podise ta pasobra bo no tabata haya suficiente amor y apoyo di bo mayornan. Of talbes bo ta corda con bo mayornan tabata pleita cu otro constantemente lo cual finalmente a hiba na nan divorcio. Kisas bo ta hasta culpa bo mes pa esey. Of pio ainda, podise bo a sufri maltrato verbal of fisico na man di un di bo mayornan.

Ki efecto esey por tin riba un mucha cu ta sinti su mes insigur? Wel, algun di nan ta cuminsa uza droga of bebe di mas ora nan bira teenager. Otronan ta drenta den gang djis pa nan sinti cu nan ta pertenece na un grupo. Hobennan cu ta sinti nan insigur ta core drenta den un relacion romantico en busca di amor y cariño. Pero mayoria di biaha e relacionnan aki no ta dura mucho tempo, y ora nan kibra, e hobennan aki ta sinti nan mas insigur ainda.

Hasta teenagernan insigur cu a logra di keda leu for di e tipo di cosnan ey por crece cu e sintimento  cu e no ta bal nada. Ana a bisa: “Mi tabata convenci cu mi no tabata sirbi pa nada, pasobra mi mama tabata bisa mi esey cada bes. Cu ami ta corda, nunca el a elogia mi of bisa mi cu e ta stima mi.”

No ta e manera cu nos a lanta so por causa insiguridad. Un divorcio traumatico, edad avansa of hasta preocupacion tocante nos apariencia por laga nos sinti nos insigur. Sea cual sea e causa, e por kita nos felicidad y daña nos relacion cu otro hende. Kico nos por haci pa vence e sintimentonan ey?

Nos por ta sigur cu nos no ta nos so. Nos tur tin un persona cu no solamente por yuda nos, sino tambe kier yuda nos, esta, Dios mes.

Mediante profeta Isaias, Dios a bisa: “No tene miedo, pasobra mi ta cu bo; no desmaya, pasobra mi ta bo Dios. Lo mi fortalece bo, si, lo mi yuda bo, si, lo mi sostene bo cu mi man drechi di husticia.” (Isaias 41:10, 13) Ta un consuelo pa sa cu den un sentido figurativo Dios kier tene nos man. Pues, nos no tin motibo pa sinti nos mes ansha.

Bijbel ta papia di algun sirbidor di Dios cu tabatin hopi preocupacion pero cu a siña confia den Dios. Por ehempel, Ana, e mama di Samuel, a sinti cu e tabata un fracaso ya cu e no por a haya yiu, y pa e motibo ey e mester a soporta bofon di otro hende. Como resultado, Ana a perde su apetit y tabata yora hopi. (1 Samuel 1:6, 8) Pero despues cu el a desahoga su mes cerca Dios, e no tabata angustia mas.—1 Samuel 1:18.

E salmista David tambe a sintie insigur na diferente ocasion. Pa hopi aña, Rey Saul tabata busc’e pa mata. Aunke David a scapa diferente biaha, algun biaha el a sinti comosifuera e tabata hoga den tur su problemanan. (Salmo 55:3-5; 69:1) A pesar di esey, el a skirbi: “Na paz lo mi bay drumi y pega soño, pasobra ta abo so, o SEÑOR, ta haci mi biba den siguridad.”—Salmo 4:8.

Tanto Ana como David a tira nan problemanan emocional riba Jehova, y nan a sinti cu Jehova a yuda nan. (Salmo 55:22) Con nos por haci mescos awe?

1. Mira Jehova como bo Tata y siña confi’e.

Hesus a urgi nos pa siña conoce su Tata, “e unico Dios berdadero.” (Juan 17:3) Apostel Pablo a sigura nos cu “e no ta masha leu for di cada un di nos.” (Echonan 17:27) Pesey, Santiago a bisa: “Hala cerca Dios, y lo e hala cerca boso.”—Santiago 4:8.

E echo cu nos sa cu nos tin un Tata den cielo cu ta stima nos y cu ta cuida nos ta un paso importante pa vence sintimento di insiguridad. Ta berdad cu por tuma tempo pa nos haya e confianza ey, pero hopi hende a mira cu ta net esey ta yuda nan. Caroline a bisa: “Ora mi a siña conoce Jehova como mi Tata, porfin mi tabatin un persona cu mi por a conta tur mi sintimentonan di mas profundo. Esey a duna mi un gran alivio.”

