Bo por imagina bida riba Tera sin solo? Solo ta percura energia pa mata, y mata, na su turno, ta produci blachi, flor, fruta, noot y simia. Ademas, solo ta pone mata absorba awa for di tera pa medio di su raiznan y ta manda e awa ey na e blachinan. Despues, e awa ta evapora y bay den aire.

Awasero ta un regalo precioso di Dios. Awasero ta yuda tera produci cuminda pa nos por come. Dios ta duna nos awasero for di cielo y tempo di bon cosecha, y asina ta laga nos haya cuminda na abundancia y ta yena nos curason cu alegria.

Hopi tata di famia ta preocupa pa haya suficiente cuminda y paña pa nan famianan. Tuma nota di loke e Scritura ta bisa: “Observa e parhanan di cielo bon; nan no ta sembra ni cosecha ni warda cuminda den mangashina. Toch boso Tata celestial ta alimenta nan. Boso no ta bal mas cu nan?”—Mateo 6:25, 26.

“Siña un les for di e manera cu e flornan di mondi ta crece; ... ma mi ta bisa boso cu ni Rey Salomon den tur su gloria no a bisti manera un di e flornan aki. Awor bon, si ta asina Dios ta bisti yerba di mondi, ... cuanto mas lo e no bisti boso?”—Mateo 6:28-30.

Si Dios por percura cuminda y paña pa nos, siguramente e lo por yuda nos cu tur otro cos cu nos tin mester di dje. Si nos haci Dios su boluntad, e por bendiciona e esfuerso cu nos ta haci pa planta pa asina nos por haya cuminda of e por yuda nos haya un trabou di manera cu nos por cumpra loke nos tin mester.—Mateo 6:32, 33.

Ora nos pensa riba tur loke Dios ta percura pa nos, manera solo, awasero, parha y flor, sin duda, nos ta sinti cu nos tin bon motibo pa stima Dios. E siguiente articulo lo splica con nos Creador ta comunica cu hende.