ESTA UN BUNITA SPERANSA! Nos Creador a priminti cu e ta duna nos bida eterno, aki riba Tera mes. Pero hopi hende ta haya esey algo duro pa kere. Nan ta bisa: “Mester muri. Bo ta nace, biba y muri.” Y otronan ta kere cu ta posibel pa biba pa semper, pero no aki riba Tera. Nan ta bisa cu hende por haya bida eterno solamente despues cu nan muri y bay cielo. Kico abo ta pensa?

Prome cu bo contesta e pregunta ey, ban wak con Bijbel ta contesta e tres preguntanan aki: Si bo wak e manera cu hende a ser crea, cuanto tempo eigenlijk nos lo mester biba? Kico tabata Dios su proposito original pa e Tera y humanidad? Dicon hende ta muri?

Di tur loke Dios a crea riba Tera cu tin bida, sin duda, hende ta unico. Den ki sentido? Bijbel ta bisa cu ta hende so Dios a crea den su “imagen” y “semehansa.” (Genesis 1:26, 27) Kico esey ta nifica? Wel, cu hende a haya caracteristica- y cualidadnan cu Dios tin, manera entre otro amor y husticia.

Ademas, hende a haya e capacidad di pensa, rasona, distingui entre loke ta bon y loke ta malo, y cu e deseo di conoce Dios y di ta su amigo. Pa e motibo ey nos por disfruta di e universo inmenso y di e maraviyanan di naturaleza, y tambe di arte, musica y poesia. Y mas importante ainda, hende tin e capacidad unico di forma un amistad cu nan Creador. E cualidadnan ey ta haci hende hopi diferente for di tur otro criatura riba Tera.

Awor pensa un rato riba lo siguiente: Si Dios tabata kier pa hende biba djis un poco tempo so, pakico el a crea nos cu cualidadnan asina bunita y e capacidad sin limite di desaroya y mehora esakinan? Wel, eigenlijk Dios a duna nos e cualidad- y habilidadnan unico aki pa nos por disfruta di bida aki riba Tera pa semper.

Pero toch tin hende ta bisa cu nunca tabata Dios su intencion pa hende biba pa semper riba Tera. Nan ta bisa cu Dios a traha Tera pa hende biba temporalmente riba dje. Tambe nan ta bisa cu ta test Dios ta test hende aki riba Tera pa wak si nan ta merece di bay cielo pa biba pa semper cu Dios. Pero si ta asina, acaso no ta e lo ta responsabel pa tur e maldad cu tin riba Tera? Pero esey no ta cuadra ningun tiki cu e manera cu Dios ta,  pasobra Bijbel ta bisa di dje: “Tur su camindanan ta husto; un Dios di fieldad y sin inhusticia, husto y recto e ta.”—Deuteronomio 32:4.

Bijbel ta bisa na un manera hopi cla kico ta Dios su proposito original pa Tera: “E cielonan ta e cielonan di SEÑOR, ma Tera el a duna na e yiunan di hende.” (Salmo 115:16) Si, Dios a crea Tera como un hogar bunita y permanente pa hende biba riba dje cu tur loke nan tin mester pa disfruta pa semper di un bida cu ta bale la pena.—Genesis 2:8, 9.

“E cielonan ta e cielonan di SEÑOR, ma Tera el a duna na e yiunan di hende.”​—Salmo 115:16

Ademas, Bijbel ta bisa claramente kico ta Dios su proposito pa humanidad. El a manda e prome pareha pa “yena e Tera” y haci “tur ser bibo cu ta move riba Tera” somete na nan. (Genesis 1:28) El a duna nan e Tera pa nan cuid’e y hacie un paradijs. Esta un bunita privilegio nan a haya! Ta aki riba Tera Adam cu Eva y nan descendientenan lo a biba pa semper, y no den cielo.

Pero ta dicon nos ta muri anto? Bijbel ta conta cu un di Dios su criaturanan spiritual, kende despues a rebeldia y bira Satanas e Diabel, a purba di sabotia Dios su proposito den Eden. Con el a haci esey?

Satanas a influencia nos prome mayornan, Adam cu Eva, pa rebeldia hunto cu ne contra Dios. Satanas a bisa cu Dios tabata priva nan di algo bon: e derecho di determina pa nan mes kico ta bon y kico ta malo. Y nan a scoge e banda di Satanas y a rebeldia contra Dios. Kico tabata e consecuencia? Wel, manera Dios a spierta nan, cu tempo nan a muri y a perde nan speransa di biba pa semper den Paradijs riba Tera.—Genesis 2:17; 3:1-6; 5:5.

E echo cu Adam cu Eva a rebeldia contra Dios ta afecta nos tur te awe. E Palabra di Dios ta bisa: “Pa medio di un hende [Adam] pica a drenta mundo, y morto pa medio di pica, y asina morto a pasa pa tur hende.” (Romanonan 5:12) Nos ta muri pasobra nos a hereda pica y morto di nos prome mayornan, y no pa motibo di un “plan” di Dios cu ta imposibel pa nos compronde.

E rebelion den Eden no a stroba Dios di cumpli cu su proposito original pa humanidad y Tera. Dios su amor perfecto y su sentido di husticia a conmov’e pa haci tur loke ta necesario pa libera nos for di sclavitud na pica y morto. Apostel Pablo a splica: “E salario cu pica ta paga ta morto, ma e regalo cu Dios ta duna ta bida eterno pa medio di Cristo Hesus, nos Señor.” (Romanonan 6:23) Amorosamente, Dios “a duna su Yiu unigenito [Hesucristo], pa tur cu pone fe den dje no bay perdi, ma haya bida eterno.” (Juan 3:16) Door cu Hesus a ofrece su mes boluntariamente como un sacrificio di rescate, el a cumpra bek tur loke Adam a perde. a

Pronto, Dios su promesa pa comberti Tera den un paradijs lo bira realidad. Abo tambe por disfruta di e futuro maraviyoso ey si bo tuma loke Hesus a bisa na pecho: “Drenta di e porta smal, pasobra e caminda cu ta hiba na destruccion ta hancho y espacioso, y hopi ta esnan cu ta pasa riba dje; mientras cu e porta cu ta hiba na bida ta smal y e caminda ta preta, y poco ta esnan cu ta hay’e.” (Mateo 7:13, 14) Si, bo futuro ta den bo man. Kico abo lo haci?