Rachel ta corda: “Ta Jehova tabata esun cu a yuda mi sinti mi sigur ora m’a keda mi so sin mi mayornan. Mi por a papia cu ne y pidie yuda mi cu mi problemanan. Y el a yuda mi.” *

2. Busca un famia spiritual.

Hesus a siña su discipelnan pa mira otro como ruman. El a bisa: “Boso tur ta ruman.” (Mateo 23:8) E tabata kier pa su berdadero discipelnan stima otro y bira un famia spiritual grandi.—Mateo 12:48-50; Juan 13:35.

E congregacionnan di testigonan di Jehova ta haci tur nan esfuerso pa duna apoyo, cariño y consuelo na ken cu mester di esey, manera un berdadero famia lo haci. (Hebreonan 10:24, 25) Hopi hende ta haya cu e reunionnan di congregacion por sirbi como un enguente cu por cura nan heridanan emocional.

Eva ta corda: “Mi tabatin un bon amiga den mi congregacion cu tabata compronde e dolor cu mi tabata sinti. E tabata scucha mi, lesa Bijbel pa mi y haci oracion cu mi. El a haci sigur cu mi no tabata mi so, y el a yuda mi desahoga mi mes. Danki na su yudansa, mi a cuminsa sinti mi mes mas sigur.” Anto Rachel a agrega: “Mi a haya mama y tata den e congregacion. E rumannan a echt laga mi sinti cu nan ta stima mi y cu mi por a confia nan.”

 3. Mustra amor y bondad na otro hende.

Amor y bondad ta yuda un persona haya amistad duradero. Hesus a bisa: “Tin mas felicidad den duna cu den ricibi.” (Echonan 20:35) Y nos lo ripara cu mas nos mustra amor na otro hende, mas amor nos lo haya bek. Hesus a bisa su discipelnan: “Custumbra duna, y hende lo duna boso.”—Lucas 6:38.

Ora nos duna y ricibi amor, nos lo sinti nos mes hopi mas sigur. Ta manera Bijbel ta bisa: “Amor no ta caba nunca.” (1 Corintionan 13:8) Maria a bisa: “Mi sa cu algun di e pensamentonan negativo cu mi tin di mi mes no tin base. Ora mi yuda otro hende y lubida riba mi mes, e pensamentonan ey no ta pasa mes den mi mente. Semper mi ta sinti mi satisfecho ora mi yuda otronan.”

E pasonan cu nos a menciona anteriormente no ta un formula magico cu lo duna nos alivio mesora, pero nan por haci un gran diferencia si. Caroline a admiti: “Ainda mi sa sinti mi mes insigur. Pero awor mi tin mas balor propio. Mi sa cu Dios ta interesa den mi, y mi tin hopi bon amigo cu tambe ta laga mi sinti mi sigur.” Rachel ta pensa mescos. E ta bisa: “Hopi biaha mi ta sinti mi hopi tristo. Pero mi tin mi rumannan spiritual cu mi por pidi conseho. Nan ta yuda mi keda cu un actitud positivo. Y mas importante ainda, mi tin un Tata den cielo cu mi por papia cu ne tur dia. Y esey ta tur loke mi tin mester.”

Pero pronto lo tin un solucion permanente. Bijbel ta describi un mundo nobo, caminda nos tur lo sinti nos sigur. E Palabra di Dios ta priminti nos: “Cada un di nan lo sinta bou di su palo di wendruif y bou di su palo di figo, y ningun hende lo no spanta nan.” (Mikeas 4:4) Na e tempo ey, niun hende lo no laga nos sinti nos mes insigur ni haci nos daño. Hasta nos lo lubida cualkier cos di pasado cu a traumatisa nos. (Isaias 65:17, 25) Dios y su Yiu, Cristo Hesus, lo trece berdadero husticia. Como resultado, pa semper lo tin paz y siguridad.—Isaias 32:17.