E Hudiunan di antiguedad tabatin miedo di un tipo di lepra cu tabata comun den tempo biblico. E maleza teribel ey por a ataca un hende su sistema di nervio, pon’e bira lam y desfigura su curpa. No tabatin un cura pa lepra. Mas bien, hende cu lepra mester a keda den cuarentena, y nan tabata obliga di adverti hende cu nan tabatin e maleza.—Levitico 13:45, 46.

E lidernan religioso hudiu a inventa yen di regla encuanto lepra cu no tabata den e Scritura, y esey a haci bida innecesariamente duro pa e victimanan. Por ehempel, reglanan rabinico a stipula cu hende mester a keda dos meter leu for di un leproso. Pero si biento tabata supla, niun hende no por a yega mas cerca cu 45 meter di un leproso. Segun e Scritura, un leproso mester a biba “pafo di e campamento.” Pero algun hende cu tabata sigui e Talmud a bisa cu e palabranan ey kiermen cu e leprosonan mester a biba pafo di e murayanan rond di un stad. Ademas, tabatin un rabi cu ora e mira un leproso den un stad, e tabata tira piedra riba dje y bis’e: “Bay bo luga bek pa bo no pega otro hende.”

Hesus tabata hopi diferente. En bes di core cu e leprosonan, e tabata dispuesto pa mishi cu nan, y hasta cura nan.—Mateo 8:3.

Den prome siglo, divorcio tabata topico di discusion entre e lidernan religioso. Pesey, na un ocasion, algun fariseo a pone Hesus na prueba cu e pregunta: “Un homber tin mag di divorcia di su esposa pa cualkier motibo?”—Mateo 19:3.

E Ley di Moises a permiti un homber divorcia di su casa si el a “haya algo indecente den dje.” (Deuteronomio 24:1) Den tempo di Hesus, tabatin e siñansa rabinico di Shammai y esun di Hillel; e siñansanan aki tabata interpreta e ley ey na un manera hopi distinto. Segun e siñansa di Shammai, cu tabata esun mas streng, e unico motibo valido pa divorcio tabata “inmoralidad”, esta, adulterio. Di otro banda, e siñansa di Hillel a bisa cu un homber por a divorcia di su esposa pa cualkier problema matrimonial, sin importa con chikito e problema ey tabata. Ademas, e ta bisa cu un homber por a divorcia di su casa si e esposa a djis daña su cuminda of si e homber a haya un otro muher cu segun e tabata mas bunita.

Con Hesus a contesta e pregunta di e fariseonan? El a bisa nan claramente: “Ken cu divorcia di su esposa y casa cu un otro muher—si no ta pa motibo cu e esposa a comete fornicacion—ta comete adulterio.”—Mateo 19:6, 9.