Si Dios no ta culpabel, ta dicon tin asina tanto hende ta muri di hamber y biba den miseria? Y dicon tin asina tanto guera, maleza y desaster natural? Bijbel ta splica cu tin tres motibo principal pakico hende ta sufri:

1. Egoismo, Golosidad y Odio. “Hende a eherce autoridad riba un otro hende pa su daño.” (Eclesiastes 8:9) Hopi biaha, hende ta bira victima debi na e crueldad y egoismo di otro hende imperfecto.

2. Tempo y Suceso Imprevisto. Hende hopi biaha ta sufri “pasobra tempo y suceso imprevisto” ta afecta tur hende. (Eclesiastes 9:11, NW) Esey kiermen cu algo por bay robes simplemente pasobra un hende ta na e luga robes na e momento robes, un accidente por sosode of un hende ta haci un fout of ta haci algo sin pensa.

3. E Gobernante Malbado di e Mundo Aki. Bijbel ta bisa bon cla ta kico ta e motibo principal cu hende ta sufri: “Henter mundo ta den poder di e Malbado.” (1 Juan 5:19) E “Malbado” ey ta Satanas e Diabel, un poderoso criatura spiritual cu na principio tabata un angel di Dios pero cu “no a keda firme den e berdad.” (Juan 8:44) Otro angelnan a join Satanas y a rebeldia contra Dios pa satisface nan deseonan egoista, y asina nan a bira demoño. (Genesis 6:1-5) Desde cu nan a rebeldia contra Dios, Satanas y su demoñonan tabatin un influencia poderoso y cruel riba e mundo aki, pero den nos tempo nan influencia ta mas bisto cu nunca. Awor, Diabel ta yen di rabia y “ta gaña henter e Tera habita.” Pesey Bijbel ta bisa: “Ay di Tera.” (Revelacion 12:9, 12) Si, Satanas ta un dictador cruel y sadista cu ta gusta mira hende sufri. Pues, no ta Dios ta pone hende sufri; ta Satanas ta pone hende sufri.

ALGO PA PENSA RIBA: Ta un persona malbado y sin gevoel so lo pone hende inocente sufri. En cambio, Bijbel ta bisa: “Dios ta amor.” (1 Juan 4:8) Pesey ta imposibel cu Dios ta comete maldad of actua na un manera inhusto.—Job 34:10.

Pero kisas cu rason bo ta puntra awor: Pa cuanto tempo mas Dios Todopoderoso lo permiti Satanas goberna? Manera nos a mira caba, Dios ta odia maldad y nos sufrimento ta caus’e hopi dolor. Ademas, Bijbel ta anima nos pa “tira tur [nos] inkietud riba dje, pasobra e ta interesa den [nos].” (1 Pedro 5:7) Dios ta stima nos y e tin poder pa kita tur sufrimento y inhusticia, manera e siguiente articulo lo splica. *